Yelemiya

19 Mona tshiakamba Yehowa: “Ndaku, usumbe mulondo kudi mufumbi.+ Wangate bamue bakulu ba bantu ne bamue bakulu ba bakuidi, 2 ne upatuke uye ku Tshibandabanda tshia Muana wa Hinoma,+ ku tshibuelelu tshia Tshiibi tshia Biyoyi. Umanyishaku mêyi andi nkuambila. 3 Newambe ne: ‘Umvuayi dîyi dia Yehowa, nuenu bakalenge ba Yuda ne nuenu badi basombele mu Yelushalema. Monayi tshidi Yehowa wa biluilu, Nzambi wa Isalele, wamba:

“‘“Nkadi pa kutuma dikenga muaba eu, ne matshi a muntu yonso udi umvua bualu buadi neasunsume. 4 Mbualu bavua bandekele+ ne bavuije muaba eu kawutshiyi kumanya.+ Badi balambuila nzambi mikuabu ivuabu bobu ne bankambua babu ne bakalenge ba Yuda kabayi bamanye milambu muaba eu, ne mbuwuje muaba eu ne mashi a bantu badi kabayi ne bualu.+ 5 Bavua bibake miaba mitumbuke ya Bâla bua kuoshabu bana babu mu kapia bu milambu ya kuosha mijima bua Bâla,+ bualu bumvua tshiyi mubatumine dîyi bua kuenza anyi muambe ne butu mene kabuyi nansha buanji kunduila ku muoyo.”’*+

6 “‘“Nunku monayi! matuku adi alua,” ke mudi Yehowa wamba, “ikalabu kabayi mua kubikila kabidi muaba eu ne: Tofete anyi Tshibandabanda tshia Muana wa Hinoma, kadi ne: Tshibandabanda tshia Dishipangana.+ 7 Nempangishe malu adi Yuda ne Yelushalema balongolola bua kuenza muaba eu, ne nembakuluishe ku muele wa mvita kumpala kua bena lukuna babu ne ku tshianza tshia badi bakeba kuangata muoyo wabu.* Nemfile bitalu biabu bu biakudia kudi nyunyi ya muulu ne kudi nyama ya pa buloba.+ 8 Nemvuije tshimenga etshi tshintu tshidi tshikuatshisha buôwa ne tshintu tshia kuelela muonzo. Muntu yonso udi upitshilamu neashale mutangile ne buôwa ne neele muonzo bua makenga atshi onso.+ 9 Nengenze bua badie munyinyi wa bana babu ba balume ne ba bakaji, ne nebadie muntu ne muntu munyinyi wa mukuende, bua bualu bua ditshintshimika ne dipanga tshia kuenza padibu babajingile kudi bena lukuna babu ne kudi bantu badi bakeba kuangata muoyo wabu.”’*+

10 “Pashishe utayishe mulondo mu mêsu a bantu badi baya nebe, 11 ne ubambile ne: ‘Monayi tshidi Yehowa wa biluilu wamba: “Eu ke mushindu ungatayisha tshisamba etshi ne tshimenga etshi, anu bu muntu udi utayisha dilongo dia mufumbi kakuyi mushindu wa kudilongolola kabidi; ne nebajiike bantu bafue mu Tofete too ne pikalaku kakutshiyi kabidi muaba wa kubajiika.”’+

12 “‘Ke tshingenzela muaba eu ne bantu badi basombelamu,’ ke mudi Yehowa wamba, ‘bua kuvuija tshimenga etshi bu Tofete. 13 Nzubu ya mu Yelushalema ne nzubu ya bakalenge ba Yuda neyilue mikoya anu bu muaba eu, Tofete,+ eyowa, nzubu yonso miena misaka ivuabu balambuile musumba wonso wa bia mu diulu milambu+ ne ivuabu bapongoluelapu nzambi mikuabu milambu ya bia kunua.’”+

14 Pavua Yelemiya mualukile ufuma ku Tofete kuvua Yehowa mumutume bua kuamba mêyi a buprofete, wakimana mu lubanza lua nzubu wa Yehowa, kuambilaye bantu bonso ne: 15 “Monayi tshidi Yehowa wa biluilu, Nzambi wa Isalele, wamba: ‘Monayi ndi ntumina tshimenga etshi ne bimenga biatshi bionso dikenga dionso dindi muambe bua bualu buatshi, bualu bavua babenge bua kutumikila mêyi anyi ne mutu mukole.’”*+