Kifundwa 8

Būmi bwa Kisaka Busangaja Leza

I kifuko’ka kidi’po mulume mu kisaka? (1)

Lelo mulume ufwaninwe kushikata namani na wandi mukaji? (2)

I biselwa’ka bidi na shabana? (3)

I mwingilo’ka udi na mukaji mu kisaka? (4)

Leza usakanga bika kudi bambutwile ne kudi bana? (5)

I kika kinena Bible pa kusansana ne pa dilubu? (6, 7)

1. Bible unena amba mulume ye mutwe wa kyandi kisaka. (1 Kodinda 11:3) Mulume ufwaninwe kwikala na mukaji umo kete. Bafwaninwe kwikala besonge senene mungya bijila.​—1 Temote 3:2; Tetusa 3:1.

2. Mulume ufwaninwe kuswa wandi mukaji’nka na mwaiswedile aye mwine. Ufwaninwe kushikata nandi biyampe pamo na mwikadile Yesu na balondi bandi. (Efisesa 5:25, 28, 29) Kafwaninwepo nansha dimo kukupila wandi mukaji nansha kumususula shi mu muswelo’ka shi mu muswelo’ka. Ino ufwaninwe kumukwata na bulēme ne na mutyika.​—Kolose 3:19; 1 Petelo 3:7.

3. Shabana ufwaninwe kwingila bininge mwanda wa kukwatakanya kyandi kisaka. Ufwaninwe kusokola bidibwa, bivwalwa, ne njibo mwa kwikala na wandi mukaji ne bandi bana. Kadi shabana ufwaninwe kuvuija ne bisakibwa bya ku mushipiditu bya ba mu kyandi kisaka. (1 Temote 5:8) Utangidila kumeso mu kukwasha kyandi kisaka kifunde kuyuka Leza ne mpango Yandi.​—Kupituluka 6:4-9; Efisesa 6:4.

4. Mukaji ufwaninwe kwikala mukwashi muyampe wa wandi mulume. (Ngalwilo 2:18) Ufwaninwe kwangula wandi mulume mu kufundija bana ne mu kwibeija mingilo. (Nkindi 1:8) Yehova usakanga mukaji ekale kukwatakanya kisaka kyandi na buswe. (Nkindi 31:10, 15, 26, 27; Tetusa 2:4, 5) Ufwaninwe kulēmeka wandi mulume bulēme bukatampe.​—Efisesa 5:22, 23, 33.

5. Leza usakanga bana bakōkele babo bambutwile. (Efisesa 6:1-3) Usakanga bambutwile bafundije ne kulemununa babo bana. Bambutwile bafwaninwe kushikatyila pamo na babo bana ne kwifunda nabo Bible, kukwatakanya bisakibwa byabo bya ku mushipiditu ne bya mwiivwanino wabo wa mu mutyima. (Kupituluka 11:18, 19; Nkindi 22:6, 15) Bambutwile kebafwaninwepo nansha dimo kulemununa nansha kufundija babo bana na mutyima wa nketekete nansha na bulobo.​—Kolose 3:21.

6. Shi ba mulume ne mukaji abelubila, bafwaninwe kupima kulonda madingi a mu Bible. Bible witusoñanya kwikala na mutyima wa buswe ne kwilekela bilubo. (Kolose 3:12-14) Kinenwa kya Leza kekikankamikangapo kusansana amba o muswelo wa kupwija tumyanda tutyetutye. Ino mukaji ukokeja kutonga kusansana na wandi mulume enka shi (1) mulume upelanga na mutyima mūmu pototo kukwatakanya kyandi kisaka, (2) udi na bukalabale bukatampe bininge butūla ngitu ne būmi bwa wandi mukaji mu kyaka, ne (3) shi ukankajanga wandi mukaji bipitepite byakomenwa ne kutōta Yehova.​—1 Kodinda 7:12, 13.

7. Ba mulume ne mukaji bafwaninwe kwilamata enka abo bene bubidi kete. Makoji i bubi ku meso a Leza ne ku meso a mwine pobe. (Bahebelu 13:4) Kusambakana pamo na muntu kesongelwe nandi bo buluji bumo kete mungya Bisonekwa bwa kwilubwila, bupāna bwanapabo bwa kwisonga na ungi. (Mateo 19:6-9; Loma 7:2, 3) Yehova ushikilwe kumona bantu belubula pakubulwa buluji bwimanine pa Bisonekwa kupwa kebesonge na muntu ungi.​—Malaki 2:14-16.

[Bifwatulo pa paje 16, 17]

Shabana wa buswe usasaketanga kyandi kisaka ku ngitu ne ku mushipiditu

[Kifwatulo pa paje 17]

Leza usakilanga bambutwile kufundija babo bana ne kwibalemununa