Yobo
32 Nunku, bantu basatu aba bakalekela kuteta bua kuandamuna Yobo, bualu uvua mutuishibue muvuaye yeye ne buakane.*+ 2 Kadi Elihu muana wa Balakela muena Buza+ wa mu dîku dia Lama wakumvua tshiji tshikole. Tshiji tshiende tshiakatemena Yobo bua muvuaye uteta kuleja muvuaye yeye* muakane pamutu pa Nzambi.+ 3 Uvua kabidi mukuatshile balunda basatu ba Yobo tshiji tshikole bualu kabavua bapete tshia kuandamuna, kadi bakamba muvua Nzambi muntu mubi.+ 4 Elihu utshivua muindile bua kuandamuna Yobo, bualu bobu bavua bakulumpe kudiye.+ 5 Pakamona Elihu ne: bantu basatu abu kabavua ne tshia kuandamuna, tshiji tshiende tshiakalunduka bikole. 6 Ke Elihu muana wa Balakela muena Buza kutuadijaye kuakula, wamba ne:
Nunku mvua mudikande ne kanemu konso,+
Ne tshivua mupete dikima dia kunuambila malu andi mumanye to.
7 Mvua muele meji ne: ‘Bidimu* biakule,
Ne bungi bua bidimu bumanyishe meji.’
8 Kadi nyuma udi munda mua bantu,
Mueyelu wa Wa Bukole Buonso, ke udi ubapesha lungenyi.+
9 Ki mbidimu nkayabi* bidi bivuija muntu muena meji,
Anyi bantu bakulumpe nkayabu badi bajingulula tshidi tshiakane to.+
10 Nunku ndi ngamba ne: ‘Ntelejayi,
Nennuambile panyi tshindi mumanye.’
11 Monayi! Ndi muindile mêyi enu;
Mvua anu nteleja ngelelu wenu wa meji+
Panuvua nukeba malu a kuamba.+
12 Mvua munuteleje bimpe menemene,
Kadi muntu nansha umue wa kunudi ki mmuleje ne: Yobo udi mu tshilema*
Anyi mumuandamune bua malu avuaye udibingisha nawu.
13 Nunku, kanuambi ne: ‘Tudi bapete meji;
Nzambi ke udi umubenga, ki mmuntu to.’
14 Uvuaye wamba mêyi ende ki mmeme to,
Nunku tshiakumuandamuna ne malu anudi nuenu bambe to.
15 Mbapete buôwa, kabena kabidi ne bia kuandamuna to;
Kabena ne tshikuabu tshidi
tshishale tshia kuambabu to.
16 Ndi muindile, kadi kabena
batungunuka ne kuakula to;
Mbimane anu muaba au, kabayi ne tshikuabu tshia kuandamuna.
17 Nunku, meme panyi nengandamune;
Meme panyi nengambe tshindi mumanye,
18 Bualu ndi muwule tente ne mêyi;
Nyuma udi munda muanyi udi unsaka.
19 Bia munda muanyi bidi bu mvinyo udi kayi ne muaba wa kupatukila,
Bu milondo ya mvinyo ya biseba mipiamipia idi yamba kutayika.+
20 Ngakule bua mpetaku disulakana!
Nenkangule mishiku yanyi ne nengandamune.