Tunangu Twa Mwa Kwikadila na Nsangaji mu Kisaka

Balume, Sanswai Bakaji Benu

“Balume nabo bafwaninwe kusanswa bakaji babo pamo bwa imbidi yabo abo bene. Muntu usenswe wandi mukaji wisenswe aye mwine, mwanda i kutupu muntu ushikilwe umbidi wandi aye mwine, ino wiudishanga ne kwiulela na buswe.”​—BENE EFISESA 5:28, 29.

Mulume, i mutwe wa kisaka. (Bene Efisesa 5:23) Inoko mulume muyampe kadipo na kasumalomo nansha kōminija. Ukwete wandi mukaji na bulēme ne kuvuija bisakibwa byandi bya ku ngitu ne mu ñeni. Kadi uloñanga bukomo bwa kumusangaja ne kuleka kumuningila alonge byasaka. (Bene Fidipai 2:4) Wisambanga nandi pampikwa kafinda ne kumuteja paesamba. Kamulobelangapo “bulobo bulula bululu,” nansha kumusanshija ku ngitu ne mu ñeni.​—Bene Kolose 3:19.

Bakaji, Lēmekai Balume Benu

“Mukaji . . . ufwaninwe kulēmeka mulumyandi bikatampe.”​—BENE EFISESA 5:33.

Shi mukaji ulēmekele wandi mulume ne kukwatakanya butyibi bwandi, ukaleta ndoe mu kisaka. Shi mulume walonga kilubo, aye kakamufutululapo, inoko ukekala nyeke na bulēme kadi utalala. (1 Petelo 3:4) Shi usaka kulombola wandi mulume myanda, utoñanga kitatyi kiyampe kya kumulombola’yo ne kwisamba nandi na bulēme.​—Musapudi 3:7.

Lamata Mwinē Pobe

“Mwana-mulume . . . ukalamata wandi mukaji, penepo bakekala ke ngitu imo.”​—NGALWILO 2:24.

Shi ba mwana-mulume ne mwana-mukaji abesonge, bapwananga kipwano kya mpwaninine mu kisaka. O mwanda ba mulume ne mukaji bafwaninwe kulonga bukomo bwa kuningija busongi bwabo na kwilombola bidi ku mutyima ne kwilongela tubintu tutyetutye na kanye. Bafwaninwe ne kwilamata na kuleka kulāla na muntu mukwabo. Kulāla na muntu mukwabo kusansanga bininge. Kupwanga kikulupiji, kadi kubwanya kupomona kisaka.​—Bahebelu 13:4.

Bambutwile, Fundijai Benu Bana

“Fundija mwana . . . dishinda dyafwaninwe kwenda’mo; nansha shi wanunupa kakasāsuka’mopo.”​—NKINDI 22:6, kunshi kwa dyani.

Leza i mupe bambutwile mwingilo wa kufundija babo bana. Ko kunena’mba, kwibafundija mwa kwiendejeja ne kwibapa kimfwa kiyampe. (Kupituluka mu Bijila 6:6, 7) Shi mwana wiendeja bibi, mbutwile wa tunangu kakamukalabelapo. Aye ukapeja “pa kwivwana, kwija pa kwisamba, kwija pa kukwatwa bulobo.” (Yakoba 1:19) Shi mbutwile wamone’mba ufwaninwe kulemununa mwana, ukamulemununa na buswe, ke na bulobopo.

Bana, Kōkelai Bambutwile Benu

“Banwe bana, kōkelai bambutwile benu . . . ‘Lēmeka shobe ne inobe.’”​—BENE EFISESA 6:1, 2.

Bana bafwaninwe kulēmeka bambutwile babo ne kwibalongela bintu na bulēme bukatampe. Shi bana balēmekele bambutwile babo, bakaleta nsangaji mivule mu njibo ne kukwasha kisaka kikale mu ndoe kadi mu bumo. Bana batame, balēmekanga bambutwile babo na kwibalela biyampe. Kwibalela biyampe i ne kwibalongolwela mobo nansha kwibapa kalupeto ka kwibakwasha.​—1 Temote 5:3, 4.