KIFUNDWA 34
Le Tukalombola Namani Amba Tusenswe Yehova?
Le pano wimonanga bu ubapwana bininge na Leza tamba na powashilwile kwifunda Bible? Le usaka kuningija nyeke kipwano kyobe nandi? Shi i amo, nabya vuluka’mba Yehova pamona buswe bobe kwadi bwenda buningila’ko, nandi po pene ukakusanswa kadi ukakukwatakanya. Pene’pa, le ukamulombola namani amba wi mumusanswe?
1. Le tulombolanga namani Yehova amba twi bamusanswe?
Tulombolanga buswe bwetu kudi Yehova na kumukōkela. (Tangai 1 Yoano 5:3.) Kaningilangapo muntu nansha umo kumukōkela. Inoko i mupe muntu ne muntu mukenga wa kutonga kumukōkela nansha kupela. Mwanda waka? Mwanda Yehova usaka tukōkele “na mutyima umo.” (Bene Loma 6:17) Mu muneneno mukwabo, usaka abewa umukōkele, ke pa mwandapo ubaningilwa, ino i mwanda’tu umusenswe. Bipindi 3 ne 4 bya kino kitabo bidi’ko mwanda wa kukukwasha ulombole buswe bobe kudi Yehova na kulonga byobya bimusangaja ne kwepuka byobya bimufītyija mutyima.
2. Mwanda wa bika bibwanya kwikala bikomo kulombola buswe bwetu kudi Yehova?
“Masusu a moloke i mavule.” (Ñimbo ya Mitōto 34:19) Batwe bonso tulwanga na kubulwa kubwaninina kwetu. Kadi tutanwanga na myanda ya kukoma kwa misokwe, bukondame ne bikoleja bikwabo. Potutanwa na makambakano, bikokeja kwikala bikomo kotudi kulonga byobya bitulomba Yehova. Ne kino i mwanda’tu kulonga bibi kumweka bu kupēla. Inoko shi ulonge na kikōkeji byobya bikunena Yehova, ubalombola’mba wi mumusanswe kupita kintu kikwabo kyonso. Kadi nabya ubalombola lulamato kwadi, nandi ukekala wa lulamato kodi. Kadi kakakushiyepo.—Tangai Ñimbo ya Mitōto 4:3.
LANGULUKA BININGE
Bandaula, umone mwanda waka kikōkeji kyobe kidi na mvubu kudi Yehova, kadi umone ne bintu bibwanya kukukwasha wikale nyeke na kikōkeji kwadi.
3. Mwanda ukutala ne abe
Mungya mukanda wa mu Bible wa Yoba, Satana i musambile bantu, ke’nkapo Yoba kete, ino i bantu bonso basaka kwingidila Yehova. Tangai Yoba 1:1, 6–2:10, ne kwisambila pa bino bipangujo:
Mungya Satana, mwanda waka Yoba wādi mukōkele Yehova?—Tala Yoba 1:9-11.
Le Satana i musambile namani bantu bonso kubadila’mo ne abe?—Tala Yoba 2:4.
Tangai Yoba 27:5b, ne kwisambila pa kino kipangujo:
Lelo Yoba wālombwele namani amba usenswe binebine Yehova?
Yoba wālombwele amba usenswe Yehova na kushala mulamate kwadi
Tulombolanga’mba tusenswe Yehova na kushala balamate kwadi
4. Sangaja mutyima wa Yehova
Tangai Nkindi 27:11, ne kwisambila pa bino bipangujo:
Lelo Yehova wiivwananga namani shi ubaikala wa tunangu kadi ubamukōkela? Mwanda waka?
5. Ubwanya kushala na lulamato kudi Yehova
Buswe bwetu botusenswe Yehova bwitulengejanga twisambe myanda yandi ku bakwabo. Lulamato lwetu kwadi luketutonona tusapule nansha ke pobikomene. Talai VIDEO, ne kwisambila pa bino bipangujo:
Lelo ke bikutane wakomenwa kusapwila bantu bakwabo myanda ya Yehova?
Mu ino video, i bika byakweshe Grayson anekenye moyo wandi?
Biketupēlela kulamata Yehova shi tusenswe byobya byasenswe ne kushikwa byobya byashikilwe. Tangai Ñimbo ya Mitōto 97:10, ne kwisambila pa bino bipangujo:
Mungya myanda yowifundile, le i bintu’ka bimo bisenswe Yehova? Le i bintu’ka bimo byashikilwe?
Le ukabwanya namani kusanswa biyampe ne kushikwa bibi?
6. Tumwenanga mu kukōkela Yehova
Kukōkela Yehova kudi nyeke na kamweno. Tangai Isaya 48:17, 18, ne kwisambila pa bino bipangujo:
Molangila, Yehova uyukile nyeke bilumbuluke byotusakilwa? Mwanda waka ubanena nankyo?
Le kufika ne pano, wi mumwene namani mu kifundwa kyobe kya Bible ne mu kuyuka kowayuka Yehova, Leza wa bine?
BANTU BAMO BANENANGA’MBA: “Leza katelepo mutyima ku bilongwa byami.”
Le i kisonekwa’ka kyokengidija mwanda wa kulombola’mba byobya byotulonga bibwanya kusangaja Yehova nansha kumufītyija mutyima?
MU KĪPI
Ubwanya kulombola’mba usenswe Yehova na kumukōkela ne na kushala wa lulamato kwadi nansha shi ubatanwa na makambakano.
Pitulukai’mo
Le kimfwa kya Yoba kibakufundija bika?
Ukalombola namani amba usenswe Yehova?
Le i bika bikakukwasha ulamate nyeke Yehova?
KIMBA
Tala muswelo obwanya kulamata Yehova ne kipwilo.
Yukila’ko bivule Satana byasambīle bantu.
“Yoba Walama Bululame Bwandi” (Lelo I Musapu’ka Udi mu Bible? Kipindi 6)
Enka ne bana babwanya kulombola’mba basenswe Yehova; wimwene abe mwine.
Le bankasampe baningilwa na bakwabo babwanya namani kulama lulamato lwabo kudi Leza?