Mukanda wa Kumpala wa Kulondolola
21 Pashishe Satana* wakajuka bua kuluisha Isalele, kusakaye Davidi bua kubala bungi bua bena Isalele.+ 2 Nunku Davidi wakambila Yoaba+ ne bamfumu ba tshisamba ne: “Ndayi nubale bungi bua bena Isalele, kumbukila ku Bê-sheba too ne ku Dana;+ pashishe nulue kungambila bua mmanye bungi buabu.” 3 Kadi Yoaba wakamba ne: “Yehowa avudije tshisamba tshiende misangu lukama! Mfumu mukalenge wanyi, bobu bonso ki mbamane kuikala bena mudimu ba mukalenge wanyi anyi? Bua tshinyi mukalenge wanyi mmusue kuenza bualu ebu? Bua tshinyi mmusue kukebela Isalele dipila?”
4 Kadi dîyi dia mukalenge diakapita Yoaba bukole. Nunku Yoaba wakumbuka, kunyungulukaye Isalele mujima, pashishe kualukilaye ku Yelushalema.+ 5 Nunku Yoaba wakapesha Davidi bungi bua bantu bavuabu bafunde mêna. Isalele mujima uvua ne bantu muliyo umue ne binunu lukama, bikale ne miele ya mvita, ne Yuda uvua ne bantu binunu 470, bikale ne miele ya mvita.+ 6 Kadi kabavua bafunde mêna a bena Lewi ne a bena Benyamina munkatshi muabu to,+ bualu dîyi dia mukalenge divua dibi menemene kudi Yoaba.+
7 Kadi bualu ebu kabuvua busankishe Nzambi mulelela nansha kakese to, ke yeye kupesha Isalele dinyoka. 8 Pashishe Davidi wakambila Nzambi mulelela ne: “Ndi muenze mpekatu+ munene pandi muenze bualu ebu. Mpindieu, buikidila koku muena mudimu webe tshilema tshiende,+ bualu ndi muenze malu ne bupote bua bungi menemene.”+ 9 Pashishe Yehowa wakakula ne Gada,+ mumonyi wa bikena kumona wa Davidi wamba ne: 10 “Ndaku wambile Davidi ne: ‘Yehowa udi wamba ne: “Ndi nkutekela malu asatu. Sungula bundi ne bua kukuenzela.”’” 11 Nunku Gada wakaya kudi Davidi, kumuambilaye ne: Yehowa udi wamba nunku: ‘Sungula 12 biwikala musue bua kuikale bidimu bisatu bia tshiyole tshia nzala,+ anyi ngondo isatu ya baluishi bebe bakutshimuna padi eku muele wa mvita wa bena lukuna bebe ukupeta,+ anyi matuku asatu a muele wa mvita wa Yehowa, mmumue ne: tshipupu mu buloba,+ ne muanjelu wa Yehowa ulua ne kabutu+ mu buloba bujima bua Isalele.’ Mpindieu ela meji bua tshindi ne bua kuandamuna Eu uvua muntume.” 13 Ke Davidi kuambila Gada ne: “Mbintonde bikole menemene. Nkuluke koku mu tshianza tshia Yehowa, bualu luse luende ndunene menemene;+ kadi tshikuluki mu tshianza tshia muntu to.”+
14 Nunku Yehowa wakatuma tshipupu+ mu Isalele, kuenzabi bua ne: bantu binunu 70 ba mu Isalele bafue.+ 15 Kabidi, Nzambi mulelela uvua mutume muanjelu ku Yelushalema bua kumubutula; kadi pakavuaye pa kuenza nanku, Yehowa wakamona bualu ebu ne wakanyingalala* bua dikenga adi,+ ke yeye kuambila muanjelu uvua mulue ne kabutu ne: “Biakumbanyi!+ Mpindieu puekesha tshianza tshiebe.” Muanjelu wa Yehowa uvua muimane pabuipi ne muaba wa tshishipuidi wa Ônana+ muena Yebuse.+
16 Pavua Davidi mubandishe mêsu, wakamona muanjelu wa Yehowa muimane pankatshi pa buloba ne diulu muikale ne muele wa mvita+ mu tshianza mutangija ku Yelushalema. Davidi ne bakulu bakadiela panshi diakamue, kutuabu mpala panshi,+ bavuale bilamba bikayabale.+ 17 Davidi wakambila Nzambi mulelela ne: “Ki mmeme uvua muambe bua babale bungi bua bantu anyi? Meme ke uvua muenze mpekatu, ne meme ke uvua muenze bibi;+ kadi mikoko eyi, tshidiyi mienze ntshinyi? Yehowa Nzambi wanyi, tshianza tshiebe tshinduishe meme ne nzubu wa tatuanyi; kadi kutuminyi tshisamba tshiebe tshipupu etshi to.”+
18 Nunku muanjelu wa Yehowa wakambila Gada+ bua kuambila Davidi bua abande ne ashile Yehowa tshioshelu muaba wa tshishipuidi wa Ônana muena Yebuse.+ 19 Ke Davidi kubanda bilondeshile dîyi dia Gada divuaye muakule mu dîna dia Yehowa. 20 Pine apu, Ônana wakakudimuka, kumonaye muanjelu; bana bende banayi bavuaye nabu bakasokoma. Dîba adi Ônana uvua ushipula ntete ya blé. 21 Pavua Davidi mubande kudi Ônana, Ônana wakatangila, kumonaye Davidi, yeye kupatuka diakamue muaba wende wa tshishipuidi, kuinaminaye Davidi mpala mutue panshi. 22 Davidi wakambila Ônana ne: “Nsumbisha* muaba webe wa tshishipuidi bua ngashilapu Yehowa tshioshelu. Uwunsumbishe ku mushinga wawu wonso, bua tshipupu tshidi tshikuate tshisamba tshimane.”+ 23 Kadi Ônana wakambila Davidi ne: “Uwangate bua wikale webe, ne mfumu mukalenge wanyi enze tshidi tshimpe kudiye. Mona, ndi mfila ngombe bua milambu ya kuosha ne tshintu tshia kushipula natshi+ bua nkunyi ne ntete ya blé bu mulambu wa ntete. Ndi mbifila bionso.”
24 Kadi mukalenge Davidi wakambila Ônana ne: “Tòo, ndi ne bua kuwusumba ku mushinga wawu wonso, bualu tshiakuangata tshintu tshiebe kutshilambula Yehowa anyi kulambula milambu ya kuosha indi tshiyi mutudile tshintu to.”+ 25 Nunku Davidi wakapesha Ônana nshekele* 600 ya or bua muaba wa tshishipuidi bilondeshile bujitu buayi. 26 Nunku Davidi wakashila Yehowa tshioshelu+ muaba au, yeye kulambula milambu ya kuosha ne milambu ya diumvuangana, ne wakabila Yehowa, yeye kumuandamuna ne kapia+ kavua kafumina mu diulu pa tshioshelu tshia mulambu wa kuosha. 27 Ke Yehowa kutumina muanjelu dîyi+ bua apingaje muele wende wa mvita mu tshizubu tshiawu. 28 Tshikondo atshi, pavua Davidi mumone ne: Yehowa uvua mumuandamune muaba wa tshishipuidi wa Ônana muena Yebuse, wakatungunuka ne kulambula milambu muaba au. 29 Kadi tshikondo atshi ntenta wa tshitendelelu wa Yehowa uvua Mose muenze mu tshipela ne tshioshelu tshia mulambu wa kuosha bivua muaba mutumbuke ku Gibeona.+ 30 Kadi Davidi kavua mukumbane bua kuyaku bua kuyukila ne Nzambi to, bualu uvua ne buôwa bua bungi bua muele wa mvita wa muanjelu wa Yehowa.