Nadi “Ntala Bipangwa Byūmi”

Na bubine, Ezekyele wāmwene byelekejo bikatampe bya bañombe ba mapapa ne bantambo ba mitwe ya bantu bemene bu balami ku meso a mobo makatakata ne matempelo. Bino byelekejo byādi bitanwa konsokonso mu Ashidia wa kala ne mu Babiloni. Pamo bwa bonso bādi babandila, Ezekyele nandi wādi ubwanya kutulumuka pangala pa bino bipangwa bya kutendelwa, bimo byādi na bula bwa kintu kya mametele 6. Inoko, nansha shi bino bipangwa byādi bimweka bu bya bukomo namani, kebyādipo na būmi, byādi bya mabwe masōnge.

Inoko, bipangwa biná byāmwene Ezekyele abyo byādi “bipangwa byūmi.” Kuno shako ko kwishila kutendelwa! Kino kimonwa kyāikele na lupusa padi Ezekyele, wāfula ku kutela bishima “bipangwa byūmi” misunsa 11 mu ntwelelo ya bupolofeto bwandi. (Ezk. 1:5-22) Kimonwa kya bipangwa byūmi biná byendela pamo munshi mwa lupona lwa Leza kyādi kibwanya kulengeja Ezekyele ajingulule amba Yehova wendejanga bupangi bonso senene. Dyalelo, kino kimonwa kitutulumujanga pa bukatampe ne bukomokomo bwa Yehova ne pa mubaile bubikadi bwandi.​—1 Bi. 29:11.