Yehezekele

34 Dîyi dia Yehowa diakalua kabidi kundi, diamba ne: 2 “Muana wa muntu, amba mêyi a buprofete afikila balami ba mikoko ba Isalele. Amba mêyi a buprofete, ne ambila balami ba mikoko abu ne: ‘Monayi tshidi Mukalenge Mutambe Bunene Yehowa wamba: “Diakabi dikale kudi balami ba mikoko ba Isalele+ badi badidiisha bobu nkayabu! Ki ntshisumbu tshia mikoko tshidi balami ba mikoko ne bua kudiisha+ anyi? 3 Nudi nudia mafuta, nuvuala miosa ya mikoko, ne nushipa nyama wa manyi a bungi,+ kadi kanuena nudiisha tshisumbu tshia mikoko+ to. 4 Kanuena bakoleshe nyama udi mutekete, buondope udi usama, basuike udi mutapike tshilamba, bapingaje idi mipambuke anyi bakebe udi mujimine+ to; kadi, nudi bayikokeshe ne malu makole ne tshikisu.+ 5 Ke bualu kayi bakayitangalaja bualu kakuvua mulami;+ bakayitangalaja ne kuluayi biakudia bia nyama yonso ya tshisuku ya mu mpata. 6 Mikoko yanyi ivua itambakana pa mikuna minene yonso ne pa mukuna mukese mutumbuke wonso; mikoko yanyi yakatangalaka pa buloba bujima, kakuyi muntu udi uyikeba anyi udi uyilonda bua kuyipeta.

7 “‘“Nunku, nuenu balami ba mikoko, umvuayi dîyi dia Yehowa: 8 ‘“Bushuwa, bu mundi ne muoyo,” ke mudi Mukalenge Mutambe Bunene Yehowa wamba, “bu mudi mikoko yanyi milue nyama ya kukuata, biakudia bia nyama yonso ya tshisuku ya mu mpata, bualu kakuvua mulami wa mikoko, ne balami banyi ba mikoko kabavua bakebe mikoko yanyi; kadi, bakatungunuka anu ne kudidiisha bobu nkayabu ne kabavua badiishe mikoko yanyi,”’ 9 nunku, nuenu balami ba mikoko, umvuayi dîyi dia Yehowa. 10 Monayi tshidi Mukalenge Mutambe Bunene Yehowa wamba: ‘Ndi tshilumbu ne balami ba mikoko aba, nembalumbuluishe bua mikoko yanyi,* nembipate bua kabadiishi* mikoko yanyi,+ ne balami ba mikoko aba kabakudidiisha kabidi bobu nkayabu to. Nensungile mikoko yanyi mukana muabu, ne kayakuikala kabidi biakudia biabu nansha.’”

11 “‘Bualu monayi tshidi Mukalenge Mutambe Bunene Yehowa wamba: “Mmeme eu, ne meme nkayanyi nenkebe mikoko yanyi, ne nenyilame.+ 12 Nendame mikoko yanyi bu mulami wa mikoko udi mupete mikoko yende ivua mitangalake ne udi uyidiisha.+ Nenyisungidile miaba yonso ivuabu bayitangalaje mu dituku dia matutu ne mifitu mikole.+ 13 Nenyumbushe munkatshi mua bukua bantu ne nenyisangishe pamue nyumbusha mu matunga ne nenyibueje mu buloba buayi, nenyidiishile pa mikuna ya Isalele,+ pabuipi ne tusulu ne pabuipi ne miaba yonso ya kusombela ya mu buloba. 14 Nenyidiishile mu mpata muimpe, ne buloba budiyi idiila nebuikale pa mikuna mitumbuke ya Isalele.+ Neyilale muomu amu, mu buloba buimpe bua kudiila,+ ne neyidiile mu mpata mimpe pa mikuna ya Isalele.”

15 “‘“Meme nkayanyi nendiishe mikoko yanyi,+ ne meme nkayanyi nenyiladike,”+ ke mudi Mukalenge Mutambe Bunene Yehowa wamba. 16 “Nenkebe udi mujimine,+ nempingaje udi mupambuke, nensuike udi mutapike tshilamba, ne nenkoleshe udi mutekete; kadi, nembutule udi ne manyi ne udi ne bukole. Wowu au nengudiishe dilumbuluisha.”

17 “‘Kadi nuenu, mikoko yanyi, monayi tshidi Mukalenge Mutambe Bunene Yehowa wamba: “Nkadi pa kukosa tshilumbu pankatshi pa mukoko ne mukoko mukuabu ne pankatshi pa bimpanga bia mikoko ne mbuji ya mpumbu.+ 18 Kudiila mu mpata mitambe buimpe ki nkunukumbane anyi? Nudi kabidi ne bua kudiatakaja mpata yenu idi mishale ne makasa enu anyi? Nuenu bamane kunua mâyi matoke tòò, nudi ne bua kunyanga mâyi nuadiata ne makasa enu anyi? 19 Mpindieu mikoko yanyi idi ne bua kudiila mu mpata mudiatakaja kudi makasa enu ne kunua mâyi manyanga ne didiatakaja dia makasa enu anyi?”

20 “‘Nunku, monayi tshidi Mukalenge Mutambe Bunene Yehowa ubambila: “Mmeme eu, meme nkayanyi nenkose tshilumbu pankatshi pa mukoko udi ne manyi ne mukoko udi munyane, 21 bualu, nuakatungunuka ne kuyisakila ne lubese luenu ne dikaya, ne nuakatungunuka ne kutua yonso ivua isama nsengu yenu too ne panuvua bayitangalaje miye miaba mikuabu. 22 Nempandishe mikoko yanyi, ne kayakulua kabidi tshintu tshia kukuata bua kudia+ to; ne nenkose tshilumbu pankatshi pa mukoko ne mukoko mukuabu. 23 Nenyijudile mulami umue,+ muena mudimu wanyi Davidi,+ ne yeye neayidiishe. Yeye muine neayidiishe ne nealue mulami wayi.+ 24 Meme, Yehowa, nendue Nzambi wayi,+ ne muena mudimu wanyi Davidi nealue mfumu munkatshi muayi.+ Meme muine, Yehowa, ngudi muakule.

25 “‘“Nempunge nayi tshipungidi tshia ditalala,+ ne nengumbushe nyama ya luonji ya tshisuku mu buloba,+ bua yoyi imone mua kusomba talalaa mu tshipela ne kulala mu metu.+ 26 Nenyivuije yoyi ne tshitupa tshidi tshinyunguluke mukuna wanyi dibenesha,+ ne nendokeshe mvula mu tshikondo tshiende. Mabenesha nealoke bu mvula.+ 27 Mitshi ya mu mpata neyikuame bimuma biayi, ne buloba nebupatule mamuma abu,+ ne yoyi neyisombe mu buloba talalaa. Nunku, neyifike ku dimanya ne: meme ndi Yehowa pandi ntshibula mitshi yayi ya tshikokedi+ ne nyisungila kudi bavua bayikuate ku bupika. 28 Kayakulua kabidi tshintu tshia bisamba kukuata, ne nyama ya tshisuku ya pa buloba kayakuyidia to, ne neyisombe talalaa, kakuyi muntu wa kuyitshinyisha.+

29 “‘“Nenyijadikile budimi bua lumu,* ne kayakufua kabidi ne nzala mu buloba+ to, ne kayakufuishibua kabidi bundu kudi bisamba+ nansha. 30 ‘Nunku neyifike ku dimanya ne: Meme, Yehowa Nzambi wayi, ndi nayi, kabidi ne: yoyi, nzubu wa Isalele, yidi bantu banyi,’+ ke mudi Mukalenge Mutambe Bunene Yehowa wamba.”’

31 “‘Kadi nuenu, mikoko yanyi,+ mikoko indi ndama, nudi anu bantu, ne meme ndi Nzambi wenu,’ ke mudi Mukalenge Mutambe Bunene Yehowa wamba.”