bipangujo bya Batangi
Le mutumibwa Polo paānenene’mba: “Kupityila ku bijila ami nafwile ku bijila” wādi ukimba kunena bika?—Ngt. 2:19.
Polo wālembele amba: “Kupityila ku bijila ami nafwile ku bijila, amba ngikale mūmi kudi Leza.”—Ngt. 2:19.
Byobya byālembele Polo byādi bikwatañene na mwanda mukatampe waātumīne bipwilo bya mu Ngalatea, mu polovenshi ya Loma. Bene Kidishitu bamo bādi’mo, bādi ke balonda byādi binena bafundiji babubela. Bano bana-balume bādi bafundija’mba, muntu pa kupanda unenwe kulonda Bijila bya Mosesa, nakampata kyokya kitala kutwejibwa kwisao. Inoko Polo wādi uyukile’mba, Leza kākidipo kadi usakila bantu ba lwitabijo kutwejibwa kwisao. Pa kulangulukila’po bininge wāpela buno bufundiji bwa bubela, kupwa wāningija lwitabijo lwa banababo mu kitapwa kya kinkūlwa kya Yesu Kidishitu.—Ngt. 2:4; 5:2.
Bible unena patōkelela amba shi muntu wafu, kakiyukilepo kintu nansha kimo kadi kakitalwepo na kintu nansha kimo. (Mus. 9:5) Polo paānenene’mba: “Ami nafwile ku bijila,” wādi ukimba kunena’mba Bijila bya Mosesa kebyākidipo kadi na lupusa pādi. Inoko Polo wādi ukulupile amba “waikele mūmi kudi Leza” kupityila ku lwitabijo lwaādi nalo mu kitapwa kya kinkūlwa.
Ngikadilo yādi’mo Polo yāshintyile “kupityila ku bijila.” Namani? Wāshintulwile’mba: “Muntu utelwanga bu moloke, ke pa mingilo ya bijilapo, aa, ino i enka pa lwitabijo mudi Yesu Kidishitu kete.” (Ngt. 2:16) Shako, Bijila byāingile mwingilo mukatampe bininge. Polo wāshintulwidile bene Ngalatea amba: “Byābwejibwe’ko mwanda wa kujilula kumweke patōka, enka ne bifika lutundu lwālailwe mulao’wa.” (Ngt. 3:19) Bine, Bijila byālombwele patōkelela’mba bantu ba bubi, bampikwa kubwaninina kebabwanyapo kulama Bijila mu muswelo mubwaninine, ne amba basakilwa kintu kya mfulo, kitapwa kibwaninine. Nanshi Bijila byātwele bantu kudi Kidishitu, “lutundu.” Muntu wādi ubwanya kumonwa na Leza bu moloke shi walombola lwitabijo mudi Yesu Kidishitu. (Ngt. 3:24) Polo wāfudile ku kunena namino, mwanda i Bijila byāmukweshe ekale na lwitabijo mudi Yesu. O mwanda Polo wānenene’mba, “nafwile ku bijila, amba ngikale mūmi kudi Leza.” Bijila kebyādipo monka na lupusa pādi, ino Leza ye wādi na lupusa pādi.
Polo wālembele ino milangwe ne mu mukanda waātumīne bene Loma. Wānenene amba: “A banabetu, ne banwe nenu mwafwile ku Bijila kupityila ku umbidi wa Kidishitu . . . Twi banyongololwe ku Bijila, mwanda twi bafwe ku byobya byadi bitukwete.” (Loma 7:4, 6) Kino kisonekwa ne kisonekwa kya Bene Ngalatea 2:19, bilombola’mba Polo kādipo wisambila pa kufwa kwa kipya-mambo watyibilwa mambo na Bijila. Inoko wādi wisambila pa kunyongololwa. Bijila kebyākidipo kadi na lupusa padi Polo ne pa bakwabo badi pamo bwa aye. Kwitabija mu kinkūlwa kya Kidishitu kwēbanyongolwele.