KIFUNDWA 1

Ntwelelo Miyampe

Bilongwa 17:22

MU KĪPI: Ntwelelo yobe ifwaninwe kulangula mutyima wa kusangela, kuyukanya mwanda owisambila’po ne kulombola kine kifwaninwe kusangela’o bevwaniki bobe.

MWA KULONGELA:

Langula mutyima wa kusangela. Tonga kipangujo, binenwa, mwanda mumweke binebine mu būmi, nansha mapya akasangela bevwaniki bobe.

Langulukila bininge kumeso kwa kitatyi pa byobya bisangela bevwaniki bobe, bintu byobatele’ko mutyima, kupwa ukwatañanye ntwelelo yobe mungya bino bintu.
Yukanya mwanda owisambila’po. Tompa kujingulula shi ntwelelo yobe ikakwasha bevwaniki bobe bayuke senene mwanda’wa ne kitungo kya mwisambo obe.
Lombola kine kikadile mwanda obe na mvubu. Kwatañanya byonena na bisakibwa bine bya bevwaniki bobe. Bafwaninwe kwivwanija senene muswelo ubwanya kwibakwasha mwanda’wa.

Kitatyi kyoteakanya mwisambo, wiipangule amba, ‘Le batutu ne bakaka mu kyetu kipwilo bekondanga na myanda’ka?’ Kupwa kwatañanya senene ntwelelo yobe na bisakibwa byabo.