Yehezekele
7 Dîyi dia Yehowa diakalua kabidi kundi, diamba ne: 2 “Kadi wewe, muana wa muntu, mona tshidi Mukalenge Mutambe Bunene Yehowa wambila buloba bua Isalele: ‘Nshikidilu! Nshikidilu wafiki ku ntengu inayi ya buloba. 3 Nshikidilu wafiki mpindieu kuudi, nenkutumine tshiji tshianyi, nenkulumbuluishe bilondeshile njila yebe ne nenkuase tshilumbu bua bienzedi biebe bibi bionso. 4 Dîsu dianyi kadiakukumvuila luse; tshiakukumvuila nansha muoyo wa luse to,+ bualu nenkutumine bipeta bia njila yebe, ne neukenge bua bipeta bia bienzedi biebe bibi.+ Nunku neufike ku dimanya ne: meme ndi Yehowa.’+
5 “Mona tshidi Mukalenge Mutambe Bunene Yehowa wamba: ‘Mona! Dikenga, dikenga dia pa buadi, didi dilua.+ 6 Nshikidilu udi ulua; nshikidilu nealue; neakujukile.* Mona! Udi ulua. 7 Dîba diebe* diafiki, wewe udi musombele mu ditunga. Tshikondo tshidi tshilua, dituku didi pabuipi.+ Kudi tshimvundu ne kakuena mbila ya disanka pa mikuna.
8 “‘Mu katupa kîpi emu nenkuitshikijile tshiji tshianyi tshikole,+ nenkutumine tshiji tshianyi tshionso,+ ne nenkulumbuluishe bilondeshile njila yebe ne nenkuase tshilumbu bua bienzedi biebe bibi bionso. 9 Dîsu dianyi kadiakukumvuila luse; tshiakukumvuila nansha muoyo wa luse to.+ Nenkutumine bipeta bia njila yebe, ne neukenge bua bipeta bia bienzedi biebe bibi. Nunku neufike ku dimanya ne: meme Yehowa ngudi ukukuma.+
10 “‘Mona dituku! Mona, didi dilua!+ Dîba diebe* diafiki; mulangala mmuele bilongo ne dikamakama ndisampile. 11 Tshikisu ntshivule mu mulangala wa bubi.+ Ni mbobu ni mbubanji buabu, ni mmisumba yabu ya bantu, ni ndumu luabu kabiakupanduka nansha. 12 Tshikondo netshilue, dituku nedifike. Musumbi kasanki to, ne musumbishi kadidi to, bualu tshiji tshikole tshidiku bua musumba wabu mujima.*+ 13 Bualu musumbishi kakualukila ku tshivuaye musumbishe, nansha muoyo wende wowu musungidibue, bualu tshikena kumona tshidi tshikuata tshisumbu tshijima tshia bantu. Muntu nansha umue kakupingana, ne bua tshilema tshiende,* muntu nansha umue kakusungila muoyo wende to.
14 “‘Mbele mpungi,+ ne muntu yonso ukadi mudiakaje, kadi kakuena muntu udi uya ku mvita, bualu tshiji tshianyi tshikole tshidi tshikuata tshisumbu tshijima tshia bantu.+ 15 Muele wa mvita udi pambelu,+ tshipupu ne tshiyole tshia nzala bidi munda. Muntu yonso udi mu mpata neafue ku muele wa mvita, ne tshiyole tshia nzala ne tshipupu nebibutule badi mu tshimenga.+ 16 Bantu babu badi bashale ne muoyo badi bapeta mushindu wa kunyema nebaye ku mikuna, ne anu bu nyunyi ya nkutshi ya mu bibandabanda, muntu yonso neadile bua tshilema tshiende.+ 17 Bianza biabu bionso nebilembelele, ne binu biabu bionso nebimatshishe mâyi.*+ 18 Mbavuale tshilamba tshikayabale,+ ne lukanku ndubakuate.* Muntu yonso neafuishibue bundu ne mutu wonso newikale ne dibala.*+
19 “‘Nebimanshe arjan yabu mu misesu, ne or yabu neyilue tshintu tshibi kudibu. Nansha arjan yabu anyi or yabu kabiakukumbana bua kubapandisha mu dituku dia tshiji tshikole tshia Yehowa to.+ Kabakukuta,* anyi kuwuja bifu biabu, bualu mbilue* tshilenduishi tshidi tshikebesha tshilema tshiabu. 20 Bavua baditambishe bua bulengele bua bilenga biabu, ne bavua benze nabi* bimfuanyi biabu bibi, mpingu yabu ya muendi.+ Ke bualu kayi nembivuije tshintu tshibi kudibu. 21 Nembifile* mu tshianza tshia bantu ba ku babende bua kubipawula ne kudi bantu babi ba mu buloba bua kubinyenga, ne bobu nebabinyange.
22 “‘Nengumbushe mpala wanyi kudibu,+ ne bobu nebanyange muaba wanyi musokome,* ne banyengi nebabuelamu ne nebawunyange.+
23 “‘Enza shene,*+ bualu buloba ebu mbuwule tente ne dilumbuluisha dikale ne mashi,+ ne tshimenga ntshiuwule tente ne tshikisu.+ 24 Nembikidishe bisamba bitambe bubi bia ku bisamba bionso,+ nebiangate nzubu yabu,+ ne meme nenshikije lutambishi lua bantu ba bukole, ne nebanyange miaba yabu minsantu.+ 25 Padi kanyinganyinga kabu kakole kafika, nebakebe ditalala, kadi kadiakuikalaku to.+ 26 Tshipupu netshilonde tshipupu tshikuabu, ne lumu nelulonde lukuabu, bantu nebakebe tshikena kumona kudi muprofete,+ kadi mukenji newujimine* kudi muakuidi ne lungenyi* kudi bakulu.+ 27 Mukalenge neabuele mu madilu,+ ne mfumu neavuale dishikila,* ne bianza bia bantu ba mu ditunga nebizakale bua buôwa. Nembenzele malu bilondeshile njila yabu, nembalumbuluishe muvuabu balumbuluishangane. Nebafike ku dimanya ne: meme ndi Yehowa.’”+