Yelemiya
47 Edi ndîyi divua Yehowa muambile muprofete Yelemiya bua bualu bua bena Peleshete+ kumpala kua Palô kutshimunaye Gaza. 2 Mona tshidi Yehowa wamba:
“Tangila! Mâyi adi alua afumina ku nord.
Nealue mâyi a nkuaka mukole adi apasalala.
Ne neabuikile ditunga ne bintu bionso bidimu,
Tshimenga ne bantu badi basombelamu.
Bantu balume nebadile muadi,
Ne bantu bonso badi basombela mu ditunga adi nebele kabobo ka muadi.
3 Ku tshiona tshia mikuma ya bikono bia tubalu tuende,
Ku mutoyi wa matempu ende a mvita
Ne mukungulu wa nkata yende,
Batatu kabakukudimuka nansha panyima bua bualu bua bana babu,
Bualu bianza biabu bidi biteketa,
4 Bualu dituku didi dienda dilua nedibutule bena Peleshete+ bonso;
Nediumbushe ku Tulo+ ne Sidona+ muambuluishi yonso udi mushale.
5 Dibala* nedilue kudi Gaza.
Mbapuwishe Ashekelona.+
6 Aka! Muele wa mvita wa Yehowa!+
Newubenge kusomba talalaa too ne dîba kayi?
Pingana mu tshizubu tshiebe.
Ikisha ne shala mupuwe.
7 Mmunyi mudiwu mua kusomba talalaa
Pakadi Yehowa muwutumine dîyi?
Bua kuluisha Ashekelona ne buloba bua ku muelelu wa mbuu,+
Kuoku aku ke kudiye muwupeshe mudimu wa kuenza.”