Yehezekele

6 Dîyi dia Yehowa diakalua kabidi kundi, diamba ne: 2 “Muana wa muntu, tangija mpala webe ku mikuna ya Isalele ne amba mêyi a buprofete ayifikila. 3 Udi ne bua kuamba ne: ‘Nuenu mikuna ya Isalele, umvuayi dîyi dia Mukalenge Mutambe Bunene Yehowa: Monayi tshidi Mukalenge Mutambe Bunene Yehowa wambila mikuna minene, mikuna mikese, tusulu tua mâyi ne bibandabanda: “Monayi! Nennutumine muele wa mvita, ne nembutule miaba yenu mitumbuke. 4 Nebupule bioshelu bienu ne nebatshibule bioshelu bienu bia musenga wa manananshi,+ ne nengele bantu benu badi bashipibue panshi kumpala kua mpingu yenu ya muendi.*+ 5 Nengimanshe bitalu bia bantu ba Isalele kumpala kua mpingu yabu ya muendi, ne nentangalaje mifuba yenu ku nseke yonso ya bioshelu bienu.+ 6 Mu miaba yenu yonso inudi basombele, nebabutule bimenga+ ne nebupule miaba mitumbuke ne neyishale mibutula.+ Nebupule bioshelu bienu ne nebabitayishe, mpingu yenu ya muendi neyijimine, nebakose bioshelu bienu bia musenga wa manananshi, ne midimu yenu neyijimijibue. 7 Badibu bashipa nebakuluke munkatshi muenu,+ ne nenufike ku dimanya ne: meme ndi Yehowa.+

8 “‘“Kadi nenshiye bashadile, bualu bamue ba kunudi nebapanduke ku muele wa mvita munkatshi mua bisamba padibu banutangalaja mu matunga.+ 9 Badi bapanduka nebamvuluke munkatshi mua bisamba mudibu bakuatshibue.+ Nebajingulule ne: muoyo wanyi uvua musame bua muoyo wabu udi kawuyi ne lulamatu* uvua mumbuke kundi+ ne bua mêsu abu adi ajinga ne muoyo mujima* mpingu yabu ya muendi.+ Nebafuishibue bundu bua bubi buabu buonso ne malu mabi onso adibu benze, ne nebabikine.+ 10 Nebafike ku dimanya ne: meme ndi Yehowa, kabidi ne: mêyi amvua mfuna bua kubatumina dikenga edi kaavua a patupu to.”’+

11 “Monayi tshidi Mukalenge Mutambe Bunene Yehowa wamba: ‘Tutayi bianza bienu, kumayi dikasa dienu panshi ne kemayi bua bubi buonso ne malu mabi onso menza kudi nzubu wa Isalele, bualu nebakuluke ku muele wa mvita, ku tshiyole tshia nzala ne ku tshipupu.+ 12 Muntu udi kule neafue ku tshipupu, muntu udi pabuipi neakuluke ku muele wa mvita, ne muntu yonso udi mupanduke ku bintu ebi, udibu bashiye neafue ku tshiyole tshia nzala; ne nembatumine tshiji tshianyi tshikole tshionso.+ 13 Nenufike ku dimanya ne: meme ndi Yehowa,+ pikala bashipibue babu balale munkatshi mua mpingu yabu ya muendi ku nseke yonso ya bioshelu biabu,+ pa mukuna wonso mutumbuke, pa nsongo yonso ya mikuna, muinshi mua mutshi wonso udi musampile bikole, ne muinshi mua matamba a mitshi minene muvuabu balambuile milambu ya dipembu dimpe* bua kutuyisha mpingu yabu yonso ya muendi.+ 14 Nemboluele tshianza tshianyi bua kubaluisha ne nembutule buloba, ne miaba yabu yonso ya kusombela neyishale munda mutupu kupita tshipela tshidi pabuipi ne Dibela. Nebafike ku dimanya ne: meme ndi Yehowa.’”