YOELE
1 Dîyi dia Yehowa diakalua kudi Yoele* muana wa Petuele, ne:
2 “Umvuayi bualu ebu, nuenu bakulu,
Teyayi ntema, nuenu bonso badi basombele mu buloba ebu.
Bualu bua nunku bukadiku buenzeke mu matuku enu
Peshi mu matuku a bankambua benu anyi?+
3 Buambilayi bana benu,
Ne bana benu babuambile bana babu,
Ne bana babu babuambile ba tshipungu tshidi tshilua.
4 Tshivuabu bashiye kudi mpasu idi ibutula, mbatshidie kudi mpasu idi yenda mu tshisumbu;+
Ne tshivuabu bashiye kudi mpasu idi yenda mu tshisumbu, mbatshidie kudi mpasu idi kayiyi ne masala;
Ne tshivua mpasu idi kayiyi ne masala mishiye, mbatshidie kudi mpasu idi idia ne lumpukusu.+
5 Tabalayi, nuenu bakuatshiki ba maluvu,+ ne dilayi!
Elayi kabobo ka muadi, nuenu banu ba mvinyo bonso,
Bualu mbumbushe mvinyo mushême mukana muenu.+
6 Bualu tshisamba ntshibande tshilue mu buloba buanyi, tshia bukole ne katshiyi kubala.+
Mênu atshi mmênu a ntambue,+ ne mbanga yatshi mmbanga ya ntambue.
7 Ntshibutule muonji wanyi wa tumuma tua mvinyo ne ntshivuije mutshi wanyi wa mfigi tshikuku,
Tshibiuvula bizubu bionso ne tshibimansha,
Tshishiya matamba abi matoke.
8 Ela kabobo ka muadi bu mudi muana wa bakaji utshidi kamama* muvuale tshilamba tshikayabale wela
Bua mulume* wa ku bunsonga buende.
9 Mulambu wa ntete+ ne mulambu wa bia kunua+ mbikoseke mu nzubu wa Yehowa;
Bakuidi, bena mudimu ba Yehowa, badi mu madilu.
10 Mbabutule budimi, buloba budi budila;+
Bualu ntete mmibutula, mvinyo mupiamupia mmume, mafuta mmajike.+
11 Babidime mbumvue bundu, basonji ba mionji ya tumuma tua mvinyo badi bela kabobo ka muadi,
Bua bualu bua ntete ya blé ne ya orje;
Bualu bintu bia kunowa bia mu budimi mbifue.
12 Muonji wa tumuma tua mvinyo mmume,
Mutshi wa mfigi mmufubidile.
Mutshi wa grenade, dibue dia ngaji, ne mutshi wa pome,
Mitshi yonso ya mu budimi mmiume;+
Bualu disanka ndilue bundu munkatshi mua bantu.
13 Vualayi bilamba bikayabale* ne dilayi,* nuenu bakuidi;
Elayi kabobo ka muadi, nuenu bena mudimu ba ku tshioshelu.+
Buelayi ne pitshishayi butuku bavuale bilamba bikayabale, nuenu bena mudimu ba Nzambi wanyi;
Bualu mbabenge kupesha nzubu wa Nzambi wenu mulambu wa ntete+ ne mulambu wa bia kunua.+
14 Manyishayi bua* tshijila tshia biakudia; buejayi disangisha dia tshijila.+
Sangishayi bakulu pamue, ne bantu bonso badi basombele mu buloba ebu,
Ku nzubu wa Yehowa Nzambi wenu,+ ne didilayi Yehowa bua anuambuluishe.
15 Diakabi bua dituku edi!
Bualu dituku dia Yehowa didi pabuipi,+
Ne nedilue bu kabutu kafuma kudi Wa Bukole Buonso!
16 Ki mbumbushe biakudia ku mêsu etu,
Ne musangelu ne disanka ku nzubu wa Nzambi wetu anyi?
17 Mamiinu* mmafubidile muinshi mua bikasu biabu.
Nzubu ya kulamina bintu idi munda mutupu.
Mayeba mmupula, bualu ntete mmiuminyine.
18 Too ne bimuna bidi bitua mikemu!
Bisumbu bia ngombe bidi bitambakana mu tshimbondambonda, bualu kabiena ne mpata wa kudiila!
Ne bisumbu bia mikoko bidi biambula dinyoka.
19 Nguewe, Yehowa wetu, ke ungabikila;+
Bualu kapia nkabutule mpata ya mu tshipela ya kudishila nyama,
Ne ludimi lua kapia nduoshe mitshi yonso ya mu mpata.
20 Too ne nyama ya tshisuku idi nebe dijinga bikole,
Bualu tusulu tua mâyi ntukame
Ne kapia nkabutule mpata ya mu tshipela ya kudishila nyama.”
2 “Elayi mpungi mu Siona!+
Elayi lubila lua mvita mu mukuna wanyi wa tshijila.
Bantu bonso badi basombele mu buloba ebu bazakale,
Bualu dituku dia Yehowa didi dilua!+ Dikadi pabuipi!
2 Ndituku dia mîdima ne mifitu,+
Dituku dia matutu ne mifitu mikole,+
Bu butoke bua mu dinda budi butangalaka pa mikuna.
Kudi tshisamba tshia bantu ba bungi ne tshikole;+
Kakutu kuanji kuikala tshisamba bu etshi,
Ne kakuakuikala kabidi tshikuabu
Mu bidimu bia bipungu bionso bia bantu to.
3 Kumpala kuatshi kapia kadi kabutula,
Ne panyima patshi ludimi lua kapia ludi luosha.+
Buloba budi kumpala kuatshi budi bu budimi bua Edene,+
Kadi panyima patshi padi tshipela tshia munda mutupu,
Ne tshintu nansha tshimue katshiena mua kupanduka.
4 Tshimuenekelu tshiatshi tshidi bu tshimuenekelu tshia tubalu,
Ne badi banyema bu tubalu tua mvita.+
5 Mutoyi wabu udi bu mutoyi wa matempu a mvita padibu batumpika pa nsongo ya mikuna,+
Bu ditudika dia kapia kakole kadi kosha bikolakola.
Tshidi bu tshisamba tshikole tshidilonge bua mvita.+
6 Bua bualu buabu, bukua bantu nebuikale mu kanyinganyinga.
Mpala yonso neakunze.
7 Bobu badi babunda bu bena mvita,
Basambuka tshimanu bu basalayi,
Yonso wa kudibu udi ulonda anu njila wende,
Ne kabena basesuka mu njila yabu to.
8 Kabena basakilangana;
Muntu yonso udi uya kumpala mu njila wende.
Bia mvita* biobi bikulule bamue,
Bakuabu kabena banyanga milongo.
9 Badi baditua lubilu mu tshimenga, banyemena pa bimanu.
Badi babanda pa nzubu, babuelela pa madidishi bu muivi.
10 Kumpala kuabu buloba budi buzakala ne diulu didi dikanka.
Dîba ne ngondo mbilue mîdima,+
Ne mitoto mmijimije bukenke buayi.
11 Yehowa neabandishe dîyi diende kumpala kua tshiluilu tshiende,+ bualu tshitudilu tshiende tshidi ne bantu ba bungi menemene.+
Bualu eu udi ukumbaja dîyi Diende udi ne bukole;
Bualu dituku dia Yehowa ndinene, dikuatshisha buôwa bikole.+
Nnganyi udi mua kuditua tshiadi?”+
12 Yehowa udi wamba ne: “Kadi mpindieu, pinganayi kundi ne muoyo wenu wonso,+
Ne dijila dia biakudia+ ne muadi ne kabobo ka muadi.
13 Pandayi mioyo yenu,+ kanupandi bilamba bienu,+
Pinganayi kudi Yehowa Nzambi wenu,
Bualu yeye udi uditeka pa muaba wa bakuabu* ne udi ne luse, kena ukuata tshiji lukasa+ ne udi ne dinanga dia lulamatu divule,+
Ne neelulule meji a* dikenga edi.
14 Nnganyi udi mumanye bikalaye mua kupingana ne kuelulula meji*+
Ne kushiya dibenesha panyima,
Mulambu wa ntete ne mulambu wa bia kunua bua Yehowa Nzambi wenu?
15 Elayi mpungi mu Siona!
Elayi dîyi bua bantu babuele mu* tshijila tshia biakudia; buejayi disangisha dia tshijila.+
16 Sangishayi bantu; jidilayi tshisumbu.+
Kunguijayi bantu bakulumpe;* sangishayi bana batekete ne bana ba ku dibele.+
Musedianganyi apatuke mu nzubu wende wa munda, ne udibu basela apatuke mu nzubu wende wa dibaka.
17 Pankatshi pa lutanda ne tshioshelu+
Bakuidi, bena mudimu ba Yehowa, badile, bambe ne:
‘Yehowa wetu, umvuila bantu bebe luse;
Kuvuiji bumpianyi buebe tshintu tshia kupetula,
Ulekela bisamba bibakokesha.
Bua tshinyi bukua bantu budi ne bua kuamba ne: “Nzambi wabu udi penyi?”’+
18 Pashishe, Yehowa neikale ne tshisumi bua buloba buende
Ne nealeje bantu bende luse.+
19 Yehowa neandamune bantu bende ne:
‘Monayi ndi nnutumina ntete ne mvinyo mupiamupia ne mafuta,
Ne nenukute bikole;+
Tshiakunuvuija kabidi tshipendu munkatshi mua bisamba.+
20 Nentume muntu wa ku nord kule nenu;
Nemmumuangalaje ku buloba bume, ne buloba buatuke budi munda mutupu,
Muikale ne tshitupa tshiende tshia kumpala tshitangile* ku mbuu wa ku est*
Ne tshitupa tshiende tshia panyima tshitangile ku mbuu wa ku ouest.*
Mupuya mubole newubande ufumina kudiye,
Mupuya mubi neutungunuke ne kubanda ufumina kudiye;+
Bualu Yeye neenze malu manene.’
21 Kutshinyi, wewe buloba.
Ikala ne disanka ne sanka, bualu Yehowa neenze malu manene.
22 Kanuikadi ne buôwa, nuenu nyama ya mu mpata,
Bualu mpata ya mu tshipela ya kudishila nyama neyikale ne bisonsa bibishi,+
Ne mitshi neyikuame bimuma;+
Mutshi wa mfigi ne muonji wa tumuma tua mvinyo bidi ne bua kufila mamuma abi onso.+
23 Nuenu bana ba Siona, ikalayi ne disanka ne sankayi mu Yehowa Nzambi wenu;+
Bualu yeye neanupeshe mvula ya mbedi bungi bukumbane
Ne neanutumine mvula wa bungi,
Mvula ya mbedi ne mvula ya ndekelu, anu bu kumpala.+
24 Miaba ya kushipuila ntete neyuwule tente ne ntete mishipula,
Ne bikaminu nebiuwule tente ne mvinyo ne mafuta biyila ne panshi.+
25 Nennufute bua bidimu
Bidi mpasu idi yenda mu tshisumbu, mpasu idi kayiyi ne masala, mpasu idi idia ne lumpukusu ne mpasu idi ibutula midie bintu bienu bia pa madimi,
Tshiluilu tshianyi tshinene tshimvua mutume munkatshi muenu.+
26 Bushuwa nenudie nuenu kukuta,+
Ne nenutumbishe dîna dia Yehowa Nzambi wenu+
Udi muenze malu a kukema bua bualu buenu;
Bantu banyi kabakufuishibua kabidi bundu nansha.+
27 Nenufike ku dimanya ne: meme ndi munkatshi mua Isalele+
Kabidi ne: meme ndi Yehowa Nzambi wenu,+ kakuena mukuabu nansha!
Bantu banyi kabakufuishibua kabidi bundu nansha.
28 Pashishe, nengitshikijile bantu ba mishindu yonso nyuma wanyi,+
Ne bana benu ba balume ne bana benu ba bakaji nebambe mêyi a buprofete,
Bakulakaje benu nebalote bilota,
Ne bansongalume benu nebamone bikena kumona.+
29 Nansha bapika banyi balume ne bapika banyi bakaji
Nembitshikijile nyuma wanyi mu matuku au.
31 Dîba nedikudimuke mîdima ne ngondo neakudimuke mashi+
Kumpala kua dilua dia dituku dinene dia Yehowa didi dikuatshisha buôwa.+
32 Kadi muntu yonso udi ubila dîna dia Yehowa neapandishibue;+
Bualu nekuikale bantu bapanda mu mukuna wa Siona ne mu Yelushalema,+ anu mudi Yehowa muambe,
Bantu bashala ne muoyo badi Yehowa ubikila.”
3 “Bualu monayi! mu matuku au ne mu tshikondo atshi,
Pandi mpingaja bakuatshibue ba Yuda ne ba Yelushalema,+
2 Nensangishe kabidi bisamba bionso pamue
Nempite nabi ku tshilumbuluidi muomu amu+
Bua Isalele, bantu banyi ne bumpianyi buanyi,
Bualu bivua bibatangalaje munkatshi mua bisamba,
Ne bavua babanyangane buloba buanyi munkatshi muabu.+
3 Bualu bakelela bantu banyi nshobo;+
Bavua bashintakaja muana wa balume bua kufuta ndumba
Ne basumbisha muana wa bakaji ku mvinyo wa kunua.
4 Kabidi, nudi nanyi tshilumbu kayi,
Wewe Tulo ne Sidona ne maloba onso a Peleshete?
Nudi numfuta bua bualu kampanda anyi?
Binuikala nudi numfuta,
Meme nennutumine difutu dienu pa mitu yenu ne lukasa luonso.+
5 Bualu nudi bangate arjan wanyi ne or wanyi,+
Ne nudi babueje biuma bianyi bitambe buimpe mu ntempelo yenu;
6 Nudi basumbishe bantu ba mu Yuda ne ba mu Yelushalema kudi bena Greke,+
Bua kubatuma kule ne buloba buabu;
7 Monayi, ndi mbajula bua bafumine muaba unuvua babasumbishe,+
Ne nennutumine difutu dienu pa mitu yenu.
8 Nensumbishe bana benu ba balume ne bana benu ba bakaji mu tshianza tshia bantu ba mu Yuda,+
Ne bobu nebabasumbishe kudi bantu ba ku Sheba, kudi tshisamba tshia kule;
Bualu Yehowa muine mmuambe bualu ebu.
9 Manyishayi bualu ebu munkatshi mua bisamba+ ne:
‘Dilongololayi bua* mvita! Julayi bilobo!
Basalayi bonso basemene pabuipi, baye kumpala!+
10 Fulayi nkasu yenu ya kudima nayi nuyivuije miele ya mvita, ne miele yenu ya kusonza nayi nuyivuije mafuma.
Muntu udi kayi ne makanda ambe ne: “Ndi ne bukole.”
11 Luayi, nuambuluishe, nuenu bisamba bionso bidi binyunguluke, disangishayi pamue!’”+
Yehowa wetu, puekesha bena bukole bebe* muaba au.
12 “Bisamba bijuke ne bilue ku Tshibandabanda* tshia Yehoshafata;
Bualu kuoku aku nensombe bua kulumbuluisha bisamba bionso bidi binyunguluke.+
13 Elayi muele wa kunowa nawu, bualu bia pa madimi mbikole.
Puekayi, diatakajayi, bualu bikaminu bia mvinyo mbiuwule.+
Bipanza mbiuwule biyila ne panshi, bualu bubi buabu mbua bungi.
14 Misumba ya bantu, misumba ya bantu idi mu tshibandabanda* tshia dipangadika,
Bualu dituku dia Yehowa didi pabuipi mu tshibandabanda* tshia dipangadika.+
15 Dîba ne ngondo nebilue mîdima,
Ne mitoto neyijimije bukenke buayi.
16 Yehowa neakungule kumbukila mu Siona,
Neabandishe dîyi diende difumina mu Yelushalema.
Diulu ne buloba nebikanke;
Kadi Yehowa neikale tshinyemenu bua bantu bende,+
Muaba mukolesha bua bantu ba Isalele.
17 Nunku nenufike ku dimanya ne: meme ndi Yehowa Nzambi wenu, udi musombele mu Siona, mukuna wanyi wa tshijila.+
18 Dituku adi mikuna minene neyimatshishe mvinyo mushême,+
Ne mikuna mikese neyipuekeshe mabele,
Ne tusulu tua Yuda tuonso netupuekeshe mâyi.
Mushimi wa mâyi newupueke ufumina mu nzubu wa Yehowa,+
Ne newutume mâyi au mu Tshibandabanda tshia* Mitshi ya misese.*
19 Kadi Ejipitu nealue munda mutupu,+
Ne Edome nealue tshipela tshia munda mutupu,+
Bua bualu bua malu a tshikisu avuabu benzele bantu ba mu Yuda,+
Bena mu buloba muvuabu bamatshishe mashi a bantu badi kabayi ne bualu panshi.+
20 Kadi bantu nebasombele mu Yuda tshiendelele,
Ne mu Yelushalema ku tshipungu ne ku tshipungu tshia bantu.+
21 Mashi* abu amvua ngangata mikale ne tshibawu nengangate kaayi ne tshibawu;+
Ne Yehowa neasombele mu Siona.”+
Diumvuija: “Yehowa udi Nzambi.”
Anyi “nsongakaji udi.”
Anyi “bayende.”
Ku mua.: “Suikayi mukaba.”
Anyi “dikumayi mu tshiadi.”
Ku mua.: “Jidilayi.”
Anyi pamuapa: “Mfigi miume.”
Anyi “Bintu bidibu babasa.”
Anyi “mmuena muoyo muimpe.”
Anyi “neanyingalale bua.”
Anyi “kunyingalala.”
Ku mua.: “Jidilayi.”
Anyi “bakulu.”
Ku mua.: “ne mpala wende mutangile.”
Mmumue ne: Mbuu Mufue.
Mmumue ne: Mbuu wa Mediterane.
Anyi “bimanyinu.”
Anyi “Tshibatabata.”
Diumvuija: “Yehowa udi mulumbuluishi.”
Ku mua.: ‘Jidilayi.”
Anyi “bena mvita bebe.”
Anyi “Tshibatabata.”
Anyi “tshibatabata.”
Anyi “tshibatabata.”
Anyi “bantu ba ku babende.”
Anyi “Kasulu ka tshilonda nkoka ka.”
Anyi “Shitima.”
Anyi “Dibanza dia mashi.”