KIFUNDWA 05
Mu Bible Mudi Musapu Witutumīne Leza
Yehova i mwitupe kyabuntu kya kutendelwa—kya mikanda 66 myelwe mu kitabo kimo, kitwa bu Bible. Padi ubwanya kwiipangula’mba: ‘Lelo Bible i mutambe kwepi? Le i ani mwinē’ye?’ Pa kulondolola bino bipangujo, tutalei bidi musapu udi mu Bible mowāfikīle kotudi.
1. Shi bantu bo bālembele Bible, le kyatelelwa’mba i wa Leza i kika?
Bible wālembelwe na balembi kubwipi kwa 40 mu bula bwa myaka kubwipi kwa 1 600, tamba mu 1513 Y.K. kufika mu 98 Y.M. Bano balembi i bantu bātambile mu bibidiji bivule. Nansha nankyo, bipindi byonso bya mu Bible i bikwatañane. Le i bibwanike’tu namani? I mwanda Leza ye Mwine ulembeje Bible. (Tangai 1 Bene Tesalonika 2:13.) Boba bālembele Bible, kebālembelepo milangwe yabo. Ino, “besambile bya kwa Leza monka mobadi baludikilwa na mushipiditu ujila.”a (2 Petelo 1:21) Leza wāingidije mushipiditu wandi ujila mwanda wa kupa bantu bukomo, kwibatonona balembe milangwe yandi.—2 Temote 3:16.
2. Lelo i ani ubwanya kumwena mu Bible?
“Mizo yonso ne bisaka ne ndimi ne bantu” babwanya kumwena mu myanda miyampe itanwa mu Bible. (Tangai Kusokwelwa 14:6.) Leza i mulonge bukomo amba Bible ekale’ko mu ndimi mivule kupita bitabo bikwabo byonso mu mānga ya bantu. Pano bantu bonso, nansha bekale kwepi, nansha banene ludimi’ka, babwanya kutanga Bible.
3. Le Yehova wālamine Bible namani?
Bible wālembelwe pa bintu kebijepo koneka, kimfwa biseba ne mbuba. Inoko bantu basenswe Bible, bādi bamutentula’nka kumutentula ku makasa. Nansha bantu ba lupusa byobātompele kujimankanya Bible, ino kudi bantu bakwabo bādi batūla’nka ne būmi bwabo mu kyaka mwanda wa kumulama. Yehova kalekelepo muntu nansha umo, kintu nansha kimo, kimukalakanye kwisamba netu. Bible unena’mba: “Kinenwa kya Leza wetu kilādilanga nyeke.”—Isaya 40:8.
LANGULUKA BININGE
Wifunde, uyuke muswelo wāpēle Leza bantu bukomo bwa kulemba Bible, muswelo waālamine’ye ne muswelo waāfikije’ye ku bantu.
4. Bible wasokola Mwinē’ye
Talai VIDEO. Kupwa, tangai 2 Temote 3:16, ne kwisambila pa bipangujo bilonda’bya.
Shi bantu bo bālembele Bible, mwanda waka utelwa bu Kinenwa kya Leza?
Le i byendele’mo kukulupila’mba Leza wādi ubwanya kupa bantu milangwe yandi balembe’yo?
Mulembi ubwanya kulemba mukanda, ino myanda ya kulemba yatamba kudi muntu mukwabo. Mo monka ne pano, bantu bo bālembele Bible, ino myanda ya kulemba yādi itamba kudi Leza
5. Bible wapande ku kujimankanibwa
Shi Bible i mutambe kudi Leza, nanshi aye mwine wadi wa kumulama. Mu bula bwa mānga, bantu ba lupusa batompele kujimankanya Bible. Bendeji ba bipwilo nabo badi batompa kumufya. Ino nansha byokwadi luno lwana enka ne kukimba kwipaibwa, bantu bavule batūdile būmi bwabo mu kyaka mwanda wa kukinga Bible. Pa kuyuka’ko muntu umo, talai VIDEO, ne kwisambila pa bino bipangujo:
Byowayuka’mba bantu balwile bininge pa kulama Bible, le kino kibakulengeja usake kutanga’ye? Mwanda waka?
Tangai Ñimbo ya Mitōto 119:97, ne kwisambila pa kino kipangujo:
Le i bika byatonwene bantu bavule batūle būmi bwabo mu kyaka mwanda wa kwalamuna ne kwabanya Bible?
6. Dibuku dya bantu bonso
Bible i kitabo kyalamunwe ne kwabanibwa bininge mu mānga ya muntu kupita bitabo bikwabo byonso. Tangai Bilongwa 10:34, 35, ne kwisambila pa bino bipangujo:
Mwanda waka Leza usaka Kinenwa kyandi kyalamunwe ne kwabanibwa konso namino?
I mwanda’ka utala Bible wakusangaja?
Kubwipi kwa bantu
Bonso
pano pa ntanda
babwanya kutanga Bible mu ludimi lobevwana
Bible udi’ko mu ndimi
3 000
ne kupita
mutuntulu nansha kipindi
Ke kulupulwe kintu kya Mabible
5 000 000 000
kutabuka mabuku makwabo onso
BANTU BAMO BANENANGA’MBA: “Bible i kitabo’tu kya kala kyālembelwe na bantu.”
Le abe ulanga’po namani?
I bukamoni’ka bulombola’mba Bible i Kinenwa kya Leza?
MU KĪPI
Bible i Kinenwa kya Leza, kadi Leza i mulonge bukomo amba bantu bonso bekale na Bible.
Pitulukai’mo
Lelo kunena’mba Leza wāpele bantu mushipiditu balembe Bible kushintulula bika?
Le i bika byakutulumuna pa muswelo upandile Bible, waalamwinwe ne waabanibwe?
Lelo ubeivwana namani pa kumona Leza ulonga buno bukomo bonso’bu mwanda wa kwisamba nobe?
KIMBA
Tanga mānga ya Bible yense—tamba ku bilembwa bya kala kufika ne ku bwalamuni bwa dyalelo.
Tala muswelo wapandile Bible ku kutambwa kwa miswelo isatu.
“Mānga ya Kupanda kwa Bible” (Kiteba kya Mulami, 1 Kweji 7, 2016)
Yukila’ko bikwabo pa byaka byētūdile’mo bantu pa kwalamuna Bible.
Bible wātentwilwe ne kwalamunwa misunsa mivule. Le ukayuka namani amba musapu wandi walaminwe biyampe?
“Le Bible Wāshintyilwe Nansha Kutweja’mo Bilubo?” (Kishinte kya pa Entelenete)
a Monka mokisa kushintulwilwa mu Kifundwa 07, mushipiditu ujila i bukomo bwa Leza bwingila.