Twakwete Butyibi bwa Kwikala na Būmi bwa Bintu Bityetye

Ba Madián ne Marcela badi na būmi buyampe mu Medellín, mu Kolombi. Madián wadi na kaji ka mfutwa miyampe, kene kadi kebakwasha bashikate mu njibo miyampe. Inoko byobadi bengidi ba Yehova Leza, kudi kintu kimo kyebalengeje babandaule bintu byobatangidije kumeso. Bashintulula’mba: “Mu 2006 twatenwe ku kitango kya pa bula kya difuku dimo kyadi na mutwe wa mwanda unena’mba, ‘Ikala na Diso Ditūkanye.’ Mīsambo mivule yetukankamikile kwikala na būmi bwa bintu bityetye, mwanda wa kwingidila Yehova bininge. Potwatambile ku kitango, twajingulwile amba byotwadi tulonga byadi bishile bininge na byotwafundile. Twadi tupota bintu kyaba kyonso, kadi twadi na mapu mavule a kufuta.”

Pa kupwa kwivwanija uno mwanda, ba Madián ne Marcela bashilwile kwikala na būmi bwa bintu bityetye. Banena’mba: “Twashilwile kutyepeja madepanse. Twavilukila mu njibo mityetye, twapoteja wetu motoka, kupwa twapota motó.” Kadi, balekele kwenda ku mamangajini mwanda wa kutyina kutūlwa pa ditompo dya kwendelela kupota bintu. Bashilula kupityija kitatyi kivule mu kusapwila bakwabo myanda ya mu Bible. Kadi bapwene na balunda badi bengidila Yehova Leza na bupyasakane bu bapania ba pa bula.a

Bukidi bonka, ba Madián ne Marcela bakwata butyibi bwa kulonga bivule mu mwingilo wa Yehova, na kwenda mu kakipwilo katyetye ka kunja kadi kasakilwa bukwashi. Pa kuviluka, Madián walekele kandi kaji. Mukulu wandi wa kaji byakaivwanijepo buno butyibi, Madián walangulukile nandi amba: “Usokolanga lupeto luvule, ino le udi na nsangaji?” Mukulu wandi wa kaji wanena’mba aa, mwanda wadi na makambakano mavule akadipo ubwanya kupwija. Kupwa Madián wamusapwila’mba: “Kya mvubu, ke buvulepo bwa lupeto lotusokola. Ino i kusokola kintu kituletela bine nsangaji. Kintu kituletela nsangaji ami ne wami mukaji, i kufundija bantu myanda ya Leza. Kadi tusaka twikadile’ko monka na nsangaji, na kupityija kitatyi kivule mu uno mwingilo.”

Ba Madián ne Marcela i batane nsangaji ya bine mu kutūla mwingilo wa Leza pa kifuko kibajinji mu bwabo būmi. Mu ino myaka 13 yapita’i, bengidilanga mu bipwilo bisakilwa basapudi bavule dya kungala ne kushika kwa Kolombi. Kadi pano badi na nsangaji ya kwingila bu bapania ba pa bula.