Mukanda wa Kumpala wa Kulondolola
17 Diakamue pavua Davidi musombe mu nzubu* wende yeye, wakambila muprofete Natana+ ne: “Tangila, meme ndi musombele mu nzubu wa mitshi ya sedre+ padi mushete wa tshipungidi tshia Yehowa wowu musombe mu bilamba bia ntenta.”+ 2 Natana wakandamuna Davidi ne: “Enza tshionso tshidi mu muoyo webe, bualu Nzambi mulelela udi nebe.”
3 Anu butuku abu, dîyi dia Nzambi diakalua kudi Natana diamba ne: 4 “Ndaku, wambile muena mudimu wanyi Davidi ne: ‘Yehowa udi wamba ne: “Ki nguewe wangibakila nzubu wa meme kusombela to.+ 5 Bualu tshiena musombele mu nzubu katshia ku dituku dimvua mupatule Isalele mu Ejipitu too ne lelu, kadi mvua ngenda ngumbuka mu ntenta nya mu mukuabu, ngumbuka mu ntenta wa tshitendelelu nya mu mukuabu.*+ 6 Tshikondo tshionso tshimvua muende ne Isalele mujima, mvuaku muambile umue wa ku balumbuluishi ba Isalele bamvua muteke bua kulama tshisamba tshianyi dîyi ngamba ne: ‘Bua tshinyi kuena mungibakile nzubu wa mitshi ya sedre’ anyi?”’
7 “Mpindieu ambila muena mudimu wanyi Davidi ne: ‘Yehowa wa biluilu udi wamba ne: “Mvua mukuangatshile mu mpata ya kudishila nyama, muaba uuvua usaka mikoko, bua wewe kulua mulombodi wa tshisamba tshianyi tshia Isalele.+ 8 Nengikale nebe kuonso kuudi uya,+ ne nenjimije* bena lukuna bebe bonso kumpala kuebe;+ nengenze bua dîna diebe dilue bu dîna dia bantu banene ba pa buloba.+ 9 Nensunguile tshisamba tshianyi tshia Isalele muaba, nembatekamu, nebasombelamu ne kabakubatatshisha kabidi to; ne bantu babi kabakubakengesha* kabidi bu muvuabu benze kale,+ 10 katshia dituku dimvua muteke balumbuluishi ku mutu kua tshisamba tshianyi tshia Isalele.+ Nentshimune bena lukuna bebe bonso.+ Ndi nkuambila kabidi ne: ‘Yehowa neakuenzele nzubu.’*
11 “‘“Padi matuku ebe atua ku ndekelu ne wewe muye bua kuikala ne bankambua bebe, nenjule muanebe* wa balume walua panyima pebe, umue wa ku ndelu yebe,+ ne nenjadike bukalenge buende bikole.+ 12 Yeye ke wangibakila nzubu,+ ne nenjadike nkuasa wende wa bukalenge bikole bua kashidi.+ 13 Nendue tatuende ne yeye nealue muananyi.+ Tshiakumbusha dinanga dianyi dia lulamatu kudiye+ mushindu umvua mudiumbushe kudi muntu uvua kumpala kuebe to.+ 14 Nengenze bua imane mu nzubu muanyi ne mu bukalenge buanyi bua kashidi,+ ne nkuasa wende wa bukalenge neashalaku kashidi.”’”+
15 Natana wakambila Davidi mêyi onso aa ne wakamulondela tshikena kumona tshionso etshi.
16 Pakumvua mukalenge Davidi nanku wakalua, kusombaye kumpala kua Yehowa, kuambaye ne: “Yehowa Nzambi wanyi, meme ndi nganyi? Nzubu wanyi udi ne mushinga kayi bua muudi muye nanyi kule nunku?+ 17 Nzambi wanyi, anu bu ne: ki mbikumbane, udi wakula kabidi bua nzubu wa muena mudimu webe too ne mu matuku atshilualua kule menemene;+ Yehowa Nzambi wanyi, udi muntangile kabidi anu bu ne: ndi muntu udibu ne bua kubandisha* kabidi. 18 Muena mudimu webe Davidi neakuambile kabidi tshinyi bua muudi muntue mushinga paudi wewe mumanye bimpe muena mudimu webe nunku?+ 19 Yehowa wanyi, bua bualu bua muena mudimu webe ne mu diumvuangana ne muoyo webe* udi muenze malu manene onso aa pa kuleja bunene buebe.+ 20 Yehowa wanyi, kakuena mukuabu bu wewe,+ ne kakuena Nzambi pa kumbusha wewe;+ malu onso atudi bumvue ne matshi etu adi ajadika bualu ebu. 21 Ntshisamba kayi tshikuabu pa buloba tshidi bu tshisamba tshiebe tshia Isalele?+ Nzambi mulelela uvua muye ne mubapikule bu bantu bende.+ Wewe uvua mudipetele lumu ku malu manene adi akemesha auvua muenze,+ wipata bisamba kumpala kua tshisamba tshiebe+ tshiuvua mupikule mu Ejipitu. 22 Uvua muvuije tshisamba tshiebe tshia Isalele tshisamba tshiebe bua kashidi;+ ne wewe Yehowa, uvua mulue Nzambi wabu.+ 23 Mpindieu Yehowa wanyi, dilaya diudi muenze bua muena mudimu webe ne nzubu wende dikale dia kueyemenyibua bua kashidi, ne enzaku anu bu muudi mulaye.+ 24 Dîna diebe dishalaku* bua kashidi ne ditumbishibue+ bua kashidi, bua bantu bambe ne: ‘Yehowa wa biluilu, Nzambi wa Isalele, udi Nzambi kudi Isalele,’ ne nzubu wa muena mudimu webe Davidi ajadikibue bikole kumpala kuebe.+ 25 Bualu wewe Nzambi wanyi, udi mubuluile muena mudimu webe dijinga diebe dia kumuenzela nzubu.* Ke bualu kayi muena mudimu webe udi ne dishindika dia kuenza disambila edi kuudi. 26 Mpindieu, Yehowa wanyi, wewe udi Nzambi mulelela, ne udi mulaye malu mimpe aa bua muena mudimu webe. 27 Nunku bikusankishaku bua kubenesha nzubu wa muena mudimu webe, ne atungunuke kumpala kuebe bua kashidi, bualu wewe Yehowa udi mubeneshe, ne nzubu eu mmubeneshibue bua kashidi.”