Bible​—⁠Kalombwe Kapēne Leza Ku Bantu Bonso

¹ Dyalelo bantu bedika’mba ke kutampwe Mabible midiyala iná ne kupita mu ndimi 2 100, mikatampe ne mityetye, ko kunena’mba pano, bantu 90 ne musubu pa katwa kujokoloka ntanda yonso babwanya kwivwana Kinenwa kya Leza. Ino nansha namino, ntanda ikidi na nzala ya “kwivwana binenwa bya Yehova.” (Am. 8:11) Bantu bavule badi na Bible, ino kumutanga mpika, pakwabo batanga’ye ino kumwivwana mpikila. Lelo tukokeja kwibakwasha namani mwanda wa Bible ebaludike binebine mu būmi bwabo?

² Mu kweji umbajinji, tukapāna dibuku Biblia​—⁠Neno la Mungu au la Binadamu? Boba bakasepelela’dyo, tukebaponejeja kadi monka Bible otumwena’mo kamweno pano ke padi myaka 34: Bwalamuni bwa Ntanda Impya. Pa kino, tulombolei mvubu ya muneneno wandi upēla kadi wa dyalelo. Tukwashei bakwabo na nsangaji bamone Bible bu kalombwe kapēne Leza ku bantu bonso, uno nao i muswelo pa bula wa kufwija’ko Yehova pangala pa kino kyabuntu kyaetupele.

³ Tukokeja kushilula mīsambo mu trakte “Mwanda waka kifwaninwe kukulupila mu Mukanda Ukola,” amba:

◼ “Bantu 90 ne musubu pa katwa kujokoloka ntanda yonso badi na Bible, inoko bantu batyetye bo bamutañanga kitatyi ne kitatyi. Lelo uyukile i mwanda waka?” Tanga misāngo ibidi imbajinji mu trakte pamo ne kisonekwa kya 2 Temote 3:16. Pāna dibuku Neno la Mungu. Shi waitabija dibuku, mulombole lupoto lwadyo. Shi wapele, mushile trakte ashale kwiitanga, kokela milangwe yandi pa kamutwe ka mwanda kamfulo kanena’mba, “Bibula utobanga butobo bwa bikāya kumeso.”

⁴ Shi tubajoka kukatala bantu botwashidile trakte “Mwanda waka kifwaninwe kukulupila mu Mukanda Ukola,” tukokeja kupima namino:

◼ Kupwa kuvuluja mīsambo yenu yapityile, tanga misāngo ibidi yamfulo mu trakte. Ipangula mwisambi nobe shi ke mulanguluke kala pa muswelo wa kwikala na būmi bwanyeke pano panshi. Teja kilondololwa kyandi, kupwa bweja’ko amba: “Batumoni ba Yehova i basumininwe, mwanda bayukile’mba bupolofeto bonso bwa Bible bukafikidila, kubadila’mo ne mulao wa būmi bulumbuluke bukapebwa bantu betabijibwe na Leza.” Lombola kifwatulo kidi pa paje 13 mu mukanda Kisaka Leza. Pa kushilula kifundwa, pūtula kifundwa kya 5, kupwa munene mubandaule nandi malondololo ku bipangujo bipangwilwe’po.

⁵ Mu myaba mudi bantu balamete ku mutōtelo kampanda, tukokeja kutompa ino ntwelelo:

◼ “Tukankamikanga bantu bakwate Bible na bulēme bukatampe. Bisaka bivule bidi na Bible, ino bityetye byo bitanga’ye shi bibafikilwa na bizumba. Lelo nobe ujingulwile uno mwanda? [Muleke akulondolole.] Padi bantu balañanga’mba Bible ke mununu. Ino dino dibuku, Biblia​—⁠Neno la Mungu au la Binadamu? i dilete bukamoni bulombola’mba Bible i wabine mu myanda itala sianse, ne amba witulombolanga miswelo mifwaninwe ya kupwija makambakano makatampe etufikila dyalelo.” Imanina pa milangwe imoimo idi mu shapita 8 ku 12 mu dibuku, kupwa pāna’dyo ku mwisambi nobe.

⁶ Shi tubajoka kutala muntu otwashidile dibuku “Neno la Mungu,” tukokeja kunena’mba:

◼ “Musunsa wamfulo otwetene, twamwene muswelo witukwashanga Bible mu myanda itala kupwija makambakano makutakane etufikila mu ano etu mafuku. Ukwashanga ne boba bamwitabijanga bu Kinenwa kya Leza, baikala na būmi bwansangaji ne bwa maloa. Nsaka nkulombole umo wa mu misoñanya mifwaninwe ilombwelwe mu dibuku dyonakushidile.” Wisambile pa musoñanya wa mu Bisonekwa utelelwe mu musāngo 3 ku 6 mu shapita 12, fudija mīsambo na kutanga musāngo 7. Shi wasepelela, munene kushilula nandi kifundwa mu dibuku Buyuki nansha mu mukanda Kisaka Leza.

⁷ Mīsambo ilonda’ko ino ibwanya kusangaja banunu:

◼ “Kitatyi kimo kunyuma, Bible wādi utangwa mu bisaka bivule ne misoñanya yandi yādi iludika būmi bwa bisaka bivule. Lelo kyadi uno muswelo ne ku yobe njibo? [Muleke akulondolole.] Dyalelo bimweka bu bantu bavule i batyintyidilwe na mingilo, bakomenwa ne kutanga Bible, pakwabo balanga’mba misoñanya itala pa mwikadilo idi’mo ke mikulu. Shapita 13 wa dino dibuku, Biblia​—⁠Neno la Mungu au la Binadamu? ulombola kifwa kya bantu basatu baalamwine būmi bwabo kupwa kwa kwifunda Bible. Shi usaka kutanga uyuke bukomo bwa Kinenwa kya Leza mobwaikadile kwibakwasha, nankyo nkasepelela kukushila’dyo.”

⁸ Mu kupita kwetu kwabubidi, tukokeja kunena’mba:

◼ “Musunsa wamfulo otwetene, twaitabije batwe bonso amba misoñanya itala pa mwikadilo idi mu Bible ifutululwanga na bantu bavule dyalelo. Molangila, uno mwanda witutala ne batwe? [Muleke akulondolole.] Yesu Kidishitu wāshintulwile amba kwifunda kuyuka Leza kudi na mvubu mikatampe mpata.” Tanga Yoano 17:⁠3. Kupwa pūtula dibuku Buyuki pa shapita 1, wisambile pa musāngo 5. Lombola mpangiko yetu ya kifundwa kya Bible kya ku bitupu, kupwa mulombole mwifundilwanga.

⁹ Tulombei Yehova etwesele mu bukomo bonso botulonga bwa kukokela milangwe ya bantu ku Bible, kalombwe kapēne Leza ku bantu bonso!

[Binenwa bya Kifwatulo pa paje 8]

Tupānei Bible Traduction Du Monde Nouveau

¹ “[Traduction] du monde nouveau i bwalamuni bwa mvubu mpata. Bukabe, bukunka mutyima, butonwena mutangi ku kulanguluka ne ku kwifunda. Ke mwingilopo wingilwe na Bashayuka ba Bilembwa, mhm, ino i na bafundi balēmekele Leza ne Kinenwa Kyandi.” Mo mwānenene mushintuludi mutumbe wa Kihebelu ne Kingidiki. I munene kyabine! Ino i muswelo’ka otubwanya kukwasha bakwetu bakwate Bible Traduction du monde nouveau na mutyika namino kitatyi kyotupāna’ye pamo na dibuku Buyuki mu Kweji 12?

² Bantu bamo babwanya kulondolola’mba: “Ami ndi kala na Bible wami. Nkidipo kyonsakila mukwabo.” Kyotukimba batwe i kwibayukija’mba Traduction du monde nouveau ke Bible mukwabopo bitupu, mhm. I bwalamuni bwalamwinwe mu muneneno wa panopano ulamine buluji bwa bilembwa bibajinjibajinji. Kintu kimo mu bivule bilombola’mba i mutabuke, i kino kyotumona pa kudingakanya mwalamwininwe kishima “kikwe” mu (Mukanda Ukola) bu “nsoko ya mwita” mu (Traduction du monde nouveau) mu 1 Kodinda 10:⁠25.

³ Inoko bantu batañanga Bible i batyetye, ebiya mu bano batyetye bevwananga misoñanya yandi moikadile na mvubu mu būmi bwa difuku ne difuku i batyetyetyetye. Kibasakila kuyuka Kinenwa kya Leza mokikokeja kwalamwina būmi bwabo bwikale biyampe ne kuyuka’mba kulonda madingi akyo esambila pa mwanda utala kubulwa budimbidimbi, mwikadilo, ne pa būmi bwa kisaka kukebakwasha banekenye makambakano a dyalelo. Lelo tubwanya kwibalombola’byo namani?

⁴ Ivwana Madingi Amo: “Lelo uyukile amba kwalamuka lubilolubilo kukyalamuka mikadilo ya bantu dyalelo ne kuyuka koketuyukile mukekadila būmi bwetu bwa kumeso, kwitusakila twikale na kalombwe ukulupilwa mu būmi bwetu? [Muleke akulondolole.] Bible shandi i dibuku dya kala, ino uletanga madingi mafike’po mu būmi bwa dyalelo ne mu būmi bwa nsangaji mu kisaka.” Kupwa, pūtula shapita 2 mu dibuku Buyuki, tanga musāngo 10 ne mulongo umbajinji mu musāngo 11, pamo ne 2 Temote 3:​16, 17. Shi wasepelela, mupāne dibuku Buyuki, umulombole ne mpangiko yetu ya kifundwa kya Bible kya ku bitupu, kupwa muponejeje Traduction du monde nouveau. Shi ubamone amba i biyampe kushilula nandi kifundwa mu mukanda Kisaka Leza, nankyo shilula’kyo. Ukatana ntwelelo mikwabo mishikate mu kabuku Muswelo wa Kushilula ne Kwendeleja Misambo Itala pa Bible, paje 2-7.

⁵ Tulombolei mutyika otukwete nao uno Bible muyampe mpata​—⁠Traduction du monde nouveau. Tukeulombola na kumupāna na bupyasakane mu Kweji 12.