Mubwanya Kwikala Na Nsangaji Mu Kisaka

1, 2. Le Yehova usakanga bisaka bikale namani?

YEHOVA LEZA ye wāshilwile busongi bubajinji. Bible witusapwila’mba wālongele mwana-mukaji mubajinji “wāmuleta kudi mwana-mulume.” Adama wāsangele bininge ko kunena wānena’mba: “Uno’ko’ko’ko ye kikupa kya ku bikupa byami ne mwita wa ku mwita wami.” (Ngalwilo 2:22, 23) Kino kitulombola’mba Yehova usakanga boba besongele bekale mu nsangaji.

² Ino i kya bulanda, mwanda bantu bavule kebadipo na būmi bwa nsangaji mu kisaka. Inoko, mu Bible mudi misoñanya mivule ikwasha bonso ba mu kisaka mwa kwikadila biyampe ne kusangela pamo.​—Luka 11:28.

LEZA USAKA BALUME BALONGE BIKA?

3, 4. (a) Le mulume ufwaninwe kwikala namani na wandi mukaji? (b) Mwanda waka i kya mvubu ba mulume ne mukaji belekele?

³ Bible unena’mba mulume muyampe ufwaninwe kusanswa wandi mukaji ne kumulēmeka. Tubakulombe utange Efisesa 5:25-29. Mulume ufwaninwe nyeke kulongela wandi mukaji bintu na buswe. Ufwaninwe kumukinga, kumulela biyampe, kadi kafwaninwepo kumususula nansha dimo.

⁴ Ino le mulume ukalonga namani shi mukaji waluba? Balume i basoñanibwe amba: “Sanswai nyeke bakaji benu kadi kemwakibalobelai bulobo bulula bululu.” (Kolose 3:19) A balume, vulukai amba nenu mulubanga. Kadi shi musaka’mba Leza emulekele, nenu mufwaninwe kulekela benu bakaji. (Mateo 6:12, 14, 15) Shi ba mulume ne mukaji belekela na mutyima umo, nabya bakalengeja busongi bwabo bwikale bwa nsangaji.

5. Mwanda waka mulume ufwaninwe kulēmeka wandi mukaji?

⁵ Yehova usakanga mulume alēmeke wandi mukaji. Mulume ufwaninwe kuta mutyima bininge ku bisakibwa bya wandi mukaji. Uno i mwanda mukatampe. Shi mulume kekalapo biyampe na wandi mukaji, Yehova ubwanya kupela kwivwana milombelo yandi. (1 Petelo 3:7) Kintu kilengejanga muntu ekale wa mvubu ku meso a Yehova i buswe bwasenswe Leza. Kasenswepo’nka bana-balume, usenswe ne bana-bakaji bene.

6. Le kwikala “umbidi umo” kushintulula bika ku ba mulume ne mukaji?

⁶ Yesu wāshintulwile amba ba mulume ne mukaji “kebakidipo babidi, aa, ino ke ngitu imo.” (Mateo 19:6) Bakelamata abo bonso bubidi kadi kebafwaninwepo kwilamuka nansha dimo. (Nkindi 5:15-21; Bahebelu 13:4) Mu myanda ya kusambakena pamo, mulume ufwaninwe kulangila wandi mukaji, mukaji nandi ufwaninwe kulangila wandi mulume pampikwa kwisakila. (1 Kodinda 7:3-5) Mulume ufwaninwe kuvuluka’mba “i kutupu muntu ushikilwe umbidi wandi aye mwine, ino wiudishanga ne kwiulela na buswe.” Nanshi mulume ufwaninwe kusanswa ne kulela wandi mukaji na buswe. Kutabukidila, mukaji usakanga wandi mulume ekale nandi na kanye ne na buswe.​—Efisesa 5:29.

LEZA USAKA BAKAJI BALONGE BIKA?

7. Mwanda waka kisaka kisakilwa mutwe?

⁷ Kisaka kyonso kisakilwa mutwe, ko kunena’mba muntu wa kwikyendeja mwanda wa bengidile pamo. Bible unena mu 1 Kodinda 11:3 amba: “Mutwe wa mwana-mulume ense i Kidishitu; ne mutwe wa mwana-mukaji i mwana-mulume; ne kadi mutwe wa Kidishitu i Leza.”

8. Le mukaji ukalēmeka bininge namani wandi mulume?

⁸ Mulume yense ulubanga. Inoko shi mukaji ukwatakanya butyibi bwa wandi mulume ne kwingidila nandi pamo na mutyima umo, kisaka kyonso kikamwena’mo. (1 Petelo 3:1-6) Bible unena’mba: “Mukaji nandi ufwaninwe kulēmeka mulumyandi bikatampe.” (Efisesa 5:33) Le bikekala namani shi mulume kadipo mu kipwilo kimo na mukaji? Mukaji ufwaninwe’nka kumulēmeka bininge. Bible unena’mba: “Ne banwe bakaji nenu mo monka, kōkelai bininge balume benu, amba shi kudi bamo kebakōkelepo kinenwa, banekenibwe pampikwa kinenwa kupityila ku mwikadilo wa bakaji babo, mwanda bemwenanga abo bene mwikadilo wenu wampikwa disubi pamo ne bulēme bukatampe.” (1 Petelo 3:1, 2) Kimfwa kiyampe kya mukaji kibwanya kukwasha mulume evwanije ne kulēmeka lwitabijo lwa mukaji.

9. (a) Le mukaji ukalonga namani shi ketabijepo milangwe ya wandi mulume? (b) Le mu Tetusa 2:4, 5 i bape’mo bakaji madingi’ka?

⁹ Le mukaji ukalonga namani shi ketabijepo milangwe ya wandi mulume? Mukaji ufwaninwe kulombola milangwe yandi na bulēme. Kimfwa, Sala wānenene mwanda umo kewāsangejepo Abalahama, ino Yehova wānena Abalahama amba: “Mwivwane.” (Ngalwilo 21:9-12) Mukaji ufwaninwe kukwatakanya mulangwe wa mulume, mwanda ke divulepo dikakwata mulume mwine Kidishitu butyibi bwishile na byobya binena Bible. (Bilongwa 5:29; Efisesa 5:24) Mukaji muyampe ukwatakanyanga kisaka kyandi. (Tanga Tetusa 2:4, 5.) Shi mulume ne bana abamone mwaingidila na bukomo, bakamusanswa ne kumulēmeka bininge.​—Nkindi 31:10, 28.

10. Le Bible unena bika pa mwanda utala kusansana ne dilubu?

¹⁰ Kyaba kimo ba mulume ne mukaji bakwatanga bukidibukidi butyibi bwa kusansana nansha kwilubula. Inoko, Bible unena’mba “mukaji kafwaninwepo kusansana na mulumyandi,” ne amba “mulume kafwaninwepo kushiya mukajandi.” (1 Kodinda 7:10, 11) Kudi ngikadilo imo mikomo ibwanya kulengeja ba mulume ne mukaji basansane, inoko kusansana i butyibi bukatampe. Le dilubu nadyo? Bible unena’mba bubinga bumo kete bwa kwilubwila’po i enka shi mulume nansha mukaji walonga busekese.​—Mateo 19:9.

LEZA USAKA BAMBUTWILE BALONGE BIKA?

11. Le i bika bisakanga bana nakampata?

¹¹ A bambutwile, shikatai kitatyi kivule na benu bana. Benu bana badi nenu buya kutabuka kintu kyo-kyonso, basaka mwibafundije myanda ya Yehova.​—Kupituluka 6:4-9.

12. I bika bifwaninwe kulonga bambutwile mwanda wa kukinga babo bana?

¹² Ntanda ya Satana yendanga ibipila’ko bininge, o mwanda kudi bantu bamo bakimbanga kusanshija betu bana, enka ne kulāla nabo ku bukomo. Bambutwile bamo bakolelwanga kwisamba na babo bana myanda ya kusambakena pamo. Inoko bambutwile bafwaninwe kudyumuna babo bana banyeme bantu bakimba kwibasanshija nansha kulāla nabo ku bukomo. Kadi bafwaninwe ne kwibafundija bekale kutyina bano bantu. A bambutwile, kingai benu bana.a​—1 Petelo 5:8.

13. Mwanda waka bambutwile bafwaninwe kufundija babo bana?

¹³ Bambutwile badi na kiselwa kya kufundija babo bana mwa kwikadila. Le mukafundija benu bana namani? Bilomba kwibidija benu bana, kadi kemufwaninwepo kwibalemununa na kalobolobo ne kasumalomo. (Yelemia 30:11) Nanshi ke biyampepo kulemununa bobe bana podi mulobe. Mwanda binenwa byobe kebifwaninwepo kwikala bwa “kusaba kwa kipete,” ko kunena’mba bibasanshija. (Nkindi 12:18) Fundija bobe bana bevwanije mwanda waka bafwaninwe kukōkela.​—Efisesa 6:4; Bahebelu 12:9-11; tala Bilembwa bya ku Mfulo 30.

LEZA USAKA BANA BALONGE BIKA?

14, 15. Mwanda waka bana bafwaninwe kukōkela bambutwile?

¹⁴ Yesu wādi nyeke ukōkele Shandi, nansha ke pobyādi bikomo pene. (Luka 22:42; Yoano 8:28, 29) Yehova nandi usakilanga bana bakōkele bambutwile.​—Efisesa 6:1-3.

¹⁵ A bana, nansha shi mubamone amba i bikomo kukōkela bambutwile, vulukai amba shi mukōkele, nabya mubasangaja Yehova ne benu bambutwile.b​—Nkindi 1:8; 6:20; 23:22-25.

16. (a) Le Satana utompanga namani bankasampe balonge bibi? (b) Mwanda waka i biyampe mpata kupwana na balunda basenswe Yehova?

¹⁶ Dyabola wingidijanga balunda nobe ne bankasampe bakwabo mwanda wa kukutompa ulonge bibi. Satana uyukile amba kuno kuningilwa na bakwenu i kukomo kukomena. Kimfwa, Dina mwanā Yakoba mwana-mukaji, wādi na balunda kebādipo basenswe Yehova. Kino kyāletēle Dina ne kisaka kyabo makambakano mavule. (Ngalwilo 34:1, 2) Shi balunda nobe kebasenswepo Yehova, babwanya kukuningila ulonge bintu bishikilwe Yehova, bine bikakuletela makambakano mavule, abe, kisaka kyenu, ne Leza mwine. (Nkindi 17:21, 25) O mwanda i biyampe mpata kupwana na balunda basenswe Yehova.​—1 Kodinda 15:33.

MUBWANYA KWIKALA NA NSANGAJI MU KISAKA

17. I kiselwa’ka kidi na muntu ne muntu mu kisaka?

¹⁷ Shi bantu ba mu kisaka balonda bulombodi bwa Leza, bakatyepeja’ko tuvutakanya ne myanda. Nanshi shi wi mulume, sanswa mukajobe ne kumulongela bintu na buswe. Shi wi mukaji, lēmeka mulumyobe ne kukōkelelela bumutwe bwandi kadi iula kimfwa kya mwana-mukaji utelelwe mu Nkindi 31:10-31. Shi wi mbutwile, fundija bobe bana basanswe Leza. (Nkindi 22:6) Shi wi shabana, endeja kisaka kyobe “senene.” (1 Temote 3:4, 5; 5:8) Kadi banwe bana nenu, kōkelai bambutwile. (Kolose 3:20) Vulukai amba muntu ne muntu mu kisaka ubwanya kuluba, nanshi mwityepejei ne kwilomba lusa. Bine, mu Bible mudi bulombodi bwa Yehova ku muntu ne muntu mu kisaka.