Tukwashei Bakwetu Nabo Bamone Kusengibwa
1 Bantu bavule i bapungile pamwanda wa myanda ivwanwaivwanwa itala bimpengele, mavita, buñonaona ne masusu. Busengi i kintu kyabila muzo wa muntu bikatampe nansha byokebutelwatelwa mu misapu isapulwa bukile bukya. Kukankamika nansha kusenga muntu kishintulula kumupa bukomo ne lukulupilo, kumukwasha anekenye matompo. Batumoni ba Yehova i bateakanibwe mwanda wa kupāna bukwashi bwa uno muswelo. (2 Kod. 1:3, 4) Mikanda yetu imanine pa Bible, yotukapāna mu kweji 8 ne mu kweji 9, idi na misapu ya bubinebine ne busengi. (Loma 15:4) Tala madingi amoamo etupa bukwashi bwa mwa kwiipānina mu bitatyi bishileshile:
2 Mwanda kampanda uleta bulanda ukokeja kwitupa mukenga wa kupāna bukamoni ne kusenga bakwetu na binenwa bya uno muswelo, amba:
◼ “Kitatyi kilupukanga bimyanda bya uno muswelo, bavule beipangulanga shi bine Leza udiko, ne shi udiko, lelo bine witutele mutyima. Abe ulanga’po namani? [Muleke akulondolole.] Muswelo umo wa kuyuka shi Leza udiko i uno wa kwingidija musoñanya uyukene ku bantu bonso.” Tanga Bahebelu 3:4. Tela bintu bikwabo bitujokolokele byaikele kupangibwa. Kupwa endeleja’ko namino amba: “Ndi na mukanda okamona nobe amba bine i mukanda ukankamika. Udi na mutwe wa mwanda unena amba Je! Kweli Mungu Anatujali? [Tanga bipangujo bidi pa kibalu.] Uletanga bubinga bukatampe bulombola amba Leza udiko kadi amba panopano ponka ukafudija ino ngikadilo yambulwa koloka yotwikoka nayo dyalelo. Lelo ukasangela kwiutanga?” Mwipei nandi kilayeno kya kulonga kujokelamo kupya.
3 Mu kujokelamo kupya, tukokeja kunena amba:
◼ “Twesambile nobe pa bintu bilombola amba binebine Leza udiko, kadi nakushidile ne mukanda udi na mutwe wa mwanda unena’mba Je! Kweli Mungu Anatujali? Padi wajingulwile uno mulangwe udi pa paje 7. [Lombola kifwatulo ne kunena mu kīpi milangwe idi mu musāngo 15.] Kino i kimfwa kimo mu bimfwa bivule bilombola amba bine Leza udiko kadi witutele mutyima. [Tanga musāngo 27 pa paje 9.] Kifundwa kya pa kasuku kya Bible kinkwashanga nekenye makambakano amfikila mu būmi bwa difuku ne difuku mwanda kimpanga mulangwe wa Leza pa bino bintu.” Ipangula muntu’wa shi witabije umulombole muswelo otwifundanga.
4 Busapudi bwa ku telefone na kwingidija mukanda “Quel est le but de la vie? Comment le découvrir?” Tukokeja kwitela kupwa twanena amba:
◼ “Nakwite mwanda wa kukulombola musapu wa mvubu, mwanda nkidipo na muswelo wa kwiya ami mwine ku kupempula.” Tanga musāngo umbajinji pa paje 4 mu uno mukanda, utanga bwa abe unena, enka bwa abe udi nandi mpala na mpala. Mwipangule mwalangila’po kadi muleke akulondolole. “Mputwile Bible wami pa Isaya 45:18. Kino kisonekwa kilombola amba ntanda yāpangilwe pamwanda wetu. Lelo mbwanya kukutangila’kyo?” Kupwa, mushintulwile kitungo kya uno mukanda ne kumulomba shi ubwanya kukamutwadila’ko nandi mukanda umo.
5 Mu kwita kwabubidi, tukokeja kutompa ano manwa mwanda wa kushilula kifundwa:
◼ “Nsenswe kwendeleja mīsambo yetu yotwakadikije na kukupa kimfwa kilombola i kudi ani kotufwaninwe kukimba malondololo atala pa kitungo kya būmi bwetu. [Nena mu kīpi milangwe idi mu musāngo 1 ne 2 pa paje 6 mu mukanda But de la vie.] Kusokwelwa 4:11 ushintulula amba Yehova Leza i Umpangi wetu. [Tanga uno vese.] Wādi na kitungo kampanda pa kwitupanga. Bantu bavule badi basaka kuyuka buno buluji bashilwile kwifunda Bible, Kinenwa kya Leza. Nsenswe nobe kukulaija mulongelwanga kino kifundwa.” Mushintulwile mupityilanga bifundwa byetu bya Bible ku mobo a bantu ku bitupu, kadi mwipei nandi kilayeno kya kushilula kifundwa.
6 Uno musapwilo muyampe ukokeja kusenga bantu bafwidilwe muntu obasenswe:
◼ “Ñingilanga mwingilo ukwasha boba bonso bafwidilwe muntu obasenswe. Na bubine, kufwilwa muntu osenswe i mwanda umo mukomo bininge kunekenya. Omwanda uno mukanda udi na mutwe wa mwanda unena amba Kitatyi Kifwa Muntu Osenswe. . . waikele kuteakanibwa. Ke mukwashe kala bantu bavule bene. Nsakile kukulombola byobya byounena pangala pa mulao usangaja wālaile Yesu Kidishitu. [Tanga musāngo wa butano pa paje 26, ne kisonekwa kidi’mo kya Yoano 5:21, 28, 29.] Talai kifwatulo kidi pa paje 29: kilombola kusangulwa kwa Lazalasa na Yesu monka mokusekunwininwe mu Maevanjile. Shi usepelele butangi bwa uno mukanda uleta busengi, nankyo nkushile’o na nsangaji yonso.”
7 Mu kujokelamo kupya, tukokeja kulombola dipya kifwatulo kidi pa paje 29 mu mukanda “Kitatyi Kifwa Muntu Osenswe. . . ,” kupwa twanena amba:
◼ “Musunsa wamfulo, twesambile pa lusangukilo lwa Lazalasa. [Tanga myanda ya kifwatulo idi pa paje 28 kadi bandaulai milangwe ilombwelwe mu kamutwe kamwanda kanena amba “Lelo Kino Kyālongekele Bine?”] Shi mutyima obe witabije amba bine ukokeja kukemona difuku dimo na yewa ufwile, nankyo leka nkulombole mwa kwikadila na lukulupilo mu lusangukilo.” Munene mushilule nandi kifundwa kya Bible.
8 Tulongei batwe bonso bukomo bwetu mu myeji iya’ko mwanda wa kwiula Yesu ne “kusenga bonsololo badila.”—Is. 61:2.