MUTWE WA MWANDA WA PA KIBALU: LELO LEZA I NTAPANI?
Mwanda Waka Bantu Banenanga’mba Leza I Ntapani?
LELO kipangujo kya pa kibalu kya dino dipepala kibakutenga ku mutyima? Bamo kibebatenga, ino bantu bavule dyalelo beipangulanga shi Leza i ntapani—nansha kunena’mba i ntapani. Mwanda waka?
Bantu bamo bapandile ku bimpengele bya kipangila beipangulanga amba: “Mwanda waka Leza ulekele bino bintu bilongeka? Le katele’kopo mutyima? Nansha i ntapani?”
Bakwabo nabo bakambakanibwanga muswelo umo onka kitatyi kyobatanga Bible. Kitatyi kyobatanga nsekununi itala padi Noa ne Dilobe, beipangulanga’mba, ‘mwanda waka Leza wa buswe wāipaile bantu bonso nenki? Le i ntapani?’
Le nobe kodi mwiipangule kyaba kimo bino bipangujo? Le umona’mba kubwanyapo kulondolola boba beipangula shi Leza i ntapani? Nansha bikale namani, tala kino kipangujo kibwanya kukwasha.
MWANDA WAKA TUSHIKILWE BUTAPANI?
Mu kīpi, tushikilwe butapani mwanda tudi na mutyima witulombola biyampe ne bibi. Twi beshile bininge na banyema mu uno mwanda. Umpangi wetu wētupangile “mu kyelekejo kyandi.” (Ngalwilo 1:27, Dibuku Dijila) Le bino binenwa bishintulula bika? Bishintulula amba, Leza wētupele bukomo bwa kumwekeja ngikadilo yandi, misoñanya ya mu mwikadilo ne mutyima wandi ulombola biyampe ne bibi. Langulukila pa kino: Shi Leza wētupele mutyima ulombola biyampe ne bibi ne kadi tushikilwe butapani, le kino kekilombolapo amba Leza nandi ushikilwe’bo?
Bible ubingija’mba ushikilwe’bo, mwanda Leza witukulupija mu Bible amba: “E monka muzunzwidilwe ne mashinda ami nao pangala pa mashinda enu, ne mifwatakanyo yami nayo pa mifwatakanyo yenu.” (Isaya 55:9) Shi tunena’mba Leza i ntapani, le ketunenangapo bishile na binena Bible—le bine ketudipo na batwe banena’mba mashinda etu adi pangala pa mashinda andi? I biyampe kuyuka bintu bivule kumeso kwa kunena uno muswelo. Padi tubwanya kwipangula’mba, shi Leza ke ntapanipo, mwanda waka bilongwa byandi bimweka bu bya butapani. Pa kutana malondololo, tubandaulei bidi mwine mushintulwila “ntapani.”
Shi twita muntu bu ntapani, tunenanga’mba udi na milangwe mityani. Ntapani i muntu usangela masusu a bakwabo nansha muntu katelepo mutyima ku byamalwa byabo. Nanshi, shabana ulemununa wandi mwana mwanda’tu wa kumusanshija i ntapani. Ino shabana ulemununa wandi mwana mwanda wa kumufundija nansha kumukinga i muyampe. Shi ketuyukilepo kine kyalongela muntu kintu kampanda, i bipēla kukomenwa kwivwanija kukanina kwandi kwa mutyima.
Tubandaulei’ko bidi bubinga bubidi bulengejanga bantu bamo balange’mba Leza i ntapani—bimpengele bya kipangila byotumona dyalelo ne butyibi bwa Leza botutanga mu Bible. Le bine bino bintu bilombola’mba Leza i ntapani?
[Kifwatulo pa paje 3]
Mungya kipangila, tudi na mutyima wa kulombola lusa ne kushikwa butapani