Endelela Kuningija Buswe Bosenswe Yehova ne Bakwenu

1. Le i bubine’ka bowefundile powashilwile kwifunda Bible?

LELO ukivulukile kitatyi kyowashilwile kwifunda Bible? Ye uno watulumukile pa kujingulula’mba Leza udi na dijina. Padi watūkijibwe mutyima pa kuyuka’mba Leza kasusulangapo bantu mu kalunganyembo ka mudilo. Kadi ye uno wasangele pa kuyuka’mba ubwanya kukemona monka na baswe bobe bafwile ne kwikala nabo mu paladisa pano pa ntanda.

2. Le kutentekela pa kwifunda bubine bwa mu Bible, i kwendelela’ka kukwabo kowalongele? (Bene Efisesa 5:1, 2)

² Powaendelele kwifunda Kinenwa kya Leza, po pene waningijije’ko buswe bosenswe Yehova. Buno buswe bwakulengeje wingidije byowadi wifunda. Wakwete butyibi buyampe bukwatañene na misoñanya ya mu Bible. Walumbulwile būmi bobe mwanda wadi usaka kusangaja Leza. Pamo’nka bwa mwana mwaiwilanga mbutwile wa buswe, nobe waiwile Tata obe wa mūlu.—Tanga Bene Efisesa 5:1, 2.

3. I bipangujo’ka byotubwanya kwiipangula?

³ Tubwanya kwiipangula’mba: ‘Le buswe bonsenswe Yehova i buningile’ko pano kutabuka ponashilwile kumwingidila? Le tamba mbatyijibwa, mulangilo wami ne muswelo wami wa kulonga bintu wiifwaninanga’ko bininge na wa Yehova—nakampata mu mwanda utala kusanswa batutu ne bakaka?’ Shi “buswe bowadi nabo dibajinji” i butalale mu muswelo kampanda, kokatyumukwa mutyima. Kino kyātene ne bene Kidishitu ba mu myaka katwa kabajinji. Inoko Yesu kēbapelelepo, netu kaketupelepo. (Kus. 2:4, 7) Mwanda aye uyukile amba tubwanya kujokeja buswe botwadi nabo potwashilwile kwifunda bubine.

4. Le i bika byotusa kwisambila’po mu kino kishinte?

⁴ Mu kino kishinte, tusa kwisambila’mo pa muswelo otubwanya kwendelela kuningija buswe botusenswe Yehova ne bakwetu. Kupwa tusa kwisambila’mo ne pa byabuyabuya kampanda byotubwanya kumwena’mo batwe pamo ne bakwetu, shi tuningije buswe botusenswe Yehova ne batutu ne bakaka.

NINGIJA BUSWE BOSENSWE YEHOVA

5-6. Le i bikoleja’ka byēkondele na mutumibwa Polo mu mwingilo wandi, ino i bika byāmulengeje endelele kwingidila Yehova?

⁵ Mutumibwa Polo wādi na būmi bwa nsangaji mu mwingilo wa Yehova, inoko kwādi bikoleja bivule byaādi unenwe kunekenya. Divule Polo wādi wenda ñendo milampe, kadi kebyādipo bipēla kwenda ñendo mu kine kitatyi’kya. Kyaba kimo Polo paādi wenda ñendo, wādi “mu byaka bya mu minonga” ne “mu byaka bya bangivi.” Kyaba kikwabo bāmukupile ne kudi balwana nandi. (2 Ko. 11:23-27) Kadi banababo bene Kidishitu kebādipo nyeke bamufwija’ko pa bukomo bwaādi ulonga mwanda wa kwibakwasha.—2 Ko. 10:10; Fid. 4:15.

⁶ Le i bika byākweshe Polo endelele kwingidila Yehova? Polo wēfundile bivule pa bumuntu bwa Yehova kupityila ku Bisonekwa ne ku bintu byāemwenine mu būmi. Polo wākulupile amba Yehova Leza umusenswe. (Loma 8:38, 39; Ef. 2:4, 5) Kupwa nandi wāsanswa Yehova bininge. Polo wālombwele amba usenswe Yehova ‘na kwingidila bajila ne kwendelela kwibengidila.’—Bah. 6:10.

7. I muswelo’ka umo bidi otubwanya kuningija buswe botusenswe Yehova?

⁷ Tubwanya kuningija buswe botusenswe Yehova na kwifunda Kinenwa kyandi na kininga. Potanga Bible, longa bukomo bwa kujingulula bikufundija kisonekwa ne kisonekwa padi Yehova. Wiipangule amba: ‘Le ino nsekununi ilombola namani’mba Yehova unsenswe? Le impa bubinga’ka bwa kusanshilwa Yehova?’

8. Le milombelo ibwanya kwitukwasha namani tuningije buswe botusenswe Leza?

⁸ Muswelo mukwabo otubwanya kuningija buswe botusenswe Yehova, i na kulombela kitatyi ne kitatyi ne kumusapwila byonso bitudi ku mutyima. (Ñim. 25:4, 5) Yehova nandi ukalondolola milombelo yetu. (1 Yo. 3:21, 22) Kaka Khanh wa mu Azia, unena’mba: “Buswe bonsenswe Yehova bwadi bwimanine dibajinji pa buyuki, inoko buno buswe bwaningile’ko ponamwene muswelo waadi ulondolola milombelo yami. Kino kyanengeje nsake kulonga bintu bimusangaja.”b

NINGIJA BUSWE BOSENSWE BAKWENU

9. Le Temote wālombwele namani kwendelela kwandi mu mwanda utala kusanswa batutu ne bakaka?

⁹ Myaka kampanda pa kupita’po na pāikele Polo ke mwine Kidishitu, wētene na nkasampe muyampe witwa bu Temote. Temote wādi usenswe Yehova, kadi wādi usenswe ne bantu. Polo wāsapwidile bene Fidipai amba: “Nkidipo na muntu mukwabo wa milangwe na [ya Temote] ukata mutyima bya binebine ku myanda yenu.” (Fid. 2:20) Polo kādipo wisambila pano pa bwino bwa Temote bwa bu muntu utūla bintu mu ndudi nansha bwa bu muneni wa mu bantu bavule, inoko wātengelwe na buswe bukatampe bwa Temote ku batutu ne bakaka. Na bubine bipwilo byādi bipempula Temote, byādi bitengela bininge bupempudi bwandi.—1 Ko. 4:17.

10. Le kaka Anna ne wandi mulume balombwele namani buswe bobasenswe batutu ne bakaka?

¹⁰ Ne batwe netu tukimbanga miswelo ya kukwasha’mo batutu ne bakaka bene Kidishitu. (Bah. 13:16) Twisambilei’ko pa kimfwa kya kaka Anna, wesambīlwe’po mu kishinte kibadikile. Palongekele kimpumpu kikatampe, aye ne wandi mulume bakapempwile njibo ya kisaka kimo kya Kamoni, batana kimpumpu kyonakanye musaka wa njibo ya kino kisaka. Pa kino, bonso mu kisaka kebadipo na bisandi bitōka. Kaka Anna unena’mba: “Twaselele byabo bisandi, twebikenda, kupwa twakebalwija’byo bikome kadi bipupe senene. Ketwamwenepo amba kudi ne kintu kikatampe kyotwalonga, inoko kino i kilengeje tupwane nabo bininge kufika enka ne dyalelo.” Buswe busenswe kaka Anna ne wandi mulume batutu ne bakaka, bwebatonwene bebakwashe mu miswelo mipotoloke.—1 Yo. 3:17, 18.

11. (a) Le bakwetu beivwananga divule namani pa buswe botwibalombola? (b) Mungya Nkindi 19:17, le Yehova uloñanga’po namani kitatyi kyotulombola buswe?

¹¹ Shi tusenswe bakwetu ne kwikala nabo biyampe, divule dine bamonanga bukomo botulonga bwa kwiula mulangilo wa Yehova ne muswelo wandi wa kulonga bintu. Kadi babwanya kufwija’ko pa byotwibalongela kutabuka ne motwadi twibilangila. Kaka Khanh, otwesambilanga’po kala, uvulukanga bininge banabetu bamukweshe. Unena’mba: “Mfwijanga’ko bininge bakaka bonso badi bansela twende nabo mu busapudi. Badi bāya kunsela, bangita tukadye nabo byakudya, ne kunjokeja ku njibo. Pano ne mujingulule amba byebalombele bukomo pa kulonga namino. Kadi buswe bo bwebalengeje balonge’byo.” Shako, ke bonsopo baketufwija’ko pa byotwibalongela. Kaka Khanh unena pangala pa boba bamukweshe amba: “Nkimbanga kwibalubwila bintu biyampe byonso byobanongēle, ino nkiyukilepo kobashikata abo bonso. Inoko, Yehova ubwanya kwibalubwila’byo, kadi nombelanga ebalubwile’byo pa kyami kyaba.” Kaka Khanh udi na bubinga. Yehova umonanga nansha ke kilongwa kityetye kiyampe kyotulongela bakwetu. Wikimonanga bu kitapwa kilumbuluke ne bu mapu asa kulubula.—Tanga Nkindi 19:17.

12. Le batutu babwanya kulombola namani buswe bobasenswe banabetu mu kipwilo? (Tala ne kifwatulo.)

¹² Shi wi tutu, i muswelo’ka obwanya kulombola buswe bosenswe banabetu ne kulonga bintu mwanda wa kwibakwasha? Tutu umo nkasampe witwa bu Jordan waipangwile mukulumpe umo amulombole muswelo wabwanya kulongela’ko bivule mwanda wa kukwasha mu kipwilo. Mukulumpe wamufwijije’ko pa kwendelela kwandi, kupwa wamupa’ko madingi kampanda pa muswelo wabwanya kulongela’ko bivule. Kimfwa, walombwele Jordan anze kufika kumeso kwa kitatyi ku Njibo ya Bulopwe ne kwimuna bakwabo, kulondolola ku kupwila, kusapula kitatyi ne kitatyi na kisumpi kyabo, ne kukimba’ko miswelo mipotoloke ya kukwasha’mo bakwabo. Jordan pawaingidije ano madingi, kefundilepo’tu enka bwino bupya, ino waningijije’ko ne buswe bwasenswe batutu ne bakaka. Jordan wefundile amba shi tutu waikala mwingidi wa mingilo, kashilulangapo kukwasha bakwabo; inoko, wendelelalanga na kwibakwasha.—1 Tm. 3:8-10, 13.

13. Le buswe bwalengeje namani Tutu Christian abwanye monka bisakibwa bya kwingila bu mukulumpe?

¹³ Le tunene namani shi mafuku kunyuma wadi mwingidi wa mingilo nansha mukulumpe? Yehova uvulukanga mwingilo owaingile mafuku kunyuma ne buswe bwadi bukulengeja ulonge namino. (1 Ko. 15:58) Kadi umonanga buswe boendelela kulombola. Tutu umo witwa bu Christian watyumukilwe mutyima pobamutalwile madyese a bu mukulumpe. Inoko unena’mba: “Nakwete butyibi bwa kulonga byonso byombwanya mwanda wa kwingidila Yehova pa mwanda wa buswe bomusenswe—ekale ngidi na madyese nansha nkidipo nao.” Mwenda mafuku, watongelwe monka bu mukulumpe. Tutu Christian unena’mba: “Naselele bityetye mutyima kūlu pa kwingila monka bu mukulumpe. Inoko nakwete butyibi bwa amba, shi Yehova waitabija ñingile monka bu mukulumpe, pa mwanda wa lusa lwandi, nsa kwibwingila mwanda wa buswe bomusenswe aye ne batutu ne bakaka.”

14. Le i ñeni’ka yowaboila ku byanenene kaka umo wa mu Jeorji?

¹⁴ Kadi bengidi ba Yehova balombolanga buswe ku bantu bonso. (Mat. 22:37-39) Kimfwa, kaka Elena wa mu Jeorji unena’mba: “Dibajinji, kintu kimo kete kyadi kinengeja nsapule i buswe bonseswe Yehova. Inoko paningile’ko buswe bonsenswe Tata wami wa mūlu, ne buswe bonsenswe bantu nabo bwaningile’ko. Natompele kufwatakanya makambakano obadi bekonda nao ne kukimba myanda ibwanya kwibasangaja. Kitatyi kyonso kyonadi nangulukila pobadi uno muswelo, po pene nadi nsaka kwibakwasha.”—Loma 10:13-15.

BYABUYABUYA BIDI MU KUSANSWA BAKWETU

15-16. Monka mulombwela’byo kifwatulo, le i byabuyabuya’ka bidi mu kulombola buswe ku bakwetu?

¹⁵ Potulombola buswe ku banabetu, ke enkapo abo kete bamwenanga’mo. Pashilwile kipupo kya Corona, Tutu Paolo ne wandi mukaji bakweshe bakaka bavule banunu bayuke mwa kwingidijija bingidilwa byabo bya busendwe mwa kusapwila. Kaka umo wadi umona’mba i bikomo kwingidija kingidilwa kyandi, wabwenye kwikingidija. Wekingidije mwanda wa kwita babutule bandi batanwe ku Kivulukilo. Bantu makumi asamba mobadi batenwe’ko kupityila ku video! Uno kaka pamo ne babutule bandi bamwenine mu bukomo bwalongele Tutu Paolo ne wa kwandi. Mwenda mafuku, uno kaka walembēle Tutu Paolo amba: “Wafwa’ko ne kwitufundija batwe banunu. Nkendelela kuvuluka nyeke muswelo witutele Yehova mutyima ne muswelo owaingile bininge mwanda wa kwitukwasha.”

¹⁶ Myanda pamo bwa ino yafundije Tutu Paolo bufundiji bwa kamweno. Yamuvulwije amba buswe i bwa mvubu mpata kutabuka buyuki ne bwino bwa kibutwila. Uvuluka’mba: “Nadi ñingila bu mutadi wa kipindi. Dyalelo, najingulula’mba nansha shi batutu ne bakaka ke belwe mīsambo yonadi nena, bakivulukanga muswelo mupotoloke onadi nebakwasha.”

17. Le tumwenanga’mo namani batwe bene shi tulombola buswe?

¹⁷ Shi tulombola buswe ku bakwetu, batwe bene tumwenanga’mo mu muswelo oketwadipo tulangila. Tutu Jonathan, ushikatanga mu Nuvele-Zelande ubingija uno mwanda. Dya Mposo dimo kyolwa pokwadi dyuba dikomo, wamwene tutu umo pania usapula mu kipito bunka. Tutu Jonathan wakwata butyibi bwa kwanza kusapula na uno pania Dya Mposo dyonso kyolwa. Mu kine kitatyi’kya kajingulwilepo muswelo wakamwena mu kino kilongwa kyandi kiyampe. Tutu Jonathan unena’mba: “Mu kine kitatyi’kya, nkyadipo nsenswe kusapula. Inoko ponamwene muswelo wadi ufundija uno tutu pania ne bipa byadi bilupuka mu mwingilo wandi, byanengeje nsanswe mwingilo wa busapudi. Kadi nasokwele mulunda wankweshe ntame ku mushipiditu, nsanswe busapudi, ne kwikala pabwipi na Yehova.”

18. I bika bitusakilanga Yehova kulonga?

¹⁸ Yehova witusakilanga batwe bonso tuningije buswe botumusenswe ne botusenswe bakwetu. Monka motwefundila’kyo, tubwanya kuningija buswe botusenswe Yehova na kutanga Kinenwa kyandi ne kulangulukila’po, ne na kwisamba nandi kyaba kyonso mu milombelo. Tubwanya kuningija buswe botusenswe batutu ne bakaka na kwibakwasha mu miswelo mipotoloke. Shi buswe bwetu bubaningila’ko, tukapwana bininge na Yehova ne na batutu ne bakaka. Kadi buno bulunda bukalādila nyeke ne nyeke!