Yeshaya
46 Bele udi winama,+ Nebo udi ukobama.
Mpingu yabu mmiteka pa nyama, pa nyama itu yambula majitu,+
Bu mabuki adi anemena nyama idi mitshioke bujitu.
2 Badi bakobama ne binama diatshimue;
Kabena mua kusungila majitu* au,
Ne bobu bine* badi bakuatshibua.
3 “Ntelejayi, nuenu ba mu nzubu wa Yakoba, ne nuenu bonso badi bashale ba mu nzubu wa Isalele,+
Nuenu bandi mukuatshishe katshia ku diledibua ne muambule katshia mu difu.+
4 Too ne panudi nukola, meme nengikale anu muomumue;+
Too ne padi nsuki yenu itoka, meme nentungunuke ne kunuambula.
Nennuambule, nennutuale ne nennusungile bu mundi muenze.+
5 Nnganyi unudi mua kumfuanyikija nende anyi kumvuija muomumue nende peshi kungelakaja nende,+
Bua tufuanangane nende?+
6 Kudi bantu badi bupumuna or wa mu tubuta tuabu;
Badi bapima bujitu bua arjan ne tshipiminu.
Badi bangata mufudi wa biamu ku mudimu, ne yeye udi umuvuija nzambi.+
Pashishe badi binama, eyowa, bamutendelela.*+
7 Badi bamubandisha pa makaya abu;+
Badi bamuambula, bamuteka pa muaba wende, ne udi ushala muimane anu muaba au.
Kena umbuka muaba wende to.+
Badi bamuela mbila, kadi yeye kena wandamuna;
Kena mua kusungila muntu nansha umue ku dikenga.+
8 Vulukayi bualu ebu, ne ikalayi ne dikima.
Bulamayi ku muoyo, nuenu bashipi ba mikenji.
9 Vulukayi malu a diambedi* a kale kale,
Ne: meme ndi Nzambi, ne kakuena mukuabu.
Meme ndi Nzambi, ne kakuena mukuabu bu meme to.+
10 Ndi ndianjila kumanyisha ndekelu wa bualu ku tshibangidilu tshiabu,
Ne mmanyisha kumpala menemene malu adi kaayi manji kuenzeka.+
11 Ndi mbikila nyunyi utu udia minyinyi umbukila kudi dîba dipatukila,*+
Ndi mbikila muntu mu buloba bua kule bua kukumbaja dipangadika dianyi.*+
Ndi muambe bualu ebu, ne nembuenzeje.
Ndi mubulongolole, ne nembukumbaje kabidi.+
12 Ntelejayi, nuenu badi ne muoyo wa tshitshiu,*
Nuenu badi kule menemene ne buakane.
Nemfile lupandu mu Siona, bulengele buanyi kudi Isalele.”+