Bya Musubu Bibwanyanga pa Byobya Bibudilwe Banabetu

Batumoni ba Yehova bengilanga mingilo ya Leza ne kukwasha bantu mu matanda 200 ne kupita. Inoko kubwipi kwa matanda 35 mu ano matanda, ye abwanyanga kuleta ao mene byabuntu bya kwaluja lupeto lobalupula. Le penepa lupeto lulupula matanda a misokwe mityetye lwalujibwanga namani?

Kitango Kyendeji kya Batumoni ba Yehova kibandaulanga bisakibwa bya ku mushipiditu ne mingilo ya Batumoni kujokoloka ntanda yonso. Batutu ba ku kitango kyendeji batuñanga lupeto lwa kwingidija mu lupeto ludi’ko kala, ne kwilwingidija mu muswelo muyampe. Shi musambo ubatambula lupeto lwa byabuntu lupityile pa lobasakilwa pa kwingila mwingilo mu yabo ntanda, batumanga lolwa lwa musubu ku matanda keadipo na luvule. Mu uno muswelo tulondanga kimfwa kya bene Kidishitu babajinji, bādi bekwasha abo bene na bene amba “kwikale kwenzankana.” (2 Bene Kodinda 8:14) Bādi bengidija bya musubu byabo mwanda wa kubwanya pa bya bene Kidishitu badi na bityetye.

Le banabetu bobatuminanga lupeto lwa musubu kudi misambo mikwabo beivwananga namani? Kimfwa mu Tanzani, kipindi kya bantu badi’mo badyanga munshi mwa madolala abidi pa difuku; luno lupeto lwaingidijibwe mwanda wa kulongolola Njibo ya Bulopwe ipwidilanga’mo kipwilo kya Mafinga. Kipwilo kyalembele amba: “Tamba twiilongolola, kibalwa kya bantu bāya ku kupwila kibelundila’ko bininge! Bine, tubafwija’ko bulongolodi bwa Yehova bininge ne kisaka kya batutu ne bakaka pa buntu bwabo, bwine bwetukwasha twikale na kifuko kiyampe kya kutōtela’mo.”

Banabetu bamo mu Sri Lanka babudilwe byakudya pa mwanda wa kipupo kya COVID-19. Imara Fernando ne Enosh wandi mwana nkasampe, nabo kebakidipo na byakudya. Inoko pa mwanda wa byabuntu byatambile mu matanda makwabo, batambwile bukwashi bobadi basakilwa. Balembele amba: “Tubafwija’ko banabetu betulombola buswe mu bino bitatyi bikomo. Twi basangale bininge pa kwikala mu kino kisaka, kadi tulombelanga nyeke Yehova akwashe banabetu bonso mu ano mafuku a mfulo.”

Nansha shi batutu ne bakaka bashikatanga kwepi, bamwene amba i biyampe kwiabila na bakwabo bintu byobadi nabyo. Kimfwa, Enosh i mupunge kasanduku katyetye mwaleya kalupeto ka kutūla bu kyabuntu kya kukwasha bisaka bisakilwa bukwashi. Guadalupe Álvarez nandi ulombolanga buno buntu. Ushikete mu kibundi kya mu Meksike mudi bantu batyetye batambulanga mfutwa mityetye’tu kadi kemudipo bantu bapebwanga lupeto lwa kumwena’mo. Inoko uletanga byabuntu mwendele bukomo bwandi. Walembele amba: “Mfwijanga’ko Yehova pa buyampe bwandi ne buswe bwandi bwa ndamatyidile. Ndyukile amba byabuntu byami bityañwanga ku bya bakwetu ne kukwasha banabetu basakilwa bukwashi.”

Mabilo a misambo atumanga lupeto ku bifuko bisakilwa bukwashi, i masangale kwilutuma. Anthony Carvalho tutu wa mu Komite ya Musambo wa mu Brezile unena’mba, “Mu bula bwa myaka mivule, mwingilo wa mu yetu ntanda wadi usakilwa kukwatakanibwa na lupeto na matanda makwabo. Twemwenine kwilundila’ko kwa bantu pa mwanda wa kuno kukwatakanya kobetukwatakenye. Pano kubaikala kushinta mu myanda ya lupeto, kadi ketudi na dyese dya kukwasha bakwetu. Banabetu bamwene mwingilo wa busapudi busapulwa ntanda yonso, ne mwingilo obabwanya kwingila pamo bwa bana ba bwanga ba Yesu bepāne.”

Le Batumoni ba Yehova babwanya kukwasha banababo biyampe namani? Ke na kutumapo’tu lupeto ku misambo ya matanda makwabo, ino i na kutūla byabuntu bya mwingilo wa ntanda yonso. Babwanya kwibitūla mu kasanduku ka byabuntu ka pa kipwilo kalembelwe’po amba, “Mwingilo wa Ntanda Yonso,” nansha pa Entelenete mu donate.jw.org. Tufwijanga’ko bininge pa bino byabuntu byonso.