EZELA

1 Mu tshidimu tshia kumpala tshia Kolesha+ mukalenge wa Pelasa, bua dîyi divua Yehowa muambe ku butuangaji bua Yelemiya+ kukumbanadi, Yehowa wakasonsola lungenyi lua Kolesha mukalenge wa Pelasa bua kufila dimanyisha mu bukalenge buende buonso, dimanyisha divuaye kabidi mufunde,+ wamba ne:

2 “Kolesha mukalenge wa Pelasa udi wamba ne: ‘Yehowa Nzambi wa mu diulu mmumpeshe makalenge onso a pa buloba,+ ne mmumpeshe kabidi mudimu wa kumuibakila nzubu mu Yelushalema+ udi mu Yuda. 3 Muntu yonso udi munkatshi muenu wa mu tshisamba tshiende tshijima, Nzambi wende ikale nende, ne yeye abande ku Yelushalema udi mu Yuda, ne ibakulule nzubu wa Yehowa Nzambi wa Isalele (yeye udi Nzambi mulelela), muena nzubu uvua mu Yelushalema.* 4 Muntu yonso udi musombe bu muntu wa ku babende,+ nansha yeye muikale muaba kayi, bena mutumba bende* bamuambuluishe pa kumupesha arjan ne or, bintu bikuabu ne bimuna, pamue ne dipa dia budisuile bua nzubu wa Nzambi mulelela+ uvua mu Yelushalema.’”

5 Nunku bamfumu ba nzubu ya batatu ya bena Yuda ne ya bena Benyamina ne bakuidi ne bena Lewi (mmumue ne: muntu yonso uvua Nzambi mulelela musonsole lungenyi luende) bakadilongolola bua kubanda ne kuibakulula nzubu wa Yehowa uvua mu Yelushalema. 6 Bena mutumba babu bonso bakabambuluisha pa kubapesha* bintu bia arjan ne bia or, bintu bikuabu, bimuna, ne bintu bia mushinga, kusangisha ku mapa onso a budisuile.

7 Mukalenge Kolesha wakapatula kabidi bintu bia mu nzubu wa Yehowa bivua Nebukadenesâ muangate ku Yelushalema ne muteke mu nzubu wa nzambi wende.+ 8 Kolesha mukalenge wa Pelasa wakabipatula ku bulombodi bua Miteledata mulami wa tshibutshilu, yeye kubibadila Sheshebasâ*+ mfumu wa Yuda.

9 Mpindieu ebi mbintu bivuabu babale: bintu 30 bia or bienze bu bibondo, bintu tshinunu bia arjan bienze bu bibondo, malongo makuabu 29, 10 tubakudi 30 tua or, tubakudi 410 tua arjan, ne bintu bikuabu tshinunu. 11 Bintu bia or bionso ne bia arjan bivua 5 400. Sheshebasâ wakabanda ne bintu bionso ebi pavuabu bapingaje bena Yuda bavuabu bakuate+ mu Babilona ku Yelushalema.

2 Aba mbantu ba mu provense* bavua babande ba ku bantu bavuabu bakuate baye nabu,+ aba bavua Nebukadenesâ mukalenge wa Babilona muye nabu ku Babilona+ ne bakalua kupingana pashishe mu Yelushalema ne mu Yuda, muntu yonso mu tshimenga tshiabu,+ 2 bantu bavua balue ne Zelubabela,+ Yeshua,+ Nehemiya, Selaya, Lêlaya, Môdekai, Bileshana, Misepâ, Bigewai, Lehuma, ne Bânaha.

Mu bungi bua bantu balume bena Isalele muvua:+ 3 bana ba Palosha, 2 172; 4 bana ba Shefataya, 372; 5 bana ba Alaha,+ 775; 6 bana ba Pahata-moaba,+ ba mu bana ba Yeshua ne Yoaba, 2 812; 7 bana ba Elama,+ 1 254; 8 bana ba Zatu,+ 945; 9 bana ba Zakai, 760; 10 bana ba Bani, 642; 11 bana ba Bebai, 623; 12 bana ba Azagada, 1 222; 13 bana ba Adonikama, 666; 14 bana ba Bigewai, 2 056; 15 bana ba Adine, 454; 16 bana ba Atê, ba Hezikiya, 98; 17 bana ba Bezai, 323; 18 bana ba Yola, 112; 19 bana ba Hashuma,+ 223; 20 bana ba Gibâ, 95; 21 bana ba Beteleheme, 123; 22 bantu ba ku Netofa, 56; 23 bantu ba ku Anatota,+ 128; 24 bana ba Azamaweta, 42; 25 bana ba Kîyata-yalima, Kefila, ne Bêlota, 743; 26 bana ba Lama+ ne Geba,+ 621; 27 bantu ba ku Mikemasa, 122; 28 bantu ba ku Betele ne ku Ai,+ 223; 29 bana ba Nebo,+ 52; 30 bana ba Magebisha, 156; 31 bana ba Elama mukuabu, 1 254; 32 bana ba Halima, 320; 33 bana ba Lodo, Hadidi, ne Onoho, 725; 34 bana ba Yeliko, 345; 35 bana ba Sena, 3 630.

36 Bakuidi:+ bana ba Yedaya+ ba mu nzubu wa Yeshua,+ 973; 37 bana ba Imê,+ 1 052; 38 bana ba Pashû,+ 1 247; 39 bana ba Halima,+ 1 017.

40 Bena Lewi:+ bana ba Yeshua ne Kadamiele,+ ba mu bana ba Hodaweya, 74. 41 Bimbi ba misambu:+ bana ba Asafa,+ 128. 42 Bana ba balami ba ku biibi:+ bana ba Shaluma, bana ba Atê, bana ba Talemona,+ bana ba Akuba,+ bana ba Hatita, bana ba Shobai, bonso 139.

43 Bena mudimu ba ku ntempelo:*+ bana ba Ziha, bana ba Hasufa, bana ba Tabaota, 44 bana ba Kelosa, bana ba Siyaha, bana ba Padona, 45 bana ba Lebana, bana ba Hagabaha, bana ba Akuba, 46 bana ba Hagaba, bana ba Shamelai, bana ba Hanana, 47 bana ba Gidela, bana ba Gahâ, bana ba Leaya, 48 bana ba Lesine, bana ba Nekoda, bana ba Gasama, 49 bana ba Uza, bana ba Pasea, bana ba Besai, 50 bana ba Asena, bana ba Meunima, bana ba Nefisima, 51 bana ba Bakabuka, bana ba Hakufa, bana ba Hâhu, 52 bana ba Baseluta, bana ba Mehida, bana ba Hâsha, 53 bana ba Bâkosa, bana ba Sisela, bana ba Temaha, 54 bana ba Nesiya, bana ba Hatifa.

55 Bana ba bena mudimu ba Solomo: bana ba Sotai, bana ba Sofeleta, bana ba Peluda,+ 56 bana ba Yâla, bana ba Dâkona, bana ba Gidela, 57 bana ba Shefataya, bana ba Hatila, bana ba Pokeleta-hasebayima, bana ba Ami.

58 Bena mudimu ba ku ntempelo* ne bana ba bena mudimu ba Solomo bonso bavua 392.

59 Bantu aba bakabanda bafumina ku Tele-mela, ku Tele-halesha, ku Kelube, ku Adona, ne ku Imê, kadi kabavua mua kujadika nzubu wa batatuabu anyi kuvuabu bafumine, bua kumanya ni bavua bena Isalele:+ 60 bana ba Delaya, bana ba Tobiya, bana ba Nekoda, 652. 61 Mu bana ba bakuidi: bana ba Habaya, bana ba Hakosa,+ bana ba Bâzilai uvua musele mukaji mu bana ba bakaji ba Bâzilai+ muena Gilada ne uvuabu babikila ku dîna diabu. 62 Bantu aba bakakeba mikanda ivuabu bafunde mêna abu bua kumanya mulongo wa bankambua babu, kadi kabakayipeta to, kuenzabi bua ne: kabikadi bakumbane bua mudimu wa buakuidi.*+ 63 Nguvena* wakabambila ne: kabavua mua kudia bintu bitambe tshijila+ too ne pavuaku mua kumueneka muakuidi uvua mua kuebeja malu ku diambuluisha dia Ulima ne Tumima.+

64 Bungi busanga bua tshisumbu tshijima buvua bua bantu 42 360,+ 65 pa kumbusha bapika babu ba balume ne ba bakaji bavua 7 337; bavua kabidi ne bimbi ba misambu ba balume ne ba bakaji 200. 66 Tubalu tuabu tuvua 736, mpunda yabu ya mushindu mukuabu ivua 245, 67 tumelu tuabu tuvua 435, ne mpunda yabu ivua 6 720.

68 Pakafikabu ku nzubu wa Yehowa mu Yelushalema, bamfumu bakuabu ba nzubu ya batatu bakafila mapa a budisuile+ bua nzubu wa Nzambi mulelela, bua kumuibakulula* muaba uvuaye kumpala.+ 69 Bilondeshile bungi bua bintu bivuabu nabi, bakafila mu tshibutshilu tshia mudimu wa luibaku drakma* binunu 61 ya or, mina* 5 000 ya arjan,+ ne mizabi lukama bua bakuidi. 70 Bakuidi, bena Lewi, bantu bakuabu, bimbi ba misambu, balami ba ku biibi, ne bena mudimu ba ku ntempelo* bakasombela mu bimenga biabu, ne bena Isalele bakuabu bonso* bakasomba mu bimenga biabu.+

3 Pakakumbana ngondo wa muanda mutekete+ ne bena Isalele* bikale mu bimenga biabu, bakadisangisha ku Yelushalema bikale dîyi dimue. 2 Yeshua+ muana wa Yehosadaka ne bakuidi nende ne Zelubabela+ muana wa Shalatiele+ ne bana babu bakajuka, kuibakabu tshioshelu tshia Nzambi wa Isalele bua bikale balambuilapu milambu ya kuosha, anu mudibi bifunda mu Mikenji ya Mose+ muntu wa Nzambi mulelela.

3 Nunku bakimanyika tshioshelu muaba uvuatshi kumpala, nansha muvuabu batshina bisamba bia mu maloba avua mabanyunguluke,+ ne bakatuadija kulambuilapu Yehowa milambu ya kuosha, milambu ya kuosha ya mu dinda ne ya dilolo.+ 4 Pashishe bakenza Tshibilu tshia Bitanda* bilondeshile tshidibu bafunde,+ ne ku dituku ku dituku bavua balambula milambu ya kuosha bungi bulomba buvuabu bakose bua dituku dionso.+ 5 Pashishe bakalambula mulambu wa kuosha wa pa tshibidilu+ ne milambu ya padi ngondo ibala+ ne ya bibilu bionso bijidila bia ku tshidimu+ bia Yehowa, pamue ne ya muntu yonso uvua ufila dipa dia budisuile+ ne muoyo mujima kudi Yehowa. 6 Kumbukila ku dituku dia kumpala dia ngondo wa muanda mutekete+ bakatuadija kulambula Yehowa milambu ya kuosha nansha muvuabu kabayi banji kuenza tshishimikidi tshia ntempelo wa Yehowa.

7 Bakafila makuta kudi bapandi ba mabue+ ne kudi bansenda,+ ne bakapesha bena Sidona ne bena Tulo biakudia ne bia kunua ne mafuta bua balue ne mitshi ya sedre ku Yopa,+ baluila nayi pa mbuu bumbukila ku Lebanona, bilondeshile dianyisha divuabu babapeshe kudi Kolesha mukalenge wa Pelasa.+

8 Mu tshidimu tshibidi panyima pa bobu bamane kulua ku nzubu wa Nzambi mulelela ku Yelushalema, mu ngondo muibidi, Zelubabela muana wa Shalatiele, Yeshua muana wa Yehosadaka ne bana babu bakuabu, bakuidi ne bena Lewi, ne bantu bonso bavua balue ku Yelushalema bavua bafume kuvuabu babakuate baye nabu+ bakatuadija mudimu; bakasungula bena Lewi ba kutuadijila ku bidimu 20 kubanda bua bikale batangidi ba mudimu wa nzubu wa Yehowa. 9 Nunku Yeshua ne bana bende ba balume ne bana babu, ne Kadamiele ne bana bende ba balume, bana ba Yuda, bakadisangisha bua kutangila bantu bavua benza mudimu mu nzubu wa Nzambi mulelela, pamue ne bana ba balume ba Henedada,+ bana babu balela ne bana babu, bavua pabu bena Lewi.

10 Pavua bibaki benze tshishimikidi tshia ntempelo wa Yehowa,+ nunku bakuidi mu bilamba biabu bia mudimu bikale ne mpungi,+ ne bena Lewi, bana ba Asafa, bikale ne bintu bia kukumakaja kuimanabu kuulu bua kutumbisha Yehowa bilondeshile bulombodi bua Davidi mukalenge wa Isalele.+ 11 Nunku bakatuadija kupunguluja+ batumbisha Yehowa ne bamuela tuasakidila, “bualu yeye udi muimpe; dinanga diende dia lulamatu kudi Isalele didi dishalaku kashidi.”+ Pashishe bantu bonso bakela lubila lukole lua kutumbisha nalu Yehowa bualu bavua benze tshishimikidi tshia nzubu wa Yehowa. 12 Bakuidi ba bungi ne bena Lewi ne bamfumu ba nzubu ya batatu (bantu bakulakaje bavua bamone nzubu wa kumpala)+ bakadila ne dîyi dikole pavuabu bamone benze tshishimikidi tshia nzubu eu, pavua eku bantu bakuabu ba bungi bela mbila ya disanka ne dîyi diabu dionso.+ 13 Nunku bantu kabavua mua kutapulula mbila ya disanka ne mbila ya miadi to, bualu bantu bavua bela mbila mikole bienza bua mbila ayi yumvuike kule menemene.

4 Pavua bena lukuna ba Yuda ne Benyamina+ bumvue ne: bantu bavuabu bakuate baye nabu kadi bapingane+ bavua benda bibaka ntempelo wa Yehowa Nzambi wa Isalele, 2 bakalua diakamue kudi Zelubabela ne bamfumu ba nzubu ya batatu, kubambilabu ne: “Anyishayi tuibake nenu; bualu tuetu petu tudi tutendelela* Nzambi wenu anu bu nuenu+ ne tudi tumulambula milambu katshia ku matuku a Esâ-hadona+ mukalenge wa Ashû uvua mulue netu muaba eu.”+ 3 Kadi Zelubabela ne Yeshua ne bamfumu bakuabu ba nzubu ya batatu ya Isalele bakabambila ne: “Kanuena ne bua kuibaka netu nzubu wa Nzambi wetu to,+ bualu tuetu nkayetu netuibakile Yehowa Nzambi wa Isalele nzubu anu bu mudi Kolesha mukalenge wa Pelasa mututumine dîyi.”+

4 Nunku bantu ba mu buloba abu bavua anu batekesha bantu ba mu Yuda mu maboko* ne babatekesha ku muoyo bua balekele kuibaka.+ 5 Bakafuta bafidi ba ngenyi bua kupangisha midimu yabu bua kayiyi kumpala+ matuku onso a Kolesha mukalenge wa Pelasa too ne ku bukokeshi bua Dayawesha+ mukalenge wa Pelasa. 6 Ku ntuadijilu kua bukokeshi bua Ahashawelosha, bakafunda mukanda bua kubanda bantu ba mu Yuda ne mu Yelushalema. 7 Mu matuku a Atashasete mukalenge wa Pelasa, Bishilama, Miteledata, Tabêla, ne bena diende bakuabu bakafundila mukalenge Atashasete mukanda; bakakudimuna mukanda au mu tshiena Alama,+ bawufunde mu mfundilu wa bena Alama.*

8 * Lehuma mfumu wa bena mudimu ba mbulamatadi ne mufundi Shimeshai bakafundila mukalenge Atashasete mukanda bua kubanda Yelushalema, bamba ne: 9 (Mukanda au uvua wa kudi Lehuma mfumu wa bena mudimu ba mbulamatadi ne mufundi Shimeshai ne bena diabu bakuabu, balumbuluishi, ne banguvena bapuekele, bafundi, bantu ba ku Eleke,+ bena Babilona, bantu ba ku Susa,+ mmumue ne: bena Elama,+ 10 ne kudi bisamba bikuabu bivua wa kunemeka Asenapâ munene mukuate mulue nabi, mubiteke mu bimenga bia mu Samalea,+ ne kudi bantu bakuabu ba mu buloba bua Dia muamua dia Musulu,* ne mpindieu 11 aa mmalu avua mu mukanda uvuabu bamutumine.)

“Mukanda mufundila mukalenge Atashasete wa kudi bena mudimu bebe, bantu ba mu buloba bua Dia muamua dia Musulu: Mpindieu 12 mukalenge amanye ne: bena Yuda bavua bumbuke kuudi babande kutudi mbafike ku Yelushalema. Badi bibakulula tshimenga tshibi tshia buntomboji, ne badi benda bajikija bimanu+ ne balongolola bishimikidi. 13 Mpindieu, mukalenge amanye ne: bobu bibakulule tshimenga etshi ne bajikije bimanu biatshi, kabakufuta kabidi bitadi, milambu,+ anyi bitadi bia njila to, ne bualu ebu nebuenze bua bintu kabikadi bibuela mu bibutshilu bia bakalenge. 14 Bu mutudi tudia mukele wa ku dibalasa* ne kabiyi bimpe kutudi bua kumona malu a mukalenge anyanguka, ke bualu kayi tudi batume mukanda eu bua kumanyisha mukalenge bualu ebu, 15 bua bakebulule malu adi mu mukanda wa malu a bankambua bebe.+ Neusangane mu malu adi mu mukanda au ne neumanye ne: tshimenga etshi ntshimenga tshia buntomboji, tshidi tshienzela bakalenge ne maprovense* bibi, ne munda muatshi mudi bantu badi basaka bakuabu bua kutombokela bakokeshi katshia ku bikondo bia kale. Ke bualu kayi bavua babutule tshimenga etshi.+ 16 Tudi tumanyisha mukalenge ne: bobu bibakulule tshimenga etshi ne bajikije bimanu biatshi, kuakuikala ne bukokeshi pa* buloba bua Dia muamua dia Musulu to.”+

17 Mukalenge wakatuma mukenji kudi Lehuma mfumu wa bena mudimu ba mbulamatadi ne mufundi Shimeshai ne kudi bena diabu bakuabu bavua basombela mu Samalea ne kudi bantu bakuabu ba mu buloba bua Dia muamua dia Musulu, wamba ne:

“Muoyo wenu au! Mpindieu 18 mbabale* bimpe menemene kumpala kuanyi mukanda wa mukalenge unuvua batutumine. 19 Mbakebulule malu ku dîyi dianyi, ne mbasangane ne: katshia ku kale mu tshimenga etshi bantu badi batombokela bakalenge, ne buluishi ne buntomboji bitu bienzekamu.+ 20 Kuvua bakalenge ba bukole ku mutu kua Yelushalema bavua bakokesha buloba buonso bua Dia muamua dia Musulu, ne bavua babafuta bitadi, milambu ne bitadi bia njila. 21 Mpindieu elayi mukenji bua bantu aba bimanyike mudimu, bua kabibaki kabidi tshimenga too ne pangamba dîyi. 22 Nudimuke bua kanulenguludi bualu ebu to, bua kabanyangi kabidi malu a mukalenge.”+

23 Nunku panyima pa bobu bamane kubala malu a mu mukanda wa kudi mukalenge Atashasete kumpala kua Lehuma ne mufundi Shimeshai ne bena diabu, bobu aba bakaya lubilu ku Yelushalema kudi bena Yuda, kubenzejabu ku bukole bua kuimanyika mudimu. 24 Dîba adi ke divua mudimu wa nzubu wa Nzambi uvua mu Yelushalema muimane; ne wakashala muimane too ne mu tshidimu tshibidi tshia bukokeshi bua Dayawesha mukalenge wa Pelasa.+

5 Pashishe muprofete Hagai+ ne muprofete Zekâya+ muikulu wa Ido+ bakambila bena Yuda bavua mu Yuda ne bavua mu Yelushalema mêyi a buprofete mu dîna dia Nzambi wa Isalele uvua ku mutu kuabu. 2 Tshikondo atshi ke tshivua Zelubabela+ muana wa Shalatiele ne Yeshua+ muana wa Yehosadaka batuadije kuibakulula nzubu wa Nzambi+ uvua mu Yelushalema; baprofete ba Nzambi bavua nabu ne bavua babambuluisha.+ 3 Tshikondo atshi Tatenai nguvena wa buloba bua Dia muamua dia Musulu* ne Shetâ-bozenai ne bena diabu bakalua kudibu, bobu kubebeja ne: “Nnganyi udi munutumine dîyi bua kuibaka nzubu eu ne kujikija diela dia mikamba eyi?” 4 Pashishe bakabebeja ne: “Bantu badi benza mudimu ku nzubu eu mêna abu mbanganyi?” 5 Kadi Nzambi uvua utangila* bakulu ba bena Yuda,+ ne kabakabimanyika too ne pavuabu mua kutuma mukenji kudi Dayawesha ne pavuabu pabu mua kupeta mukanda wa kudi mukalenge bua bualu ebu.

6 Aa mmalu avua mu mukanda uvua Tatenai nguvena wa buloba bua Dia muamua dia Musulu ne Shetâ-bozenai ne bena diende, banguvena bapuekele ba buloba bua Dia muamua dia Musulu, batumine mukalenge Dayawesha; 7 bakamufundila malu avua enzeka, ne bakafunda nunku:

“Mukanda mufundila mukalenge Dayawesha:

“Ditalala dionso dikale nebe! 8 Mukalenge amanye ne: tuvua baye mu provense wa* Yuda ku nzubu wa Nzambi munene, ne badi bamuibaka ne mabue manene adibu babunguluje too ne muaba au, ne badi bela mikamba mu bimanu. Bantu badi benza mudimu ne tshisumi tshionso ne mudimu udi uya kumpala bua mushindu udibu badienzeja. 9 Ke tuetu kuebeja bakulu babu, kubebeja ne: ‘Nnganyi udi munutumine dîyi bua kuibaka nzubu eu ne kujikija diela dia mikamba eyi?’+ 10 Tuetu kubebeja kabidi mêna abu bua kukumanyisha, bua tumone mua kufunda mêna a bantu badi balombola mudimu au.

11 “Edi ndiandamuna divuabu batupeshe: ‘Tudi bena mudimu ba Nzambi wa diulu ne buloba, ne tudi tuibakulula nzubu uvuabu bibake kukadi bidimu bia bungi, uvua mukalenge munene kampanda wa Isalele muibake ne mujikije.+ 12 Kadi bu muvua batatuetu bafiikishe Nzambi wa mu diulu munda,+ wakabafila mu tshianza tshia Nebukadenesâ+ mukalenge wa Babilona, muena Kasada, yeye kupula nzubu eu,+ kukuataye bantu, kuyaye nabu ku Babilona.+ 13 Tshidibi, mu tshidimu tshia kumpala tshia Kolesha mukalenge wa Babilona, mukalenge Kolesha wakatuma dîyi bua kuibakulula nzubu wa Nzambi eu.+ 14 Bualu bukuabu, mukalenge Kolesha wakapatula malongo a or ne a arjan a mu nzubu wa Nzambi avua mu ntempelo wa ku Babilona avua Nebukadenesâ muangate mu ntempelo ku Yelushalema mulue nawu mu ntempelo wa mu Babilona.+ Bakaapesha muntu mukuabu dîna diende Sheshebasâ*+ uvua Kolesha muteke nguvena.+ 15 Kolesha wakamuambila ne: “Angata malongo aa. Ndaku, uateke mu ntempelo udi ku Yelushalema, ne bibake nzubu wa Nzambi muaba uvuaye kumpala.”+ 16 Pashishe Sheshebasâ eu wakalua, kuenzaye bishimikidi bia nzubu wa Nzambi+ udi mu Yelushalema; ne badi bamuibaka katshia ku tshikondo atshi too ne mpindieu, kadi ki mbanji kumujikija to.’+

17 “Mpindieu mukalenge yeye mumone ne: mbimpe, bakebulule mu tshibutshilu tshia mukalenge ku Babilona aku, bua kumanya bikala mukalenge Kolesha uvua mutume dîyi bua kuibakulula nzubu wa Nzambi au mu Yelushalema;+ pashishe batutumine dipangadika dia mukalenge bua bualu ebu.”

6 Dîba adi ke divua mukalenge Dayawesha mutume dîyi, bobu kukebulula mu bibutshilu* muvuabu balamina bintu bia mushinga mu Babilona. 2 Nunku bakapeta muvungu mu nzubu mukolesha wa ku Ekebatane, mu provense* wa Madayi, ne mu malu avuabu bafundamu muvua bualu ebu:

3 “Mu tshidimu tshia kumpala tshia mukalenge Kolesha, mukalenge Kolesha wakatuma dîyi bua nzubu wa Nzambi mu Yelushalema+ wamba ne: ‘Bibakulule nzubu bua ikale muaba udibu ne bua kufidila milambu, ne badi ne bua kuenza bishimikidi biende; butumbuke buende budi ne bua kuikala bua nkubita* 60, ne butshiama buende bua nkubita 60,+ 4 muikale ne milongo isatu ya mabue manene mabunguluja too ne muaba au ne mulongo umue wa mabaya;+ ne batule makuta a mu nzubu wa mukalenge bua kuenzeja midimu eyi.+ 5 Bapingaje kabidi malongo a or ne a arjan a mu nzubu wa Nzambi avua Nebukadenesâ mumbushe mu ntempelo uvua mu Yelushalema, mulue nawu mu Babilona,+ bua baateke muaba wawu mu ntempelo ku Yelushalema ne baalamine mu nzubu wa Nzambi.’+

6 “Nunku mpindieu Tatenai nguvena wa buloba bua Dia muamua dia Musulu,* Shetâ-bozenai, ne bena dienu, banguvena bapuekele ba buloba bua Dia muamua dia Musulu,+ kanusemenyi kuntu aku to. 7 Kanuedi dîyi mu mudimu wa nzubu wa Nzambi au to. Nguvena wa bena Yuda ne bakulu ba bena Yuda nebibakulule nzubu wa Nzambi au muaba uvuaye kumpala. 8 Bualu bukuabu, ndi ntuma dîyi bua tshinudi ne bua kuenzela bakulu ba bena Yuda aba bua kuibakulula nzubu wa Nzambi au: Bangate makuta a mu tshibutshilu tshia mukalenge,+ mu bitadi bidibu basangishe mu buloba bua Dia muamua dia Musulu, bua kuapesha bantu aba ne lukasa bua batungunuke ne mudimu wabu kabayi bawimanyika.+ 9 Nunku tshintu tshionso tshidibu natshi dijinga (bu mudi bana balume ba ngombe+ pamue ne bimpanga bia mikoko+ ne bana ba mikoko+ bua milambu ya kuoshela Nzambi wa mu diulu, ntete ya blé,+ mukele,+ mvinyo,+ ne mafuta,+ anu bu mudi bakuidi badi mu Yelushalema bamba) badi ne bua kubapeshatshi misangu yonso ku dituku ku dituku kakuyi mpata, 10 bua bikale bafila misangu yonso milambu idi isankisha Nzambi wa mu diulu ne basambila bua muoyo wa mukalenge ne wa bana bende.+ 11 Ndi mutume kabidi dîyi ne: muntu yonso udi ushipa mukenji eu, nebatule mukamba ku nzubu wende, nebamuambule ne nebamusuikilaku*, ne nzubu wende neashale nkumba wa bantu bonso* bua tshilema etshi. 12 Nzambi udi muenze bua dîna diende dikale kuntu aku+ umbushe mukalenge yonso ne bantu bonso badi bajula tshianza bua kushipa dîyi edi ne kubutula nzubu wa Nzambi udi mu Yelushalema au. Meme, Dayawesha, ke udi mutume dîyi edi. Badikumbaje ne lukasa.”

13 Nunku Tatenai nguvena wa buloba bua Dia muamua dia Musulu, ne Shetâ-bozenai,+ ne bena diabu bakenza diakamue malu onso avua mukalenge Dayawesha mutume dîyi bua kuenza. 14 Nunku bakulu ba bena Yuda bakatungunuka ne kuibaka ne kuya kumpala,+ basaka kudi mêyi a buprofete a muprofete Hagai+ ne a Zekâya+ muikulu wa Ido; bakajikija kumuibaka bilondeshile dîyi dia Nzambi wa Isalele+ ne dia Kolesha,+ dia Dayawesha+ ne dia Atashasete+ mukalenge wa Pelasa. 15 Bakajikija nzubu mu dituku disatu dia ngondo wa Adâ,* mu tshidimu tshisambombo tshia bukokeshi bua mukalenge Dayawesha.

16 Pashishe bena Isalele, bakuidi, bena Lewi,+ ne bantu bakuabu bonso bavuabu bakuate baye nabu kadi bapingane bakabanjija* nzubu wa Nzambi eu ne disanka. 17 Nunku bua kubanjija nzubu eu, bakafila ngombe milume lukama, bimpanga bia mikoko 200, bana ba mikoko 400, ne mbuji ya mpumbu 12 bu mulambu wa mpekatu bua Isalele mujima, bilondeshile bungi bua bisa bia Isalele.+ 18 Bakateka bakuidi mu bisumbu biabu ne bena Lewi mu bisumbu biabu bua mudimu wa Nzambi mu Yelushalema,+ bilondeshile tshidibu bafunde mu mukanda wa Mose.+

19 Bantu bavuabu bakuate kadi bapingane bakenza Pasaka mu dituku dia 14 dia ngondo wa kumpala.+ 20 Bakuidi bonso ne bena Lewi bonso bavua badikezule,+ nunku buonso buabu bavua bakezuke; bakashipa mulambu wa Pasaka bua bantu bonso bavuabu bakuate baye nabu kadi bapingane, bua bakuidi nabu, ne buabu bobu nkayabu. 21 Nunku bena Isalele bavuabu bakuate baye nabu kadi bapingane bakawudia, pamue ne muntu yonso uvua mudisange kudibu ne mudiumbushe ku bukoya bua bisamba bia mu buloba bua kutendelela* Yehowa Nzambi wa Isalele.+ 22 Bakenza kabidi Tshibilu tshia Mampa kaayi mela Luevene+ matuku muanda mutekete ne disanka dionso, bualu Yehowa uvua muenze bua basanke ne uvua muenze bua muoyo wa mukalenge wa Ashû wikale nabu bimpe,+ ke yeye kubambuluisha* mu mudimu wa nzubu wa Nzambi mulelela, Nzambi wa Isalele.

7 Panyima pa malu aa, mu bukokeshi bua Atashasete+ mukalenge wa Pelasa, Ezela*+ wakapingana. Uvua muana wa Selaya,+ muana wa Azaya, muana wa Hilekiya,+ 2 muana wa Shaluma, muana wa Sadoka, muana wa Ahituba, 3 muana wa Amalia, muana wa Azaya,+ muana wa Melayota, 4 muana wa Zelaya, muana wa Uzi, muana wa Buki, 5 muana wa Abishua, muana wa Pinehasa,+ muana wa Eleazâ,+ muana wa Alona+ mfumu wa bakuidi. 6 Ezela eu wakabanda ufumina ku Babilona. Uvua mutentudi wa mikanda* uvua mumanye bimpe menemene* Mikenji ya Mose+ ivua Yehowa Nzambi wa Isalele mufile. Mukalenge wakamupesha tshintu tshionso tshivuaye mulombe, bualu tshianza tshia Yehowa Nzambi wende tshivua nende.

7 Bena Isalele bakuabu, bakuidi, bena Lewi,+ bimbi ba misambu,+ balami ba ku biibi,+ ne bena mudimu ba ku ntempelo*+ bakabanda ku Yelushalema mu tshidimu tshia muanda mutekete tshia mukalenge Atashasete. 8 Nunku Ezela wakafika ku Yelushalema mu ngondo muitanu, mu tshidimu tshia muanda mutekete tshia mukalenge. 9 Mu dituku dia kumpala dia ngondo wa kumpala, wakabanga luendu ufumina ku Babilona, ne wakafika ku Yelushalema mu dituku dia kumpala dia ngondo muitanu, bualu tshianza tshimpe tshia Nzambi wende tshivua nende.+ 10 Ezela uvua mulongolole muoyo wende* bua kukonkonona Mikenji ya Yehowa ne bua kuyitumikila,+ ne bua kulongesha mêyi ne mikandu biayi ne mêyi ayi a dilumbuluisha mu Isalele.+

11 Aa mmalu avua mu mukanda uvua mukalenge Atashasete mupeshe Ezela muakuidi ne mutentudi wa mikanda,* mumanyi mupiluke mu dilonga dia* mêyi a Yehowa ne mêyi ne mikandu biende bivuaye mupeshe Isalele:

12 * “Atashasete,+ mukalenge wa bakalenge, kudi muakuidi Ezela, mutentudi* wa Mikenji ya Nzambi wa mu diulu: Ditalala dipuangane dikale nebe. Nunku mpindieu 13 ndi mutume dîyi ne: muntu yonso udi muaba undi nkokesha wa mu tshisamba tshia Isalele ne bakuidi babu ne bena Lewi udi musue kuya nebe ku Yelushalema, aye.+ 14 Bualu mukalenge ne bafidi bende ba mibelu muanda mutekete mbakutume bua kukonkonona bikalabu batumikila mu Yuda ne mu Yelushalema Mikenji ya Nzambi iudi nayi,* 15 ne bua kuangata arjan ne or idi mukalenge ne bafidi bende ba mibelu bafile ku budisuile kudi Nzambi wa Isalele udi muaba wende wa kusombela muikale mu Yelushalema, 16 ne arjan yonso ne or iudi mupete* mu provense* mujima wa Babilona, pamue ne dipa didi bantu ne bakuidi bafile ku budisuile bua nzubu wa Nzambi wabu udi ku Yelushalema.+ 17 Udi ne bua kusumba diakamue ngombe milume,+ bimpanga bia mikoko,+ bana ba mikoko,+ pamue ne milambu yabi ya ntete+ ne milambu yabi ya bia kunua+ ne makuta aa, ne udi ne bua kubilambula pa tshioshelu tshia nzubu wa Nzambi webe mu Yelushalema.

18 “Nunku tshintu tshionso tshidi tshimueneka tshimpe ku mêsu kuebe wewe ne kua bana benu bua kuenza, nudi mua kutshienza ne arjan ne or idi ishala, bilondeshile disua dia Nzambi wenu. 19 Malongo onso adibu bakupeshe bua mudimu wa nzubu wa Nzambi webe, udi ne bua kuafila kumpala kua Nzambi ku Yelushalema.+ 20 Bintu bikuabu bidi bikengedibua bua nzubu wa Nzambi webe bidibu bakulomba bua kufila, newangate makuta mu tshibutshilu tshia mukalenge bua kubifila.+

21 “Meme, mukalenge Atashasete, ndi mutume dîyi kudi balami ba bibutshilu bonso badi mu buloba bua Dia muamua dia Musulu* ne: tshintu tshionso tshidi muakuidi Ezela,+ mutentudi* wa Mikenji ya Nzambi wa mu diulu, unulomba nudi ne bua kutshifila diakamue, 22 too ne ku ntalanta* lukama ya arjan, bipiminu lukama bia kore* wa ntete ya blé, bipiminu lukama bia bata* wa mvinyo,+ bipiminu lukama bia bata wa mafuta,+ ne mukele+ bungi tshianana. 23 Tshintu tshionso tshidi Nzambi wa mu diulu utuma dîyi bua kuenza batshienze ne tshisumi bua nzubu wa Nzambi wa mu diulu,+ bua Nzambi kakuatshidi bana ba mukalenge ne bantu badi muaba udi mukalenge ukokesha tshiji.+ 24 Badi banudimuija kabidi ne: ki mbianyishibue bua kulomba tshitadi, mulambu,+ anyi tshitadi tshia njila kudi bakuidi, bena Lewi, bimbi ba misambu,+ balami ba ku biibi, bena mudimu ba ku ntempelo,*+ ne kudi bantu badi benza mudimu ku nzubu wa Nzambi eu to.

25 “Nunku wewe, Ezela, bilondeshile meji adi Nzambi webe mukupeshe,* teka bamanyi ba mikenji ne balumbuluishi bua kulumbuluisha bantu bonso badi mu buloba bua Dia muamua dia Musulu, bonso badi bamanye mikenji ya Nzambi webe; ne nudi ne bua kulongesha muntu yonso udi kayi muyimanye.+ 26 Muntu yonso udi kayi utumikila Mikenji ya Nzambi webe ne mikenji ya mukalenge, badi ne bua kumulumbuluisha diakamue: badi nansha mua kumushipa, anyi kumuipata mu buloba, anyi kumukosela tshibawu kampanda anyi kumuela mu buloko.”

27 Yehowa Nzambi wa bankambua betu atumbishibue, yeye uvua muele bualu ebu mu muoyo wa mukalenge bua kulengeja nzubu wa Yehowa mu Yelushalema!+ 28 Yeye mmundeje dinanga dia lulamatu kumpala kua mukalenge+ ne bafidi bende ba mibelu+ ne kua bakokeshi bonso ba bukole ba mua mukalenge. Ke meme kupeta muoyo mukole* bualu tshianza tshia Yehowa Nzambi wanyi tshivua nanyi, meme kusangisha bantu balume bavua balombola ba* mu Isalele bua kubandabu nanyi.

8 Mpindieu aba mbamfumu ba nzubu ya batatuabu ne mêna a bantu bavuabu bafunde bilondeshile dilondangana dia mêku abu bavua babande nanyi bumbukile mu Babilona, mu bukokeshi bua mukalenge Atashasete:+ 2 mu bana ba Pinehasa,+ Gêshoma; mu bana ba Itamâ,+ Danyele; mu bana ba Davidi, Hatusha; 3 mu bana ba Shekaniya, ba mu bana ba Palosha, Zekâya, ne yeye uvua ne bantu balume 150 bavuabu bafunde mêna abu; 4 mu bana ba Pahata-moaba,+ Eleyeho-enai muana wa Zelaya, ne yeye uvua ne bantu balume 200; 5 mu bana ba Zatu,+ Shekaniya muana wa Yahaziele, ne yeye uvua ne bantu balume 300; 6 mu bana ba Adine,+ Ebede muana wa Yonatana, ne yeye uvua ne bantu balume 50; 7 mu bana ba Elama,+ Yeshayi muana wa Atalaya, ne yeye uvua ne bantu balume 70; 8 mu bana ba Shefataya,+ Zebadaya muana wa Mikaele, ne yeye uvua ne bantu balume 80; 9 mu bana ba Yoaba, Obadaya muana wa Yehiele, ne yeye uvua ne bantu balume 218; 10 mu bana ba Bani, Shelomita muana wa Yosifiya, ne yeye uvua ne bantu balume 160; 11 mu bana ba Bebai,+ Zekâya muana wa Bebai, ne yeye uvua ne bantu balume 28; 12 mu bana ba Azagada,+ Yohanana muana wa Hakatana, ne yeye uvua ne bantu balume 110; 13 mu bana ba Adonikama,+ bantu bavua ba ndekelu, ne aa avua mêna abu: Elifelete, Yiele, ne Shemaya, ne bobu bavua ne bantu balume 60; 14 ne mu bana ba Bigewai,+ Utai ne Zabuda, ne bobu bavua ne bantu balume 70.

15 Ngakabasangisha ku musulu udi uya ku Ahawa,+ tuetu kuasa tshitudilu muaba au bua matuku asatu. Kadi pamvua mukonkonone bantu ne bakuidi, tshivua musanganamu muena Lewi nansha umue to. 16 Ke meme kubikidisha bantu bavua balombola aba: Eliezê, Aliele, Shemaya, Elenatana, Yaliba, Elenatana, Natana, Zekâya, ne Meshulama, meme kubikidisha kabidi Yoyaliba ne Elenatana bavua balongeshi. 17 Pashishe meme kubatumina dîyi bua Ido mulombodi wa muaba uvuabu babikila ne: Kasifaya. Meme kubambila bua kuambila Ido ne bana babu, bena mudimu ba ku ntempelo* bavua mu Kasifaya, bua batutuadile bena mudimu bua nzubu wa Nzambi wetu. 18 Bu muvua tshianza tshimpe tshia Nzambi wetu tshikale netu, bakalua ne muntu uvua ne budimu wa mu bana ba Mali+ muikulu wa Lewi muana wa Isalele, mmumue ne: Shelebaya,+ ne bana bende ne bana babu, bantu balume 18; 19 ne Hashabeya, ne yeye uvua ne Yeshayi wa mu bena Melali,+ bana babu ne bana babu balela, bantu balume 20. 20 Kuvua kabidi bena mudimu ba ku ntempelo* 220 bavua Davidi ne bakokeshi bapeshe bena Lewi bua kubambuluisha, buonso buabu batela mu mêna abu.

21 Pashishe meme kuambila bantu bua kujila biakudia ku musulu wa Ahawa, bua tuetu kudipuekesha kumpala kua Nzambi wetu, bua atulombole mu luendu luetu, tuetu ne bana betu balela ne bintu bietu bionso. 22 Mvua mumvue bundu bua kulomba mukalenge basalayi ne bendeshi ba tubalu bua kutulamabu mu njila bua bena lukuna, bualu tuvua bambile mukalenge ne: “Tshianza tshimpe tshia Nzambi wetu tshidi kudi bantu bonso badi bamukeba,+ kadi udi uleja bukole buende ne tshiji tshiende kudi bantu bonso badi bamulekela.”+ 23 Ke tuetu kujila biakudia, kulomba Nzambi wetu bua bualu ebu, ne yeye wakateleja disengelela dietu.+

24 Nunku ngakateka bamfumu ba bakuidi 12 ku luseke, mmumue ne: Shelebaya ne Hashabeya,+ pamue ne bana babu ba balume dikumi. 25 Pashishe meme kubapimina arjan ne or ne bintu bia kuenza nabi mudimu, dipa divua mukalenge ne bafidi bende ba mibelu ne bakokeshi ba mu bukalenge buende ne bena Isalele bonso bavua muaba au bafile bua nzubu wa Nzambi wetu.+ 26 Nunku mvua mupime mu bianza biabu ntalanta* 650 ya arjan, bintu lukama bia kuenza nabi mudimu bia tshiamu tshia arjan, bikale ne mushinga wa ntalanta ibidi, ntalanta lukama ya or, 27 tubakudi 20 tua or tuikale ne mushinga wa darike* tshinunu, ne bintu bibidi bia kuenza nabi mudimu bia tshiamu tshia mitaku tshimpe menemene, tshikunze tshibalakana, bionso bimpe anu bu or.

28 Pashishe meme kubambila ne: “Nudi ba tshijila ku mêsu kua Yehowa,+ ne bintu bia kuenza nabi mudimu ebi mbia tshijila, ne arjan ne or mmulambu wa budisuile udibu bapeshe Yehowa Nzambi wa bankambua benu. 29 Nubilame bimpe menemene too ne panudi nubipima kumpala kua bamfumu ba bakuidi ne bena Lewi ne bakokeshi ba nzubu ya batatu ya Isalele mu Yelushalema,+ mu bibambalu bia* nzubu wa Yehowa.” 30 Nunku bakuidi ne bena Lewi bakangata arjan ne or ne bintu bia kuenza nabi mudimu bivuabu babapimine bua kuyabu nabi ku Yelushalema ku nzubu wa Nzambi wetu.

31 Ndekelu wa bionso tuakumbuka ku musulu wa Ahawa+ mu dituku dia 12 dia ngondo wa kumpala+ bua kuya ku Yelushalema, ne tshianza tshia Nzambi wetu tshivua netu, yeye kutusungila ku tshianza tshia bena lukuna mu njila ne kudi bantu batu baalaminangana. 32 Nunku tuakafika ku Yelushalema,+ tuetu kuenzaku matuku asatu. 33 Mu dituku dinayi, tuetu kupima arjan ne or ne bintu bia kuenza nabi mudimu mu nzubu wa Nzambi wetu,+ tuetu kubipesha Melemota+ muana wa muakuidi Uliya, ne yeye uvua ne Eleazâ muana wa Pinehasa, ne bobu bavua ne Yozabada+ muana wa Yeshua ne Noadaya muana wa Binui,+ bena Lewi. 34 Bakabala bintu bionso, ne bakabipima, bobu kufunda bujitu buabi buonso. 35 Bantu bavuabu bakuate baye nabu kadi bapingane bakafila milambu ya kuosha kudi Nzambi wa Isalele: ngombe milume 12+ bua Isalele mujima, bimpanga bia mikoko 96,+ bana ba mikoko 77 ba mpanga, ne mbuji ya mpumbu 12+ bu mulambu wa mpekatu; bionso ebi bivua mulambu wa kuosha bua Yehowa.+

36 Pashishe tuakafila mêyi a kudi mukalenge+ kudi baleji mpala* ba mukalenge ne banguvena ba buloba bua Dia muamua dia Musulu,*+ ne bobu bakambuluisha tshisamba ne nzubu wa Nzambi mulelela.+

9 Diakamue pavuabu bajikije kuenza malu aa, bakokeshi bakalua kundi, kungambilabu ne: “Bantu ba mu Isalele ne bakuidi ne bena Lewi ki mbaditapulule kudi bisamba bia mu maloba adi mabanyunguluke ne ku bilele biabu bibi menemene,+ bilele bia bena Kanâna, bena Hiti, bena Pelizi, bena Yebuse, bena Amona, bena Moaba, bena Ejipitu,+ ne bena Amole.+ 2 Mbangate bana ba bakaji ba mu bisamba ebi bua bikale bakaji babu bobu ne ba bana babu.+ Mpindieu bobu, bana* ba tshijila,+ mbabuelakane ne bisamba bia maloba aa.+ Bakokeshi ne balombodi bindondi ke ba kumpala badi benze bibi mu dipanga lulamatu edi.”

3 Mpindieu diakamue pamvua mumvue bualu ebu, ngakadipanda bilamba ne muzabi wanyi wa kawuyi maboko, meme kuditula nsuki ne muedi, ne meme kusomba panshi bimpitshile. 4 Nunku bantu bonso bavua banemeka* mêyi a Nzambi wa Isalele bakadisangisha bannyunguluke bua dipanga lulamatu dia bantu bavuabu bakuate baye nabu kadi bapingane, pamvua meme eku musombe bimpitshile too ne dîba dia mulambu wa ntete wa dilolo.+

5 Nunku pakakumbana dîba dia mulambu wa ntete wa dilolo,+ ngakajuka ku dipuekeshibua dianyi dia milongo ne bilamba bianyi ne muzabi wanyi wa kawuyi maboko bipanda, meme kutua binu ne kuela bianza bianyi muulu kudi Yehowa Nzambi wanyi. 6 Ke meme kuamba ne: “Wewe Nzambi wanyi, ndi ngumvua bundu ne bidi bintonda bua kubandisha mpala wanyi kuudi, wewe Nzambi wanyi, bualu bilema bietu mbivulangane pa mitu yetu ne dipila dietu ndibande too ne mu diulu.+ 7 Katshia ku matuku a bankambua betu too ne lelu dipila dietu didi anu dinene;+ ne bua bilema bietu, tuetu, bakalenge betu, ne bakuidi betu tudi bafidibue mu tshianza tshia bakalenge ba maloba makuabu, ku muele wa mvita,+ ku ditukuata,+ ku ditupawula,+ ne ku bundu, anu bu mudibi lelu.+ 8 Kadi mpindieu bua tshitupa tshîpi, Yehowa Nzambi wetu mmuleje luse padiye mulekele ndambu wa bantu bapanduka ne padiye mutupeshe muaba mushindame* mu muaba wende wa tshijila,+ bua kukenkesha mêsu etu, wewe Nzambi wetu, ne bua kutupeshilula ndambu wa makanda mu bupika buetu. 9 Bualu nansha mutudi bapika,+ Nzambi wetu ki mmutulekele mu bupika buetu to; kadi mmutuleje dinanga diende dia lulamatu kumpala kua bakalenge ba Pelasa,+ bua tupetulule bukole bua kujula nzubu wa Nzambi wetu,+ bua kuakajilula miaba yende ivua minyanguke, ne bua kutupesha tshimanu tshia mabue* mu Yuda ne mu Yelushalema.

10 “Kadi mpindieu Nzambi wetu, ntshinyi tshitudi mua kuamba panyima pa bualu ebu bumane kuenzeka? Bualu tudi balekele mêyi ebe 11 auvua mutupeshe ku diambuluisha dia bena mudimu bebe baprofete, wamba ne: ‘Buloba bunudi nuya bua kuangata mbuloba budi bunyanguke ne bukoya bua bisamba bia mu maloba au, bua bilele biabu bibi menemene bidibu buwuje nabi buloba ku ditengu dimue too ne ku dikuabu bua bukoya buabu.+ 12 Nunku, kanufidi bana benu ba bakaji kudi bana babu ba balume, ne kanuangatshi bana babu ba bakaji bua bana benu ba balume;+ ne kanuena ne bua kuenza bua bikale mu ditalala anyi batante,+ bua nuenu numone mua kupeta bukole, kudia bintu bimpe bia mu buloba abu, ne kubuangata bua bana benu bua kashidi.’ 13 Panyima pa malu onso adi matufikile bua bienzedi bietu bibi ne dipila dietu dinene (bualu wewe Nzambi wetu kuena mutuenzele malu bilondeshile tshilema tshietu,+ ne udi muitabe bua tuetu badi muaba eu tupanduke)+ 14 tudi kabidi ne bua kushipa mêyi ebe ne kudia bipungidi bia diselangana* ne bisamba bidi bienza malu mabi menemene aa anyi?+ Wewe kuakutukuatshila tshiji tshikole bienza bua ne: utubutule bonso butubutu, kuyi ushiya bashadile anyi muntu nansha umue ne muoyo anyi? 15 Wewe Yehowa Nzambi wa Isalele, wewe udi muakane,+ bualu tudi bapanduke bu bashadile too ne lelu. Ntuetu aba kumpala kuebe mu dipila dietu, bualu kakuena mushindu wa tuetu kuimana kumpala kuebe bua bualu ebu to.”+

10 Pavua Ezela usambila+ ne utonda mpekatu ya bena mu tshisamba tshiabu, udila mudiolole mutue mpala panshi kumpala kua nzubu wa Nzambi mulelela, tshisumbu tshinene tshia bena Isalele tshienza ne bantu balume, bantu bakaji ne bana tshiakadisangisha tshimunyunguluke, bualu bantu bavua badila bikole menemene. 2 Nunku Shekaniya muana wa Yehiele+ wa mu bana ba Elama+ wakambila Ezela ne: “Tudi bapange lulamatu kudi Nzambi wetu pa kusela* bakaji ba ku babende ba mu bisamba bia maloba adi matunyunguluke.+ Nansha nanku, kutshidi anu ditekemena bua Isalele. 3 Mpindieu tudiayi tshipungidi ne Nzambi wetu+ bua kuipata bakaji bonso aba ne bana badibu balele, mu diumvuangana ne bulombodi bua Yehowa ne bua bantu badi banemeka* dîyi dia Nzambi wetu.+ Tuenzayi malu bilondeshile Mikenji. 4 Juka, bualu, bualu ebu mbujitu buebe, ne tuetu tudi nebe. Ikala ne bukole ne angata malu mu bianza.”

5 Nunku Ezela wakajuka ne wakatshipishisha bamfumu ba bakuidi ne bena Lewi ne Isalele mujima bua kuenzabu tshivuabu bambe.+ Ke bobu kuditshipa. 6 Nunku Ezela wakajuka kumpala kua nzubu wa Nzambi mulelela, yeye kuya mu tshibambalu tshia* Yehohanana muana wa Eleyashiba. Nansha muvuaye muye kuntu aku, kakadia tshintu ne kakanua mâyi, bualu uvua mu madilu bua dipanga lulamatu dia bantu bavuabu bakuate baye nabu kadi bapingane.+

7 Pashishe bakamanyisha mu Yuda mujima ne mu Yelushalema bua bantu bonso bavuabu bakuate baye nabu kadi bapingane balue kudisangisha ku Yelushalema; 8 ne bilondeshile dipangadika dia bakokeshi ne bakulu, bavua ne bua kunyenga* bintu bionso bia muntu uvua kayi ulua mu matuku asatu, ne bavua ne bua kumuipata mu tshisumbu tshia bantu bavuabu bakuate baye nabu kadi bapingane.+ 9 Nunku bantu balume bonso ba mu Yuda ne mu Benyamina bakadisangisha mu Yelushalema mu matuku asatu, mmumue ne: mu ngondo wa tshitema, dituku dia 20 dia ngondo. Bantu bonso bavua basombe mu lubanza lua nzubu wa Nzambi mulelela, bazakala bua bualu buvua mu tshialu ne bua mvula mukole.

10 Nunku muakuidi Ezela wakajuka, kubambilaye ne: “Nudi bapange lulamatu panudi basele bakaji ba ku babende,+ ne nunku nudi bavudije dipila dia Isalele. 11 Mpindieu tondelayi Yehowa Nzambi wa bankambua benu mpekatu wenu ne enzayi disua diende. Ditapululayi kudi bisamba bia mu buloba ne kudi bakaji ba ku babende aba.”+ 12 Ke tshisumbu tshijima kuandamuna ne dîyi dikole ne: “Tudi ne dibanza dia kuenza anu muudi wamba amu. 13 Kadi kudi bantu ba bungi, ne tudi mu muvu wa mvula. Kakuena mushindu wa kuimana pambelu to, ne bualu ebu kabuakuangata dituku dimue anyi abidi, bualu tudi batomboke bikole menemene mu bualu ebu. 14 Nunku, bakokeshi betu bimanyine koku tshisumbu tshijima;+ ne bantu bonso ba mu bimenga bietu badi basele bakaji ba ku babende balue dîba diambabu, pamue ne bakulu ne balumbuluishi ba tshimenga ne tshimenga, too ne patumbusha tshiji tshikole tshia Nzambi wetu kutudi mu bualu ebu.”

15 Kadi Yonatana muana wa Asahele ne Yahezeya muana wa Tikewa bakabenga bualu ebu, ne Meshulama ne Shabetai,+ bena Lewi, bakatua ku tshiabu. 16 Kadi bantu bavuabu bakuate baye nabu kadi bapingane bakenza muvuabu bumvuangane; ne muakuidi Ezela ne bamfumu ba mêku ba nzubu ya batatuabu, bonso batela mu mêna abu, bakadisangisha nkayabu dituku dia kumpala dia ngondo wa dikumi bua kutangila tshilumbu atshi; 17 ne mu dituku dia kumpala dia ngondo wa kumpala bakajikijangana ne bantu balume bonso bavua basele bakaji ba ku babende. 18 Nunku bakasangana ne: bana bakuabu ba bakuidi bavua basele bakaji ba ku babende:+ mu bana ba Yeshua+ muana wa Yehosadaka ne bana babu, kuvua Maaseya, Eliezê, Yaliba, ne Gedaliya. 19 Kadi bakalaya* bua kuipata bakaji babu, ne bu muvuabu bapile, bavua ne bua kulambula tshimpanga tshia mukoko tshia mu tshisumbu tshia mikoko bua dipila diabu.+

20 Mu bana ba Imê,+ kuvua Hanani ne Zebadaya; 21 mu bana ba Halima,+ kuvua Maaseya, Eliya, Shemaya, Yehiele, ne Uziya; 22 mu bana ba Pashû,+ kuvua Eleyehoenai, Maaseya, Yishemaele, Netanele, Yozabada, ne Eleasa. 23 Mu bena Lewi, kuvua Yozabada, Shimei, Kelaya (mmumue ne: Kelita), Petahiya, Yuda, ne Eliezê; 24 mu bimbi ba misambu, kuvua Eleyashiba; ne mu balami ba ku biibi, kuvua Shaluma, Teleme, ne Uli.

25 Mu bena Isalele, mu bana ba Palosha,+ kuvua Lamaya, Yiziya, Malakiya, Miyamina, Eleazâ, Malakiya, ne Benaya; 26 mu bana ba Elama,+ kuvua Matanaya, Zekâya, Yehiele,+ Abedi, Yelemota, ne Eliya; 27 mu bana ba Zatu,+ kuvua Eleyehoenai, Eleyashiba, Matanaya, Yelemota, Zabada, ne Aziza; 28 mu bana ba Bebai,+ kuvua Yehohanana, Hananiya, Zabai, ne Atalai; 29 mu bana ba Bani, kuvua Meshulama, Maluke, Adaya, Yashuba, Sheala, ne Yelemota; 30 mu bana ba Pahata-moaba,+ kuvua Adena, Kelala, Benaya, Maaseya, Matanaya, Besalele, Binui, ne Manashe; 31 mu bana ba Halima,+ kuvua Eliezê, Yishiya, Malakiya,+ Shemaya, Shimeona, 32 Benyamina, Maluke, ne Shemaliya; 33 mu bana ba Hashuma,+ kuvua Matenai, Matataha, Zabada, Elifelete, Yelemai, Manashe, ne Shimei; 34 mu bana ba Bani, kuvua Mâdai, Amalama, Wele, 35 Benaya, Bediya, Keluhu, 36 Wanya, Melemota, Eleyashiba, 37 Matanaya, Matenai, ne Yâsu; 38 mu bana ba Binui, kuvua Shimei, 39 Shelemeya, Natana, Adaya, 40 Makenadebai, Shashai, Shalai, 41 Azalele, Shelemeya, Shemaliya, 42 Shaluma, Amalia, ne Jozefe; 43 ne mu bana ba Nebo, kuvua Yiele, Matitiya, Zabada, Zebina, Yadai, Yoele, ne Benaya. 44 Bantu bonso aba bavua basele bakaji ba ku babende,+ ne bakipata bakaji babu abu pamue ne bana babu balela.+