KIFUNDWA 37
Byobya Binena Bible pa Kaji ne Lupeto
Lelo kodi mwiivwane bwa abe walēmenenwa pa mwanda utala kaji ne lupeto? Bikokeja kulomba bukomo pa kuta mutyima ku bisakibwa byetu bya ku ngitu koku kadi tukimba kutōta Yehova mu muswelo wafwaninwe. Inoko Bible uleta’po madingi akokeja kwitukwasha.
1. Le Bible unena bika pa mwanda utala kaji?
Leza usaka tusangele kaji. Bible unena’mba “I kutupu kintu kipityile buya ku muntu kutabuka . . . kuloelelwa mingilo yandi mikomo.” (Musapudi 2:24) Yehova wingilanga bininge. Shi tumwiule na kwingila na kininga, nabya tukamusangaja kadi netu tukaloelelwa.
Kaji kadi na mvubu. Inoko ketufwaninwepo kwikaleka kekale na mvubu kutabuka butōtyi bwetu botutōta Yehova. (Yoano 6:27) Yehova ulaile amba shi tumubadikije kumeso, nabya uketupa bisakibwa byetu bya ku ngitu.
2. Kwikala na mumweno mujalale pa lupeto, le ye bika?
Bible witabije amba ‘lupeto lubwanya kukinga’ muntu, inoko alo lonkalonka kelubwanyapo kwituletela nsangaji. (Musapudi 7:12) O mwanda mwine, witupeleja kusanswa lupeto, inoko witukankamika ‘kusangela bintu bidi’ko pano.’ (Tangai Bahebelu 13:5.) Shi twikale kusangela byobya byotudi nabyo, nabya ketukesanshijapo na kutyumukwa mutyima kutamba ku kukimba bintu bivule. Tukepuka māpu ampikwa mvubu. (Nkindi 22:7) Kadi ketukatanwapo mu kyaka kya kukaya makayo a kwidya lupeto nansha kya kwikala na mutyima wa mpetempete na kwingidija tushinda twa ntyibwa.
3. I muswelo’ka otubwanya kwingidija lupeto na mutyima wa buntu?
Yehova i Leza wa buntu, netu tubwanya kumwiula shi tubaikala ba “buntu, ba mutyima wa kupāna.” (1 Temote 6:18) Tubwanya kwingidija lupeto lwetu na buntu na kukwatakanya kipwilo ne na kukwasha bantu bakwabo basakilwa bukwashi, nakampata, batōtyi netu. Kine kisangajanga Yehova, ke buvulepo bwa byotupāna, ino i kine kitutonona tupāne. Shi tupāne na buntu ne na mutyima umo, tukemwena nsangaji kadi tukasangaja ne Yehova.—Tangai Bilongwa 20:35.
LANGULUKA BININGE
Tala kamweno kadi mu kutūla kaji pa kifuko kyako ne kusangela byobya byodi nabyo.
4. Lēmeka Yehova mu muswelo oingila kaji
Kipwano kyetu na Yehova kyo kifwaninwe kuludika mumweno wetu otumona kaji. Talai VIDEO, ne kwisambila pa bino bipangujo:
Mu ino video, i bika byakutulumuna pa mwiendelejo wa Jason ne pa mumweno wandi wa kaji byaamwekeja kokwa kwaingila?
I bika byaaloñanga bilombola’mba watūlanga kaji pa kifuko kyako?
Tangai Bene Kolose 3:23, 24, ne kwisambila pa kino kipangujo:
Mwanda waka muswelo otumona kaji udi na mvubu?
Kaji kadi na mvubu. Ino ketufwaninwepo kwikaleka kekale na mvubu kupita butōtyi bwetu botutōta Yehova
5. Tumwenanga mu kusangela byobya byotudi nabyo
Bantu bavule baloñanga bukomo bwa kwibungila lupeto ponso pobabwanyinya. Inoko Bible witukankamika twikale na mumweno mukwabo. Tangai 1 Temote 6:6-8, ne kwisambila pa kino kipangujo:
Lelo Bible witukankamika tulonge bika?
Nansha shi tudi na tubintu tutyetye, tubwanya kwikala na nsangaji mikatampe. Talai VIDEO, ne kwisambila pa kipangujo kilonda’kya.
Kino kisaka nansha byokidi na bintu bityetye, i bika bikiletela nsangaji?
Ino le bikekala namani shi tudi na bintu bivule kadi tukisakila’ko bikwabo? Yesu wāletele kyelekejo kilombola kino kyaka. Tangai Luka 12:15-21, ne kwisambila pa kino kipangujo:
I ñeni’ka yowaboila ku kino kyelekejo kya Yesu?—Tala vese 15.
Tangai na kudingakanya Nkindi 10:22 na 1 Temote 6:10. Kupwa, mwisambilei pa bino bipangujo:
Molangila kya mvubu i kyepi? I kupwana na Yehova’ni nansha i kwikala na lupeto luvule? Mwanda waka ubanena nankyo?
I makambakano’ka atambanga mu kulondalonda lupeto?
6. Yehova uketupa byotusakilwa
Myanda itala kaji ne lupeto ibwanya kutūla lwitabijo lwetu mudi Yehova pa ditompo. Talai VIDEO pa kumona muswelo otubwanya kunekenya dino ditompo dya lwitabijo, kupwa mwisambilei pa kipangujo kilonda’kya.
Mu ino video, le i makambakano’ka atene uno tutu?
I bika byaalongele pa kunekenya senene ano makambakano?
Tangai Mateo 6:25-34, ne kwisambila pa kino kipangujo:
I bika bilaile Yehova ku boba bonso bamubadikija kumeso?
BANTU BAMO BANENANGA’MBA: “Mfwaninwe kwingila pa kukwatakanya kisaka kyami. Nkibwanyapo kwenda yenga ne yenga ku kupwila.”
I kisonekwa’ka kikukulupije amba kubadikija butōtyi bwa Yehova kumeso i butyibi buyampe mpata?
MU KĪPI
Kaji ka ku ngitu ne lupeto bidi na mvubu, inoko kebifwaninwepo nansha dimo kwitulabika mu mwingilo otwingidila Yehova.
Pitulukai’mo
Le i bika bikakukwasha wikale na mumweno mujalale pa kaji?
I muswelo’ka obwanya kumwena mu kusangela bintu byodi nabyo?
Ukalombola namani amba ukulupile mulao wa Yehova walaile kukwatakanya bantu bandi?
KIMBA
Tala umone shi Bible unenanga’mba lupeto i lubi.
“Lelo Lupeto Ye Kitako kya Bubi Bonso?” (Kishinte kya pa Entelenete)
Wifunde umone i kupāna kwa muswelo’ka kusanga-janga Leza.
“Lelo Bible Unena Bika pa Mwanda Utala Kupāna?” (Kishinte kya pa Entelenete)
Le makayo a kwidya lupeto keadipo na mwanda?
“Byobya Binena Bible pa Makayo a Kwidya Lupeto” (Langukai!, Kweji 3, 2015)
Tala bine byalengeje muntu umo wadi ukaya makayo a kwidya lupeto kadi wa manyengenyenge ashinte būmi bwandi.
“Nadi Mwitobwe Kwitāka pa Bampunda” (Kiteba kya Mulami, 1 Kweji 11, 2011)