Yeshaya
47 Pueka, somba mu lupuishi,
Wewe muana wa bakaji wa Babilona utshidi kamana.+
Somba panshi muaba udi kawuyi nkuasa wa bukalenge,+
Wewe muana wa bakaji wa bena Kasada,
Bualu bantu kabakukubikila kabidi ne: mulengele ne muengeleka to.
2 Angata mabue a mpelu a ku bianza, upele bukula.
Umbusha tshilamba tshiudi mubuikile ku mutu.
Vula muntumpu webe, shiya mikolo yebe buashi.
Sabuka misulu.
3 Butaka buebe nebubuludibue.
Bundu buebe nebumueneshibue patoke.
Nendisombuele,+ ne muntu nansha umue kakuimana mu njila wanyi.*
5 Somba muaba au talalaa ne buela mu mîdima,
Wewe muana wa bakaji wa bena Kasada;+
Kabakukubikila kabidi ne: Mukalenge mukaji wa makalenge to.+
6 Mvua mufiikile bantu banyi munda bikole.+
Kadi wewe kuvua mubaleje luse to.+
Uvua muambike too ne bakulakaje mutshi wa tshikokedi wa bujitu.+
7 Uvua muambe ne: “Nengikale anu Mukalenge mukaji, bua kashidi.”+
Kuvua muteke malu aa ku muoyo;
Kuvua muelangane meji a muvua bualu ebu mua kujika.
8 Mpindieu teleja bualu ebu, wewe munangi wa masanka,+
Udi musombe mu bukubi, udi udiambila mu muoyo wende ne:
“Meme ke yeye, ne kakuena mukuabu nansha.+
Tshiakulua mukaji mukamba to.
Tshiakujimija bana nansha.”+
9 Kadi malu abidi aa neakukuate mu tshimpitshimpi, mu dituku dimue:+
Dijimija dia bana ne bukamba.
10 Uvua mueyemene malu mabi ebe.
Uvua muambe ne: “Kakuena udi ummona.”
Meji ebe ne dimanya diebe ke bidi bikupambuishe,
Ne wewe udi wamba mu muoyo webe ne: “Meme ke yeye, ne kakuena mukuabu nansha.”
11 Kadi dikenga nedikukuate,
Ne mipongo yebe ya ntekesha kayakudimanyika to.*
Buluishi nebukukuate; kuakubuepuka nansha.
Dibutuka dia tshimpitshimpi diutu kuyi muanji kumanya nedikukuate.+
12 Nunku, tungunuka ne majimbu ebe ne mipongo yebe ya bungi,+
Biudi mutate nabi katshia ku buana buebe.
Pamuapa udi mua kupetelaku dikuatshisha;
Pamuapa udi mua kutshinyisha nabi bantu.
13 Udi mupungile bua bungi bua bakupeshi ba ngenyi.
Bimane mpindieu, bakupandishe,
Aba badi batendelela diulu,* badi batangile mitoto,+
Aba badi bafila dimanya mu bikondo bia dibala dia ngondo
Didi ditangila malu alua kuudi.
14 Mona! Badi bu nsona.
Kapia nekaboshe.
Kabena mua kudipandisha* ku bukole bua ndimi ya kapia.
Aa ki mmakala bua kuota,
Ne etshi ki nkapia ka kusomba kumpala kuaku to.
15 Ke mualua bena mupongo wa ntekesha bebe kuudi,
Bobu baudi mutate nabu katshia ku buana buebe.
Nebalalakane, muntu ne muntu mu wende njila.*
Kakuakuikala muntu wa kukupandisha.+