Muludiki Udi Na Lupusa pa Bintu Byonso Bya Kipangila

Kingelengele kya Yesu kya kudisha bantu tununu na tununu kidi na lupusa lukatampe pa bantu. Ke banena’mba, “Uno’u na bubine i Mupolofeto wadi unenwe kwiya mu ino ntanda,” Meshiasa, kadi i muludiki muyampe. (Yoano 6:14; Kupituluka 18:18) O mwanda bantu abakimbe kumukwata bamubikike bu mulopwe.

Ino Yesu wayuka bilanga bantu. Wajimina mu bibumbo ne kusoñanya badi bana ba bwanga bamulonde lwa bwato. Bende kwepi? Bende dya ku Betesaida kupwa ke ku Kapanama. Yesu aye wekokela ku lūlu kwa bunka mwanda wa kulombela bufuku’bwa.

Apo kepatōkele kumeso kwa kweji kupona, Yesu wamone bwato dya kulampe. Kivula kikatampe kibatetula mantanki pa dijiba, papo batumibwa kebekonde na kuvua ‘mwanda kivula kyadi kīya mobenda.’ (Mako 6:48) Yesu watūka ku lūlu kalandala pa mema a mantanki wenda kobadi. Abapu kala “kuvua kintu kya makilometele atano nansha asamba.” (Yoano 6:19) Bana ba bwanga abamone Yesu bwa wibapita, kebela mabila na moyo amba: “I kimonwa!”​—Mako 6:49.

Yesu webalondolola na kwibasenga amba: “Kankamanai! I amiwa; kemwakikwatwai moyo.” Ino Petelo wamunena’mba: “A Mfumwami, shi i abewa, ngite nami ngiye kodi nandala pa mema.” Yesu amba: “Iya!” Ponka’po Petelo watūka mu bwato kalandala pa mema wenda kudi Yesu. Ino Petelo pa kutala kivula waivwana moyo kashika. Waela lwanji amba: “A Mfumwami, mpandije’po!” Yesu waolola kuboko ne kukwata Petelo, kupwa wamunena’mba: “Abe wa lwitabijo lutyetye, mwanda waka wadi kotatana, a?”​—Mateo 14:27-31.

Ba Petelo ne Yesu pa kukanda mu bwato ne kivula kibatalala. Bana ba bwanga abatulumuka, ino le bafwaninwe kutulumuka? Shi baivwanije “buluji bwa mikate,” kingelengele kyalongele Yesu kepaijije kya kudisha tununu twa bantu, kebadipo bafwaninwe nanshi kutulumuka palandala Yesu pa mema ne kutalaja kivula. Pano abevukwila kwadi ne kunena’mba: “Bine abe wi Mwanā Leza.”​—Mako 6:52; Mateo 14:33.

Na pano kala abafika ku dilungu diyampe didi na bumeni dya Ngenesaleta kunshi kwa Kapanama. Abashīka bwato ne kwiya ku nkula. Bantu ba koku ne koku abajingulula’mba i Yesu, kebamuletela babela. Bano babela abashilula kukoma na kutenga’tu manyamvwa a kivwalwa kyandi kya pangala.

Kino kibumbo kya bantu bemwenine kingelengele kya Yesu kya kudisha tununu ne tununu twa bantu kibajingulula’mba Yesu waenda. Tumato tutamba ku Tyibileasa pa kufika, bantu abakanda ne kwenda ku Kapanama kukimba Yesu. Abo pa kumumona abamwipangula’mba: “A Labi, le wafikile kuno kyaba’ka?” (Yoano 6:25) Yesu webatopeka na bubinga bonso, monka motusa kwikimwena.