Kupwila Kwa Mingilo Kwa Mu Kweji Wakwanza
Yenga Ushilula 5 Kweji 1
Min 10: Misapu imutala. Misapu itala Mwingilo Wetu wa Bulopwe.
Min 15: “Twisambilei Padi Yehova Difuku ne Difuku.” Na bipangujo ne malondololo. Mu bubandaudi bwa mus. 4, leta bushintuludi budi mu kifundwa 16 mu dibuku Kiongozi cha Shule, mus. 14-16.
Min 20: “Bible—Kalombwe Kapēne Leza ku Bantu Bonso.” Mukulumpe umo ubandaula kishinte ne buluji bubwanya kutonona umo ne umo akulupile mu Bible. (Tala mukanda Un livre pour tous, p. 30, 32.) Ipangula mu kīpi basapudi babidi basekunune muswelo obeteakanya kwingidija madingi adi mu musāngo 3-8. Longai kyakumwenako kimanine pa musāngo umo mu ino mwanda wa kulombola binenwa bya mu kwitāna kubajinji, ne kyakumwenako kikwabo kya kujokelamo kupya.
Lwimbo 165 ne milombelo yamfulo.
Yenga Ushilula 12 Kweji 1
Min 10: Misapu imutala. Lapolo wa mukōlo wa pa kipwilo.
Min 20: Mwanda Waka Kusokola Kyokya Kibi? Kishinte na mukulumpe kimanine pa Kiteba kya Mulami kya 15 kweji 8, 1997, p. 26-30, Falanse.
Min 15: “Kushikilwa Kobe I Kuyukane!” Mīsambo na bemvwaniki na mukulumpe umo. Vuluja mwayene wa bantu batanwanga ku kupwila kwa pa kipwilo. Ipangula batutu ne bakaka bamobamo balombole mwibakankamikilanga kutanwa kobatanwanga ku Njibo ya Bulopwe.
Lwimbo 172 ne milombelo yamfulo.
Yenga Ushilula 19 Kweji 1
Min 5: Misapu imutala.
Min 15: Bisakibwa bya pa kipwilo.
Min 25: “Tufwaninwe Kwikala Bafundiji, Ke’nkapo Basapudi Kete.” Na bipangujo ne malondololo. Mu bubandaudi bwa musāngo 11, tanga musāngo 11 wa kifundwa kya 15 mu dibuku Kiongozi cha Shule.
Lwimbo 174 ne milombelo yamfulo.
Yenga Ushilula 26 Kweji 1
Min 8: Misapu imutala. Vuluja basapudi bapaike papye wa ntentekelo wa Mwingilo Wetu wa Bulopwe wa kweji 2, 1998 ku kupwila kwa yenga wiya’ko.
Min 17: “Masomo a Mwingilo wa Kiteokratike mu 1998.” Kishinte na mutadi wa masomo. Shintulula muswelo ukokeja umo ne umo kumwena kamweno kakatampe mu uno mwaka. Kankamika umo ne umo alonde “Mpangiko ya Ntentekelo ya Butangi bwa Bible” yenga ne yenga.
Min 20: Tusapulei Myanda Miyampe Konso Konso. Mīsambo na bemvwaniki imanine pa dibuku Tumefanywa Tengenezo, p. 92-97, kupityila ku bipangujo bilonda’ko bino: (1) I kika kinenenwa’mba kwingidija mabuku etu kudi na bukwashi bukatampe mu kusambakanya myanda miyampe? Mwanda waka tufwaninwe kwiaponeja ponso potumona mukenga? (2) Mwanda waka tufwaninwe kwikankila’ko kupāna bukamoni bwa kiponka na ponka? Lelo i miswelo’ka imoimo ya kwibupāna? (Nena basapudi babala-banga basekunune myanda yobamwene mu bukamoni bwa kiponka na ponka.) (3) Mwanda waka kipwilo kifwaninwe kwikankila’ko kusambakanya mwaba onso okipelwe? Mwanda waka i kya kamweno kwikala na obe mwaba, kokwa kudi mingilo? (4) Le mpangiko ikwetwe ya busapudi bwa kyungwija idi na kamweno’ka? I muswelo’ka otukokeja kuteakanya mpangiko ya mwingilo wetu wa busapudi, twikale kwingidija kitatyi kyetu senene?
Lwimbo 222 ne milombelo yamfulo.
[Binenwa bya Kifwatulo pa paje 3]
Tushimikei Būmi Bwetu Pa Mwingilo Wa Yehova
1 Yesu wādingakenye bemvwaniki bandi na bashimiki babidi. Umo wāshimikile būmi bwandi pa mwala wa dibwe, kikōkeji kudi Kidishitu, kimpumpu kya kufikilwa na kulondwalondwa ne byamalwa kyakankalwa kumuponeja. Mukwabo wāshimika pa musenga, kipuni kya kupela kukōkela, kyamalwa pa kwiya kyāmuponeja. (Mat. 7:24-27) Pano tudi ku mvuyo ya ngikadilo ya bintu, tupukuminwanga na bimpumpu bivule bileta makambakano. Ino mu ngalaba’mu namo mwenda mukunga bimakumbi bya kutetula kyamalwa kibūke. Lelo tukominina kufika ne ku mfulo na lwitabijo lwetu lubwane? (Mat. 24:3, 13, 21) Eyo, byonso bilonda mungya mūshimikilo otushimika būmi bwetu dyalelo. Nanshi, tufwaninwe kwiipangula’mba: ‘Lelo nshimikanga būmi bwami bwa bwine Kidishitu pa mwingilo wa Leza omwingidilanga na kikōkeji?’
2 Lelo kushimika būmi bwetu pa mwingilo wa Yehova kishintulula namani? Kishintulula kutūla Yehova bu kitako kine kya būmi bwetu. Kino kitulomba kumona Bulopwe bu kintu kibajinji kyotuputumina. I ne kukōkela Leza mu byonso byotulonga mu būmi bwetu bwa difuku ne difuku. Kadi kilomba ne kuta mutyima wetu onso ku kifundwa kya Bible kya pa kasuku, kya mu kisaka, ku kupwila, ne ku mwingilo wa busapudi; kutūla bino’bi kumeso kwa bintu byonso. (Mus. 12:13; Mat. 6:33) Kukōkela uno muswelo kufikijanga muntu ku kwikala na lwitabijo lukomo bwa dibwe kelubwanika kulundulwa na kimpumpu nansha na makambakano akokeja kwitupukumina.
3 I nsangaji pa kumona bantu midiyo ne midiyo bashimika na mutyima umo būmi bwabo ne lukulupilo lwabo lutala pa būmi bwa kumeso pa mwingilo wa Leza, mwāshimikile’byo Yesu. (Yoa. 4:34) Balondanga nyeke mpangiko ya mingilo ya kiteokratike, o mwanda beselwanga madyese a ntanda ne ntanda. Inabana umo ushintulula mobatamijije biyampe na wandi mulume babo bana babidi mu mwingilo wa Yehova, amba: “Būmi bwetu bonso twebuyujije bubinebine bā—twenda ku bitango byonso, tuteakanya kupwila ne kutanwa’ko, twatūla busapudi ke kimo kya mu bintu byotuloñanga nyeke umbūmi.” Wandi mulume ubweja’ko amba: “Bubinebine ke kintupo kimo kya mu būmi bwetu, mhm, bo būmi bwetu bwine. Bintu bikwabo byonso bilondela’po.” Lelo nobe ye motūdile mwingilo wa Yehova pa kifuko kibajinjibajinji mu būmi bobe namino?
4 Twitūdilei Mpangiko Mishikate ya ku Yenga ne Yenga: Bulongolodi bwa Yehova i butūle’ko kupwila kutano mu yenga mwanda wa kwitukwasha twikale na kibidiji kiyampe kya bintu bya kumushipiditu. Bene Kidishitu bashimikile būmi bwabo pa mutōtelo wa Yehova bateakanyanga shē mingilo yabo ya kungitu ne ya mu kisaka, bashiya’ko kyaba kya kutanwa ku kuno kupwila konso kwimanine’po būmi bwabo. Kebalekangapo bintu bya mvubu mityetye bibabudije kutanwa ku kupwila kitatyi ne kitatyi.—Fid. 1:10; Bah. 10:25.
5 Bene Kidishitu bapye bayukile amba, mwikadile kudya bidibwa mu bitatyi kampanda ku difuku na mvubu, mo mwikadile ne kutūla’ko mpangiko mishikate ya kifundwa kya pa kasuku ne kya kisaka, ne ya kuteakanya kupwila. (Mat. 4:4) Nobe ubulwe’po kwitūdila’ko kintu kya minite 15 nansha 20 ya kifundwa kya pa kasuku difuku ne difuku? Lufungulo i luno, kokaleka bintu bikwabo bipatyika mu kitatyi kyotūdile bu kya kifundwa. Ikala na kibidiji kya kulonga’nka namino, ukamwena’mo. Eyo, padi kikakulomba kulanguka lubanga na bwē. Bengidi 17 000 ba mu kisaka kya Betele kujokoloka ntanda yonso balangukanga lubanga na bwē mwa kubandawila kisonekwa kya difuku. Eyo, kulanguka lubanga na bwē kukulomba kwitūdila’ko nsaa miyampe ya kulāla mwa kushilwila difuku dīpya na bukomo mu ngitu.
6 Shi wi mutwe wa kisaka, langa’ko mulangwe wa kutūla ne kulongolola mpangiko ya kwingila mingilo ya kiteokratike na kisaka kyonso. Bisaka bimo bitañanga Bible, Annuaire, nansha dibuku dikwabo kupwa kudya bidibwa bya kyolwa, pobakīkija bidibwa. Bambutwile bavule batamije babo bana ke bene Kidishitu bakomo, banenanga’mba kintu kyebakweshe babwanye i kibidiji kya kuleya’ko kyolwa kimo ku yenga ne yenga kya kwiūbaka kumushipiditu abo bonso pamo. Shabana umo mu bano unena’mba: “Kikatampe kitamije betu bana kumushipiditu i kifundwa kya kisaka kyotwadi twifunda nabo kyolwa kyonso kya dya Busatu, pano kepadi kintu kya myaka 30 tamba tushilula’kyo.” Bandi bana bonso basatu bābatyijibwe abo bakidi bankasampe, mwenda mafuku bonso basatu bashilula mwingilo wa kitatyi kyonso. Kutentekela pa kifundwa kya kisaka, mukokeja kuteakanya misapwilo ya mu busapudi nansha bipindi bya ku kupwila ne kulongela pamo mingilo mikwabo miyampe.
7 Lelo mu mpangiko yobe ya ku yenga, wi ‘mukūle’mo ne kitatyi kifwaninwe’ kya kusapula Bulopwe? (Kol. 4:5) Bavule motudi muno i bavudilwe bya kulonga mu būmi, aku biselwa bya kisaka koku nako bya kipwilo. Shi ketutūdilepo mpangiko mishikate ya kwenda kusapula ne kufundija yenga ne yenga, tukamona bintu bikwabo bitādila lubilo lonka ino mingilo ya mvubu mikatampe. Tutu umo kimunye kya bañombe wanene amba: “Tamba mu 1944, namwene amba muswelo umo kete wa kutambila mu busapudi i kwibutūdila’tu difuku dyabo bwa pala. Tamba’nka penepa, nsañunanga difuku dimo mu yenga dya kutambila mu mwingilo.” Mukulumpe umo mwine Kidishitu wanene amba kutūla’ko mpangiko mishikate ya kutambila mu busapudi ko kumukwashanga asapule nsaa 15 kweji ne kweji. Shi wamone amba kudi kaji kasa kwingila mu dya Mposo, ukasapulanga bidi lubanga, kupwa kaenda ku kaji. Lelo abe ne kyobe kisaka mubulwe’po nenu kutūla’ko nansha’tu difuku dimo ku yenga dya kutambila mu mwingilo, kwitūdila kino kibidiji ke dishinda dya būmi bwenu bwa kumushipiditu?—Fid. 3:16.
8 Tubandaulei Būmi Bwetu Senene: Kudi bintu bitukalakanyanga mu kushimika kotushimika būmi bwetu pa mwingilo wa Yehova. Bimyanda kampanda byampikwa kulaya bikokeja kuvutakanya mpangiko yetu milumbuluke yotutūdile bu ya kifundwa, kupwila ne busapudi. Walwana netu Satana nandi uloñanga bukomo bwandi bonso “witukankaja” ne kwitujikila mashinda. (1 Tes. 2:18; Ef. 6:12, 13) Bino bijika kebifwaninwepo kwitupungija, kutyina’mba twakaleka kwendelela. Ino tujadikei kitatyi senene mwa kuvuijija mwingilo wa kiteokratike otutūdile ku mpangiko. Tufwaninwe kusumininwa ne kwipānina’ko mwa kulongela bintu bya kamweno kabinebine.
9 Ketufwaninwepo kuleka mpusa ya bwine ntanda ne lupusa lubi lwa ngitu yetu yambulwa kubwaninina bituningila mingilo ingi yambulwa kukwatañana na bintu bya kumushipiditu itudīla bityebitye kitatyi ne kwituleñanya. O mwanda kifwaninwe kwibandaula, kwiipangula’mba: ‘Lelo būmi bwami bwendanga bushetuka ne kulabikwa na bintu bingi’ni? Lelo kendi mushilule kushimika būmi bwami pa bintu bya lupito bya ino ntanda? (1 Yoa. 2:15-17) Le njimijanga kitatyi kivule ku bintu bintala ami mwine, lunango, makayo, nansha bintu bikwabo bya kwipwija mukose—kifwa kutala televijo nansha kuputulaputula Internet—kupita’ko ku bintu bya kumushipiditu?’
10 Lelo ukalonga namani shi ubamone amba būmi bobe ke bupatyikwepatyikwe bintu byakubulwa mvubu? Polo wālombēle amba banababo bekale “bajadikwe monka,” “bemanije biyampe,” lelo nobe ubulwe’po kulomba Yehova akukwashe ushimatyije monka ñeni yobe pa mwingilo wandi? (2 Kod. 13:9, 11, NW, kkd.) Kupwa ninga, ulongele mungya kusumininwa kowasumininwa, usendulule bintu senene shē. (1 Kod. 9:26, 27) Yehova nandi ukakukwasha uleke kusāsukila ku lundyo nansha ku lunkuso mu mwingilo omwingidila.—Enzankanya na Isaya 30:20, 21.
11 Putumina mu Mwingilo wa Leza Uleta Nsangaji: Bantu bavule balondalondanga nsangaji na mipepeketo, shi būmi bwabo kebulumba ku mfulo, ye kumona bamona’mba bituntwa byobadi bakimba kungwija kebibaletelepo nsangaji yaendaenda. I “kupanga luvula” bitupu. (Mus. 2:11) Ino shi twimanije būmi bwetu padi Yehova, ‘tumutūle ku meso etu nyeke,’ tukekala na mutyima mufukate byabinebine. (Mit. 16:8, 11) I amo, mwanda Yehova ye nsulo mine ya būmi bwetu. (Kus. 4:11) Pampikwa aye Mukala Mpango Mukatampe, būmi kebwikalapo na buluji. Kwingidila Yehova ko kwitupa mingilo mivule milumbuluke, ya mvubu, ya kamweno kaendaenda, kanyeke, kotudi ne kudi bakwetu.
12 I kipite buya kuleka kwimona’mba tubabwanya, kutyina’mba twakajimija mumweno wa kampeja-bukidi otumona mwiila lubilo mfulo ya ino ntanda ya Satana. Būmi bwetu bwa difuku ne difuku bulondanga mungya mumweno otumona būmi bwetu bwa kumeso. Bantu ba mu mafuku a Noa kebādipo balanga’mba dilobe dya ntanda yonso dibwanya kwikala’ko, “abo ne kuta’ko mityima mpika,” bāimanija būmi bwabo mu kulondalonda bintu bibatala—kudya, kutoma, ne kwisonga—enka ne byāile dilobe “dyebakubija bonsololo.” (Mat. 24:37-39, MB) Ne dyalelo mo monka, boba bemanija būmi bwabo pa ino ntanda bakamona mukapomokela lubulubu bitungo byabo ku bonakani bukatakata kebwamwenwe kasha na bantu, ke “difuku dya Yehova” kadi.—2 Pet. 3:10-12.
13 Shi ke pano, twendelelei na kushimika būmi bwetu padi Yehova, Leza mūmi, ne kulonga kiswamutyima kyandi. I kutupu bupeta nansha bumo botukokeja kwibikila bukapita Yehova, Makuñamina ukulupilwa byabinebine. Aye kabepangapo—ukafikidija milao yandi yonso. (Tet. 1:2) Kafwangapo—kantu konso kotubika kwadi kekajiminapo nansha dimo. (Hab. 1:12; 2 Tem. 1:12) Būmi bwetu bwa kikōkeji ne lwitabijo botushimika pano i ngalwilo’tu ya būmi bwa nyeke ne nyeke botukekala nabo pa kwingila mwingilo wa tusepo wa Leza wetu wa nsangaji!—1 Tem. 1:11; 6:19.
[Binenwa bya Kifwatulo pa paje 3]
[Binenwa bya Kifwatulo pa paje 3]
“Bubinebine ke kintupo kimo kya mu būmi bwetu, mhm, bo būmi bwetu bwine.
Bintu bikwabo byonso bilondela’po.”