I Ani Ubwenye Bisakibwa Mwanda Wa Kusapula?
1 Pamwanda utala mingilo, le kodi mwiivwane pamo na mwēivwanine Mosesa? Wānene’mba: “A! Mfumwami! amiwa nkidipo ne kampeja-bukidi ka kwisambila, nansha kala nansha po washilula kwisamba ne umpika obe pano, mhm.” (Div. 4:10) Shi nobe udi na ino milangwe, yuka’mba kino kikokeja kwimika mwingilo obe wa busapudi. Inoko, Yesu ‘wētusoñenye kusapula musapu’ ku bantu ne kwibalombola bukamoni bonsololo. (Bilongwa 10:42) I muswelo’ka otukokeja kwikala basapudi ba myanda miyampe babwanye bisakibwa?
2 Ke buyukipo bwa masomo a ku ngitu bwitubwaninya bisakibwa bitala pa mwingilo. Polo wānene’mba ‘ke bavulepo betyilwe badi na ñeni ya ngitu, ehe,’ ne kadi amba “ñeni ya panopantanda i bulembakane kwa Leza.” (1 Kod. 1:26; 3:19) Yesu wātongele batumibwa bandi mu bantu ba mingilo; kubwipi kwa baná umbukata mwabo bādi biluwe bya lui. Bakulumpe ba bipwilo bamitatulo bādi bebatala na kafutululo pamo bwa bantu “bakubulwa kufundijibwa, bampikwa ñeni.” Mwendele buno butyibi bwa ntanda, batumibwa kebādipo babwenye bisakibwa mwanda wa kusapula. Inoko, kishinte kikatampe kyakutendelwa kyānene Petelo mu difuku dya Pentekosa kyākunkile bantu 3 000 ku mutyima, bābatyijibwa!—Bilongwa 2:14, 37-41; 4:13.
3 Yehova Witubwaninyanga Bisakibwa Byetu Mwanda wa Kusapula: Polo wānene’mba: “Kubwanya kwetu i kwa kudi Leza.” (2 Kod. 3:5) Yehova, Nsulo ya ñeni, i mufundije midiyo ya bantu mwanda wa basapwile bakwabo bubinebine butala pa Bulopwe. (Is. 54:13) Uno mwingilo i mufwaninwe ne ulupulanga bipa bivule bininge: bapya 338 491 baikele kubatyijibwa mu mwaka wapityile (1995) i bukamoni bwikilombola patōka kadi ‘i mikanda myūmi ya kwiyukanya nayo.’ (2 Kod. 3:1-3) Bino byonso bitukankamika tusapule na bupyasakane ne na kikulupiji, byobya byonso bitufundije Yehova.
4 Bulongolodi bwa Leza i butūle’ko mpangiko ya kufundija bengidi kujokoloka ntanda yonso. Tufundijibwanga ne kupebwa bulombodi kupityila ku Bisonekwa ne ku mikanda mivule kadi mishileshile ishintulula Bible mwanda wa twikale ‘babwanye bisakibwa, kadi bakumbanye byonso senene’ mwanda wa kusapula. (2 Tem. 3:16, 17) Bavule batulumukanga bininge pa kumona buyuki bwa mushike budi mu mikanda ilupulwanga na Sosiete. Kimfwa, tala byotukokeja kutanga mu julunale wa mu Suède: “Lwitabijo lusapula ba Tumoni twa Yehova lulombolanga ñeni mikatampe itala pa Bible kadi luletanga bukamoni bwa patōkelela bwa bufundiji bwa ntanda yonso.”
5 Tukokeja kukulupila na kusumininwa konso amba Yehova witumwene bu babwanye bisakibwa byonso mwanda wa kusapula, ke-pantu tutambulanga bufundiji ku kupwila kwetu kutano kwa ku yenga ne yenga, ku mpangiko ya butangi ne bwifundi bwetu bwa Bible, ku madingi otutambulanga ku Masomo a Mwingilo wa Kiteokratike, ku bukwashi bwa pa kasuku bwitupanga bengidi bakwabo babwino, ne kutentekela pa byonso, ku bukwashi bwa mushipiditu sandu wa Yehova. ‘Eyo, tunenanga ku meso a Leza, pamo na Kristu, bu mikendi ya Leza.’—2 Kod. 2:17.
6 Shi tumwenanga kamweno kabinebine mu bufundiji bwa kiteokratike bwitupa Leza kupityila ku bulongolodi bwandi, kekudipo kintu nansha kimo kiketwimika nansha kwitulengeja moyo, mhm. Tusapwilei bakwabo na nsangaji, aku tukulupile amba Yehova uketwesela pangala pa bukomo botulonga.— 1 Kod. 3:6.