Kushikilwa Kobe I Kuyukane!
1 Kitatyi kivule, twikalanga padi tushikilwa ku kupwila kumo nansha kuvule kwa pa kipwilo, amba: “Kepadipo kikatampe kyalamuka; kadi i kutupu ne muntu mwine usa kuyuka’mba nashikilwa’ko.” Bine ke amopo! Tudi pamo bwa bipindi bibundile umbidi umo, batwe bonso tudi na mwingilo wa mvubu pa kusaka kipwilo kikale kyūmi. (1 Kod. 12:12) Kushikilwa kwetu ku kupwila kumo kwa mu yenga kukokeja kōna kamweno ka kumushipiditu ka boba batanwa’ko. Shi kutenwe’kopo, yuka’mba: kushikilwa kobe i kuyukane!
2 Mwingilo wa Mvubu Wingila Umo ne Umo: Polo wādi na kipyupyu kya kupwila pamo na banababo. Uleta buluji bwine mu Loma 1:11, 12 amba: “Nemupe kyakwimupa kya ku mushipiditu amba, . . . i kwikankamika kwa bātwe bonso mu lwitabijo lwetu, lwenu mudi lwami, lwami mudi lwenu.” Netu mo monka, na malondololo etu, na bipindi byotupityijanga ne na kutanwa kotutanwanga’ko, twiūbakanga batwe bonso ne kwikankamika mwa kwikadila bakikōkeji.—1 Tes. 5:11.
3 Mwene wikalanga na kipyupyu kya kusaka kwitana na balunda nobe bene Kidishitu ku kupwila kwa pa kipwilo? Utejanga na katentekeji malondololo abo ne kutendela muswelo obalombola lwitabijo lwabo. Byabuntu byabo bya kumushipiditu bikūbakanga. Langa’po bidi, shi bamo bekale kushikilwa, mukeivwana pamo bwa banwe bapatuke. Banabenu, batutu ne bakaka beivwananga muswelo umo onka poshikilwanga.
4 Mwingilo wa Mvubu Utanwa mu Kupwila: Kiteba kya Mulami kyaimanine bininge pa mvubu ya kupwila, amba: “Mu ino ntanda ya dyalelo, iyudile busekese ne misalwe na malwi meshileshile, kipwilo kya bwine Kidishitu i mpakala yabinebine ya kumushipiditu . . . kifuko kya ndoe ne buswe. Shi kepano, tanwai kitatyi ne kitatyi ku kupwila konso kwa pa kipwilo.” (w93-F 15/8 11) Difuku ne difuku, tufikilwanga na bimyanda bitūla būmi bwetu bwa kumushipiditu pa matompo makomo. Shi ketudyumukilepo, tukalēmenenwa na bya kuzumbijazumbija mutyima, ku mfulo twashilula ne kuzobolola bintu bya kumushipiditu, bidi na mvubu kutabuka. Batwe bonso tudi na mvubu na umo ne mukwabo mwanda wa kutambula kukankamikwa kufwaninwe ne kushala bekutyile umbumo kadi bapyasakane mu mwingilo wa Leza.—Bah. 10:24, 25.
5 I kya mvubu kotudi kutanwa ku kupwila. Eyo, misongo nansha myanda itufikila mu kitulumukila ikokeja kwitukoleja kwenda ku kupwila, ino mu byaba bikwabo byonso, twikalei nyeke basumininwe kutanwa umbukata mwa bibumbo bibungile, bitumbija Yehova!—Mit. 26:12.
[Binenwa bya Kifwatulo pa paje 1]
Bakokeja Kwitumona Amba Twi Beshile
1 Mwaka wadi’mo’u, kwadi bantu bapya 300 000 ne musubu belungile kotudi, babatyijibwe. Le i kika kyamwene bano bantu mu Batumoni ba Yehova kyebatonwene basake kwilunga ku bulongolodi bwa Leza? Mwanda waka twi beshile na mitōtelo mikwabo yonso? Ivwana malondololo amoamo:
—Tulamete ku Bible, ke ku milangwepo ya batwe bene: Tutōtanga Yehova Leza ‘na mushipiditu ne na bubinebine’ pamo na mwēkinenene Yesu Kidishitu. Kino kishintulula kupela bubela bubepa mitōtelo, kulonda enka binena Kinenwa kisonekwe kya Leza.—Yoano 4:23, 24; 2 Tem. 3:15-17.
—Twendanga kudi bantu, ketwibelaijangapo bāye kotudi: Twi betabije mwingilo witupele Kidishitu wa kusapula ne kufundija, kadi twiulanga kifwa kyandi kya kukimba bantu ba mityima miyampe. Twibakimbanga ku mobo abo, mu bipito, ne konso kotukokeja kwibatana.—Mat. 9:35; 10:11; 28:19, 20; Bil. 10:42.
—Tupānanga bufundiji bwa Bible ku muntu ye-yense ku bitupu: Tujimijanga na mutyima tō bintu ne bukomo bwetu, tupityija nsaa mudiyala ne bya pangala mu mwingilo wa Leza ku mwaka ne mwaka. Twifunda Bible na bantu ba miswelo yonso pakubulwa kusañuna amba yeu ye yeu.—Mat. 10:8; Bil. 10:34, 35; Kus. 22:17.
—Tupebwanga bufundiji bulumbuluke mwa kukwashisha bantu kumushipiditu: Kifundwa kya Bible kya pa kasuku, kupwila kwa pa kipwilo, kubungakana ne bitango, byonso bino bitupanga bufundiji bwa kiteokratike bwa mvubu mpata, bwitukwasha tumunikile bakwetu kumushipiditu.—Is. 54:13; 2 Tem. 2:15; 1 Pet. 3:15.
—Tukwete bubinebine na mutyika, twibwingidija mu būmi bwetu bwa difuku ne difuku: Tuswele Leza, o mwanda twalamukanga kwalamuka kwabinebine, mwanda wa būmi bwetu bwikale bukwatañane na kiswamutyima kyandi. Bumuntu bwetu bupya bulonda mu lwayo lwa Kidishitu bukokelanga bakwetu ku bubinebine.—Kol. 3:9, 10; Yak. 1:22, 25; 1 Yoa. 5:3.
—Twielelanga’ko kwikala ne kwingila na bakwetu mu ndoe: Ngikadilo ya bwine Leza yotutamijanga itukwashanga twikale kwishisa mu bilongwa ne mu binenwa. ‘Tukimba ndoe ne kulonda’yo’ na bantu bonso.—1 Pet. 3:10, 11; Ef. 4:1-3.
2 Bifwa bya mwikadilo wa bwine Kidishitu bimona bantu mu bulongolodi bwa Yehova bikunkanga bavule baitabija bubinebine. Tusaka kifwa kya umo ne umo umbukata mwetu kikale na lupusa lwa uno muswelo pa boba betuyukile ne betutala.