YOSHUA

1 Panyima pa lufu lua Mose muena mudimu wa Yehowa, Yehowa wakambila Yoshua*+ muana wa Nuna, muambuluishi+ wa Mose ne: 2 “Mose muena mudimu wanyi wafu.+ Mpindieu juka, usabuke Yadene, wewe ne tshisamba tshionso etshi, ubuele mu buloba bundi mbapesha bobu, tshisamba tshia Isalele.+ 3 Nennupeshe muaba wonso wadiata makasa enu, anu mumvua mulaye Mose.+ 4 Buloba buenu nebumbukile ku tshipela too ne ku Lebanona ne ku musulu munene, musulu wa Pelata, (buloba buonso bua bena Hiti+) ne nebuye too ne ku Mbuu Munene* ku ouest.*+ 5 Muntu nansha umue kakukokesha mua kukukandamena matuku onso audi ne muoyo to.+ Nengikale nebe anu mumvua ne Mose.+ Tshiakukushiya nkayebe anyi tshiakukulekela to.+ 6 Ikala ne dikima ne bukole,+ bualu wewe ke wenza bua tshisamba etshi tshipiane buloba bumvua muditshipe kudi bankambua babu bua kubapesha.+

7 “Kadi ikala anu ne dikima ne bukole bua bungi, utumikile ne muoyo mujima Mikenji yonso ivua muena mudimu wanyi Mose mukutumine dîyi bua kutumikila. Kusesukiku, uya ku dia balume anyi ku dia bakaji,+ bua wenze malu ne meji kuonso kuudi uya.+ 8 Mukanda wa Mikenji eu kawumbuki mukana muebe to;+ udi ne bua kuwubala ne dîyi dia panshi panshi* munya ne butuku, bua utumikile ne muoyo mujima malu onso adibu bafundamu;+ bualu dîba adi malu ebe neende bimpe, ne dîba adi newenze malu ne meji.+ 9 Tshiena mukutumine dîyi anyi? Ikala ne dikima ne bukole. Kuikadi ne buôwa anyi kutshinyi to, bualu Yehowa Nzambi webe udi nebe kuonso kuudi uya.”+

10 Pashishe Yoshua wakatumina batangidi ba tshisamba dîyi ne: 11 “Pitshilayi munkatshi mua tshitudilu, nuelele bantu mukenji eu ne: ‘Longololayi biakudia, bualu mu matuku asatu emu nenusabuke Yadene bua kubuela ne kuangata buloba budi Yehowa Nzambi wenu unupesha bua buikale buenu.’”+

12 Yoshua wakambila bena Lubena, bena Gada, ne tshitupa tshia tshisa tshia Manashe ne: 13 “Nuvuluke tshivua Mose muena mudimu wa Yehowa munutumine dîyi bua kuenza:+ ‘Yehowa Nzambi wenu udi unupesha dikisha ne mmunupeshe buloba ebu. 14 Bakaji benu, bana benu balela, ne bimuna bienu nebishale mu buloba budi Mose munupeshe dia munemu* dia Yadene,+ kadi nuenu bilobo bia mvita+ bionso nenusabuke kumpala kua bana benu, badilongolole bua mvita.+ Nudi ne bua kubambuluisha 15 too ne padi Yehowa upesha bana benu dikisha, anu mudiye munupeshadi, ne padibu bangata pabu buloba budi Yehowa Nzambi wenu ubapesha. Pashishe nupingane mu buloba buvuabu banupeshe bua kusomba ne nubuangate, buloba buvua Mose muena mudimu wa Yehowa munupeshe ku luseke lua ku est kua Yadene.’”+

16 Bakandamuna Yoshua ne: “Netuenze bionso biudi mututumine dîyi bua kuenza, ne netuye kuonso kuudi ututuma.+ 17 Netukuteleje anu mutuvua bateleje malu onso avua Mose muambe. Kadi Yehowa Nzambi webe ikale nebe anu bu muvuaye ne Mose.+ 18 Muntu yonso udi utombokela dîyi diebe ne ubenga kutumikila mukenji wonso uudi umuelela neashipibue.+ Kadi wewe ikala anu ne dikima ne bukole.”+

2 Pashishe Yoshua muana wa Nuna wakatuma bantu balume babidi mu musokoko kumbukila ku Shitima+ bu batentekedi. Wakabambila ne: “Ndayi, nutangile buloba, nangananga Yeliko.” Nunku bakaya, kufikabu ku nzubu kua mukaji wa ndumba mukuabu dîna diende Lahaba,+ kushalabu kuntu aku. 2 Bakambila mukalenge wa Yeliko ne: “Tangila! Bena Isalele mbabuele munemu butuku ebu bua kutentekela buloba.” 3 Ke mukalenge wa Yeliko kutumina Lahaba mukenji ne: “Patula bantu bavua balue abu, badi basombele mu nzubu muebe, bualu mbalue bua kutentekela buloba buetu buonso.”

4 Kadi mukaji au wakangata bantu babidi abu, kubasokokaye. Pashishe kuambaye ne: “Bushuwa, bantu abu bavua balue kundi, kadi tshivua mumanye kuvuabu bafumina to. 5 Kadi pakavua panshi pafiika pakavuabu bakeba kukanga tshiibi tshia tshimenga, bantu abu bakapatuka. Tshiena mumanye kudi bantu abu baye to, kadi nuenu babalonde lukasa nenubapete.” 6 (Pabi uvua muye nabu pa mutu pa nzubu ne mubasokoke munkatshi mua tukolakola tua line tuvuabu balonge mu milongo pa mutu pa nzubu.) 7 Nunku bantu abu bakabalonda mu njila wa ku Yadene lua ku bisabu,+ ne bakakanga tshiibi tshia tshimenga diakamue pavua bantu bavua babalonda abu bapatuke.

8 Kumpala kua bantu abu kulala, wakabanda kudibu pa mutu pa nzubu. 9 Yeye kuambila bantu abu ne: “Ndi mumanye bimpe ne: Yehowa neanupeshe buloba ebu+ ne tuetu bonso tudi ne buôwa bua bualu buenu.+ Bantu bonso ba mu buloba mbatekete ku muoyo bua bualu buenu,+ 10 bualu tuvua bumvue muvua Yehowa mukamishe mâyi a Mbuu Mukunze kumpala kuenu panuvua bapatuke mu Ejipitu+ ne tshinuvua benzele bakalenge babidi ba bena Amole, Sihona+ ne Oga,+ banuvua babutule dia muamua* dia Yadene. 11 Patuvua bumvue bualu abu, tuakateketa ku muoyo,* ne muntu nansha umue kena ne dikima nansha dikese* bua bualu buenu, bualu Yehowa Nzambi wenu udi Nzambi muulu mu diulu ne panshi pa buloba.+ 12 Mpindieu ndi nnulomba bua nuditshipe kundi mu dîna dia Yehowa ne: bu mundi munuleje dinanga dia lulamatu, nuenu penu nenuleje ba mu nzubu wa tatu wanyi dinanga dia lulamatu; ne nudi ne bua kumpesha tshimanyinu tshidi tshileja ne: nenukumbaje dîyi dienu.* 13 Nudi ne bua kusungila muoyo wa tatuanyi ne wa mamuanyi, wa bana betu ba balume ne ba bakaji ne wa bantu bonso badibu nabu, ne nudi ne bua kutupandisha* ku lufu.”+

14 Ke bantu abu kumuambilabu ne: “Netufile mioyo yetu bua mioyo yenu!* Nuenu kanuyi bambilangane tshitudi baluile, dîba adi netunuleje dinanga dia lulamatu ne lulamatu pikala Yehowa mutupeshe buloba ebu.” 15 Pashishe wakabapuekeshila ku dididishi ne muonji, bualu nzubu wende uvua luseke lua tshimanu tshia tshimenga. Bushuwa, uvua musombele pa tshimanu.+ 16 Pashishe wakabambila ne: “Ndayi ku buloba bua mikuna, nusokomaku matuku asatu, bua bantu badi banulonda kabanupetshi to. Pashishe padi bantu badi banulonda bapingana, dîba adi nudi mua kutungunuka ne njila wenu.”

17 Bantu abu bakamuambila ne: “Netubinge ku mutshipu uudi mututshipishe eu+ 18 patuabuela mu buloba ebu wewe kuyi musuike muonji wa dikala dikunze kunzuu eu ku dididishi kuudi mutupuekeshile eku. Neusangishe tatuebe, mamuebe, bana benu ba balume, ne bantu bonso ba mu nzubu wa tatuebe mu nzubu muebe.+ 19 Nunku muntu yeye mupatuke ku biibi bia nzubu webe muye pambelu, mashi ende neikale pa mutu pende yeye nkayende, ne tuetu katuakupila to. Kadi bualu bubi buobu bufikile* muntu yonso udi ushala nebe mu nzubu, mashi ende neikale pa mitu yetu. 20 Kadi wewe muambilangane tshitudi baluile,+ katuakupila bua mutshipu webe uudi mututshipishe to.” 21 Yeye kubandamuna ne: “Bienzeke bilondeshile mêyi enu.”

Ke yeye kubalekela, kuyabu. Pashishe yeye kusuika muonji wa dikala dikunze kunzuu ku dididishi. 22 Nunku bakumbuka, kuyabu ku buloba bua mikuna, kushalabu kuntu aku matuku asatu too ne pavua bantu bavua babalonda bapingane. Bantu bavua babalonda aba bavua benda babakeba mu njila yonso, kadi kabakabapeta to. 23 Pashishe bantu babidi aba bakapueka bafuma ku buloba bua mikuna, kusabukabu musulu, kufikabu kudi Yoshua muana wa Nuna. Bakamulondela malu onso avua mabafikile. 24 Pashishe bobu kuambila Yoshua ne: “Yehowa mmutupeshe buloba buonso abu.+ Bushuwa, bantu bonso ba mu buloba abu mbatekete ku muoyo bua bualu buetu.”+

3 Pashishe Yoshua wakajuka mu dindadinda, ne yeye ne bena Isalele* bonso bakumbuka ku Shitima,+ kufikabu ku Yadene. Bakapitshisha butuku muaba au kumpala kua kusabukabu.

2 Panyima pa matuku asatu, batangidi+ bakapita mu tshitudilu, 3 kutuminabu bantu dîyi ne: “Diakamue panudi numona bakuidi bena Lewi bambula mushete wa tshipungidi tshia Yehowa Nzambi wenu,+ nudi ne bua kuasa luendu muaba unudi, kuwulonda. 4 Kadi nuikale nawu ntanta wa nkubita 2 000,* kanusemenyi pabuipi nawu to, bua numanye njila wa kuyila bualu kanutu banji kuyila mu njila eu to.”

5 Ke Yoshua kuambila bantu ne: “Nudijidile,+ bualu malaba Yehowa neenze malu a kukema munkatshi muenu.”+

6 Pashishe Yoshua wakambila bakuidi ne: “Ambulayi mushete+ wa tshipungidi, nupite kumpala kua bantu.” Nunku bakambula mushete wa tshipungidi, kupitabu kumpala kua bantu.

7 Pashishe Yehowa wakambila Yoshua ne: “Lelu eu nentuadije kukutumbisha ku mêsu kua Isalele mujima,+ bua bamanye ne: nengikale nebe+ anu bu mumvua ne Mose.+ 8 Udi ne bua kutumina bakuidi bikala ne bua kuambula mushete wa tshipungidi dîyi edi ne: ‘Panudi nufika ku muelelu kua mâyi a Yadene, nushale bimane mu Yadene.’”+

9 Nunku Yoshua wakambila bena Isalele ne: “Luayi kuneku, nuteleje mêyi a Yehowa Nzambi wenu.” 10 Ke Yoshua kuamba ne: “Bua bualu ebu nenumanye ne: Nzambi wa muoyo udi munkatshi muenu,+ ne neipate kakuyi mpata bena Kanâna, bena Hiti, bena Hiwi, bena Pelizi, bena Gîgashi, bena Amole ne bena Yebuse+ kumpala kuenu. 11 Monayi! Mushete wa tshipungidi tshia Mukalenge wa buloba bujima udi ubuela mu Yadene kumpala kuenu. 12 Mpindieu sungulayi bantu balume 12 mu bisa bia Isalele, muntu umue bua tshisa tshionso,+ 13 ne diakamue padi makasa a bakuidi badi bambule Mushete wa Yehowa, Mukalenge wa buloba bujima, adiata* mâyi a Yadene, mâyi a Yadene adi apueka afumina ku mutu neakosoloke, ne neimane anu bu nkila.”*+

14 Nunku pakasa bantu luendu bumbuka ku ntenta yabu kumpala kua kusabukabu Yadene, bakuidi bavua bambule mushete+ wa tshipungidi bakapita kumpala kua bantu. 15 Diakamue pavua bantu bavua bambule Mushete bafike ku Yadene ne bakuidi bavua bambule mushete batue makasa abu mu mâyi a ku muelelu (pabi Yadene uvua uwula bikole upita pa mikalu yende+ matuku onso a dinowa), 16 mâyi avua apueka afumina ku mutu akimana. Akimana mabande muulu menze bu nkila* kule menemene ku Adama, tshimenga tshidi pabuipi ne Saletana, pavua mâyi avua apueka ku Mbuu wa mu Alabâ, Mbuu wa Mukele,* enda akama. Mâyi akakosoloka, ne bantu kusabukabu dia muamua bitangilangane ne Yeliko. 17 Pavua bakuidi bavua bambule mushete wa tshipungidi tshia Yehowa bashale bimane pa buloba bume+ munkatshi mua Yadene, Isalele mujima wakasabuka pa buloba bume,+ too ne pavua tshisamba tshijima tshijikije kusabuka Yadene.

4 Diakamue pakajikija tshisamba tshijima kusabuka Yadene, Yehowa wakambila Yoshua ne: 2 “Angata bantu balume 12 mu tshisamba, muntu umue mu tshisa tshionso,+ 3 ubatumine dîyi edi ne: ‘Angatayi mabue 12 munkatshi mua Yadene muaba uvua makasa a bakuidi mimane,+ nuye nawu, nuateke muaba unualala butuku.’”+

4 Nunku Yoshua wakabikila bantu balume 12 bavuaye musungule mu bena Isalele, muntu umue mu tshisa tshionso, 5 ne Yoshua wakabambila ne: “Pitayi kumpala kua Mushete wa Yehowa Nzambi wenu, nuye munkatshi mua Yadene, muntu yonso ambule dibue pa dikaya diende, bilondeshile bungi bua bisa bia bena Isalele, 6 bua ikale tshimanyinu munkatshi muenu. Bikala bana* benu banuebeje pashishe ne: ‘Mabue aa nga tshinyi?’+ 7 nenubambile ne: ‘Bualu mâyi a Yadene avua mimane kumpala kua mushete+ wa tshipungidi tshia Yehowa. Pavuawu musabuke Yadene, mâyi a Yadene akimana. Mabue aa neikale tshivulukilu tshia kashidi kudi tshisamba tshia Isalele.’”+

8 Nunku bena Isalele bakenza anu muvua Yoshua mubatumine dîyi bua kuenza. Bakangata mabue 12 munkatshi mua Yadene, anu muvua Yehowa muambile Yoshua bua kuenza, bua ikale bungi bumue ne bungi bua bisa bia bena Isalele. Bakaambula, kuyabu nawu muaba uvuabu ne bua kulala butuku, bobu kuateka muaba au.

9 Yoshua wakimanyika kabidi mabue 12 munkatshi mua Yadene muaba uvua makasa a bakuidi bavua bambule mushete wa tshipungidi mimane,+ ne mabue au adi muaba au too ne lelu.

10 Bakuidi bavua bambule Mushete bakashala bimane munkatshi mua Yadene too ne pakajika malu onso avua Yehowa mutumine Yoshua dîyi bua kuambila bantu bua kuenza, mu diumvuangana ne malu onso avua Mose mutumine Yoshua dîyi bua kuenza. Mutantshi wonso au, bantu bavua basabuka lukasa lukasa. 11 Diakamue pakajikija bantu bonso kusabuka, Mushete wa Yehowa ne bakuidi bakasabuka mu mêsu a bantu bonso.+ 12 Bena Lubena, bena Gada, ne tshitupa tshia tshisa tshia Manashe bakasabuka badilongolole bua mvita+ kumpala kua bena Isalele bakuabu, anu muvua Mose mubambile bua kuenza.+ 13 Basalayi batue ku binunu 40 bikale ne bia mvita bua kuluangana bakasabuka kumpala kua Yehowa mu mpata ya bipela ya Yeliko.

14 Dituku adi Yehowa wakatumbisha Yoshua ku mêsu kua Isalele mujima,+ ne bakamunemeka* bikole matuku ende onso a muoyo, anu muvuabu banemeka Mose bikole.+

15 Pashishe Yehowa wakambila Yoshua ne: 16 “Tumina bakuidi badi bambule mushete+ wa Bujadiki dîyi bua bapatuke mu Yadene.” 17 Ke Yoshua kutumina bakuidi dîyi ne: “Patukayi mu Yadene.” 18 Pavua bakuidi bavua bambule mushete+ wa tshipungidi tshia Yehowa bapatuke munkatshi mua Yadene ne makasa a bakuidi madiate pa buloba bume, mâyi a Yadene akatuadija kupueka kabidi, kuwulawu kupita too ne pa mikalu+ anu bu kumpala.

19 Bantu bakumbuka ku Yadene mu dituku dia dikumi dia ngondo wa kumpala, bobu kutudila ku Gilegala+ ku mukalu wa ku est kua Yeliko.

20 Bua mabue 12 avuabu bangate mu Yadene au, Yoshua wakaimanyika ku Gilegala.+ 21 Pashishe wakambila bena Isalele ne: “Pikala bana benu bebeje batatuabu mu matuku alualua ne: ‘Mabue aa adi umvuija tshinyi?’+ 22 nudi ne bua kumvuija bana benu ne: ‘Bena Isalele bavua basabuke Yadene pa buloba bume+ 23 pavua Yehowa Nzambi wenu mumishe mâyi a Yadene kumpala kuabu too ne pavuabu bamusabuke, anu muvua Yehowa Nzambi wenu muenze ku Mbuu Mukunze pavuaye mumumishe kumpala kuetu too ne patuvua bamusabuke.+ 24 Uvua muenze nunku bua bisamba bionso bia pa buloba bimanye mudi tshianza tshia Yehowa tshikale+ ne bukole ne bua nuikale nutshina Yehowa Nzambi wenu misangu yonso.’”

5 Diakamue pavua bakalenge bonso ba bena Amole+ bavua ku luseke lua ku ouest* kua Yadene ne bakalenge bonso ba bena Kanâna+ bavua kumpenga kua mbuu bumvue ne: Yehowa uvua mumishe mâyi a Yadene kumpala kua bena Isalele too ne pavuabu basabuke, bakateketa ku muoyo*+ ne bakajimija dikima dionso* bua bualu bua bena Isalele.+

2 Tshikondo atshi Yehowa wakambila Yoshua ne: “Enza tuele tua mabue, utengule+ kabidi bantu balume ba mu Isalele bua musangu muibidi.” 3 Nunku Yoshua wakenza tuele tua mabue, yeye kutengula bantu balume ba mu Isalele ku Gibeata-hâlalota.*+ 4 Yoshua wakabatengula bua bualu ebu: Bantu balume bonso ba mu tshisamba bavua bapatuke mu Ejipitu, bena mvita bonso,* bakafua mu luendu mu tshipela bobu bamane kupatuka mu Ejipitu.+ 5 Bantu bonso bavua bapatuke mu Ejipitu bavua batengula, kadi bantu bonso bavuabu balelele mu luendu mu tshipela bobu bamane kupatuka mu Ejipitu kabavua batengula to. 6 Bena Isalele bavua bende mu tshipela bidimu 40+ too ne pavua tshisamba tshijima tshifue, mbuena kuamba ne: bena mvita bavua bapatuke mu Ejipitu bavua kabayi batumikile dîyi dia Yehowa.+ Yehowa uvua muditshipe kudibu ne: kavua mua kubalekela bua bamone buloba+ buvua Yehowa muditshipe kudi bankambua babu bua kutupesha,+ buloba budi ne mabele ne buitshi bia bungi.+ 7 Nunku wakajula bana babu pamutu pabu.+ Bobu aba ke bavua Yoshua mutengule; kabavua batengula bualu kabavua babatengule mu luendu to.

8 Pakajikijabu kutengula tshisamba tshijima, bakashala miaba ivuabu mu tshitudilu too ne pakumvuabu bimpe.

9 Pashishe Yehowa wakambila Yoshua ne: “Ndi mumbushe tshipendu tshia Ejipitu kunudi lelu.” Ke bualu kayi too ne lelu badi babikila muaba au ne: Gilegala.*+

10 Bena Isalele bakatungunuka ne kutudila ku Gilegala, ne bakenza Pasaka mu dituku dia 14 dia ngondo au+ ku dilolo mu mpata ya bipela ya Yeliko. 11 Bakatuadija kudia bintu bia mu buloba abu dituku diakalonda Pasaka, mampa kaayi mela luevene+ ne ntete mikanga, anu dituku adi. 12 Nunku mana akajimina dituku diakalonda adi pakavuabu bamane kudia bimue bintu bia mu buloba abu; kakutshivua kabidi mana bua bena Isalele to,+ kadi bakatuadija kudia bintu bia mu buloba bua Kanâna tshidimu atshi.+

13 Pavua Yoshua pabuipi ne Yeliko, wakabandisha mêsu, kumonaye muntu+ muimane kumpala kuende ne muele wa mvita mu tshianza tshiende.+ Yoshua wakaya kudiye, kuebejaye ne: “Udi ku luseke luetu anyi ku luseke lua baluishi betu?” 14 Ke muntu au kuamba ne: “Tòo, kadi ndi mmulue bu mukokeshi* wa tshiluilu tshia Yehowa.”+ Nunku Yoshua wakadiela panshi, kutuaye mpala wende panshi, kumuambilaye ne: “Mbualu kayi budi mukalenge wanyi nabu bua kuambila muena mudimu wende?” 15 Mukokeshi wa tshiluilu tshia Yehowa wakandamuna Yoshua ne: “Umbusha sandala ku makasa ebe, bualu muaba uudi muimane ngua tshijila.” Diakamue Yoshua wakenza nanku.+

6 Mpindieu biibi bia Yeliko bivua bikanga bikole bualu bua bena Isalele; kakuvua muntu uvua upatuka ne kakuvua muntu uvua ubuela to.+

2 Nunku Yehowa wakambila Yoshua ne: “Mona, ndi mufile Yeliko ne mukalenge wende ne bilobo biende bia mvita mu tshianza tshiebe.+ 3 Nuenu baluanganyi ba mvita bonso nenuende nunyunguluka tshimenga, nunyunguluka tshimenga musangu umue. Nenuenze nunku matuku asambombo. 4 Enza bua bakuidi muanda mutekete bikale ne nsengu muanda mutekete ya bimpanga bia mikoko kumpala kua Mushete. Kadi dituku dia muanda mutekete, nenuende nunyunguluka tshimenga misangu muanda mutekete ne bakuidi nebele mpungi.+ 5 Padibu bela mpungi wa lusengu lua tshimpanga tshia mukoko, diakamue panudi numvua muadi* wa mpungi, bantu bonso nebele lubila lua mvita lukole. Dîba adi bimanu bia tshimenga nebiupuke, bilala panshi,+ ne bantu badi ne bua kuya, muntu yonso mutangile kumpala kuende.”

6 Nunku Yoshua muana wa Nuna wakasangisha bakuidi pamue, kubambilaye ne: “Ambulayi mushete wa tshipungidi, ne bakuidi muanda mutekete bambule nsengu muanda mutekete ya bimpanga bia mikoko kumpala kua Mushete wa Yehowa.”+ 7 Pashishe wakambila bantu ne: “Ndayi, nunyunguluke tshimenga, ne basalayi bavuale bia mvita+ nebaye kumpala kua Mushete wa Yehowa.” 8 Anu muvua Yoshua muambile bantu, bakuidi muanda mutekete bambule nsengu muanda mutekete ya bimpanga bia mikoko kumpala kua Yehowa bakaya kumpala, ne bakela mpungi, ne mushete wa tshipungidi tshia Yehowa uvua ubalonda. 9 Basalayi bavua ne bia mvita bakaya kumpala kua bakuidi bavua benda bela mpungi, ne bakuabu bavua panyima bakalonda Mushete pavua mpungi yenda idila.

10 Mpindieu Yoshua uvua muelele bantu mukenji ne: “Kanuedi mbila anyi mêyi enu kaumvuiki to. Dîyi nansha dimue kadipatuki mukana muenu too ne dituku dindi nnuambila ne: ‘Elayi mbila!’ Dîba adi nenuele mbila.” 11 Wakenza bua Mushete wa Yehowa unyunguluke tshimenga, utshinyunguluka musangu umue, pashishe bakapingana mu tshitudilu, kulalabu muntu amu.

12 Dinda diakalonda Yoshua wakajuka mu dinda menemene, ne bakuidi bakambula Mushete+ wa Yehowa, 13 ne bakuidi muanda mutekete bavua bambule nsengu muanda mutekete ya bimpanga bia mikoko bavua benda kumpala kua Mushete wa Yehowa, benda bela mpungi. Basalayi bavua ne bia mvita bavua benda kumpala kuabu, eku basalayi bakuabu bavua panyima benda balonda Mushete wa Yehowa pavua mpungi yenda idila. 14 Bakanyunguluka tshimenga musangu umue dituku dibidi, pashishe bakapingana mu tshitudilu. Ke tshiakenzabu matuku asambombo.+

15 Dituku dia muanda mutekete bakajuka mu dindadinda diakamue pakatshia butuku, ne bakanyunguluka tshimenga mushindu wa muomumue misangu muanda mutekete. Anu dituku adi ke divuabu banyunguluke tshimenga misangu muanda mutekete.+ 16 Musangu wa muanda mutekete bakuidi bakela mpungi, ne Yoshua wakambila bantu ne: “Elayi mbila,+ bualu Yehowa mmunupeshe tshimenga etshi! 17 Tshimenga ne bintu bionso bidimu mbia kubutula;+ tshionso tshijima ntshia Yehowa. Anu Lahaba+ mukaji wa ndumba ke washala ne muoyo, yeye ne bonso badi nende mu nzubu muende, bualu uvua musokoke bantu batuvua batume.+ 18 Kadi nudilame ku tshintu tshia kubutula,+ bua kanujingi tshintu tshia kubutula ne kanutshiangatshi,+ nuvuija tshitudilu tshia Isalele tshintu tshia kubutula, nutshikebela dikenga.*+ 19 Kadi arjan yonso ne or ne bintu bia tshiamu tshia mitaku ne bia tshiamu tshifiike mbia tshijila kudi Yehowa.+ Mbia kuela mu tshibutshilu tshia Yehowa.”+

20 Pashishe bantu bakela mbila pavuabu bele mpungi.+ Diakamue pavua bantu bumvue muadi wa mpungi ne bele lubila lua mvita lukole, bimanu biakupuka, kulalabi panshi.+ Pashishe bantu bakabanda mu tshimenga, muntu yonso mutangile kumpala kuende, kukuatabu tshimenga. 21 Bakabutula bionso bivua mu tshimenga ne muele wa mvita: bantu balume ne bantu bakaji, bana ne bakulumpe, ngombe, mikoko, ne mpunda.+

22 Yoshua wakambila bantu babidi bavua batentekele buloba abu ne: “Buelayi mu nzubu wa mukaji wa ndumba au, nupatule mukaji au ne bonso badiye nabu, anu munuvua baditshipe kudiye.”+ 23 Nunku bansongalume bavua batentekele tshimenga abu bakabuela, kupatulabu Lahaba, pamue ne tatuende, mamuende, bana babu ba balume, ne bantu bonso bavuaye nabu; bushuwa, bakapatula dîku diende dijima,+ bakaya nabu muaba kampanda pambelu pa tshitudilu tshia Isalele kakuyi bualu bubi bubenzekele.

24 Pashishe bakuosha tshimenga ne bionso bivuamu ne kapia. Kadi bakafila arjan ne or ne bintu bia tshiamu tshia mitaku ne bia tshiamu tshifiike mu tshibutshilu tshia nzubu wa Yehowa.+ 25 Kadi Yoshua wakalama anu Lahaba mukaji wa ndumba, ne ba mu nzubu wa tatuende, ne bantu bonso bavuaye nabu;+ yeye mmusombele mu Isalele too ne lelu+ bualu wakasokoka bantu bavua Yoshua mutume bua kutentekela Yeliko.+

26 Tshikondo atshi, Yoshua wakenza mutshipu* eu wamba ne: “Muntu udi ubanga kuibakulula tshimenga tshia Yeliko etshi edibue mulawu kumpala kua Yehowa. Neajimije muanabute wende bua kuasa tshishimikidi tshiende, ne neajimije muanende wa mukala bua kuela biibi biatshi.”+

27 Nunku Yehowa uvua ne Yoshua,+ ne lumu luende luakatangalaka pa buloba bujima.+

7 Kadi bena Isalele bakapanga lulamatu bua bintu bivuabu ne bua kubutula, bualu Akana+ muana wa Kâmi, muana wa Zabedi, muana wa Zela, wa mu tshisa tshia Yuda wakangata bimue bintu bivuabu ne bua kubutula.+ Ke tshiji tshia Yehowa kutemenatshi bena Isalele.+

2 Pashishe Yoshua wakatuma bantu balume kumbukila ku Yeliko bua kuya ku Ai+ udi pabuipi ne Bete-awena ne udi ku est kua Betele,+ kubambilaye ne: “Bandayi, nutentekele buloba.” Nunku bantu abu bakabanda, kutentekelabu Ai. 3 Pakapinganabu kudi Yoshua, bakamuambila ne: “Kabiena bikengela bua bantu bonso babande kuntu aku to. Bantu batue ku 2 000 anyi 3 000 mbakumbane bua kutshimuna Ai. Kutshiokeshi tshisamba tshijima, utshituma kuntu aku to, bualu bobu badi anu bakese.”

4 Nunku bantu balume batue ku 3 000 bakabanda kuntu aku, kadi bakanyema bantu ba ku Ai.+ 5 Bantu ba ku Ai bakashipa bantu 36, bobu kubalondakaja pambelu pa tshiibi tshia tshimenga too ne ku Shebalima,* ne bakatungunuka ne kubashipa mu dipueka. Nunku mioyo ya bantu yakabanga kuzakala, bobu kupanga dikima.*

6 Ke Yoshua kudipanda bilamba, kutuaye mpala wende panshi kumpala kua Mushete wa Yehowa too ne ku dilolo, yeye ne bakulu ba mu Isalele, ne bakatungunuka anu ne kudiela buloba mu mutu. 7 Yoshua wakamba ne: “Aka! Mukalenge Mutambe Bunene Yehowa, bua tshinyi uvua mulue ne tshisamba etshi, mutshisabuishe too ne Yadene anu bua kutufila mu bianza bia bena Amole bua kutubutulabu? Tuvua mua kuikala nansha bashale dia muamua* dia Yadene! 8 Mfuila koku luse Yehowa, ntshinyi tshindi mua kuamba mpindieu udi Isalele munyeme kumpala kua bena lukuna bende?* 9 Pumvua bena Kanâna ne bantu bonso ba mu buloba ebu bualu ebu, nebatunyunguluke ne nebajimije dîna dietu mene pa buloba, ne ntshinyi tshiwenza bua dîna diebe dinene?”+

10 Yehowa wakandamuna Yoshua ne: “Juka! Bua tshinyi udi mutue mpala panshi? 11 Bena Isalele mbenze mpekatu. Mbanyange tshipungidi tshianyi+ tshimvua mubelele mukenji bua kulama. Mbangate bimue bintu bivuabu ne bua kubutula,+ mbabiibe+ ne mbabiteke mu bintu biabu mu musokoko.+ 12 Nunku bena Isalele kabakukumbana bua kuimana kumpala kua bena lukuna babu to. Nebele bena lukuna babu nyima ne nebabanyeme, bualu mbalue tshintu tshia kubutula. Nuenu kanuyi babutule tshintu tshivuabu ne bua kubutula tshidi munkatshi muenu, tshiakuikala nenu to.+ 13 Juka, ujidile bantu!+ Ubambile ne: ‘Dijidilayi bua malaba, bualu Yehowa Nzambi wa Isalele udi wamba ne: “Tshintu tshidibu ne bua kubutula tshidi munkatshi muebe, wewe Isalele. Kuakukumbana bua kuimana kumpala kua bena lukuna bebe too ne paudi umbusha tshintu tshia kubutula tshidi munkatshi muebe. 14 Nenulue mu dinda tshisa ku tshisa, ne tshisa tshiasungula Yehowa+ netshisemene dîku ku dîku, ne dîku diasungula Yehowa nedisemene nzubu ku nzubu, ne nzubu wasungula Yehowa neasemene muntu ku muntu. 15 Muntu wakuatabu ne tshintu tshia kubutula nebamuoshe ne kapia,+ yeye ne bionso bidiye nabi, bualu mmunyange tshipungidi+ tshia Yehowa ne bualu mmuenze bualu bua bundu mu Isalele.”’”

16 Nunku pakatshiabu, Yoshua wakajuka mu dinda menemene, kusemejaye bena Isalele tshisa ku tshisa, bobu kusungula tshisa tshia Yuda. 17 Wakasemeja mêku a Yuda, bobu kusungula dîku dia bena Zela,+ pashishe kusemejaye dîku dia bena Zela muntu ku muntu, kusungulabu Zabedi. 18 Ndekelu wa bionso, wakasemeja ba mu nzubu mua Zabedi muntu ku muntu, kusungulabu Akana muana wa Kâmi, muana wa Zabedi, muana wa Zela, wa mu tshisa tshia Yuda.+ 19 Ke Yoshua kuambila Akana ne: “Muananyi, ndi nkulomba bua unemeke Yehowa Nzambi wa Isalele ne umutondele mpekatu webe. Ngambila koku tshiudi muenze. Kutshinsokoki to.”

20 Akana wakandamuna Yoshua ne: “Bushuwa, meme ke udi muenzele Yehowa Nzambi wa Isalele mpekatu; bualu bundi muenze budi nunku: 21 Pamvua mumone tshilamba tshimpe tshia pa buatshi tshia ku Shinâ,+ ne nshekele* 200 ya tshiamu tshia arjan ne mulungu wa or wa bujitu bua nshekele 50 mu bintu bituvua bapete, biakansamina muoyo, ke meme kubiangata. Mpindieu mbisokoka mu buloba mu ntenta wanyi, ne makuta adi muinshi.”

22 Diakamue Yoshua wakatuma bantu, kuyabu lubilu mu ntenta wa Akana; monayi, tshilamba tshivua tshisokoka mu ntenta amu ne makuta avua muinshi muatshi. 23 Nunku bakangata bintu abi mu ntenta, kuluabu nabi kudi Yoshua ne kudi bena Isalele bonso, bobu kubiteka kumpala kua Yehowa. 24 Pashishe Yoshua ne bena Isalele bavua nende bakangata Akana+ muana wa Zela, ne tshiamu tshia arjan, ne tshilamba tshia pa buatshi, ne mulungu wa or,+ pamue ne bana bende ba balume, ne bana bende ba bakaji, ne ngombe yende, ne mpunda yende, ne mikoko yende, ne ntenta wende, ne bintu bionso bivuaye nabi, bobu kuya nabu mu Tshibandabanda* tshia Akola.+ 25 Pashishe Yoshua wakamba ne: “Bua tshinyi udi mutukebele dikenga?*+ Yehowa neakutumine dikenga lelu eu.” Ke bena Isalele bonso kumuasa mabue,+ pashishe bakabuosha ne kapia.+ Nunku bakabasa mabue buonso buabu. 26 Pashishe bakakunguija mushiki munene wa mabue pa mutu pende; mushiki au udiku too ne lelu. Nunku tshiji tshikole tshia Yehowa tshiakapueka.+ Ke bualu kayi badi babikila muaba au ne: Tshibandabanda tshia Akola* too ne lelu.

8 Pashishe Yehowa wakambila Yoshua ne: “Kutshinyi anyi kuikadi ne buôwa to.+ Angata baluanganyi ba mvita bonso, ubande bua kuluisha Ai. Mona, ndi mufile mukalenge wa Ai ne bantu bende ne tshimenga tshiende ne buloba buende mu tshianza tshiebe.+ 2 Wenzele Ai ne mukalenge wende anu muuvua muenzele Yeliko ne mukalenge wende,+ kadi nudi mua kuangata bintu ne bimuna binudi nupetamu buenu nuenu. Uteke bantu bua kualamina panyima pa tshimenga.”

3 Nunku Yoshua ne baluanganyi ba mvita bonso bakabanda bua kuluisha Ai. Yoshua wakasungula bilobo bia mvita binunu 30, kubitumaye butuku butuku. 4 Wakabitumina dîyi edi ne: “Tangilayi, nudi ne bua kualamina panyima pa tshimenga. Kanuyi kule menemene ne tshimenga to, ne nuenu bonso nuikale badilongolole. 5 Meme ne bantu bonso badi nanyi netusemene pabuipi ne tshimenga, ne padibu bapatuka bua kutuluisha anu bu kumpala,+ netubanyeme. 6 Padibu bapatuka bua kutulonda, netubakoke kule ne tshimenga, bualu nebambe ne: ‘Badi batunyema anu bu kumpala.’+ Nunku tuetu netubanyeme. 7 Pashishe nenujuke muaba unudi balamine, nenukuate tshimenga; Yehowa Nzambi wenu neatshifile mu bianza bienu. 8 Diakamue panudi nukuata tshimenga, nudi ne bua kutshitua kapia.+ Nenuenze malu bilondeshile dîyi dia Yehowa. Tangilayi, ndi munuambile tshinudi ne bua kuenza.”

9 Pashishe Yoshua wakabatuma, bobu kuya muaba uvuabu ne bua kualamina; bakimanyina pankatshi pa Betele ne Ai, ku ouest kua Ai, pavua Yoshua yeye mushale ne bantu butuku abu.

10 Pashishe Yoshua wakajuka mu dinda menemene, kusangishaye basalayi, ne yeye ne bakulu ba mu Isalele bakabalombola ku Ai. 11 Baluanganyi ba mvita bonso+ bavua nende bakaya, kusemenabu kumpala kua tshimenga. Bakatudila ku nord kua Ai, ne tshibandabanda tshivua pankatshi pabu ne Ai. 12 Pine apu ukavua muangate bantu batue ku 5 000, mubateke bua kualamina+ pankatshi pa Betele+ ne Ai, ku ouest kua tshimenga. 13 Nunku bantu bakasa tshitudilu tshinene ku nord kua tshimenga,+ ne basalayi bavua balamine bavua ku ouest kua tshimenga,+ ne Yoshua wakaya munkatshi mua tshibandabanda* butuku abu.

14 Diakamue pavua mukalenge wa Ai mumone bualu ebu, yeye ne bantu balume ba mu tshimenga bakapatuka lukasa mu dinda menemene bua kuluangana ne Isalele muaba kampanda uvua kuulu kua mpata wa tshipela. Kadi kavua mumanye ne: kuvua bantu bavua balamine panyima pa tshimenga bua kumuluisha to. 15 Pakatuadija bantu ba mu Ai kubaluisha, Yoshua ne bena Isalele bonso bakanyemena mu njila udi mutangile mu tshipela.+ 16 Nunku bakatumina bantu bonso bavua mu tshimenga dîyi bua kubalondabu; ne pavuabu balonda Yoshua, bakakokibua kule ne tshimenga. 17 Kakuvua muntu mulume nansha umue uvua mushale mu Ai ne mu Betele uvua kayi mulonde bena Isalele to. Bakashiya tshimenga tshionso buashi, kulondabu bena Isalele.

18 Ke Yehowa kuambila Yoshua ne: “Olola tshianza tshiebe, utangije difuma didimu ku Ai,+ bualu nemmufile mu tshianza tshiebe.”+ Nunku Yoshua wakolola tshianza tshiende, kutangijaye difuma divuamu ku tshimenga. 19 Diakamue pakololaye tshianza, bantu bavua balamine bakajuka lukasa muaba uvuabu, kubuelabu mu tshimenga lubilu, kutshikuatabu, kutshituabu kapia musangu umue.+

20 Pakakudimuka bantu ba mu Ai, bakamona muishi wa tshimenga ubanda muulu, kupangabu bukole bua kunyemena luseke nansha lumue. Nunku bantu bavua banyemena luseke lua tshipela bakakudimukila bantu bavua babalonda. 21 Pakamona Yoshua ne bena Isalele bonso ne: bantu bavua balamine abu bavua bakuate tshimenga, ne bamone muishi wa tshimenga ubanda, bakakudimuka, kutuadijabu kuluisha bantu ba mu Ai. 22 Bakuabu abu bakapatuka pabu mu tshimenga bua kusambakena nabu, nunku bantu ba mu Ai bakadisangana munkatshi, bamue bena Isalele ku luseke elu ne bakuabu ku luseke lualua, ne bakabashipa too ne pavua muntu nansha umue kayi mushale ne muoyo anyi munyeme.+ 23 Kadi bakakuata mukalenge wa Ai+ ne muoyo, kuluabu nende kumpala kua Yoshua.

24 Pakajikija bena Isalele kushipa bena mu Ai bonso pambelu pa tshimenga, mu tshipela muvuabu babalonde, ne pakakuluka muntu wa ndekelu ku muele wa mvita, nunku bena Isalele bonso bakapingana ku Ai, kumubutulabu ne muele wa mvita. 25 Bantu bonso bavua bafue dituku adi, bantu balume ne bantu bakaji, bavua binunu 12, mmumue ne: bantu bonso ba mu Ai. 26 Yoshua kakapingaja tshianza tshiende tshivua ne difuma tshivuaye muolole+ too ne pakabutulaye bantu bonso ba mu Ai.+ 27 Kadi bena Isalele bakangata bimuna ne bintu bivuabu bapete mu tshimenga buabu bobu, bilondeshile mêyi avua Yehowa mutumine Yoshua.+

28 Pashishe Yoshua wakuosha Ai, kumushiyaye tshibundu bua kashidi,+ anu mudiye mushale too ne lelu. 29 Kukudikaye mukalenge wa Ai ku mutshi* too ne ku dilolo, ne pakavua dîba dikeba kubuela, Yoshua wakatuma dîyi bua batulule tshitalu tshiende ku mutshi.+ Pashishe bakatshimansha ku tshibuelelu tshia tshiibi tshia tshimenga, kunguijabu mushiki wa mabue pa tshitalu tshiende, mushiki au udiku too ne lelu.

30 Tshikondo atshi ke tshivua Yoshua muashile Yehowa Nzambi wa Isalele tshioshelu ku mukuna wa Ebala,+ 31 anu muvua Mose muena mudimu wa Yehowa mutumine bena Isalele dîyi bua kuenza ne anu mudibi bifunda mu mukanda wa Mikenji+ ya Mose ne: “Tshioshelu tshia mabue majima adibu kabayi bakose ne tshiamu.”+ Bakalambuilapu Yehowa milambu ya kuosha ne milambu ya diumvuangana.+

32 Pashishe wakatentula pa mabue apu Mikenji+ ivua Mose mufunde kumpala kua bena Isalele.+ 33 Bena Isalele bonso, bakulu babu, batangidi babu, ne balumbuluishi babu, bavua bimane nseke yonso ibidi ya Mushete kumpala kua bakuidi bena Lewi bavua bambule mushete wa tshipungidi tshia Yehowa. Bantu bavua basombe buenyi ne bena Isalele bavuapu.+ Tshitupa tshia bantu tshivua tshimane kumpala kua mukuna wa Gelizima ne tshitupa tshikuabu kumpala kua mukuna wa Ebala,+ (anu muvua Mose muena mudimu wa Yehowa mudianjile kutuma dîyi),+ bua kubenesha tshisamba tshia Isalele. 34 Pashishe wakabala mêyi a mu Mikenji,+ mabenesha,+ ne milawu+ ne dîyi dikole, bilondeshile malu onso adibu bafunde mu mukanda wa Mikenji. 35 Kakuvua dîyi nansha dimue ku mêyi onso avua Mose mutume dîyi bua kuenza divua Yoshua kayi mubale ne dîyi dikole kumpala kua tshisumbu tshijima tshia bena Isalele,+ kusangisha ne bantu bakaji ne bana ne bantu bavua basombe buenyi+ bavua* munkatshi muabu.+

9 Pavua bakalenge bonso bavua ku luseke lua ouest lua Yadene+ bumvue tshivua tshienzeke, bonso bavua mu buloba bua mikuna, mu Shefela, ku maloba onso a ku muelelu kua Mbuu Munene,*+ ne kumpala kua Lebanona, mmumue ne: bena Hiti, bena Amola, bena Kanâna, bena Pelizi, bena Hiwi, ne bena Yebuse,+ 2 bakadisanga bua kuluisha Yoshua ne Isalele.+

3 Bena mu Gibeona+ bakumvua pabu tshivua Yoshua muenzele Yeliko+ ne Ai.+ 4 Nunku bakenza malu ne budimu, kuelabu biakudia mu bibombi bisunsuke, kubitekabu pa mpunda yabu, pamue ne milondo ya mvinyo ya biseba misunsuke ikavua mitayike ne bayilamakaje; 5 bavua kabidi ne sandala misunsuke ne milamakaja ku makasa abu, ne bavua bavuale bilamba bisunsuke. Mampa onso avuabu bambule avua mume ne asunsuluka. 6 Nunku bakaya kudi Yoshua mu tshitudilu tshivua ku Gilegala,+ kumuambilabu yeye ne bena Isalele ne: “Tudi bafume ku buloba bua kule. Nunku tudi tunulomba bua kudia netu tshipungidi.” 7 Kadi bena Isalele bakambila bena Hiwi ne:+ “Pamuapa nudi basombele pabuipi netu. Nunku tudi mua kudia nenu tshipungidi mushindu kayi?”+ 8 Bakandamuna Yoshua ne: “Tudi bena mudimu bebe.”*

Nunku Yoshua wakabebeja ne: “Nuenu nudi banganyi? Nudi nufumina penyi?” 9 Ke bobu kumuambila ne: “Bena mudimu bebe mbafumine ku buloba bua kule menemene+ bua dîna dia Yehowa Nzambi webe, bualu tuvua bumvue lumu luende ne malu onso avuaye muenze mu Ejipitu+ 10 ne malu onso avuaye muenzele bakalenge babidi ba bena Amole bavua dia muamua* dia Yadene, Sihona+ mukalenge wa Heshebona ne Oga+ mukalenge wa Bashana, uvua mu Ashetalota. 11 Ke bualu kayi bakulu betu ne bantu bonso ba mu buloba buetu bakatuambila ne: ‘Angatayi bintu bia nuenu kudia mu njila, nuye kusambakena nabu. Nubambile ne: “Netuikale bena mudimu benu;+ nunku tudi tunulomba bua kudia netu tshipungidi.”’+ 12 Mampa atuvua bangate bua tuetu kudia aa atshivua ne luya patuvua bumbuke ku nzubu yetu bua kulua kunudi muaba eu. Mpindieu monayi mudiwu mume ne asunsuluka.+ 13 Milondo ya mvinyo ya biseba eyi ivua mipiamipia patuvua belamu mvinyo, kadi mpindieu ikadi mitayike.+ Bilamba bietu ne sandala yetu mbisunsuke bua bule bua luendu.”

14 Ke bantu kuangatabu* ndambu wa bintu biabu bia kudia, kadi kabakebeja Yehowa bualu to.+ 15 Nunku Yoshua wakadia nabu tshipungidi tshia ditalala,+ kubalayaye bua kubashiya ne muoyo, ne bamfumu ba tshisumbu bakabalaya nanku mu mutshipu.+

16 Ku ndekelu kua matuku asatu bobu bamane kudia nabu tshipungidi, bakumvua ne: bavua basombele pabuipi apu, ku mutumba kuabu. 17 Pashishe bena Isalele bakasa luendu ne bakafika mu bimenga biabu dituku disatu; bimenga biabu bivua: Gibeona,+ Kefila, Bêlota, ne Kîyata-yalima.+ 18 Kadi bena Isalele kabakabaluisha to, bualu bamfumu ba tshisumbu bakavua baditshipe kudibu mu dîna dia Yehowa+ Nzambi wa Isalele. Nunku tshisumbu tshijima tshiakabanga kunungana bua bamfumu. 19 Ke bamfumu bonso kuambilabu tshisumbu tshijima ne: “Bu mutuvua baditshipe kudibu mu dîna dia Yehowa Nzambi wa Isalele, katuena ne mushindu wa kubenzela bibi to. 20 Netuenze nunku: Netubalekele ne muoyo, bua tshiji tshia Nzambi katshilu kutudi bua mutshipu utuvua baditshipe kudibu.”+ 21 Bamfumu bakamba kabidi ne: “Bashale ne muoyo, kadi balue bangudi ba nkunyi ne basunyi ba mâyi bua tshisumbu tshijima.” Ke tshiakabalaya bamfumu.

22 Nunku Yoshua wakababikila, kubambilaye ne: “Bua tshinyi nuvua batudinge, nuamba ne: ‘Tudi tufumina muaba wa kule menemene,’ penu basombele bushuwa anu munkatshi muetu emu?+ 23 Kumbukila ku lelu nudi bedibue mulawu,+ ne nenuikale anu mu mulongo wa bapika bu bangudi ba nkunyi ne basunyi ba mâyi bua nzubu wa Nzambi wanyi.” 24 Bakandamuna Yoshua ne: “Mbualu bavua bambile bena mudimu bebe patoke ne: Yehowa Nzambi webe uvua mutumine Mose muena mudimu wende dîyi bua kunupesha buloba buonso ebu ne kubutula benamu bonso kumpala kuenu.+ Nunku tuvua bumvue buôwa bua mioyo* yetu bua bualu buenu,+ ke bualu kayi tuvua benze nunku.+ 25 Mpindieu tudi mu bianza biebe. Tuenzela tshionso tshiudi mumone ne: ntshimpe ne tshiakane.” 26 Ke tshiakabenzelaye; wakabapandisha mu bianza bia bena Isalele, ne kabakabashipa to. 27 Kadi dituku adi, Yoshua wakabavuija bangudi ba nkunyi ne basunyi ba mâyi bua tshisumbu+ ne bua tshioshelu tshia Yehowa muaba uvuaye Yeye ne bua kusungula,+ ne mbashale nanku too ne lelu.+

10 Diakamue pakumvua Adoni-sedeke mukalenge wa Yelushalema ne: Yoshua uvua mukuate Ai ne mumubutule, muenzele Ai ne mukalenge wende+ anu muvuaye muenzele Yeliko ne mukalenge wende,+ ne muvua bena mu Gibeona bapunge tshipungidi tshia ditalala ne Isalele+ ne bashale munkatshi muabu, 2 wakumvua buôwa bua bungi,+ bualu Gibeona uvua tshimenga tshinene, bu tshimue tshia ku bimenga bia bakalenge. Uvua munene kupita Ai,+ ne bantu balume bonso ba muomu bavua bena mvita. 3 Nunku Adoni-sedeke mukalenge wa Yelushalema wakatumina Hohama mukalenge wa Hebelone,+ Pilama mukalenge wa Yâmuta, Yafia mukalenge wa Lakisha, ne Debî mukalenge wa Egelona, mukenji eu ne:+ 4 “Luayi nungambuluishe, tuluishayi Gibeona, bualu mmupunge tshipungidi tshia ditalala ne Yoshua ne bena Isalele.”+ 5 Nunku bakalenge batanu ba bena Amole+ bakadisanga pamue, mmumue ne: mukalenge wa Yelushalema, mukalenge wa Hebelone, mukalenge wa Yâmuta, mukalenge wa Lakisha, ne mukalenge wa Egelona, pamue ne biluilu biabu, bobu kuya, kuasabu tshitudilu bua kuluisha Gibeona.

6 Pashishe bantu ba mu Gibeona bakatumina Yoshua mukenji mu tshitudilu ku Gilegala ne:+ “Kulekedi* bapika bebe to.+ Luaku lukasa! Utusungile ne utuambuluishe! Bakalenge bonso ba bena Amole ba ku buloba bua mikuna mbadisange bua kutuluisha.” 7 Nunku Yoshua wakabanda, umbukila ku Gilegala ne baluanganyi ba mvita bonso ne bilobo bia mvita.+

8 Pashishe Yehowa wakambila Yoshua ne: “Kubatshinyi to,+ bualu ndi mubafile mu tshianza tshiebe.+ Muntu nansha umue wa kudibu kakukukandamena to.”+ 9 Yoshua wakalua kudibu mu tshimpitshimpi yeye mumane kuenda butuku bujima ufumina ku Gilegala. 10 Yehowa wakababueja mu kayumbayumba kumpala kua Isalele,+ bobu kubashipa dishipa dia dikema ku Gibeona, kubalondabu mu njila udi mubande ku Bete-holona, kubashipabu too ne ku Azeka ne ku Makeda. 11 Pavuabu benda banyema Isalele, bikale pa mpulumuku wa Bete-holona, Yehowa wakabalokeshila mabue manene a mvula umbukila mu diulu, too ne ku Azeka, bobu kufua. Bushuwa, bantu bavua bafue ku mabue a mvula bavua bapite bavua bafue ku muele wa mvita wa bena Isalele ku bungi.

12 Dîba adi, dituku divua Yehowa mutshimune bena Amole ku mêsu kua bena Isalele, ke divua Yoshua muambile Yehowa kumpala kua Isalele ne:

13 Nunku dîba diakimana tendee ne ngondo kakanyunga too ne pavua tshisamba tshidisombuele kudi bena lukuna batshi. Ki mbafunde bualu ebu mu mukanda wa Yashâ anyi?+ Dîba diakimana tendee munkatshi mua diulu ne kadiakabuela lukasa dituku bu dijima. 14 Kakutu kuanji kuikala dituku bu dituku adi to, ni nkumpala kuadi anyi panyima padi, divua Yehowa muteleje dîyi dia muntu,+ bualu Yehowa uvua uluila Isalele.+

15 Pashishe Yoshua pamue ne Isalele mujima bakapingana mu tshitudilu ku Gilegala.+

16 Pine apu bakalenge batanu abu bakanyema, kusokomabu mu nyongolo ku Makeda.+ 17 Pashishe bakambila Yoshua ne: “Mbasangane bakalenge batanu abu basokome mu nyongolo ku Makeda.”+ 18 Ke Yoshua kuamba ne: “Bungulujayi mabue manene, nuajike ku mushiku wa nyongolo au, nutekaku bantu bua kubalama. 19 Kadi nuenu bakuabu kanuimanyi to. Londayi bena lukuna benu, nubashipele lua panyima.+ Kanubalekedi babuela mu bimenga biabu to, bualu Yehowa Nzambi wenu mmubafile mu bianza bienu.”

20 Pavua Yoshua ne bena Isalele bajikije kubashipa dishipa dia dikema menemene, bamba kubabutula bonso pa kumbusha bantu ndambu bavua bapande, banyemene mu bimenga bikolesha, 21 bantu bonso bakapingana kudi Yoshua mu tshitudilu ku Makeda kakuyi bualu bubi bubafikile. Muntu nansha umue kakateta kuamba bena Isalele dîyi.* 22 Pashishe Yoshua wakamba ne: “Kangulayi mushiku wa nyongolo, nupatule bakalenge batanu abu, nulue nabu kundi.” 23 Nunku bakapatula bakalenge batanu aba mu nyongolo, kuyabu nabu kudiye: mukalenge wa Yelushalema, mukalenge wa Hebelone, mukalenge wa Yâmuta, mukalenge wa Lakisha, ne mukalenge wa Egelona.+ 24 Pakayabu ne bakalenge batanu aba kudi Yoshua, Yoshua wakabikila bantu balume bonso ba mu Isalele, kuambilaye balombodi ba baluanganyi ba mvita bavua baye nende ne: “Semenayi. Diatayi makasa enu pa makoshi a bakalenge aba.” Nunku bakasemena, bobu kudiata makasa abu pa makoshi abu.+ 25 Ke Yoshua kubambila ne: “Kanutshinyi anyi kanuikadi ne buôwa to.+ Ikalayi ne dikima ne bukole, bualu ke tshienzela Yehowa bena lukuna benu bonso banudi nuluangana nabu.”+

26 Pashishe Yoshua wakabakuma, kubashipaye, kubakudikaye ku mitshi* itanu, ne bakashala bakudika ku mitshi ayi too ne ku dilolo. 27 Pakavua dîba dibuela, Yoshua wakatuma dîyi bua babatulule ku mitshi+ ne babimanshe mu nyongolo muvuabu basokome. Pashishe bakajika mabue manene ku mushiku wa nyongolo, ne owu aa adiku too ne lelu eu.

28 Yoshua wakakuata Makeda+ dituku adi, kubutulaye benamu ne muele wa mvita. Wakabutula mukalenge wende ne bantu bonso* bavuamu, kayi ushiya muntu nansha umue ne muoyo.+ Wakenzela mukalenge wa Makeda+ anu muvuaye muenzele mukalenge wa Yeliko.

29 Pashishe Yoshua pamue ne Isalele mujima bakumbuka ku Makeda, kuyabu ku Libina, kuluishabu Libina.+ 30 Yehowa wakafila kabidi Libina ne mukalenge wende+ mu tshianza tshia Isalele, bobu kumubutula ne bantu bonso* bavuamu ne muele wa mvita, kabayi bashiyamu muntu nansha umue ne muoyo. Nunku bakenzela mukalenge wende anu muvuabu benzele mukalenge wa Yeliko.+

31 Pashishe Yoshua pamue ne Isalele mujima bakumbuka ku Libina, kuyabu ku Lakisha,+ kuasabu tshitudilu kuntu aku, bobu kumuluisha. 32 Yehowa wakafila Lakisha mu tshianza tshia Isalele, bobu kumukuata dituku dibidi. Bakamubutula ne bantu bonso* bavuamu ne muele wa mvita,+ anu muvuabu benzele Libina.

33 Ke Holama mukalenge wa Gezê+ kubandaye bua kuambuluisha Lakisha. Kadi Yoshua wakamushipa yeye ne bantu bende too ne pavuaku kakuyi kushale muntu nansha umue ne muoyo.

34 Pashishe Yoshua pamue ne Isalele mujima bakumbuka ku Lakisha kuyabu ku Egelona,+ kuasabu tshitudilu kuntu aku, bobu kumuluisha. 35 Bakakuata Egelona dituku adi, kumubutulabu ne muele wa mvita. Dituku adi bakabutula bantu bonso* bavuamu, anu muvuabu benzele Lakisha.+

36 Pashishe Yoshua pamue ne Isalele mujima bakumbuka ku Egelona kuyabu ku Hebelone,+ bobu kumuluisha. 37 Bakakuata Hebelone, kumubutulabu ne mukalenge wende, ne bimenga biende, ne bantu bonso* bavuamu ne muele wa mvita, kabayi bashiya muntu nansha umue ne muoyo. Wakamubutula ne bantu bonso* bavuamu, anu muvuaye muenzele Egelona.

38 Ndekelu wa bionso, Yoshua pamue ne Isalele mujima bakakudimuka batangile ku Debî,+ bobu kumuluisha. 39 Wakakuata Debî, mukalenge wende ne bimenga biende bionso, kubibutulabu ne muele wa mvita, kubutulabu bantu bonso* bavuamu,+ kabayi bashiya muntu nansha umue ne muoyo.+ Wakenzela Debî ne mukalenge wende anu muvuaye muenzele Hebelone, ne Libina ne mukalenge wende.

40 Yoshua wakatshimuna tshitupa tshionso tshia buloba bua mikuna, tshia Negebe, tshia Shefela,+ ne tshia mpulumuku, ne bakalenge ba bitupa bionso abi, kayi ushiya muntu nansha umue ne muoyo; wakabutula tshintu tshionso tshivua tshipuyakana,+ anu muvua Yehowa Nzambi wa Isalele mutume dîyi bua kuenza.+ 41 Yoshua wakabatshimuna kumbukila ku Kadeshe-bânea+ too ne ku Gaza+ ne buloba buonso bua Goshene+ too ne ku Gibeona.+ 42 Yoshua wakakuata bakalenge aba bonso ne buloba buabu, bionso musangu umue, bualu Yehowa Nzambi wa Isalele ke uvua uluila Isalele mvita.+ 43 Pashishe Yoshua wakapingana ne Isalele mujima mu tshitudilu ku Gilegala.+

11 Diakamue pakumvua Yabina mukalenge wa Hasô bualu abu, wakatuma mukenji kudi Yobaba mukalenge wa Madona,+ kudi mukalenge wa Shimelona, kudi mukalenge wa Akasafa,+ 2 kudi bakalenge bavua ku nord mu buloba bua mikuna, kudi bavua mu mpata* ku sud kua Kinelete, kudi bavua mu Shefela ne mu mpulumuku ya Dô+ ku ouest, 3 kudi bena Kanâna+ ku est ne ku ouest, kudi bena Amole,+ kudi bena Hiti, kudi bena Pelizi, kudi bena Yebuse mu buloba bua mikuna, ne kudi bena Hiwi+ kuinshi kua mukuna wa Hêmona+ mu buloba bua Misepa. 4 Nunku bakalua ne biluilu biabu bionso, tshisumbu tshinene menemene, bungi bu nsenga ya ku muelelu kua mbuu, pamue ne tubalu tua bungi menemene ne matempu a mvita. 5 Bakalenge bonso aba bakitaba bua kusambakena, bobu kulua, kuasabu tshitudilu pamue ku mâyi a Meloma bua kuluisha Isalele.

6 Ke Yehowa kuambila Yoshua ne: “Kutshinyi bua bualu buabu,+ bualu malaba ku mêba aa nembafile buonso buabu kudi Isalele, bashipa. Udi ne bua kukosa mijilu ya ku bikono bia tubalu tuabu,+ ne udi ne bua kuosha makalu abu a mvita mu kapia.” 7 Nunku Yoshua pamue ne baluanganyi ba mvita bonso bakabela mvita mu tshimpitshimpi kumpenga kua mâyi a Meloma. 8 Yehowa wakabafila mu tshianza tshia Isalele,+ bobu kubatshimuna, kubalondabu too ne ku Sidona munene+ ne ku Miselefota-mayima,+ ne mu Tshibandabanda tshia Misepe ku est; bakabashipa too ne pavuaku kakuyi kushale muntu nansha umue ne muoyo.+ 9 Pashishe Yoshua wakabenzela anu muvua Yehowa mumuambile; wakakosa mijilu ya ku bikono bia tubalu tuabu ne wakuosha makalu abu a mvita mu kapia.+

10 Pashishe Yoshua wakapingana, kukuataye Hasô, kushipaye mukalenge wende ne muele wa mvita,+ bualu kumpala Hasô uvua ku mutu kua makalenge onso aa. 11 Bakashipa bantu bonso* bavuamu ne muele wa mvita, kubabutulabu.+ Kakuvua kushale tshintu nansha tshimue tshivua tshipuyakana to.+ Pashishe wakuosha Hasô ne kapia. 12 Yoshua wakakuata bimenga bionso bia bakalenge aba, kutshimunaye bakalenge bonso ba bimenga abi ne muele wa mvita.+ Wakababutula+ anu muvua Mose muena mudimu wa Yehowa mutume dîyi bua kuenza. 13 Kadi Isalele kavua muoshe bimenga bivua pa mikuna yabi pa kumbusha Hasô; tshiotshi ke tshimenga tshimuepele tshivua Yoshua muoshe. 14 Bena Isalele bakangata buabu bobu bintu bionso bivuabu bapete mu bimenga abi ne bimuna.+ Kadi bakashipa bantu bonso ne muele wa mvita too ne pakabutulabu yonso wa kudibu.+ Kabakashiya muntu nansha umue uvua upuyakana to.+ 15 Anu muvua Yehowa mutumine Mose muena mudimu wende dîyi bua kuenza, ke muvua Mose mutumine Yoshua dîyi bua kuenza,+ ne ke muvua Yoshua muenze. Kakashiya bualu nansha bumue bua ku malu onso avua Yehowa mutumine Mose dîyi bua kuenza kabuyi buenza.+

16 Nunku Yoshua wakatshimuna buloba buonso ebu, buloba bua mikuna, Negebe yonso,+ buloba buonso bua Goshene, Shefela,+ Alabâ,+ buloba bua mikuna bua Isalele ne Shefela* wabu, 17 kumbukila ku mukuna wa Halaka udi mubande too ne ku Seî, too ne ku Bâla-gada+ mu Tshibandabanda tshia Lebanona kuinshi kua mukuna wa Hêmona,+ ne wakakuata bakalenge babu bonso, yeye kubatshimuna, kubashipaye. 18 Yoshua wakaluangana ne bakalenge bonso aba ndambu wa matuku. 19 Kakuvua tshimenga tshivua tshidie tshipungidi tshia ditalala ne bena Isalele pa kumbusha bena Hiwi bavua basombele mu Gibeona.+ Bakakuata bikuabu bionso ku mvita.+ 20 Yehowa ke uvua mulekele bua mioyo yabu ipape+ bua kuela Isalele mvita, bua yeye ababutule kakuyi luse.+ Bavua ne bua kubutudibua anu muvua Yehowa mutumine Mose dîyi bua kuenza.+

21 Tshikondo atshi Yoshua wakajimija bena Anaka+ mu buloba bua mikuna, mu Hebelone, mu Debî, mu Anaba, ne mu buloba buonso bua mikuna bua Yuda ne buloba buonso bua mikuna bua Isalele. Yoshua wakababutula bobu ne bimenga biabu.+ 22 Kakuvua kushale muena Anaka nansha umue mu buloba bua Isalele; bakashala+ anu mu Gaza,+ mu Gata+ ne mu Ashedodo.+ 23 Nunku Yoshua wakakuata buloba buonso anu muvua Yehowa mulaye Mose,+ ne pashishe Yoshua wakabupesha bena Isalele bu bumpianyi bilondeshile bitupa biabu, bua babuabanye mu bisa biabu.+ Nunku buloba buakashala mu dikisha, kakuyi mvita.+

12 Mpindieu aba ke bakalenge ba buloba bavua bena Isalele batshimune, bena buloba buvuabu bangate luseke lua ku est kua Yadene, kumbukila ku Tshibandabanda tshia Ânona*+ kubanda too ne ku mukuna wa Hêmona+ ne Alabâ mujima lua ku est:+ 2 Sihona mukalenge+ wa bena Amole, uvua musombele mu Heshebona ne uvua ukokesha kumbukila ku Aloê,+ udi ku muelelu kua Tshibandabanda tshia Ânona,*+ ne kumbukila munkatshi mua tshibandabanda atshi ne tshitupa tshia Gilada too ne ku Tshibandabanda* tshia Yaboka, mukalu wa bena Amona. 3 Uvua ukokesha kabidi mu Alabâ too ne ku Mbuu wa Kinelete*+ lua ku est, too ne ku Mbuu wa mu Alabâ, Mbuu wa Mukele,* lua ku est batangile ku Bete-yishimota, ne lua ku sud kuinshi kua mpulumuku ya Pisega.+

4 Kabidi ne buloba bua Oga mukalenge+ wa Bashana uvua umue wa mu bena Lefa ba ndekelu,+ uvua musombele mu Ashetalota ne Edelei, 5 ne uvua ukokesha ku mukuna wa Hêmona, mu Saleka, ne mu Bashana mujima,+ too ne ku mukalu wa bena Geshû ne bena Mâkata,+ ne tshitupa tshia Gilada, too ne ku buloba bua Sihona mukalenge wa Heshebona.+

6 Mose muena mudimu wa Yehowa ne bena Isalele bakabatshimuna,+ pashishe Mose muena mudimu wa Yehowa wakafila buloba buabu kudi bena Lubena, bena Gada, ne tshitupa tshia tshisa tshia Manashe bua buikale buabu.+

7 Aba ke bakalenge ba buloba bavua Yoshua ne bena Isalele batshimune ku luseke lua ku ouest kua Yadene, kumbukila ku Bâla-gada+ mu Tshibandabanda tshia Lebanona+ too ne ku mukuna wa Halaka+ udi mubande too ne ku Seî,+ pashishe Yoshua wakafila buloba buabu kudi bisa bia Isalele bua buikale buabu bilondeshile bitupa biabu,+ 8 mu buloba bua mikuna, mu Shefela, mu Alabâ, mu mpulumuku, mu tshipela, ne mu Negebe,+ mbuena kuamba ne: buloba bua bena Hiti, bena Amole,+ bena Kanâna, bena Pelizi, bena Hiwi, ne bena Yebuse:+

13 Mpindieu Yoshua ukavua mukulakaje ne muikale ne bidimu bia bungi.+ Nunku Yehowa wakamuambila ne: “Ukadi mukulakaje ne muikale ne bidimu bia bungi; kadi kutshidi kushale tshitupa tshinene tshia buloba tshia kukuata.* 2 Ebu ke buloba budi bushale:+ bitupa bia maloba onso a bena Peleshete ne a bena Geshû bonso+ 3 (kumbukila ku diapa dia musulu wa Nile* didi ku est kua* Ejipitu too ne ku mukalu wa Ekelona ku nord, buloba buvuabu bangata bu buloba bua bena Kanâna)+ kusangisha ne buloba bua bakalenge batanu ba bena Peleshete,+ mmumue ne: bena Gaza, bena Ashedodo,+ bena Ashekelona,+ bena Gata,+ ne bena Ekelona;+ buloba bua bena Awima+ 4 ku sud; buloba buonso bua bena Kanâna; Meala wa bena Sidona,+ too ne ku Afeke, too ne ku mukalu wa bena Amole; 5 buloba bua bena Gebala+ ne Lebanona mujima lua ku est, kumbukila ku Bâla-gada kuinshi kua mukuna wa Hêmona too ne ku Lebo-hamate;*+ 6 bantu bonso ba mu buloba bua mikuna, kumbukila ku Lebanona+ too ne ku Miselefota-mayima;+ ne bena Sidona bonso.+ Nembipate* kumpala kua bena Isalele.+ Wewe udi anu ne bua kubupesha Isalele bu bumpianyi, anu mundi mukutumine dîyi bua kuenza.+ 7 Mpindieu udi ne bua kuabanyina bisa tshitema ne tshitupa tshia tshisa tshia Manashe buloba ebu bu bumpianyi.”+

8 Tshitupa tshikuabu tshia tshisa atshi pamue ne bena Lubena ne bena Gada bavua bangate buabu bumpianyi buvua Mose mubapeshe luseke lua ku est kua Yadene, anu muvua Mose muena mudimu wa Yehowa mubapeshe:+ 9 kumbukila ku Aloê+ udi ku muelelu kua Tshibandabanda tshia Ânona,*+ ne tshimenga tshidi munkatshi mua tshibandabanda, ne mpata yonso wa pa mukuna wa Medeba too ne ku Dibona; 10 ne bimenga bionso bia Sihona mukalenge wa bena Amole uvua ukokesha mu Heshebona, too ne ku mukalu wa bena Amona;+ 11 kabidi ne Gilada ne buloba bua bena Geshû ne bena Mâkata+ ne mukuna wa Hêmona mujima ne Bashana+ mujima too ne ku Saleka;+ 12 bukalenge buonso bua Oga mu Bashana, yeye uvua ukokesha mu Ashetalota ne mu Edelei. (Yeye uvua umue wa ku bena Lefa ba ndekelu.)+ Mose wakabatshimuna, yeye kubipata.*+ 13 Kadi bena Isalele kabavua bipate*+ bena Geshû ne bena Mâkata to, bualu Geshû ne Mâkata mbasombele munkatshi mua Isalele too ne lelu.

14 Anu tshisa tshia bena Lewi ke tshivuaye kayi mupeshe bumpianyi.+ Milambu miosha pa kapia bua Yehowa Nzambi wa Isalele ke bumpianyi buabu,+ anu muvuaye mubalaye.+

15 Pashishe Mose wakapesha tshisa tshia bena Lubena bumpianyi bilondeshile mêku abu, 16 ne buloba buabu buvua bumbukila ku Aloê udi ku muelelu kua Tshibandabanda tshia Ânona,* ne tshimenga tshidi munkatshi mua tshibandabanda atshi, ne mpata mujima wa pa mukuna udi pabuipi ne Medeba; 17 Heshebona ne bimenga biende bionso+ bidi mu mpata wa pa mukuna, Dibona, Bamota-bâla, Bete-bâla-meona,+ 18 Yahasa,+ Kedemota,+ Mefâta,+ 19 Kiyatayima, Sibema,+ ne Selete-shaha pa mukuna wa mu tshibandabanda,* 20 Bete-peô, mpulumuku ya Pisega,+ Bete-yishimota,+ 21 bimenga bionso bia mu mpata wa pa mukuna, bukalenge buonso bua Sihona mukalenge wa bena Amole uvua ukokesha mu Heshebona.+ Mose wakamutshimuna+ ne bamfumu ba bena Midiyana: Evi, Lekeme, Sû, Hû, ne Leba,+ bilolo* bia Sihona bivua bisombele mu buloba abu. 22 Balâma+ muana wa Beô, muena mbuku,+ uvua umue wa ku bantu bavua bena Isalele bashipe ne muele wa mvita pamue ne bantu bakuabu bonso bavuabu bashipe. 23 Mukalu wa bena Lubena uvua Yadene; buloba ebu buvua bumpianyi bua bena Lubena bilondeshile mêku abu, ne bimenga ne miaba yabi mikuabu ya kusombela.

24 Mose wakafila kabidi bumpianyi kudi tshisa tshia Gada, kudi bena Gada bilondeshile mêku abu, 25 ne buloba buabu buvua buangata Yazê+ ne bimenga bionso bia Gilada ne tshitupa tshia buloba bua bena Amona+ too ne ku Aloê, udi mutangilangane ne Laba;+ 26 ne kumbukila ku Heshebona+ too ne ku Lamata-misepe, ne Betonima, kumbukila kabidi ku Mahanayima+ too ne ku mukalu wa Debî; 27 ne mu tshibandabanda,* Bete-halama,+ Bete-nimela, Sukota,+ ne Safona, tshitupa tshia buloba tshivua tshishale tshia bukalenge bua Sihona mukalenge wa Heshebona;+ Yadene muikale mukalu kumbukila kuinshi, ku ndekelu kua Mbuu wa Kinelete*+ ku luseke lua ku est kua Yadene. 28 Ebu ke buvua bumpianyi bua bena Gada bilondeshile mêku abu, ne bimenga ne miaba yabi mikuabu ya kusombela.

29 Mose wakafila kabidi bumpianyi kudi tshitupa tshia tshisa tshia Manashe, kudi tshitupa tshia tshisa tshia Manashe bilondeshile mêku abu.+ 30 Buloba buabu buvua bumbukila ku Mahanayima,+ buangata Bashana mujima, bukalenge buonso bua Oga mukalenge wa Bashana, ne misoko yonso ya ntenta ya mu Yaî+ mu Bashana, bimenga 60. 31 Tshitupa tshia Gilada, ne Ashetalota ne Edelei,+ bimenga bia mu bukalenge bua Oga mu Bashana, biakaya kudi bana ba Makî+ muana wa Manashe, kudi tshitupa tshia bana ba Makî bilondeshile mêku abu.

32 Ebu mbumpianyi buvua Mose mubapeshe mu mpata ya bipela ya Moaba dia muamua dia Yadene, ku est kua Yeliko.+

33 Kadi Mose kakapesha tshisa tshia bena Lewi bumpianyi to.+ Yehowa Nzambi wa Isalele ke bumpianyi buabu, anu muvuaye mubalaye.+

14 Mpindieu ebu ke bumpianyi buvua bena Isalele bangate mu buloba bua Kanâna, buvua muakuidi Eleazâ ne Yoshua muana wa Nuna, ne bamfumu ba nzubu ya batatu ba bisa bia Isalele babapeshe bua kupiana.+ 2 Bakababanyina bumpianyi buabu ku nshobo,+ anu muvua Yehowa mutume dîyi ku butuangaji bua Mose bua bisa tshitema ne tshitupa.+ 3 Mose uvua mufile bumpianyi bua bisa bikuabu bibidi ne tshitupa abi dia muamua* dia Yadene,+ kadi kavua mupeshe bena Lewi bumpianyi munkatshi muabu to.+ 4 Bavua babala ndelanganyi ya Jozefe bu bisa bibidi,+ tshia Manashe ne tshia Efelayima;+ kabakapesha bena Lewi tshitupa tshia buloba mu buloba abu to, pa kumbusha bimenga+ bia kusombelamu ne mpata yabi ya kudishila nyama bua bimuna biabu ne bintu biabu.+ 5 Nunku bena Isalele bakabanya buloba anu muvua Yehowa mutumine Mose dîyi bua kuenza.

6 Pashishe bantu ba mu Yuda bakalua kudi Yoshua ku Gilegala,+ ne Kaleba+ muana wa Yefune muena Kenizi wakamuambila ne: “Udi mumanye bimpe tshivua Yehowa muambile+ Mose muntu wa Nzambi mulelela+ buebe wewe ne buanyi meme ku Kadeshe-bânea.+ 7 Mvua ne bidimu 40 pavua Mose muena mudimu wa Yehowa muntume kumbukila ku Kadeshe-bânea bua kutentekela buloba,+ ne mvua mupingane, muambe bualu anu muvuabu.*+ 8 Nansha muvua bana betu bavua babande nanyi batekeshe bantu ku muoyo,* meme ngakalonda Yehowa Nzambi wanyi ne muoyo mujima.*+ 9 Mose wakaditshipa dituku adi wamba ne: ‘Buloba budi dikasa diebe didiate nebuikale bumpianyi bua kashidi buebe wewe ne bana bebe, bualu wewe udi mulonde Yehowa Nzambi wanyi ne muoyo mujima.’+ 10 Mpindieu anu muvua Yehowa mulaye,+ yeye mmundame ne muoyo+ bidimu 45 ebi katshia Yehowa walaya Mose bualu ebu pavua Isalele wendela mu tshipela;+ ntshidiku too ne lelu, muikale ne bidimu 85. 11 Lelu ndi ne bukole anu mumvua nabu dituku divua Mose muntume. Bukole bundi nabu mpindieu budi anu bu bumvua nabu tshikondo atshi, bua kuya ku mvita ne bua kuenza malu makuabu. 12 Nunku mpesha buloba bua mikuna ebu buvua Yehowa mulaye dituku adi. Nansha muuvua mumvue dituku adi ne: mu buloba amu muvua bena Anaka+ ne bimenga binene bikolesha,+ kakuyi mpata* Yehowa neikale nanyi,+ ne nembipate* anu muvua Yehowa mulaye.”+

13 Nunku Yoshua wakabenesha Kaleba muana wa Yefune, kumupeshaye Hebelone bu bumpianyi.+ 14 Ke bualu kayi Kaleba muana wa Yefune muena Kenizi udi ne Hebelone bu bumpianyi too ne lelu, bualu uvua mulonde Yehowa Nzambi wa Isalele ne muoyo mujima.+ 15 Kumpala dîna dia Hebelone divua Kîyata-âba+ (Âba uvua muntu munene munkatshi mua bena Anaka). Nunku buloba buakashala mu dikisha, kakuyi mvita.+

15 Buloba buvuabu babanyine*+ tshisa tshia Yuda bua mêku abu buvua buya too ne ku mukalu wa Edome,+ tshipela tshia Sine, too ne ku Negebe ku ndekelu wende wa ku sud. 2 Mukalu wabu wa ku sud uvua umbukila ku ndekelu kua Mbuu wa Mukele,*+ kumbukila ku tshinkonya tshia mâyi tshidi tshitangile ku sud. 3 Mukalu uvua uya kabidi ku sud too ne ku njila udi mubande ku Akalabima,+ upita mutangile ku Sine, pashishe ubanda umbukila ku sud mutangile ku Kadeshe-bânea+, uya too ne ku Heselona, ubanda ku Adâ, ne unyunguluka mutangile ku Kâka. 4 Pashishe uvua uya too ne ku Asemona,+ utungunuka too ne ku Kasulu ka tshilonda nkoka* ka mu Ejipitu;+ ne mukalu au uvua ushikila ku Mbuu.* Eu ke uvua mukalu wabu wa ku sud.

5 Mukalu wa ku est uvua Mbuu wa Mukele,* ne mukalu eu uvua ubanda too ne ku ndekelu kua Yadene, ne mukalu wa ku ditumba dia ku nord uvua ku tshinkonya tshia mbuu, ku ndekelu kua Yadene.+ 6 Mukalu uvua ubanda too ne ku Bete-hogola,+ upitshila ku nord kua Bete-alabâ,+ ne mukalu eu uvua ubanda too ne ku dibue dia Bohana+ muana wa Lubena. 7 Mukalu uvua ubanda too ne ku Debî mu Tshibandabanda* tshia Akola,+ ukudimuka lua ku nord mutangile ku Gilegala+ udi mutangilangane ne kakuna ka Adumima kadi ku sud kua kasulu ka tshilonda nkoka, ne mukalu eu uvua upita mutangile ku mâyi a Ene-shemeshe+ ne ushikila ku Ene-logela.+ 8 Mukalu uvua ubanda mutangile ku Tshibandabanda tshia Muana wa Hinoma+ too ne ku mpulumuku wa muena Yebuse+ lua ku sud, mbuena kuamba ne: Yelushalema,+ ne mukalu eu uvua ubanda too ne ku lusongo lua mukuna udi mutangilangane ne Tshibandabanda tshia Hinoma lua ku ouest, udi ku ndekelu kua Tshibandabanda* tshia bena Lefa ku nord. 9 Bavua bakose mukalu kumbukila ku lusongo lua mukuna too ne ku mushimi wa mâyi wa Nefetoa+ ne mukalu eu uvua uya too ne ku bimenga bia ku mukuna wa Efelona; ne bavua bakose mukalu too ne ku Bâlaha, mbuena kuamba ne: Kîyata-yalima.+ 10 Mukalu uvua unyunguluka kumbukila ku Bâlaha lua ku ouest mutangile ku mukuna wa Seî ne upita mutangile ku mpulumuku wa mukuna wa Yalima lua ku nord, mmumue ne: Kasalona, ne uvua upueka mutangile ku Bete-shemeshe,+ upita mutangile ku Timena.+ 11 Mukalu uvua uya too ne ku mpulumuku wa Ekelona+ ku nord, ne bavua bakose mukalu too ne ku Shikelona, upita mutangile ku mukuna wa Bâlaha, uya too ne ku Yabenêle, ne mukalu eu uvua ushikila ku mbuu.

12 Mukalu wa ku ouest uvua ku Mbuu Munene*+ ne maloba a ku muelelu kuawu. Eyi ke ivua mikalu ya ndelanganyi ya Yuda bilondeshile mêku abu ku nseke yonso.

13 Wakapesha Kaleba+ muana wa Yefune tshitupa tshia buloba munkatshi mua ndelanganyi ya Yuda ku dîyi divua Yehowa mutumine Yoshua, mmumue ne: Kîyata-âba (Âba uvua tatuende wa Anaka), mbuena kuamba ne: Hebelone.+ 14 Nunku Kaleba wakipatamu bana basatu ba Anaka:+ Sheshai, Ahimana, ne Talemai,+ ndelanganyi ya Anaka. 15 Pashishe wakabanda kumbukila muaba au bua kuluisha bena mu Debî.+ (Kumpala dîna dia Debî divua Kîyata-sefe.) 16 Nunku Kaleba wakamba ne: “Muntu waluisha Kîyata-sefe ne wamukuata nemmupeshe muananyi wa bakaji Akasa bua ikale mukajende.” 17 Nunku Oteniele+ muana wa Kenaza,+ muanabu ne Kaleba, wakakuata Kîyata-sefe. Ke yeye kumupesha muanende wa bakaji Akasa+ bua ikale mukajende. 18 Pakavua Akasa uya kuende, wakasaka Oteniele bua kulomba tatuende Kaleba buloba. Pashishe yeye wakatuluka pa mpunda wende.* Kaleba wakamuebeja ne: “Udi ukeba tshinyi?”+ 19 Yeye kuamba ne: “Mbeneshaku, bualu udi mumpeshe tshitupa tshia buloba ku sud;* mpeshaku kabidi Gulota-mayima.”* Nunku yeye wakamupesha Gulota wa ku mutu ne Gulota wa kuinshi.

20 Ebu ke buvua bumpianyi bua tshisa tshia Yuda bilondeshile mêku abu.

21 Bimenga bivua ku ndekelu kua buloba bua tshisa tshia Yuda lua ku mukalu wa Edome+ ku sud bivua: Kabesêle, Edê, Yagû, 22 Kina, Dimona, Adada, 23 Kedeshe, Hasô, Yitenana, 24 Zifa, Teleme, Bealota, 25 Hasô-hadata, ne Keliyota-heselona, mmumue ne: Hasô, 26 Amama, Shema, Molada,+ 27 Hasâ-gada, Heshemona, Bete-pelete,+ 28 Hasâ-shuala, Bê-sheba,+ Bizeyoteya, 29 Bâlaha, Yiyima, Eseme, 30 Eletolada, Kesila, Hôma,+ 31 Sikelaga,+ Mademana, Sanesana, 32 Lebaota, Shilihima, Ayina, ne Limona;+ bimenga bionso bisanga bivua 29 pamue ne miaba yabi mikuabu ya kusombela.

33 Mu Shefela+ muvua: Eshetaola, Solea,+ Ashena, 34 Zanoa, Ene-ganima, Tapua, Enama, 35 Yâmuta, Adulama,+ Soko, Azeka,+ 36 Shâlayima,+ Aditayima, ne Gedela ne Gedelotayima:* bimenga 14 ne miaba yabi mikuabu ya kusombela.

37 Senana, Hadasha, Migedala-gada, 38 Dileana, Misepe, Yoketêle, 39 Lakisha,+ Bosakata, Egelona, 40 Kabona, Lamama, Kitelisha, 41 Gedelote, Bete-dagona, Nâmaha, ne Makeda:+ bimenga 16 ne miaba yabi mikuabu ya kusombela.

42 Libina,+ Etê, Ashana,+ 43 Ifeta, Ashena, Nesiba, 44 Keila, Akeziba, ne Malesha: bimenga tshitema ne miaba yabi mikuabu ya kusombela.

45 Ekelona ne misoko ya kumpenga* kuende ne miaba yende mikuabu ya kusombela; 46 kumbukila ku Ekelona lua ku ouest, bimenga bionso bidi kumpenga kua Ashedodo ne miaba yabi mikuabu ya kusombela.

47 Ashedodo,+ misoko ya kumpenga* kuende ne miaba yende mikuabu ya kusombela; Gaza,+ misoko ya kumpenga kuende ne miaba yende mikuabu ya kusombela, kupueka too ne ku Kasulu ka tshilonda nkoka ka mu Ejipitu, ku Mbuu Munene,* ne tshitupa tshia buloba tshidi tshilamataku.+

48 Mu buloba bua mikuna: Shamî, Yatî,+ Soko, 49 Danaha, Kîyata-sana, mmumue ne: Debî, 50 Anaba, Eshetemo,+ Anima, 51 Goshene,+ Holona, ne Gilo:+ bimenga 11 ne miaba yabi mikuabu ya kusombela.

52 Alaba, Duma, Eshana, 53 Yanima, Bete-tapua, Afeka, 54 Humeta, Kîyata-âba, mmumue ne: Hebelone,+ ne Siô: bimenga tshitema ne miaba yabi mikuabu ya kusombela.

55 Maona,+ Kâmele, Zifa,+ Yuta, 56 Yizelele, Yokedama, Zanoa, 57 Kaina, Gibea, ne Timena:+ bimenga dikumi ne miaba yabi mikuabu ya kusombela.

58 Halelula, Bete-sû, Gedô, 59 Mâlata, Bete-anota, ne Eletekona: bimenga bisambombo ne miaba yabi mikuabu ya kusombela.

60 Kîyata-bâla, mmumue ne: Kîyata-yalima,+ ne Laba: bimenga bibidi ne miaba yabi mikuabu ya kusombela.

61 Mu tshipela: Bete-alabâ,+ Midina, Sekaka, 62 Nibeshana, tshimenga tshia mukele, ne Ene-gedi:+ bimenga bisambombo ne miaba yabi mikuabu ya kusombela.

63 Bua bena Yebuse+ bavua basombele mu Yelushalema,+ bantu ba mu Yuda kabakakokesha bua kubipata,+ nunku bena Yebuse badi batungunuka ne kusomba ne bena Yuda mu Yelushalema too ne lelu.

16 Buloba buvua ndelanganyi ya Jozefe+ mipete ku nshobo*+ buvua bumbukila ku Yadene pabuipi ne Yeliko buya too ne ku mâyi a ku est kua Yeliko, bupitshila mu tshipela tshidi tshibanda tshiumbukila ku Yeliko tshiya mu buloba bua mikuna bua Betele.+ 2 Buvua butungunuka, bumbukila ku Betele wa ku Luza, buya too ne ku mukalu wa bena Aka ku Atalota, 3 pashishe buvua bupueka butangile ku ouest ku mukalu wa bena Yafelete too ne ku mukalu wa Bete-holona wa kuinshi+ ne ku Gezê,+ ne buvua bushikila ku mbuu.

4 Nunku ndelanganyi ya Jozefe,+ Manashe ne Efelayima, yakangata buayi buloba.+ 5 Mukalu wa ndelanganyi ya Efelayima bilondeshile mêku ayi uvua nunku: Mukalu wa bumpianyi buayi ku est uvua Atalota-adalâ+ too ne ku Bete-holona wa ku mutu,+ 6 ne mukalu uvua uya too ne ku mbuu. Mikemetata+ uvua ku nord, ne mukalu eu uvua unyunguluka ku est uya ku Tânata-shilo, ne upita ku est mutangile ku Yanoa. 7 Pashishe uvua upueka, umbukila ku Yanoa mutangile ku Atalota ne ku Nâla, ufika ku Yeliko+ uya too ne ku Yadene. 8 Kumbukila ku Tapua+ mukalu uvua utungunuka mutangile ku ouest too ne ku Kasulu ka tshilonda nkoka ka Kanaha, ne uvua ushikila ku mbuu.+ Ebu ke buvua bumpianyi bua tshisa tshia Efelayima bilondeshile mêku abu; 9 ndelanganyi ya Efelayima ivua kabidi ne bimenga biela munkatshi, munkatshi mua bumpianyi bua Manashe,+ bimenga bionso ne miaba yabi mikuabu ya kusombela.

10 Kadi kabavua bipate bena Kanâna bavua basombele mu Gezê to,+ ne bena Kanâna abu badi batungunuka ne kusombela munkatshi mua Efelayima too ne lelu+ ne badi babenzeja midimu mikole ku bukole.+

17 Pashishe nshobo+ yakakuata tshisa tshia Manashe,+ bualu uvua muanabute wa Jozefe.+ Bu muvua Makî,+ muanabute wa Manashe ne tatuende wa Gilada, muikale muena mvita, wakapeta Gilada ne Bashana.+ 2 Pashishe nshobo yakakuata ndelanganyi ya Manashe ivua mishale bilondeshile mêku ayi, bua bana ba Abiezê,+ bana ba Heleke, bana ba Aseliele, bana ba Shekeme, bana ba Hefê, ne bana ba Shemida. Eyi ke ivua ndelanganyi ya Manashe muana wa Jozefe, bantu balume bilondeshile mêku abu.+ 3 Kadi Selofehada+ muana wa Hefê, muana wa Gilada, muana wa Makî, muana wa Manashe, kavua ne bana ba balume to, anu bana ba bakaji, ne aa ke avua mêna a bana bende ba bakaji: Mahala, Noa, Hogela, Mileka, ne Tîsa. 4 Nunku bakaya kumpala kua muakuidi Eleazâ,+ Yoshua muana wa Nuna ne bamfumu, bobu kuamba ne: “Yehowa ke uvua mutumine Mose dîyi bua kutupesha bumpianyi munkatshi mua bana betu ba balume.”+ Nunku ku dîyi dia Yehowa, wakabapesha bumpianyi munkatshi mua bana babu ne tatuabu ba balume.+

5 Kuvua kabidi bitupa dikumi bia maloba bivua biye kudi Manashe pa kumbusha buloba bua Gilada ne bua Bashana avua dia muamua* dia Yadene,+ 6 bualu bana ba Manashe ba bakaji bavua bapete bumpianyi pamue ne bana bende ba balume, ne buloba bua Gilada buakalua buloba bua ndelanganyi ya Manashe ivua mishale.

7 Mukalu wa Manashe uvua umbukila ku Ashê uya too ne ku Mikemetata,+ udi mutangilangane ne Shekeme,+ ne mukalu eu uvua utungunuka lua ku sud* ku buloba bua bantu ba mu Ene-tapua. 8 Buloba bua Tapua+ buakalua bua Manashe, kadi tshimenga tshia Tapua tshivua ku mukalu wa Manashe tshivua tshia ndelanganyi ya Efelayima. 9 Mukalu eu uvua upueka ku Kasulu ka tshilonda nkoka ka Kanaha, ku sud ku kasulu ka tshilonda nkoka. Kuvua bimenga bia Efelayima munkatshi mua bimenga bia Manashe,+ ne mukalu wa Manashe uvua ku nord kua kasulu ka tshilonda nkoka, ne uvua ushikila ku mbuu.+ 10 Luseke lua ku sud luvua lua Efelayima, ne luseke lua ku nord luvua lua Manashe, ne mbuu uvua mukalu wende;+ ku nord bavua* bafika too ne ku Ashê, ku est too ne ku Yisakâ.

11 Mu buloba bua Yisakâ ne bua Ashê, bakapesha Manashe Bete-sheana ne misoko ya kumpenga kuende,* Yibelama+ ne misoko ya kumpenga kuende, bantu ba mu Dô+ ne misoko ya kumpenga kuende, bantu ba mu Ene-dô+ ne misoko ya kumpenga kuende, bantu ba mu Tanaka+ ne misoko ya kumpenga kuende, ne bantu ba mu Megido ne misoko ya kumpenga kuende, bitupa bisatu bia maloba a mikuna.

12 Kadi ndelanganyi ya Manashe kayakakokesha bua kuangata bimenga ebi to; bena Kanâna bakatungunuka ne kusombela mu buloba ebu.+ 13 Pavua bena Isalele bapete bukole, bakatuadija kuenzeja bena Kanâna midimu mikole ku bukole,+ kadi kabavua babipate* bonso to.+

14 Ndelanganyi ya Jozefe yakambila Yoshua ne: “Bua tshinyi udi mutupeshe tuetu* bumpianyi anu bua tshitupa tshimue+ tshia buloba?* Tudi bantu ba bungi, bualu Yehowa mmutubeneshe too ne mpindieu.”+ 15 Yoshua wakabambila ne: “Binuikala bantu ba bungi nunku, bandayi muitu, nutapamu muaba mu buloba bua bena Pelizi+ ne bena Lefa+, bu mudi buloba bua mikuna bua Efelayima+ buikale bukese menemene buenu nuenu.” 16 Ke ndelanganyi ya Jozefe kuambayi ne: “Buloba bua mikuna ki mbutukumbane to, ne bena Kanâna bonso badi basombele mu buloba bua mu tshibandabanda* badi ne matempu a mvita+ mikale ne miele mikobame,* bonso badi mu Bete-sheana+ ne misoko idi kumpenga kuende* ne badi mu Tshibandabanda* tshia Yizelele.”+ 17 Nunku Yoshua wakambila bena mu nzubu wa Jozefe, mmumue ne: Efelayima ne Manashe ne: “Nudi bantu ba bungi, ne nudi ne bukole bua bungi. Kanuakupeta anu tshitupa tshimue to,+ 18 kadi buloba bua mikuna nebuikale kabidi buenu.+ Nansha mudibu ditu, nenuditape, ne nebuikale ndekelu wa buloba buenu. Bualu nenuipate bena Kanâna nansha mudibu ne bukole ne mudibu ne matempu a mvita mikale ne miele mikobame.”*+

18 Pashishe tshisumbu tshionso tshia bena Isalele tshiakadisangisha ku Shilo,+ bobu kuasaku ntenta wa kusambakena+ bu mukavua buloba ku bukokeshi buabu dîba adi.+ 2 Kadi kutshivua kushale bisa muanda mutekete bia bena Isalele bivuabu kabayi banji kuabanyina bumpianyi. 3 Nunku Yoshua wakambila bena Isalele ne: “Nenuladikije bua kuya kuangata buloba budi Yehowa Nzambi wa bankambua benu munupeshe too ne dîba kayi?+ 4 Mpeshayi bantu basatu mu tshisa tshionso bua mbatume; nebaye, nebendakane mu buloba ne nebazole mudibu bilondeshile bumpianyi buabu. Pashishe nebapingane kundi. 5 Badi ne bua kudiabanyinabu mu bitupa muanda mutekete.+ Yuda neashale mu tshitupa tshiende tshia buloba ku sud,+ ne ba mu nzubu wa Jozefe nebashale mu tshitupa tshiabu tshia buloba ku nord.+ 6 Kadi nuenu, nuzole buloba mudibu mu bitupa muanda mutekete, nulue nabi kundi muaba eu, ne meme nennuelele nshobo+ muaba eu kumpala kua Yehowa Nzambi wetu. 7 Kadi kabakupesha bena Lewi tshitupa tshia buloba munkatshi muenu to,+ bualu buakuidi bua Yehowa ke bumpianyi buabu;+ ne Gada ne Lubena ne tshitupa tshia tshisa tshia Manashe+ bakadi bamane kuangata bumpianyi buabu ku luseke lua ku est kua Yadene, buvua Mose muena mudimu wa Yehowa mubapeshe.”

8 Bantu abu bakadilongolola bua kuya, ne Yoshua wakatumina bantu bavua ne bua kuzola mudi buloba dîyi ne: “Ndayi, nuendakane mu buloba, nuzole mudibu, ne nupingane kundi, ne meme nennuelele nshobo muaba eu kumpala kua Yehowa ku Shilo.”+ 9 Nunku bantu abu bakaya, kuendakanabu mu buloba, kubuzolabu muvuabu bilondeshile bimenga mu bitupa muanda mutekete, babuzola mu mukanda. Pashishe bobu kupingana kudi Yoshua mu tshitudilu ku Shilo. 10 Nunku Yoshua wakabelela nshobo ku Shilo kumpala kua Yehowa.+ Yoshua wakabanyinaku bena Isalele buloba bilondeshile bitupa biabu.+

11 Nshobo yakakuata tshisa tshia Benyamina bilondeshile mêku atshi, ne tshitupa tshia buloba tshivuabu bapete ku nshobo tshivua pankatshi pa bantu ba Yuda+ ne bantu ba Jozefe.+ 12 Ku luseke lua ku nord, mukalu wabu uvua utuadijila ku Yadene, ne mukalu eu uvua ubanda too ne ku mpulumuku wa Yeliko+ ku nord, ubanda kabidi too ne ku mukuna lua ku ouest, ne utungunuka too ne ku tshipela tshia Bete-awena.+ 13 Mukalu eu uvua umbuka muaba au utungunuka too ne ku Luza, ku mpulumuku wa ku sud kua Luza, mmumue ne: Betele;+ mukalu uvua upueka ku Atalota-adalâ+ ku mukuna udi ku sud kua Bete-holona wa kuinshi.+ 14 Bavua bakose mukalu ku luseke lua ku ouest, ne uvua unyunguluka uya ku sud kumbukila ku mukuna udi mutangilangane ne Bete-holona ku sud; uvua ushikila ku Kîyata-bâla, mmumue ne: Kîyata-yalima,+ tshimenga tshia mu Yuda. Elu ke luseke lua ku ouest.

15 Luseke lua ku sud luvua lumbukila ku ndekelu kua Kîyata-yalima, ne mukalu uvua utungunuka mutangile ku ouest; uvua uya too ne ku mushimi wa mâyi wa Nefetoa.+ 16 Mukalu uvua upueka too ne ku ndekelu kua mukuna udi mutangilangane ne Tshibandabanda tshia Muana wa Hinoma,+ udi mu Tshibandabanda* tshia bena Lefa+ ku nord, ne uvua upueka ku Tshibandabanda tshia Hinoma, too ne ku mpulumuku wa muena Yebuse+ ku sud, ne upueka ku Ene-logela.+ 17 Bavua bawukose mutangile ku nord ne uvua utungunuka too ne ku Ene-shemeshe, pashishe uya too ne ku Gelilota udi mutangilangane ne kakuna ka Adumima,+ ne uvua upueka ku dibue+ dia Bohana+ muana wa Lubena. 18 Uvua utungunuka too ne ku mpulumuku wa ku nord udi mutangilangane ne Alabâ, ne upueka ku Alabâ. 19 Mukalu uvua utungunuka too ne ku mpulumuku wa ku nord wa Bete-hogola,+ ne mukalu eu uvua ushikila ku tshinkonya tshia ku nord tshia Mbuu wa Mukele*+ ku ndekelu kua Yadene ku sud. Eu ke uvua mukalu wa ku sud. 20 Yadene uvua mukalu wabu ku luseke lua ku est. Ebu ke buvua bumpianyi bua ndelanganyi ya Benyamina bilondeshile mêku ayi, ne bilondeshile mikalu yabu ku nseke yonso.

21 Bimenga bia tshisa tshia Benyamina bilondeshile mêku abu bivua: Yeliko, Bete-hogola, Emeke-kezizi, 22 Bete-alabâ,+ Semalayima, Betele,+ 23 Awima, Pâla, Ofela, 24 Kefâ-amoni, Ofeni, ne Geba:+ bimenga 12 ne miaba yabi mikuabu ya kusombela.

25 Gibeona,+ Lama, Bêlota, 26 Misepe, Kefila, Mosa, 27 Lekeme, Yipele, Talala, 28 Sela,+ Elefe, Yebuse, mmumue ne: Yelushalema,+ Gibea,+ ne Kîyata: bimenga 14 ne miaba yabi mikuabu ya kusombela.

Ebu ke buvua bumpianyi bua ndelanganyi ya Benyamina bilondeshile mêku ayi.

19 Pashishe nshobo mibidi+ yakakuata Simeona, yakakuata tshisa tshia Simeona+ bilondeshile mêku atshi. Bumpianyi buatshi buvua munkatshi mua bumpianyi bua Yuda.+ 2 Bumpianyi buatshi buvua Bê-sheba+ ne Sheba, Molada,+ 3 Hasâ-shuala,+ Balaha, Eseme,+ 4 Eletolada,+ Betula, Hôma, 5 Sikelaga,+ Bete-mâkabota, Hasâ-susa, 6 Bete-lebaota,+ ne Shaluhena: bimenga 13 ne miaba yabi mikuabu ya kusombela; 7 Ayina, Limona, Etê, ne Ashana:+ bimenga binayi ne miaba yabi mikuabu ya kusombela; 8 ne miaba mikuabu yonso ya kusombela ivua minyunguluke bimenga ebi too ne ku Bâlata-bê, mmumue ne: Lama wa ku sud. Ebu ke buvua bumpianyi bua tshisa tshia Simeona bilondeshile mêku atshi. 9 Bavua bangate bumpianyi bua ndelanganyi ya Simeona mu tshitupa tshia buloba tshivuabu babanyine Yuda, bualu tshitupa tshia Yuda tshivua tshipite bunene buabu bobu. Nunku ndelanganyi ya Simeona yakapeta buloba munkatshi mua bumpianyi buabu.+

10 Pashishe nshobo misatu+ yakakuata ndelanganyi ya Zebulona+ bilondeshile mêku ayi, ne mukalu wa bumpianyi buayi uvua uya too ne ku Salida. 11 Mukalu wayi uvua ubanda lua ku ouest uya ku Malala ne ufika ku Dabeshete ne pashishe ufika ku tshibandabanda* tshidi tshitangilangane ne Yokenama. 12 Uvua umbuka ku Salida uya mutangile ku est, lua kudi dîba dipatukila, uya ku mukalu wa Kiselota-tabô, upatuka mutangile ku Dabelata,+ ne pashishe ubanda ku Yafia. 13 Uvua umbukila muaba au uya mutangile ku est, lua kudi dîba dipatukila, uya ku Gata-hefê,+ ku Eta-kasina, upatuka mutangile ku Limona, ne uya too ne ku Nea. 14 Mukalu eu uvua umunyunguluka ku nord uya ku Hanatona, ne uvua ushikila ku Tshibandabanda tshia Yifeta-ele, 15 ne Katata, Nahalala, Shimelona,+ Yidala, ne Beteleheme:+ bimenga 12 ne miaba yabi mikuabu ya kusombela. 16 Ebu ke buvua bumpianyi bua ndelanganyi ya Zebulona bilondeshile mêku ayi.+ Ebi ke bivua bimenga ne miaba yabi mikuabu ya kusombela.

17 Nshobo minayi+ yakakuata Yisakâ,+ yakakuata ndelanganyi ya Yisakâ bilondeshile mêku ayi. 18 Mukalu wayi uvua uya ku Yizelele,+ Kesulota, Shunema,+ 19 Hafalayima, Shiona, Anahalata, 20 Labita, Kishiona, Ebese, 21 Lemeta, Ene-ganima,+ Ene-hada, ne Bete-pasesa. 22 Mukalu eu uvua ufika ku Tabô,+ ku Shahasuma ne ku Bete-shemeshe, ne ndekelu wa mukalu wayi uvua ku Yadene: bimenga 16 ne miaba yabi mikuabu ya kusombela. 23 Ebu ke buvua bumpianyi bua tshisa tshia Yisakâ bilondeshile mêku atshi,+ bimenga ne miaba yabi mikuabu ya kusombela.

24 Pashishe nshobo mitanu+ yakakuata tshisa tshia Ashê+ bilondeshile mêku atshi. 25 Mukalu watshi uvua Helekata,+ Hali, Betena, Akasafa, 26 Alameleke, Amada, ne Mishala. Uvua ufika ku ouest ku Kâmele+ ne ku Shihô-libenata, 27 ne uvua upingana ku est ku Bete-dagona ne ufika ku Zebulona ne ku Tshibandabanda tshia Yifeta-ele ku nord, ku Bete-emeke ne ku Niele, ne uvua uya too ne ku Kabula ku dia bakaji, 28 ne ku Ebelona, Lehoba, Hamone, ne Kanaha too ne ku Sidona munene.+ 29 Mukalu eu uvua upingana ku Lama, uya too ne ku tshimenga tshikolesha tshia Tulo.+ Pashishe mukalu uvua upingana ku Hosa, ne uvua ushikila ku mbuu udi mu buloba bua Akeziba, 30 Uma, Afeke,+ ne Lehoba:+ bimenga 22 ne miaba yabi mikuabu ya kusombela. 31 Ebu ke buvua bumpianyi bua tshisa tshia Ashê bilondeshile mêku atshi.+ Ebi ke bivua bimenga ne miaba yabi mikuabu ya kusombela.

32 Nshobo misambombo+ yakakuata ndelanganyi ya Nafatale, yakakuata ndelanganyi ya Nafatale bilondeshile mêku ayi. 33 Mukalu wayi uvua umbukila ku Helefe, umbukila ku mutshi munene wa mu Sânanima,+ ne Adami-nekeba ne Yabenêle too ne ku Lakuma; ne uvua ushikila ku Yadene. 34 Mukalu uvua upingana ku ouest ku Azanota-tabô, umbukila muaba au uya mutangile ku Hukoka, ufika ku Zebulona ku sud ne ku Ashê ku ouest ne ku Yuda ku Yadene lua ku est. 35 Bimenga bikolesha bivua: Sidima, Sê, Hamata,+ Lakata, Kinelete, 36 Adama, Lama, Hasô,+ 37 Kedeshe,+ Edelei, Ene-hasô, 38 Yiliona, Migedala-ele, Holema, Bete-anata, Bete-shemeshe:+ bimenga 19 ne miaba yabi mikuabu ya kusombela. 39 Ebu ke buvua bumpianyi bua tshisa tshia Nafatale bilondeshile mêku atshi,+ bimenga ne miaba yabi mikuabu ya kusombela.

40 Nshobo ya muanda mutekete+ yakakuata tshisa tshia Dana+ bilondeshile mêku atshi. 41 Mukalu wa bumpianyi buatshi uvua Solea,+ Eshetaola, Ile-shemesha, 42 Sahalabina,+ Ayalona,+ Yitelaha, 43 Elona, Timena,+ Ekelona,+ 44 Eleteke, Gibetona,+ Bâlata, 45 Yehuda, Bene-belaka, Gata-limona,+ 46 Me-yâkona, ne Lakona, muikale ne mukalu mutangilangane ne Yopa.+ 47 Kadi buloba bua Dana buvua bukese menemene buabu bobu.+ Nunku bakabanda, kuyabu kuluangana ne Leshema,+ bobu kumukuata, kubutulabu benamu ku muele wa mvita. Pashishe bakamuangata ne kusombamu, bobu kushintulula dîna dia Leshema kuluadi Dana, bilondeshile dîna dia Dana nkambua wabu.+ 48 Ebu ke buvua bumpianyi bua tshisa tshia Dana bilondeshile mêku atshi. Ebi ke bivua bimenga ne miaba yabi mikuabu ya kusombela.

49 Nunku bakajikija kuabanya buloba bilondeshile bitupa biabu bua babupiane. Pashishe bena Isalele bakapesha Yoshua muana wa Nuna bumpianyi munkatshi muabu. 50 Ku dîyi dia Yehowa bakamupesha tshimenga tshivuaye mulombe, mmumue ne: Timenata-sela,+ mu buloba bua mikuna bua Efelayima, yeye kuibaka tshimenga atshi, kusombelamu.

51 Ebu ke buvua bumpianyi buvua muakuidi Eleazâ, Yoshua muana wa Nuna, ne bamfumu ba nzubu ya batatu ba bisa bia Isalele babanye+ ku nshobo ku Shilo+ kumpala kua Yehowa, ku tshibuelelu tshia ntenta wa kusambakena.+ Nunku bakajikija kuabanya buloba.

20 Pashishe Yehowa wakambila Yoshua ne: 2 “Ambila bena Isalele ne: ‘Nudisunguile bimenga bia kunyemena+ bimvua munuambile ku butuangaji bua Mose, 3 bua muntu udi ushipa muntu* mukuabu kabiyi ku bukole anyi umushipa ku mpukapuka* anyemenamu. Nebikale muaba wa nuenu kunyemena musombuedi wa mashi.+ 4 Muntu udi mushipangane udi ne bua kunyemena mu tshimue tshia ku bimenga ebi,+ kuimana ku tshibuelelu tshia tshiibi tshia tshimenga,+ ne kuambila bakulu ba mu tshimenga tshilumbu tshiende. Nunku bobu badi ne bua kumuakidila mu tshimenga, kumupesha muaba, ne yeye neasombe nabu. 5 Bikala musombuedi wa mashi mumulonde, kabakufila muntu udi mushipangane au mu bianza biende to, bualu uvua mushipe mukuende ku mpukapuka* ne kavua mumukine kuonso eku to.+ 6 Yeye udi ne bua kusombela mu tshimenga atshi too ne padiye wimana kumpala kua tshisumbu+ bua kulumbulula ne udi ne bua kushalamu too ne padi muakuidi munene+ udi wenza mudimu tshikondo atshi ufua. Dîba adi muntu udi mushipangane udi mua kupingana mu tshimenga tshivuaye munyeme, ne udi mua kubuela mu tshimenga tshiabu ne mu nzubu muende.’”+

7 Nunku bakajidila* Kedeshe+ mu Galela mu buloba bua mikuna bua Nafatale, Shekeme+ mu buloba bua mikuna bua Efelayima, ne Kîyata-âba,+ mmumue ne: Hebelone, mu buloba bua mikuna bua Yuda. 8 Mu tshitupa tshia Yadene, ku est kua Yeliko, bakasungula Besê+ mu tshipela tshia mu mpata wa pa mukuna mu tshisa tshia Lubena, Lamota+ mu Gilada mu tshisa tshia Gada, ne Golana+ mu Bashana mu tshisa tshia Manashe.+

9 Ebi biakalua bimenga bivuabu basungule bua bena Isalele bonso ne bua bantu bavua basombe buenyi bavua munkatshi muabu, bua muntu yonso udi ushipa muntu* mukuabu kabiyi ku bukole anyemenamu,+ ne kafu ku tshianza tshia musombuedi wa mashi kayi muanji kuimana kumpala kua tshisumbu bua kulumbulula.+

21 Mpindieu bamfumu ba nzubu ya batatu ba bena Lewi bakalua kudi muakuidi Eleazâ,+ Yoshua muana wa Nuna, ne bamfumu ba nzubu ya batatu ba bisa bia Isalele, 2 bobu kuyukila nabu ku Shilo+ mu buloba bua Kanâna, bamba ne: “Yehowa wakatuma dîyi ku butuangaji bua Mose ne: batupeshe bimenga bia tuetu kusombela pamue ne mpata yabi ya kudishila nyama bua bimuna bietu.”+ 3 Nunku ku dîyi dia Yehowa, bena Isalele bakapesha bena Lewi bimenga ebi+ ne mpata yabi ya kudishila nyama mu bumpianyi buabu bobu.+

4 Nshobo yakakuata mêku a bena Kohata,+ ne bakapesha bena Lewi ba mu ndelanganyi ya muakuidi Alona bimenga 13 bia mu tshisa tshia Yuda,+ tshisa tshia Simeona,+ ne tshisa tshia Benyamina ku nshobo.+

5 Kadi bua bena Kohata bavua bashale, bakabapesha* bimenga dikumi bia mêku a mu tshisa tshia Efelayima,+ tshisa tshia Dana, ne tshitupa tshia tshisa tshia Manashe.+

6 Bua bena Gêshona,+ bakababanyina bimenga 13 bia mêku a mu tshisa tshia Yisakâ, tshisa tshia Ashê, tshisa tshia Nafatale, ne tshitupa tshia tshisa tshia Manashe mu Bashana.+

7 Bua bena Melali+ bilondeshile mêku abu, kuvua bimenga 12 bia mu tshisa tshia Lubena, tshisa tshia Gada, ne tshisa tshia Zebulona.+

8 Nunku bena Isalele bakapesha bena Lewi bimenga ebi ne mpata yabi ya kudishila nyama ku nshobo, anu muvua Yehowa mutume dîyi ku butuangaji bua Mose.+

9 Nunku mu tshisa tshia Yuda ne tshisa tshia Simeona bakangata bimenga ebi bidibu batele muaba eu mu mêna,+ 10 ne bakabipesha bana ba Alona ba mu mêku a bena Kohata ba mu bena Lewi, bualu nshobo yakabakuata kumpala. 11 Bakabapesha Kîyata-âba+ (Âba uvua tatuende wa Anaka), mmumue ne: Hebelone,+ mu buloba bua mikuna bua Yuda, ne mpata ya kudishila nyama ivua mimunyunguluke. 12 Kadi bakapesha Kaleba muana wa Yefune maloba a tshimenga atshi ne miaba yatshi mikuabu ya kusombela bua bikale biende.+

13 Bakapesha bana ba muakuidi Alona tshimenga tshia kunyemena bua muntu udi ushipangana,+ mmumue ne: Hebelone+ ne mpata yende ya kudishila nyama, kabidi ne Libina+ ne mpata yende ya kudishila nyama, 14 Yatî+ ne mpata yende ya kudishila nyama, Eshetemoa+ ne mpata yende ya kudishila nyama, 15 Holona+ ne mpata yende ya kudishila nyama, Debî+ ne mpata yende ya kudishila nyama, 16 Ayina+ ne mpata yende ya kudishila nyama, Yuta+ ne mpata yende ya kudishila nyama, ne Bete-shemeshe ne mpata yende ya kudishila nyama: bimenga tshitema mu bisa bibidi ebi.

17 Mu tshisa tshia Benyamina: Gibeona+ ne mpata yende ya kudishila nyama, Geba ne mpata yende ya kudishila nyama,+ 18 Anatota+ ne mpata yende ya kudishila nyama, ne Alamona ne mpata yende ya kudishila nyama: bimenga binayi.

19 Bimenga bionso bivuabu bapeshe ndelanganyi ya Alona, mmumue ne: bakuidi, bivua 13 ne mpata yabi ya kudishila nyama.+

20 Kadi bakapesha mêku a bena Kohata avua mashale munkatshi mua bena Lewi bimenga mu tshisa tshia Efelayima ku nshobo. 21 Bakabapesha tshimenga tshia kunyemena bua muntu udi ushipangana,+ mmumue ne: Shekeme+ ne mpata yende ya kudishila nyama mu buloba bua mikuna bua Efelayima, Gezê+ ne mpata yende ya kudishila nyama, 22 Kibesayima ne mpata yende ya kudishila nyama, ne Bete-holona+ ne mpata yende ya kudishila nyama: bimenga binayi.

23 Mu tshisa tshia Dana: Eleteke ne mpata yende ya kudishila nyama, Gibetona ne mpata yende ya kudishila nyama, 24 Ayalona+ ne mpata yende ya kudishila nyama, Gata-limona ne mpata yende ya kudishila nyama: bimenga binayi.

25 Mu tshitupa tshia tshisa tshia Manashe: Tanaka+ ne mpata yende ya kudishila nyama ne Gata-limona ne mpata yende ya kudishila nyama: bimenga bibidi.

26 Bimenga bionso pamue ne mpata yabi ya kudishila nyama bivua mêku a bena Kohata avua mashale mapete bivua dikumi.

27 Bena Gêshona+ ba mu mêku a bena Lewi bakapeta mu tshitupa tshia tshisa tshia Manashe tshimenga tshia kunyemena bua muntu udi ushipangana, mmumue ne: Golana,+ mu Bashana, ne mpata yende ya kudishila nyama ne Bêshetela ne mpata yende ya kudishila nyama: bimenga bibidi.

28 Mu tshisa tshia Yisakâ:+ Kishiona ne mpata yende ya kudishila nyama, Dabelata+ ne mpata yende ya kudishila nyama, 29 Yâmuta ne mpata yende ya kudishila nyama, ne Ene-ganima ne mpata yende ya kudishila nyama: bimenga binayi.

30 Mu tshisa tshia Ashê:+ Mishala ne mpata yende ya kudishila nyama, Abidona ne mpata yende ya kudishila nyama, 31 Helekata+ ne mpata yende ya kudishila nyama, ne Lehoba+ ne mpata yende ya kudishila nyama: bimenga binayi.

32 Mu tshisa tshia Nafatale: tshimenga tshia kunyemena+ bua muntu udi ushipangana, mmumue ne: Kedeshe+ mu Galela ne mpata yende ya kudishila nyama, Hamata-dô ne mpata yende ya kudishila nyama, ne Kâtana ne mpata yende ya kudishila nyama: bimenga bisatu.

33 Bimenga bionso bia bena Gêshona bilondeshile mêku abu bivua 13 ne mpata yabi ya kudishila nyama.

34 Mêku a bena Melali,+ mmumue ne: bena Lewi bavua bashale, akapeta mu tshisa tshia Zebulona:+ Yokenama+ ne mpata yende ya kudishila nyama, Kâta ne mpata yende ya kudishila nyama, 35 Dimana ne mpata yende ya kudishila nyama, ne Nahalala+ ne mpata yende ya kudishila nyama: bimenga binayi.

36 Mu tshisa tshia Lubena: Besê+ ne mpata yende ya kudishila nyama, Yahasa ne mpata yende ya kudishila nyama,+ 37 Kedemota ne mpata yende ya kudishila nyama, ne Mefâta ne mpata yende ya kudishila nyama: bimenga binayi.

38 Mu tshisa tshia Gada:+ tshimenga tshia kunyemena bua muntu udi ushipangana, mmumue ne: Lamota mu Gilada+ ne mpata yende ya kudishila nyama, Mahanayima+ ne mpata yende ya kudishila nyama, 39 Heshebona+ ne mpata yende ya kudishila nyama, ne Yazê+ ne mpata yende ya kudishila nyama: bimenga bionso bisanga binayi.

40 Bimenga bionso bivuabu babanyine bena Melali bilondeshile mêku abu, mmumue ne: mêku a bena Lewi avua mashale, bivua bimenga 12.

41 Bimenga bionso bia bena Lewi mu buloba bua bena Isalele bivua bimenga 48 pamue ne mpata yabi ya kudishila nyama.+ 42 Tshimenga tshionso tshivua tshinyunguluka kudi mpata yatshi ya kudishila nyama; ke muvuabi bua bimenga bionso ebi.

43 Nunku Yehowa wakapesha Isalele buloba buonso buvuaye muditshipe bua kupesha bankambua babu,+ bakabuangata, bobu kusombamu.+ 44 Yehowa wakabapesha kabidi dikisha ku nseke yonso, anu muvuaye muditshipe kudi bankambua babu,+ ne muena lukuna nansha umue wa ku bena lukuna babu bonso kavua mua kuimana kumpala kuabu.+ Yehowa wakafila bena lukuna babu bonso mu tshianza tshiabu.+ 45 Bualu* nansha bumue bua ku malu mimpe onso avua Yehowa mulaye nzubu wa Isalele kabuakapanga kukumbana; onso akakumbana.+

22 Pashishe Yoshua wakabikidisha bena Lubena, bena Gada, ne tshitupa tshia tshisa tshia Manashe, 2 yeye kubambila ne: “Nudi benze malu onso avua Mose muena mudimu wa Yehowa munutumine dîyi bua kuenza,+ ne nudi batumikile dîyi dianyi mu malu onso amvua munutumine dîyi bua kuenza.+ 3 Kanuena balekele bana benu tshikondo tshionso etshi nansha, too ne lelu;+ ne nudi balame dîyi didi Yehowa Nzambi wenu munufundile.+ 4 Mpindieu Yehowa Nzambi wenu mmupeshe bana benu dikisha, anu muvuaye mubalaye.+ Nunku mpindieu nudi mua kupingana ku ntenta yenu mu buloba buvua Mose muena mudimu wa Yehowa munupeshe bua buikale buenu dia muamua* dia Yadene.+ 5 Kadi ikalayi badimuke bua kutumikila mêyi ne mikenji bivua Mose muena mudimu wa Yehowa munupeshe,+ pa kunanga Yehowa Nzambi wenu,+ kuendela mu njila yende yonso,+ kulama mêyi ende,+ kumulamata,+ ne kumuenzela mudimu+ ne muoyo wenu wonso ne anyima wenu yonso.”*+

6 Pashishe Yoshua wakababenesha, yeye kubalaya, bobu kupingana ku ntenta yabu. 7 Mose ukavua mupeshe tshitupa tshia tshisa tshia Manashe bumpianyi mu Bashana,+ ne Yoshua wakapesha tshitupa tshikuabu tshia tshisa etshi buloba ku luseke lua ku ouest kua Yadene,+ pamue ne bana babu. Yoshua wakababenesha kabidi pavuaye mubapingaje ku ntenta yabu, 8 kubambilaye ne: “Pinganayi ku ntenta yenu ne bubanji bua bungi, ne bimuna bia bungi menemene, ne arjan ne or, ne tshiamu tshia mitaku ne tshiamu tshifiike, ne bilamba bia bungi menemene.+ Angatayi tshienu tshitupa pamue ne bana benu mu bintu binuvua banyenge+ bena lukuna benu.”

9 Pashishe bena Lubena, bena Gada, ne tshitupa tshia tshisa tshia Manashe bakashiyangana ne bena Isalele bakuabu ku Shilo mu buloba bua Kanâna, bobu kupingana mu buloba bua Gilada,+ buloba bua bumpianyi buabu buvuabu basombele ku dîyi dia Yehowa ku butuangaji bua Mose.+ 10 Pavua bena Lubena, bena Gada, ne tshitupa tshia tshisa tshia Manashe bafike mu tshitupa tshia buloba tshia Yadene mu buloba bua Kanâna, bakasa tshioshelu muaba au pabuipi ne Yadene, tshioshelu tshinene tshia dikema. 11 Pashishe bena Isalele bakuabu bakumvua lumu lua,+ ne: “Bena Lubena, bena Gada, ne tshitupa tshia tshisa tshia Manashe mbase tshioshelu ku mukalu wa buloba bua Kanâna mu tshitupa tshia buloba tshia Yadene luseke lua bena Isalele.” 12 Pakumvua bena Isalele bualu abu, tshisumbu tshijima tshia bena Isalele tshiakadisangisha ku Shilo+ bua kuya kubaluisha.

13 Nunku bena Isalele bakatuma Pinehasa+ muana wa muakuidi Eleazâ kudi bena Lubena, bena Gada, ne tshitupa tshia tshisa tshia Manashe mu buloba bua Gilada, 14 ne bamfumu dikumi bavua nende, mfumu umue bua nzubu yonso wa batatu ba bisa bionso bia Isalele, mfumu yonso muikale ku mutu kua nzubu wa batatuende munkatshi mua binunu* bia Isalele.+ 15 Pakafikabu kudi bena Lubena, bena Gada, ne tshitupa tshia tshisa tshia Manashe mu buloba bua Gilada, bakabambila ne:

16 “Umvuayi tshidi tshisumbu tshijima tshia Yehowa tshiamba: ‘Mbualu kayi ebu bua dipanga lulamatu+ bunudi benzele Nzambi wa Isalele? Lelu nudi babenge kulonda Yehowa, badiashile tshioshelu ne batombokele Yehowa.+ 17 Tshilema tshia Peô katshivua tshitukumbane anyi? Katuena banji kudilengeja kuditshi too ne lelu, nansha muvua tshipupu tshikuate tshisumbu tshia Yehowa.+ 18 Mpindieu lelu nukadi nubenga kulonda Yehowa! Nuenu batombokele Yehowa lelu, nunku malaba neakuatshile tshisumbu tshijima tshia Isalele tshiji.+ 19 Mpindieu bikalabi ne: nudi benze nunku bualu buloba bunudi bangate mbukoya, sabukayi mu buloba bua bumpianyi bua Yehowa,+ muaba udi ntenta wa tshitendelelu wa Yehowa musombele,+ nusombe munkatshi muetu, kadi kanutombokedi Yehowa, ne kanutuvuiji bantomboji pa kudiashila tshioshelu kusakidila ku tshioshelu tshia Yehowa Nzambi wetu.+ 20 Pavua Akana+ muana wa Zela muenze bualu bua dipanga lulamatu bua bintu bivuabu ne bua kubutula, Nzambi kavua mukuatshile tshisumbu tshijima tshia Isalele tshiji anyi?+ Pashishe kavua mufue anu yeye nkayende bua tshilema tshiende to.’”+

21 Ke bena Lubena, bena Gada, ne tshitupa tshia tshisa tshia Manashe kuandamunabu bavua ku mutu kua binunu* bia Isalele ne:+ 22 “Nzambi wa banzambi, Yehowa!* Nzambi wa banzambi, Yehowa!+ Yeye mmumanye, ne Isalele neamanye pende. Tuetu bikale bantomboji ne bapange lulamatu kudi Yehowa, kutusungidi lelu eu to. 23 Bituikala tuvua badiashile tshioshelu bua kubenga kulonda Yehowa ne bua kufilapu milambu ya kuosha, milambu ya ntete, ne milambu ya diumvuangana, Yehowa neatupeshe dinyoka.+ 24 Tòo, tuvua benze nunku bua bualu bukuabu, bualu tuvua bambe ne: ‘Mu matuku atshilualua, bana benu nebambile bana betu ne: “Kudi tshinyi pankatshi penu ne Yehowa Nzambi wa Isalele? 25 Yehowa mmuteke Yadene bu mukalu pankatshi petu nenu, nuenu bena Lubena ne bena Gada. Kanuena ne tshitupa mu Yehowa to.” Dîba adi bana benu nebapangishe bana betu bua kutendelela* Yehowa.’

26 “Ke tuetu kuamba ne: ‘Mu mishindu yonso tuasayi tshioshelu, katshiyi tshia milambu ya kuosha anyi milambu mikuabu, 27 kadi bua tshikale tshijadiki pankatshi petu nenu,+ ne ndelanganyi* yalonda panyima petu ne: netuenzele Yehowa mudimu kumpala kuende ne milambu yetu ya kuosha ne milambu yetu mikuabu ne milambu yetu ya diumvuangana,+ bua bana benu kabambidi bana betu mu matuku atshilualua ne: “Nuenu kanuena ne tshitupa mu Yehowa to.”’ 28 Ke tuetu kuamba ne: ‘Bobu batuambile tuetu ne ndelanganyi* yetu nanku mu matuku atshilualua, dîba adi netuambe ne: “Tangilayi tshioshelu tshia buena tshia Yehowa tshivua bankambua betu base, katshiyi bua milambu ya kuosha anyi milambu mikuabu, kadi bua tshikale tshijadiki pankatshi petu nenu.”’ 29 Kabiena mua kuenzeka bua tuetu kutombokela Yehowa ne kubenga kulonda Yehowa lelu,+ tuasa tshioshelu tshikuabu bua milambu ya kuosha, milambu ya ntete, ne milambu mikuabu, pa kumbusha tshioshelu tshia Yehowa Nzambi wetu tshidi kumpala kua ntenta wende wa tshitendelelu!”+

30 Pavua muakuidi Pinehasa, bamfumu ba tshisumbu, ne bantu bavua ku mutu kua binunu* bia Isalele bavua nende bumvue mêyi avua ndelangayi ya Lubena, ya Gada, ne ya Manashe bambe, bakasanka.+ 31 Nunku Pinehasa muana wa muakuidi Eleazâ wakambila ndelanganyi ya Lubena, ya Gada, ne ya Manashe ne: “Lelu tudi bamanye ne: Yehowa udi munkatshi muetu, bualu kanuena benzele Yehowa bualu ebu bua dipanga lulamatu to. Mpindieu nudi bapandishe bena Isalele mu tshianza tshia Yehowa.”

32 Pashishe Pinehasa muana wa muakuidi Eleazâ ne bamfumu bakashiyangana ne bena Lubena ne bena Gada mu buloba bua Gilada, kupinganabu mu buloba bua Kanâna, bobu kuambila bena Isalele bakuabu tshivuabu bambe. 33 Bena Isalele bakasanka bua tshivuabu bambe atshi. Nunku bena Isalele bakatumbisha Nzambi, ne kabakakula kabidi bua kuya kuluisha bena Lubena ne bena Gada bua kubutula buloba buvuabu basombele to.

34 Nunku bena Lubena ne bena Gada bakinyika tshioshelu atshi dîna,* bualu “ntshijadiki pankatshi petu ne: Yehowa udi Nzambi mulelela.”

23 Matuku a bungi panyima pa Yehowa mumane kupesha Isalele dikisha+ kudi bena lukuna bende bonso bavua bamunyunguluke, pakavua Yoshua mukulakaje ne muikale ne bidimu bia bungi,+ 2 Yoshua wakabikidisha Isalele mujima,+ bakulu ba tshisamba, bantu bavua ku mutu kuatshi, balumbuluishi batshi, ne batangidi batshi,+ yeye kubambila ne: “Nkadi mukulakaje; ndi ne bidimu bia bungi. 3 Nudi badimuene nkayenu malu onso avua Yehowa Nzambi wenu muenzele bisamba bionso ebi bua bualu buenu, bualu Yehowa Nzambi wenu ke uvua unuluila mvita.+ 4 Monayi, ndi munuabanyine ku nshobo*+ buloba bua bisamba bidi bishale bu bumpianyi bua bisa bienu,+ pamue ne buloba bua bisamba bionso bimvua mubutule,+ kumbukila ku Yadene too ne ku Mbuu Munene* ku ouest.* 5 Yehowa Nzambi wenu ke uvua ubumbusha kumpala kuenu,+ yeye wakabipata* buenu nuenu, ne nuakangata buloba buabu, anu muvua Yehowa Nzambi wenu munulaye.+

6 “Mpindieu nudi ne bua kuikala ne dikima dia bungi bua kutumikila ne kuenza malu onso adi mafunda mu mukanda wa Mikenji+ ya Mose, kanuyi nusesukaku nuya ku dia balume anyi ku dia bakaji,+ 7 kanuyi nubuelakana ne bisamba ebi+ bidi bishale nenu. Kanuena nansha ne bua kutela mêna a nzambi yabi+ anyi kuditshipa mu mêna ayi, ne kanuena ne bua kuyenzela mudimu, anyi kuyinamina.+ 8 Kadi nudi ne bua kulamata Yehowa Nzambi wenu,+ anu munudi benze too ne lelu. 9 Yehowa neipate bisamba binene ne bia bukole kumpala kuenu,+ bualu kakuena muntu nansha umue udi mukokeshe bua kuimana kumpala kuenu too ne lelu.+ 10 Muntu umue tshianana wa kunudi neipate bantu tshinunu,+ bualu Yehowa Nzambi wenu udi unuluila mvita,+ anu muvuaye munulaye.+ 11 Nunku nuikale badimuke misangu yonso*+ pa kunanga Yehowa Nzambi wenu.+

12 “Kadi nuenu bakudimuke ne balamate bantu badi bashale ba mu bisamba ebi bidi bishale+ nenu, ne nuenu badie nabu bipungidi bia diselangana*+ ne badisange nabu ne bobu badisange nenu, 13 numanye bimpe ne: Yehowa Nzambi wenu kakutungunuka ne kunuipatshila* bisamba ebi to.+ Nebilue bu dijimba ne buteyi, bu mfimbu mu mbese yenu,+ ne bu mêba mu mêsu enu too ne panuajimina mu buloba buimpe ebu budi Yehowa Nzambi wenu munupeshe.

14 “Mpindieu monayi! nkadi pa kufua,* ne nudi bamanye bimpe ne muoyo wenu wonso ne anyima* wenu yonso ne: kakuena dîyi nansha dimue dia mu malu mimpe onso avua Yehowa Nzambi wenu munulaye didi dipange kukumbana. Onso mmalue malelela kunudi. Dîyi nansha dimue dia kudiwu ki ndipange kukumbana to.+ 15 Kadi anu mudi malu mimpe onso adi Yehowa Nzambi wenu munulaye makumbane buenu nuenu,+ bia muomumue Yehowa neanutumine makenga onso adiye mulaye* ne neanujimije mu buloba buimpe ebu budi Yehowa Nzambi wenu munupeshe.+ 16 Nuenu banyange tshipungidi tshia Yehowa Nzambi wenu tshivuaye munuelele mukenji bua kulama ne nuenu baye ne benzele nzambi mikuabu mudimu ne bayinamine, dîba adi tshiji tshia Yehowa netshinutemene+ ne nenujimine ne lukasa luonso mu buloba buimpe budiye munupeshe.”+

24 Pashishe Yoshua wakasangisha bisa bionso bia Isalele pamue ku Shekeme, kubikidishaye bakulu ba mu Isalele, bantu bavua ku mutu kua tshisamba, balumbuluishi batshi ne batangidi batshi,+ bobu kuimana kumpala kua Nzambi mulelela. 2 Yoshua wakambila bantu bonso ne: “Yehowa Nzambi wa Isalele udi wamba nunku: ‘Ku kale bankambua benu,+ Tela tatuende wa Abalahama ne tatuende wa Nahô, bavua basombele dia muamua dia Musulu,*+ ne bavua benzela nzambi mikuabu mudimu.+

3 “‘Pakapita matuku ngakangata nkambua wenu Abalahama+ dia muamua dia Musulu,* meme kumuendesha mu buloba buonso bua Kanâna, ne meme kuvudija bana* bende.+ Ngakamupesha Izaka;+ 4 pashishe ngakapesha Izaka Yakoba ne Esau.+ Pashishe meme kupesha Esau mukuna wa Seî bua wikale wende;+ kadi Yakoba ne bana bende bakapueka mu Ejipitu.+ 5 Pashishe ngakatuma Mose ne Alona,+ meme kukengesha bena Ejipitu ne malu amvua muenze munkatshi muabu,+ pashishe meme kunupatulamu. 6 Pamvua mpatula batatuenu mu Ejipitu,+ nuenu kufika ku mbuu, bena Ejipitu bakalonda batatuenu panyima ne matempu a mvita ne basalayi babande pa tubalu too ne ku Mbuu Mukunze.+ 7 Bakabanga kudidila Yehowa,+ nunku yeye wakateka mîdima pankatshi penu ne bena Ejipitu, yeye kupingaja mbuu pa mutu pabu, kubabuikilaye,+ ne mêsu enu akamona tshimvua muenze mu Ejipitu.+ Pashishe nuakasombela mu tshipela bidimu* bia bungi.+

8 “‘Ngakalua nenu mu buloba bua bena Amole bavua basombele dia muamua* dia Yadene, bobu kunuluisha.+ Kadi ngakabafila mu tshianza tshienu bua nuenu kuangata buloba buabu, meme kubabutula mu mêsu enu.+ 9 Pashishe Balaka muana wa Sipô, mukalenge wa Moaba, wakajuka, kuluishaye Isalele. Nunku wakabikidisha Balâma muana wa Beô bua kunuela mulawu.+ 10 Kadi tshivua mua kuteleja Balâma to.+ Nunku wakanubenesha misangu ne misangu,+ ne ngakanusungila mu tshianza tshiende.+

11 “‘Pashishe nuakasabuka Yadene,+ nuenu kufika ku Yeliko.+ Nunku balombodi* ba Yeliko, bena Amole, bena Pelizi, bena Kanâna, bena Hiti, bena Gîgashi, bena Hiwi, ne bena Yebuse bakanuluisha, kadi ngakabafila mu tshianza tshienu.+ 12 Nunku meme kutuma ditekeshibua mu mikolo* kumpala kuenu, diodi kubipata kumpala kuenu,+ anu bu bakalenge babidi ba bena Amole. Kabakanyema bua muele wenu wa mvita anyi bua buta buenu bua mikete to.+ 13 Nunku ngakanupesha buloba bunuvua kanuyi batatshile ne bimenga binuvua kanuyi base,+ nuenu kusombamu. Nudi nudia bintu bia mu madimi a tumuma tua mvinyo ne bia mu madimi a mitshi ya olive binuvua kanuyi bakune.’+

14 “Nunku tshinayi Yehowa ne numuenzele mudimu ne muoyo mutoke* ne lulamatu,*+ ne umbushayi nzambi ivua bankambua benu benzele mudimu dia muamua dia Musulu* ne mu Ejipitu,+ ne enzelayi Yehowa mudimu. 15 Mpindieu nuenu bamone ne: buenu nuenu mbibi bua kuenzela Yehowa mudimu, nudisunguile unuenzela mudimu lelu,+ ni nnzambi ivua bankambua benu benzele mudimu dia muamua dia Musulu*+ anyi nzambi ya bena Amole, bena buloba bunudi basombele.+ Kadi buanyi meme ne ba mu nzubu muanyi, netuenzele Yehowa mudimu.”

16 Ke bantu kuandamuna ne: “Kabiena mua kuenzeka bua tuetu kulekela Yehowa ne kuenzela nzambi mikuabu mudimu to. 17 Yehowa Nzambi wetu ke uvua mutupatule tuetu ne batatuetu mu buloba bua Ejipitu,+ mu nzubu wa bupika,+ ne yeye ke uvua muenze bimanyinu binene abi mu mêsu etu+ ne mutulame mu njila mujima utuvua bendele ne munkatshi mua bisamba bionso mutuvua bapitshile.+ 18 Yehowa wakipata bisamba bionso bivua bisombele mu buloba ebu kumpala kuetu, kusangisha ne bena Amole. Nunku tuetu petu netuenzele Yehowa mudimu, bualu yeye udi Nzambi wetu.”

19 Pashishe Yoshua wakambila bantu ne: “Kanuena bakumbane bua kuenzela Yehowa mudimu, bualu yeye udi Nzambi wa tshijila;+ udi Nzambi udi ulomba bua bamulamate anu yeye.+ Kakubuikila dishipa dienu dia mikenji* ne mpekatu yenu to.+ 20 Nuenu balekele Yehowa ne benzele nzambi ya ku babende mudimu, yeye pende neanukudimukile, neanubutule yeye mumane kunuenzela bimpe.”+

21 Kadi bantu bakambila Yoshua ne: “Tòo, tuetu netuenzele Yehowa mudimu!”+ 22 Nunku Yoshua wakambila bantu ne: “Nudi bantemu kunudi nuenu nkayenu bua munudi badisunguile bua kuenzela Yehowa mudimu ku disua dienu nkayenu.”+ Ke bobu kuamba ne: “Tudi bantemu.”

23 “Nunku umbushayi nzambi ya ku babende idi munkatshi muenu, ne tumayi mioyo yenu kudi Yehowa Nzambi wa Isalele.” 24 Bantu bakambila Yoshua ne: “Netuenzele Yehowa Nzambi wetu mudimu ne netutumikile dîyi diende!”

25 Nunku Yoshua wakadia tshipungidi ne bantu dituku adi, yeye kubatekela mukenji ne dipangadika ku Shekeme. 26 Pashishe Yoshua wakafunda mêyi aa mu mukanda wa Mikenji ya Nzambi,+ kuangataye dibue dinene,+ kudimanyikaye muinshi mua mutshi munene udi pabuipi ne muaba munsantu wa Yehowa.

27 Yoshua wakatungunuka ne kuambila bantu bonso ne: “Tangilayi! Dibue edi nedikale bu ntemu kutudi,+ bualu ndiumvue malu onso adi Yehowa mutuambile, ne nedikale bu ntemu kunudi, bua kanubengi Nzambi wenu.” 28 Nunku Yoshua wakapingaja bantu, muntu yonso ku bumpianyi buende.+

29 Panyima pa malu aa, Yoshua muana wa Nuna, muena mudimu wa Yehowa, wakafua ne bidimu 110.+ 30 Nunku bakamujiika mu tshitupa tshia buloba bua bumpianyi buende mu Timenata-sela,+ udi mu buloba bua mikuna bua Efelayima, ku nord kua mukuna wa Gâsha. 31 Isalele wakatungunuka ne kuenzela Yehowa mudimu matuku onso a Yoshua ne matuku onso a bakulu bavua bashale ne muoyo panyima pa lufu lua Yoshua ne bavua bamanye malu onso avua Yehowa muenzele Isalele.+

32 Bakajiika mifuba ya Jozefe+ ivua bena Isalele bapatuke nayi mu Ejipitu ku Shekeme mu tshitupa tshia buloba tshivua Yakoba musumbe kudi bana ba Hamô,+ tatuende wa Shekeme, ku bitupa lukama bia arjan;+ ne tshiakalua bumpianyi bua bana ba Jozefe.+

33 Eleazâ muana wa Alona wakafua pende.+ Nunku bakamujiika ku mukuna wa Pinehasa muanende,+ uvuabu bamupeshe mu buloba bua mikuna bua Efelayima.