I Kutupu Ubwanya Kwingidila Bamfumwandi Babidi

“I kutupu ubwanya kwingidila bamfumwandi babidi . . . Kemukokejapo kwingila bu bapika ba Leza koku kadi bapika ba Bupeta.”—MAT. 6:24.

LE ULANGA’PO NAMANI?

Le misoñanya ya mu Bible itukwashanga namani twikale na mumweno muyampe pa biselwa bya kisaka?

Le butyibi bwetu bubwanya kulombola namani amba twingidilanga’nka Yehova?

Lelo Yehova weselanga butyibi bwetu namani kitatyi kyotumutūla pa kifuko kibajinji?

1-3. (a) Le i makambakano’ka atala lupeto atananga bantu bavule dyalelo, ne bamo baloñanga namani pa kwiapwija? (Tala kifwatulo kidi ku ngalwilo.) (b) Le i bika bifwaninwe kutebwa’ko mutyima mu mwanda utala kulela mwana?

MARILYNa unena amba: “James wami mulume wadi utambanga ku kaji ne kujokela ku njibo mukōke bininge difuku ne difuku, ino kamweno kandi i katyetye pa kuvuija bisakibwa byetu bya difuku ne difuku. Nadi nkimba kumupēlejeja kiselwa ne kukwasha na kupotela Jimmy wetu mwana bintu biyampe na bidi na bakwabo ba ku masomo.” Kadi Marilyn wadi usaka kukwasha kisaka kyabo kikatampe ne kulama’ko lupeto mwanda wa būmi bwa kumeso. Balunda nandi bavule bāvilukīle ku matanda makwabo mwanda wa kukimba lupeto luvule. Inoko, kitatyi kyaalangulukīle pa kuviluka kwandi, wakomenwe kya kulonga. Mwanda waka?

² Marilyn wadi na moyo wa kushiya kisaka kyandi kilēme ne kuleka kibidiji kyandi kya ku mushipiditu. Inoko, wadi ulanguluka amba, bakwetu baendele ku ntanda ya bweni, ne kadi bisaka byabo byadi bimweka bu byūmi ku mushipiditu. Ino wadi wiipangula muswelo waadi ubwanya kulela Jimmy aye kulampe. Lelo wadi ubwanya kutamija wandi mwana ‘mu madingi ne bulemununi bwa Yehova’ kupityila ku Entelenete?—Ef. 6:4.

³ Marilyn wadi ukimba buludiki. Wandi mulume kadipo usaka ende, nansha byaadi unena amba kakamukankajapo. Bakulumpe ne bantu bamo mu kipwilo bamudingile aleke kwenda, ino bakaka bavule bamukankamika ende mu ntanda ya bweni. Bamulombwele amba, “shi usenswe kyobe kisaka, usa kwenda. Ubwanya kwendelela na kwingidila Yehova.” Nansha byaadi utatana, Marilyn washadikile James ne Jimmy na lwimu lwa pa kanwa ne kwenda kukengila ku ntanda ya bweni. Webalaya amba, “nkisapo kukeja’ko.”

BISELWA BYA KISAKA NE MISOÑANYA YA MU BIBLE

4. Mwanda waka bantu bavule bavilukanga, ino le i bāni bafulanga ku kulela bana ba bano bantu?

⁴ Yehova kasakangapo bengidi bandi bekale mu bulanda bwa poso, ne kadi kuviluka i muswelo umo wa kala wa kukimba kupwa bulanda. (Ñim. 37:25; Nki. 30:8) Pa kutyina kufwa nzala, mukulutuba Yakoba wātumine bandi bana ku Edipito kukapota bidibwa.b (Ngo. 42:1, 2) Dyalelo, bantu bavule bavilukanga kebashiyengapo bibundi byabo mwanda wa nzala. Inoko, bakokeja kwingila bakusa byanga mwanda wa mapu. Bakwabo basakanga’tu kutamija kisaka kyabo mu būmi buyampe. Pa kufikila pa bitungo byabo mu kitatyi kya kusakana kwa lupeto, bavule bafulanga ku kwenda kukekala kulampe na bisaka byabo, ekale mu ntanda yabo nansha mu ntanda mikwabo. Divule dine, balelejanga babo bana banuke na mbutwile wabo, banababo batame, bankambo babo, babutule bakwabo nansha na balunda. Nansha bantu baviluka byobekalanga na njia ya kushiya benē pabo nansha bana, bavule bendanga mu ntanda ya bweni bamonanga’mba kebadipo na kya kulonga.

5, 6. (a) Le i bika byāfundije Yesu pa mwanda utala nsangaji ne mutyima-ntenke? (b) Le i bintu’ka bya ku ngitu byāfundije Yesu balondi bandi kulombela? (c) Le Yehova witweselanga muswelo’ka?

⁵ Mu mafuku a Yesu, bantu bavule bādi nabo balanda ne bafudile, ne kadi bādi padi bamona bu bakekala na nsangaji ne mutyima-ntenke shi enka bādi na lupeto luvule. (Mako 14:7) Inoko, Yesu wādi usaka bantu bakulupile kintu kikwabo. Wādi usaka bakulupile mudi Yehova, Nsulo ya bupeta bwa nyeke ne nyeke. Yesu wāshintulwile mu Busapudi bwandi bwa ku Lūlu amba, nsangaji ne mutyima-ntenke wa binebine kebimaninepo pa bintu bya ku ngitu nansha pa bukomo bwetu, ino i pa kipwano kyotupwene na Tata wetu wa mūlu.

⁶ Mu milombelo yandi ya kulondela’po, Yesu wētufundije kuleka kulomba lupeto, ino bisakibwa byetu bya difuku ne difuku, “bidibwa byetu bya dyalelo.” Wānene ukoma bemvwaniki bandi amba: “Lekai kwibīkila byabulēme pano pa ntanda, . . . Ino mwibīkilei byabulēme byenu momwa mūlu.” (Mat. 6:9, 11, 19, 20) Tubwanya kukulupila’mba Yehova uketwesela monka mwalaile. Dyese ditwesela Leza kekwitwitabijapo’tu na kukununa mutwe; ino i kwitupa kwaetupa bine byotusakilwa. Na bubine, muswelo umo wa kwikala na nsangaji ne mutyima-ntenke wa binebine i kukulupila mudi Tata wetu wa kilelo pa kyaba kya kukulupila mu lupeto.—Tanga Mateo 6:24, 25, 31-34.

7. (a) Lelo Yehova i mupe bāni kiselwa kya kulela bana? (b) Mwanda waka bambutwile bonso babidi bafwaninwe kulela babo bana?

⁷ Mu ‘kukimba bidi boloke bwa Leza’ mubadilwa kumona biselwa bya kisaka na mwibimwena Yehova. Mu Mukanda wa Bijila wa Mosesa mudi uno musoñanya utala bene Kidishitu wa amba: Bambutwile bafwaninwe kufundija babo bana ku mushipiditu. (Tanga Kupituluka 6:6, 7.) Leza i mupe bambutwile kino kiselwa, ke bankambopo nansha muntu mukwabo. Mulopwe Solomone wānene amba: “Wami mwana, ivwana bulombodi bwa shobe; kadi kokazobololapo lufundijo lwa inobe.” (Nki. 1:8) Yehova usaka bambutwile bonso babidi bekale’po mwanda wa kuludika ne kufundija babo bana. (Nki. 31:10, 27, 28) Bintu bivule bifundilanga bana ku bambutwile babo, nakampata mu myanda ya ku mushipiditu, bitambanga ku kwibemvwana besambila padi Yehova difuku ne difuku ne ku kwimwena kimfwa kyabo.

MAKAMBAKANO A MU KITULUMUKILA

8, 9. (a) Le i kushinta’ka kubwanya kwikala’ko shi mbutwile ushikete kulampe na kisaka? (b) Lelo kwishiya kubwanya kuleta makambakano’ka mu mwikadilo ne mu ñeni?

⁸ Kumeso kwa kwenda mu ntanda ya bweni, bantu bavilukanga batompanga kutyepeja byaka ne bintu bibalombwa kwisuminwa pa kuviluka, ino i batyetye kete babadikilanga kumona makambakano adi mu kushiya bisaka byabo. (Nki. 22:3)c Kitatyi kityetye’tu Marilyn pa kwenda, wāshilwile kwivwana misanshi keipu ya kwishiya na kisaka kyandi. Kadi wandi mulume ne mwana nabo bēivwene uno muswelo. Nkasampe Jimmy wadi’nka umwipangula’mba, “mwanda waka waunshile?” Kadi Marilyn wādi mupange kukajoka mu myeji mityetye, ino myaka pa kupwa ipunguluka, wadi umona kushinta kuvutakanya ñeni mu kisaka kyandi. Jimmy wadi mwijikile kadi watamine kulampe na inandi. Uvuluka na bulanda amba, “buswe bwandi kondi bwapwile.”

⁹ Shi bambutwile ne bana kebashiketepo pamo mu kisaka, babwanya kususuka mu ñeni ne mu mwikadilo.d Shi bana i banuke ne shi badi kulampe na bambutwile mu kitatyi kilampe, bakasusuka bininge. Marilyn washintulwidile Jimmy amba, wadi wipāna mwanda wa kamweno kandi. Ino Jimmy wāmwene’mba inandi wamunyema. Ku ngalwilo wadi mufitwe pa kwenda kwa inandi. Ino mwenda mafuku, paajokele mwanda wa kwibapempula, wafitwa pa kwiya kwandi. Monka muvudile kulangila bana bashibwe, Jimmy walangile’mba inandi wajimija lupusa lwandi lwa kumukōkela ne kumusanswa.—Tanga Nkindi 29:15.

10. (a) Lelo kupingakanya kwikala pamo na kisaka na kutuma bintu bya ku ngitu kubwanya kwikala na lupusa’ka pa bana? (b) Le i bika kebibwanyapo kulonga mbutwile shi ulonga bukomo bwa kulela bandi bana aye kulampe?

¹⁰ Nansha Marilyn byaadi utompa kwibasenga na kutuma lupeto ne bintu, wadi umwene amba wadi upalula wandi mwana ne kumufundija pampikwa kuyuka atūle bintu bya ku ngitu kumeso kwa tumweno twa ku mushipiditu ne kwa kipwano kya mu kisaka. (Nki. 22:6) Jimmy wadi ubwanya kumulombola’mba, “kokajoka. Abe tuma’tu’nka bintu.” Marilyn washilwile kujingulula’mba kabwanyapo kulela wandi mwana kupityila ku mikanda, ku telefone, nansha ku bifwatulo bya video. Ushintulula amba, “kubwanyapo kupamba obe mwana bīpa nansha kumushadika pa kanwa ku Entelenete.”

11. (a) Lelo kukengidila kulampe kwa ba mulume ne mukaji kudi na lupusa’ka pa busongi bwabo? (b) Le kaka umo wafudile ku kujingulula namani amba ufwaninwe kujokela ku njibo yandi?

¹¹ Kipwano kya Marilyn na Yehova ne James wandi mulume kekyākidipo biyampe. Kipwano kyandi ne mwingilo wandi wa bwine Kidishitu byadi ke bya difuku’tu dimo mu yenga nansha ne kwika, kadi wadi unenwe kulwa na mukulumpe wandi wa kaji wadi umusaka. Pakubulwa mwinē pandi pabwipi kwa kweyamina mwa kulwila na makambakano, ba Marilyn ne James badi kebalombola bantu bangi milangwe yabo ne kusaka kuponena mu busekese. Marilyn wafudile ku kuyuka’mba, nansha shi aye mwine ne wandi mulume kebalongelepo makoji, ino pobadi beshile kyaba kebadipo babwanya kulonda buludiki bwa mu Bible bwa kuvuija bisakibwa byabo bya mu ñeni ne bya kusambakena pamo. Kebadipo babwanya kwilombola milangwe ya bukidibukidi, kwilengwila meso, nansha kumungamunga, kwipolweja ku makasa, kwipamba bīpa na nsangaji, ‘bilomboji bya buswe,’ nansha ‘kyepelo’ kya bu mulume ne mukaji. (Lwi. 1:2; 1 Ko. 7:3, 5) Kadi kebadipo babwanya kutōta Yehova pamo na wabo mwana. Marilyn uvuluka’mba, “ponaivwene ku kitango’mba butōtyi bwa kisaka bwa kitatyi ne kitatyi budi na mvubu kotudi pa kupanda ku difuku dikatakata dya Yehova, nayukile’mba mfwaninwe kujokela ku njibo. Nadi nenwe kushilula kulumbulula būmi bwami bwa ku mushipiditu ne bwa kisaka kyami.”

MADINGI MAYAMPE NE MABI

12. Le i madingi’ka a mu Bisonekwa abwanya kupebwa boba badi kulampe na bisaka byabo?

¹² Butyibi bwa Marilyn bwa kujokela ku njibo bwalengeje bantu bamupe madingi meshileshile. Bakulumpe ba ku kipwilo kyaaendele’ko bamufwijije’ko pa lwitabijo ne bukankamane bwandi. Inoko, bakwabo nabo badi kulampe na benē pabo ne bisaka byabo kebamufwijije’kopo. Pa kyaba kya kulonda kimfwa kyandi kiyampe, batompele kumunekenya. Bamunene’mba, “usa kujokela kuno mu kitatyi’tu kityetye. Le ukasokola lupeto luvule namani shi ubajokela ku njibo?” Pa kyaba kya kunena bino binenwa bityumuna mutyima, banabetu bene Kidishitu bafwaninwe kulombola “bansongwakaji kusanswa balume babo, kusanswa babo bana, . . . bengila ku mobo abo,” mobo a abo bene, “amba kinenwa kya Leza kyakanenenwa bibibibi.”—Tanga Tetusa 2:3-5.

13, 14. Mwanda waka kutūla Yehova pa kifuko kibajinji pa kyaba kya bintu bisaka kisaka kulomba lwitabijo? Leta kimfwa.

¹³ Bantu bavule bavilukanga bataminanga mu bishi bya mu bifuko byobalēmekele’mo bisela ne biselwa bya kisaka, nakampata bya bambutwile, kutabuka bintu byonso. Ku bene Kidishitu, kuleka kulonga bintu bilonga bantu bonso nansha bintu bisaka kisaka mwanda wa kusangaja Yehova i kilongwa kya lwitabijo.

¹⁴ Tulangulukilei bidi pa lusango lwa Carin: “Kitatyi kyābutwilwe wami mwana Don, ami ne wami mulume twadi twingidila ku ntanda ya bweni, kadi nadi nekishilula kwifunda Bible. Muntu yense mu kisaka wadi usaka ntume Don kwetu ku njibo mwanda wa bakamulele kudi bambutwile bami kufika’nka ne byotukekala na tumweno senene.” Carin pa kunena’mba ukalela Don aye mwine, babutule bandi ne wandi mulume kebamunena’mba i kivila ne kumusepa. Carin unena amba, “na bubine, kyaba kimo nkyadipo ngivwanije kibi kyadi mu kushiya Don na bambutwile bami mu myaka mityetye. Ino nadi ndyukile amba Yehova i mwitupe batwe bambutwile mwingilo wa kulela wetu mwana.” Carin pa kwimita monka, wandi mulume wa kubulwa kwitabija wamunene apulumune’dyo. Butyibi buyampe bubajinji bwakwete Carin bwakomeje lwitabijo lwandi, kadi pano waimanije mudi Yehova. Pano ba Carin ne wandi mulume ne babo bana badi na nsangaji ya kwikala bonso pamo. Shi Carin watumine wabo mwana umo nansha babidi mwanda wa kulelwa na bantu bakwabo, byadi bya kwikala muswelo mukwabo.

15, 16. (a) Sekununa myanda yemwenine kaka umo wāshilwe ukidi mwanuke. (b) Mwanda waka wakwete butyibi bwa kwiendeja mu muswelo mwishile na wa wandi mwana mwana-mukaji?

¹⁵ Kamoni umo witwa bu Vicky unena amba: “Nadi ndelelwe na nkambo mwana-mukaji mu myaka’tu mityetye, abo papo bambutwile bami bashale na nkasami mwana-mukaji. Kitatyi kyonaendele kudi bambutwile bami, muswelo onadi nebamwene washinta. Nkasami wadi mupēlelwe kwisamba nabo, kwibapamba bīpa ne kwikala nabo mu kipwano kya mpwaninine. Nemwene bu mupaluke kudi bambutwile bami kufika’nka ne pa bukulu, nadi mukomenwe kwibalombola milangwe yami. Ami ne nkasami twakulupije bambutwile betu amba tukebalela mu bununu bwabo. Inoko, nkebalelela’tu mwanda wa kuvuija kiselwa, ino aye nkasami ukebalela mwanda wa buswe.

¹⁶ Vicky unena’mba, “pano mama usakanga mutumine wami mwana mwana-mukaji mwanda wa amulele, enka na mwauntumine kudi inandi. Ino napelele na bunwa. Ami ne wami mulume tusakanga kutamija wetu mwana batwe bene mu mashinda a Yehova. Kadi ne mupele kona kipwano kyami kya mu mafuku a kumeso na wami mwana.” Vicky wamwene’mba muswelo umo muyampe i wa kutūla Yehova ne misoñanya yandi kumeso kwa bitungo bya kukimba lupeto ne kukimba bisakibwa bya kisaka. Yesu wānene patōkelela amba: “I kutupu ubwanya kwingidila bamfumwandi babidi,” Leza ne Bupeta.—Mat. 6:24; Div. 23:2.

YEHOVA ‘WESELANGA’ BUKOMO BWETU

17, 18. (a) Le bene Kidishitu badi nyeke na kya kulonga mu bika? (b) Le i bipangujo’ka byotukabandaula mu kishinte kilonda’ko?

¹⁷ Yehova Tata wetu i mulaye kwitukwasha twikale na bintu bine byotusakilwa kitatyi kyonso kyotutūla Bulopwe ne boloke bwandi pa kifuko kibajinji mu būmi bwetu. (Mat. 6:33) O mwanda bene Kidishitu ba bine badi nyeke na kya kulonga. Milao ya Yehova ya ‘kushitula dishinda,’ keilombepo kutyumuna misoñanya ya mu Bible, nansha shi tubatanwa na makambakano a muswelo’ka. (Tanga 1 Kodinda 10:13.) Shi tutengela Yehova ‘ne mutyima tutūkije,’ ne shi ‘tumukulupila’ na kumulomba tunangu ne buludiki ne kulonda mbila ne misoñanya yandi, nabya “ukekifikidijanga” pa mwanda wetu. (Ñim. 37:5, 7) Ukesela bukomo botulonga pambulwa budimbidimbi bwa kumwingidila’nka aye bu Mfumwetu umo kete wa bine. Shi tumutūle pa kifuko kibajinji, ‘uketwesela’ mu būmi.—Dingakanya na Ngalwilo 39:3.

¹⁸ Le i bika bibwanya kulongwa pa kulongolola bibi bilupukanga ku kwishiya? Le i matabula’ka mayampe otubwanya kutabula mwanda wa kuvuija bisakibwa bya bisaka byetu pampikwa kwishiya nabyo? Ne i muswelo’ka otubwanya kukankamika bakwetu na buswe bakwate butyibi buyampe mu uno mwanda? Kishite kilonda’ka kikabandaula bino bipangujo.

[Kunshi kwa dyani]