HAGAI

1 Mu tshidimu tshibidi tshia mukalenge Dayawesha, mu ngondo muisambombo, mu dituku dia kumpala dia ngondo, dîyi dia Yehowa diakalua ku butuangaji bua muprofete Hagai*+ kudi Zelubabela+ muana wa Shalatiele, nguvena wa Yuda, ne kudi Yoshua muana wa Yehosadaka, muakuidi munene, diamba ne:

2 “Mona tshidi Yehowa wa biluilu wamba: ‘Bantu aba badi bamba ne: “Tshikondo ki ntshianji kulua tshia kuibaka* nzubu* wa Yehowa to.”’”+

3 Dîyi dia Yehowa diakalua kabidi ku butuangaji bua muprofete Hagai,+ diamba ne: 4 “Etshi ntshikondo tshia nuenu kusombela mu nzubu yenu milamika mabaya, padi nzubu eu munyanguke anyi?+ 5 Mpindieu monayi tshidi Yehowa wa biluilu wamba: ‘Tekayi muoyo wenu ku* njila yenu. 6 Nudi bakune mamiinu a bungi, kadi nudi nupuola bintu bikese.+ Nudi nudia, kadi kanuyi nukuta to. Nudi nunua, kadi kanuena numana nyota to. Nudi nuvuala bilamba, kadi muntu nansha umue kena upeta luya. Muntu udi udiangatshisha ku mudimu udi wela mafutu ende mu tshibombi tshiuwule tente ne masoso.’”

7 “Monayi tshidi Yehowa wa biluilu wamba: ‘Tekayi muoyo wenu ku* njila yenu.’

8 “‘Bandayi ku mukuna ne luayi ne mabaya.+ Ibakayi nzubu,+ bua mmone mua kusanka bua bualu buende ne bua mmone mua kutumbishibua,’+ ke mudi Yehowa wamba.”

9 “‘Nuvua batekemene bia bungi ne nudi bapete bikese; ne panuvua babuele nabi mu nzubu, ngakabipepula.+ Mbua bualu kayi?’ ke mudi Yehowa wa biluilu wamba. ‘Bualu nzubu wanyi mmunyanguke, padi yonso wa kunudi ubanda upueka utabalela anu wende nzubu.+ 10 Nunku diulu didi pa mutu penu diakabenga ne lumuma luadi, ne buloba buakabenga ne mamuma abu. 11 Nunku ngakatungunuka ne kubikila minanga pa buloba, pa mikuna, pa ntete, pa mvinyo mupiamupia, pa mafuta, pa bintu bidi bitoloka pa buloba, pa bantu ne pa nyama, ne pa mudimu mukole wonso wa bianza bienu.’”

12 Zelubabela+ muana wa Shalatiele+ ne Yoshua muana wa Yehosadaka,+ muakuidi munene, ne bantu bakuabu bonso bakateleja dîyi dia Yehowa Nzambi wabu ne mêyi a muprofete Hagai, bualu Yehowa Nzambi wabu uvua mumutume; ne bantu bakatuadija kumvua buôwa bua bualu bua Yehowa.

13 Pashishe Hagai, mutuadi wa mukenji wa Yehowa, wakapesha bantu mukenji eu mu diumvuangana ne mudimu uvua Yehowa mumupeshe ne: “‘Meme ndi nenu,’+ ke mudi Yehowa wamba.”

14 Nunku, Yehowa wakasonsola nyuma+ wa Zelubabela muana wa Shalatiele, nguvena wa Yuda,+ ne nyuma wa Yoshua+ muana wa Yehosadaka, muakuidi munene, ne nyuma wa bantu bakuabu bonso; bakalua, kutuadijabu kuenza mudimu ku nzubu wa Yehowa wa biluilu, Nzambi wabu.+ 15 Bivua mu dituku dia 24 dia ngondo muisambombo mu tshidimu tshibidi tshia mukalenge Dayawesha.+

2 Mu ngondo wa muanda mutekete, mu dituku dia 21 dia ngondo, dîyi dia Yehowa diakalua ku butuangaji bua muprofete Hagai,+ diamba ne: 2 “Ebeja koku Zelubabela+ muana wa Shalatiele, nguvena wa Yuda,+ ne Yoshua+ muana wa Yehosadaka,+ muakuidi munene, ne bantu bakuabu ne: 3 ‘Nnganyi udi mushale munkatshi muenu uvua mumone nzubu* eu mu butumbi buende bua kale?+ Mmunyi munudi numumona mpindieu? Panudi nufuanyikija, kena umueneka bu tshintu tshia tshianana anyi?’+

4 “‘Kadi mpindieu, ikala ne bukole, Zelubabela,’ ke mudi Yehowa wamba, ‘ikala ne bukole, Yoshua muana wa Yehosadaka, muakuidi munene.’

“‘Ikalayi ne bukole, nuenu bantu bonso ba mu buloba ebu,’+ ke mudi Yehowa wamba, ‘ne enzayi mudimu.’

“‘Bualu ndi nenu,’+ ke mudi Yehowa wa biluilu wamba. 5 ‘Vulukayi tshimvua munulaye panuvua bapatuke mu Ejipitu,+ ne nyuma wanyi utshidi munkatshi muenu.*+ Kanuikadi ne buôwa to.’”+

6 “Bualu, mona tshidi Yehowa wa biluilu wamba: ‘Musangu mukuabu kabidi, mu katupa kakese, nenyukule diulu ne buloba ne mbuu ne buloba bume.’+

7 “‘Nunku, nennyukule bisamba bionso, ne bintu bia mushinga* bia bisamba bionso nebilue;+ ne nenguwuje nzubu eu ne butumbi,’+ ke mudi Yehowa wa biluilu wamba.

8 “‘Arjan nguanyi, ne or nguanyi,’ ke mudi Yehowa wa biluilu wamba.

9 “‘Butumbi bua nzubu eu bua matuku atshilualua nebuikale bunene bikole kupita bua kale,’+ ke mudi Yehowa wa biluilu wamba.

“‘Ne mu muaba eu nemfile ditalala,’+ ke mudi Yehowa wa biluilu wamba.”

10 Mu dituku dia 24 dia ngondo wa tshitema, mu tshidimu tshibidi tshia Dayawesha, dîyi dia Yehowa diakalua kudi muprofete Hagai,+ diamba ne: 11 “Mona tshidi Yehowa wa biluilu wamba: ‘Ebeja koku bakuidi bua mikenji ne:+ 12 “Muntu yeye muambule munyinyi wa tshijila mu luzembe lua tshilamba tshiende, ne tshilamba tshiende tshiotshi tshilenge diampa anyi biakudia anyi mvinyo anyi mafuta anyi tshiakudia tshia mushindu kayi wonso, netshilue tshia tshijila anyi?”’”

Bakuidi bakandamuna ne: “Tòo!”

13 Pashishe Hagai wakebeja ne: “Muntu udi ne bukoya bua muvuaye mulengangane ne tshitalu* yeye mulenge tshintu nansha tshimue tshia ku bintu ebi, netshilue ne bukoya anyi?”+

Bakuidi bakandamuna ne: “Netshilue ne bukoya.”

14 Nunku Hagai wakamba ne: “‘Ke mudi bantu aba, ne ke mudi tshisamba etshi kumpala kuanyi,’ ke mudi Yehowa wamba, ‘ne ke mudi mudimu wonso wa bianza biabu; tshintu tshionso tshidibu bafila muaba au tshidi ne bukoya.’

15 “‘Kadi mpindieu, nuenu mua kusua, tekayi muoyo wenu ku* bualu ebu kumbukila ku dituku edi too ne ku adi alua ne: Kumpala kua kutekabu dibue pa dibue dikuabu mu ntempelo wa Yehowa,+ 16 malu avua mushindu kayi? Pavua muntu mulue ku mushiki wa ntete mutekemene bipiminu 20, kuvua anu dikumi; ne pavua muntu mulue ku tshilaminu tshia mvinyo bua kutuntamu bipiminu 50, kuvua anu 20;+ 17 Ngakanukuma, midimu yonso ya bianza bienu, ne diumisha dikole dia bintu ne disama dia mitshi+ ne mvula wa mabue, kadi muntu nansha umue wa kunudi kakalua kundi,’ ke mudi Yehowa wamba.

18 “‘Tekayi koku muoyo wenu ku* bualu ebu kumbukila ku dituku edi too ne ku adi alua, kumbukila ku dituku dia 24 dia ngondo wa tshitema, kumbukila ku dituku divuabu base tshishimikidi tshia ntempelo wa Yehowa;+ tekayi muoyo wenu ku bualu ebu ne: 19 Mamiinu atshidi mu diyeba* anyi?+ Muonji wa mvinyo, mutshi wa mfigi, mutshi wa grenade ne mutshi wa olive, ki mmianji kukuama tumuma to, ki mmuomu anyi? Kubangila ku dituku edi nentume dibenesha.’”+

20 Dîyi dia Yehowa diakalua musangu muibidi kudi Hagai mu dituku dia 24 dia ngondo au,+ diamba ne: 21 “Ambila Zelubabela nguvena wa Yuda ne: ‘Ndi nnyukula diulu ne buloba.+ 22 Nentonkole nkuasa ya bumfumu ya makalenge ne nembutule bukole bua makalenge a bisamba;+ ne nentonkole ditempu ne badiendeshi, ne tubalu ne batuendeshi nebakuluke, muntu ne muntu ku muele wa mvita wa muanabu.’”+

23 “‘Mu dituku adi,’ ke mudi Yehowa wa biluilu wamba, ‘nenkuangate, wewe muena mudimu wanyi Zelubabela+ muana wa Shalatiele,’+ ke mudi Yehowa wamba, ‘ne nenkuvuije bu mpeta wa kutua nende tshitampi, bualu wewe ke muntu undi musungule,’ ke mudi Yehowa wa biluilu wamba.”