MUKANDA MUTUMINA BENA GALATIYA

1 Meme Paulo, mupostolo udi kayi mufumine kudi bantu anyi ku butuangaji bua muntu, kadi ku butuangaji bua Yezu Kristo+ ne Nzambi Tatu+ wakamujula ku lufu, 2 ne bana betu bonso badi nanyi, kudi bisumbu bia mu Galatiya:

3 Ngasa ne ditalala bia kudi Nzambi Tatu wetu ne Mukalenge Yezu Kristo bikale nenu. 4 Wakadifila yeye nkayende bua mpekatu yetu+ bua kutusungila ku ndongoluelu wa malu mubi*+ bilondeshile disua dia Nzambi, Tatu wetu;+ 5 butumbi buikale kudi Nzambi kashidi ne tshiendelele. Amen.

6 Ndi nkema bua munudi numbuka ne lukasa* kudi Yeye uvua munubikile ne ngasa wa Kristo, nuya kudi lumu luimpe lua mushindu mukuabu.+ 7 Ki mbua ne: kudi lumu luimpe lukuabu to; kadi bantu bakuabu badiku badi banutatshisha+ ne bajinga kukonyangaja lumu luimpe lua Kristo. 8 Kadi nansha muntu wa kutudi anyi muanjelu wa mu diulu mulue kunuambila lumu luimpe lukuabu ludi lushilangane ne lumu luimpe lutudi banuambile, edibue mulawu. 9 Anu bu mutukadi bambe, mpindieu ndi ngamba kabidi ne: Muntu yonso udi unuambila lumu luimpe lukuabu ludi lushilangane ne lunuvua bitabe, edibue mulawu.

10 Mu bulelela, bandi nteta kuitabijija mpindieu mbantu anyi nNzambi? Peshi ndi nkeba kusankisha bantu? Bu meme ntshidi nsankisha bantu, tshivua mua kuikala mupika wa Kristo to. 11 Bualu bana betu, ndi musue numanye ne: lumu luimpe lumvua munuambile ki ndufumine kudi muntu to;+ 12 bualu tshivua muluangate kudi muntu anyi balundongeshe to, kadi bavua balumbuluile kudi Yezu Kristo.

13 Bulelela, nuvua bumvue malu amvua ngenza kale mu buena Yuda,+ mumvua anu nkengesha tshisumbu tshia Nzambi bikole menemene* ne ntshinyangakaja;+ 14 ne mvua nya kumpala mu buena Yuda bikole kupita bantu ba bungi ba mulongo wanyi ba mu tshisamba tshietu, bualu mvua ne tshisumi tshia bungi bua bilele bia batatu banyi.+ 15 Kadi pavua Nzambi uvua mungumbushe mu difu dia mamuanyi mumbikile ku diambuluisha dia ngasa wende+ mumone ne: bivua bimpe 16 bua kumanyisha Muanende ku butuangaji buanyi, bua meme kuamba lumu luimpe lua bualu buende kudi bisamba bikuabu,+ tshivua mulombe lungenyi kudi muntu* diakamue to; 17 tshivua nansha mubande ku Yelushalema kudi bakalua bapostolo kumpala kuanyi, kadi mvua muye ku Arabi, pashishe meme kupingana ku Damaseke.+

18 Nunku bidimu bisatu pashishe, ngakabanda ku Yelushalema+ bua kumonangana ne Kefa,*+ meme kusomba nende matuku 15. 19 Kadi tshivua mumone mupostolo mukuabu to, anu Yakobo+ muanabu ne Mukalenge. 20 Mpindieu bua malu andi nnufundila aa, ndi nnujadikila kumpala kua Nzambi ne: tshiena nshima to.

21 Pashishe ngakaya mu bitupa bia maloba bia Sulia ne Kilikia.+ 22 Kadi meme tshivua mumanyike kudi bisumbu bia mu Yudaya bivua mu buobumue ne Kristo to. 23 Bavua anu bumvua ne: “Muntu uvua utukengesha kumpala au+ udi mpindieu wamba lumu luimpe lua ditabuja divuaye kumpala unyangakaja.”+ 24 Nunku bakatuadija kutumbisha Nzambi bua bualu buanyi.

2 Pashishe bidimu 14 bimane kupita, ngakabanda kabidi ku Yelushalema ne Bânaba,+ meme kuya kabidi ne Tito.+ 2 Ngakabandaku bualu mvua mupete dibuluibua, meme kubaleja lumu luimpe lundi nyisha mu bisamba bikuabu. Kadi ngakenza nanku kumpala kua bantu bavuabu bangata ne mushinga wa bungi, tuetu nabu pa nkayetu, bua kujadika ne: tshivua nyema anyi tshivua munyeme lubilu lua patupu to. 3 Kadi nansha Tito+ uvua nanyi kavua muenzejibue bua kutengudibua+ nansha muvuaye muena Greke to. 4 Kadi bualu abu buakajuka bua bana betu ba dishima bakabuejabu mu musokoko+ bavua badifinye munkatshi muetu bua kutentekela budikadidi+ butudi nabu mu buobumue ne Kristo Yezu, bua kutukuatabu ku bupika menemene;+ 5 katuvua bitabe bua kubakokela to,+ nansha bua mutantshi mukese,* bua bulelela bua lumu luimpe butungunuke ne kuikala munkatshi muenu.

6 Kadi bua bantu bavua bamueneka bu bavua ne mushinga+ (nansha bikalabu bavua bantu ba mushindu kayi kabiena bingambila bualu, bualu Nzambi kena utangila tshidi mpala wa muntu), bantu badibu bangata ne mushinga wa bungi abu kabavua bangambile bualu bupiabupia nansha bumue to. 7 Kadi pakamonabu ne: bavua bampeshe lumu luimpe lua kuambila bantu badi kabayi batengula,+ anu bu muvuabu balupeshe Petelo bua bantu badi batengula 8 (bualu muntu uvua mupeshe Petelo bukole bua kuenzela bantu badi batengula mudimu wa bupostolo, uvua mumpeshe panyi bukole bua kuwenzela bantu ba bisamba bikuabu)+ 9 ne pakajingululabu ngasa uvuabu bampeshe,+ Yakobo+ ne Kefa* ne Yone, bantu bavua bamueneka bu makunji, bakampesha meme ne Bânaba+ tshianza tshia balume tshia buwetu,* bua tuetu tuye kudi bisamba bikuabu, kadi bobu kudi bantu badi batengula. 10 Bakatulomba anu bua kutungunuka ne kuvuluka bapele, ne ke tshindi kabidi mudienzeje bua kuenza ne muoyo mujima.+

11 Kadi pakalua Kefa*+ ku Antiyokia,+ ngakamukandamena* mpala ne mpala, bualu bivua bimueneke patoke muvuaye mu tshilema.* 12 Bualu kumpala kua bantu bakuabu bavua bafuma kudi Yakobo+ kuluabu, uvua ne tshibidilu tshia kudia ne bantu ba bisamba bikuabu;+ kadi pakafikabu, wakalekela kuenza nanku ne wakadilamuna kudibu utshina ba mu kasumbu ka bantu batengula.+ 13 Bena Yuda bakuabu bonso bakadisanga kudiye mu dishima* edi, too ne Bânaba muine wakabalonda mu dishima* diabu adi. 14 Kadi pangakamona ne: kabavua benda bilondeshile bulelela bua lumu luimpe,+ ngakambila Kefa* kumpala kuabu bonso ne: “Biwikala wewe, nansha muudi muena Yuda, wenza malu bu bantu ba bisamba bikuabu, kabiyi bu mudi bena Yuda benza, mmunyi muudi mua kuenzeja bantu ba bisamba bikuabu bua kuenza malu bilondeshile bilele bia bena Yuda?”+

15 Tuetu badi bena Yuda ba ku tshilelelu, katuyi benji ba mpekatu ba mu bisamba bikuabu, 16 tudi bamanye ne: muntu kena ubadibua muakane bualu udi wenza malu adi mikenji ilomba, kadi anu bua ditabuja+ mu Yezu Kristo.+ Nunku tudi bitabuje Kristo Yezu bua tubadibue bakane ku diambuluisha dia ditabuja mu Kristo, kabiyi ku dienza malu adi mikenji ilomba, bualu kakuena muntu* wabadibua muakane bua dienza malu adi mikenji ilomba to.+ 17 Mpindieu bobu batusangane petu bikale benji ba mpekatu patudi eku tuenda tukeba bua batubale bakane ku butuangaji bua Kristo, dîba adi Kristo mmuena mudimu wa mpekatu anyi? Nansha kakese! 18 Meme muibakulule bintu bine bimvua mubumbule kale, ndi ndeja mundi mushipi wa mikenji. 19 Bualu ku diambuluisha dia mikenji, mvua mufue pa bidi bitangila mikenji,+ bua ndue ne muoyo kudi Nzambi. 20 Mbampopele ku mutshi pamue ne Kristo.+ Ki mmeme kabidi udi ne muoyo to,+ kadi Kristo ke udi ne muoyo mu buobumue nanyi. Bulelela, muoyo undi nawu mpindieu mu mubidi, ndi nawu bua ditabuja mu Muana wa Nzambi+ uvua munnange ne mudifile bua bualu buanyi.+ 21 Tshiena mbenga* ngasa wa Nzambi to,+ bualu bikala buakane bufumina ku mikenji, bulelela Kristo uvua mufue bua tshianana.+

3 Nuenu bena Galatiya badi kabayi ne meji! Nnganyi udi munubueje mu njila mubi eu,+ nuenu bavuabu bumvuije patoke muvuabu bapopele Yezu Kristo ku mutshi?+ 2 Ndi musue kunuebeja* bualu bumue ebu: Nuvua bapetele nyuma ku dienza dia malu a mikenji anyi mbualu nuvua bitabuje malu anuvua bumvue?+ 3 Ke munudi bapangile meji mushindu eu anyi? Nuenu bamane kutuadija ne malu a nyuma,* nukadi nujikija ne malu a mubidi* anyi?+ 4 Nudi bapete makenga bungi nunku anu bua tshianana anyi? Bulelela, anu bikalabi bivua bua tshianana. 5 Nunku muntu udi unupesha nyuma ne wenza midimu ya kukema+ munkatshi muenu, udi uyenza bua dienza dia malu a mikenji anyi mbualu nudi bitabuje malu anuvua bumvue? 6 Anu bu muvua Abalahama “muitabuje Yehowa,* kumubadilabu bualu abu bu buakane.”+

7 Nudi bamanye bulelela ne: bantu badi balamata ku ditabuja ke bana ba Abalahama.+ 8 Mpindieu bu mukavua Mifundu midianjile kumona ne: Nzambi neabale bantu ba mu bisamba bikuabu bakane bua ditabuja, yakadianjila kuambila Abalahama lumu luimpe elu ne: “Ku diambuluisha diebe bisamba bionso nebibeneshibue.”+ 9 Nunku bantu badi balamata ku ditabuja badi babeneshibua pamue ne Abalahama uvua ne ditabuja.+

10 Bantu bonso badi beyemena malu a mikenji mbedibue mulawu, bualu mbafunde ne: “Muntu udi kayi ushala mu malu onso adibu bafunde mu muvungu wa Mikenji pa kuenza mmuedibue mulawu.”+ 11 Bualu bukuabu, bidi bimueneka patoke ne: kakuena muntu udi ubadibua muakane kumpala kua Nzambi bua mikenji to,+ bualu “muntu muakane neikale ne muoyo bua ditabuja.”+ 12 Mpindieu Mikenji ki mmimanyine pa ditabuja to. Kadi “muntu yonso udi wenza malu aa neikale ne muoyo ku diambuluisha diawu.”+ 13 Kristo wakatusumba,+ utupikula+ ku mulawu wa Mikenji pa kulua mulawu pa muaba wetu, bualu mbafunde ne: “Muntu yonso udibu bakudike ku mutshi mmuedibue mulawu.”+ 14 Bivua nanku bua dibenesha dia Abalahama dilue kudi bisamba ku diambuluisha dia Kristo Yezu,+ bua tupete nyuma uvuabu balaye+ bua ditabuja dietu.

15 Bana betu, ndi ngakula mfila tshilejilu tshia bantu ne: Padibu bajadika tshipungidi, nansha tshiotshi tshijadika kudi muntu, kakuena udi utshishipa anyi usakidilaku malu to. 16 Mpindieu milayi, bavua bayilaye Abalahama ne muanende.*+ Kabena bamba ne: “ne ndelanganyi* yebe,” bu badi bakula bua ya bungi to. Kadi badi bamba ne: “ne muanebe,”* bakula bua umue, udi muikale Kristo.+ 17 Bualu bukuabu, ndi ngamba ne: Mikenji ivua milue bidimu 430 pashishe+ kayena ishipa tshipungidi tshikavua Nzambi mujadike kumpala, bua kushipa mulayi to. 18 Bualu bikala bumpianyi buimanyine pa mikenji, ki mbuimanyine kabidi pa mulayi nansha; kadi Nzambi uvua mubupeshe Abalahama ne bulenga buonso ku diambuluisha dia mulayi.+

19 Nunku Mikenji ivuaku bua tshinyi? Bakayisakidila bua kuela dishipa dia mikenji patoke+ too ne pavua muana* uvuabu balaye mulayi au ne bua kufika;+ ne bakayifila ku butuangaji bua banjelu+ ku tshianza tshia mutuangaji.+ 20 Mpindieu kakuena mutuangaji padiku anu muntu umue to, kadi Nzambi udi anu umue. 21 Nunku Mikenji idi ibengangana ne milayi ya Nzambi anyi? Nansha kakese! Bualu bikalabu bavua bafile mukenji uvua mua kufila muoyo, bulelela buakane buvua ne bua kulua ku butuangaji bua mikenji. 22 Kadi Mifundu yakafila bintu bionso mu buloko bua mpekatu, bua bapeshe bantu badi baleja ditabuja mulayi uvua ufumina ku ditabuja Yezu Kristo.

23 Kadi kumpala kua ditabuja kufika, bavua batulame muinshi mua mikenji, tufidibua mu buloko, tutangila ku ditabuja dikavua pa kubuludibua.+ 24 Nunku Mikenji yakalua mulami* wetu udi utulombola too ne kudi Kristo,+ bua batubale bakane ku diambuluisha dia ditabuja.+ 25 Kadi mpindieu ukadi ditabuja dimane kufika,+ katuena kabidi ku bukokeshi bua mulami* nansha.+

26 Mu bulelela, nuenu bonso nudi bana ba Nzambi+ ku diambuluisha dia ditabuja dienu mu Kristo Yezu.+ 27 Bualu nuenu bonso bavua babatijibue mu Kristo nudi bavuale Kristo.+ 28 Kakuena muena Yuda anyi muena Greke,+ kakuena mupika anyi muntu mudikadile,+ kakuena mulume anyi mukaji,+ bualu nuenu bonso nudi tshintu tshimue mu buobumue ne Kristo Yezu.+ 29 Bualu bukuabu, binuikala bantu ba Kristo, nudi bulelela bana*+ ba Abalahama, bapianyi+ bilondeshile mulayi.+

4 Mpindieu ndi ngamba ne: patshidi mupianyi muana mutekete ki mmushilangane ne mupika to, nansha mudiye mukalenge wa bintu bionso, 2 kadi udi ku bukokeshi bua batangidi ne balami too ne ku dituku didi tatuende mudianjile kusungula. 3 Bia muomumue, tuetu petu, patutshivua bana, tuvua ku bupika bua malu a ntuadijilu a panu.+ 4 Kadi pakakumbana dîba dionso dikosa, Nzambi wakatuma Muanende uvua muledibue kudi mukaji+ ne uvua muinshi mua mikenji,+ 5 bua asumbe badi muinshi mua mikenji bua kumona mua kubapikula,+ bua tuetu tupete mushindu wa kuangatshibua bu bana.+

6 Mpindieu bu munudi bana, Nzambi mmutume nyuma+ wa Muanende mu mioyo yetu,+ ne nyuma eu udi wela lubila wamba ne: “Aba,* Tatu!”+ 7 Nunku kutshiena kabidi mupika, kadi udi muana; ne biwikala muana, dîba adi udi kabidi mupianyi ku diambuluisha dia Nzambi.+

8 Nansha nanku, panuvua kanuyi bamanye Nzambi, nuvua ku bupika bua bintu bidi mu bulelela kabiyi nzambi. 9 Kadi mpindieu unudi bafike ku dimanya Nzambi, anyi unudi bafike ku dimanyibua kudi Nzambi, mmunyi munudi nupingana kabidi ku malu matekete+ a ntuadijilu a tshianana ne basue kudishiya kabidi ku bupika buawu?+ 10 Nudi nunemeka matuku ne ngondo+ ne mivu ne bidimu ne muoyo mujima. 11 Ndi ntshina bua bualu buenu ne: mu mushindu kampanda anyi kansanga, tshikadi mutate patupu bua bualu buenu.

12 Bana betu, ndi nnulomba ne: nulue bu mundi, bualu meme panyi mvua bu munudi amu.+ Kanuvua bangenzele bualu bubi nansha bumue. 13 Kadi nudi bamanye ne: disama dia mubidi wanyi ke divua dimpeteshe mushindu wa kunuambila lumu luimpe musangu wa kumpala. 14 Nansha muvua disama dianyi dikale diteta kunudi, kanuvua bampepeje anyi bandiombole;* kadi nuvua bangakidile bu muanjelu wa Nzambi, bu Kristo Yezu. 15 Disanka dinuvua nadi didi penyi? Bualu ndi nnujadikila ne: bu kuoku mushindu, nuvua mua kuikala batonkone mêsu enu bua kuampesha.+ 16 Nunku mpindieu ndi mulue muena lukuna wenu bualu ndi nnuambila bulelela anyi? 17 Badi ne tshisumi bua kunukoka kudibu, kadi ki mbua kipatshila kimpe to; mbasue kunumbusha kundi bua nubalonde ne muoyo mujima. 18 Tshidibi bidi anu bimpe bua muntu mukuabu anukebe ne tshisumi bua kipatshila kimpe kadi ki nganu pandi nenu, 19 nuenu bana banyi bakese+ bandi ngumvuila kabidi didinyenga dia pa kulela too ne padi Kristo wenjibua* munda muenu. 20 Ndi njinga bua kuikala nenu anu mpindieu bua kuakula nenu mu mushindu mukuabu, bualu tshiena mumanye tshia kuenza bua bualu buenu to.

21 Ngambilayi nuenu badi basue kuikala muinshi mua mikenji, kanuena nuteleja Mikenji anyi? 22 Tshilejilu, mbafunde ne: Abalahama uvua ne bana ba balume babidi, umue wa kudi nsongakaji mupika+ ne mukuabu wa kudi mukaji uvua ne budikadidi;+ 23 kadi muana wa nsongakaji mupika uvua bushuwa muledibue bu mutubu balela bana bonso,*+ ne wa mukaji uvua ne budikadidi ku butuangaji bua mulayi.+ 24 Tudi mua kuangata malu aa bu tshifuanyikijilu; bualu bakaji aba badi baleja bipungidi bibidi: tshimue tshia ku mukuna wa Sinai+ tshidi tshilela bana ba bupika ne tshileja Hagâ. 25 Hagâ udi uleja Sinai,+ mukuna wa mu Arabi, ne yeye udi upetangana ne Yelushalema wa lelu, bualu udi mu bupika ne bana bende. 26 Kadi Yelushalema wa muulu udi ne budikadidi, ne yeye ke mamuetu.

27 Bualu mbafunde ne: “Wewe mukaji nkumba udi kayi ulela, ikala ne disanka; wewe mukaji udi kayi ne didinyenga dia pa kulela, ela mbila ya disanka; bualu bana ba mukaji udibu balekele badi ba bungi menemene kupita ba mukaji udi ne mulume.”+ 28 Mpindieu nuenu, bana betu, nudi bana ba mulayi anu bu muvua Izaka.+ 29 Kadi anu bu muvua tshikondo atshi muana uvua muledibue bu mutubu balela bana bonso* mutuadije kukengesha muana uvua muledibue ku diambuluisha dia nyuma,+ ke mudibi kabidi lelu.+ 30 Nansha nanku, Mifundu idi yamba tshinyi? “Ipata nsongakaji mupika ne muanende, bualu muana wa nsongakaji mupika kakuikala mupianyi pamue ne muana wa mukaji udi ne budikadidi nansha kakese.”+ 31 Nunku bana betu, katuena bana ba nsongakaji mupika to, kadi tudi ba mukaji udi ne budikadidi.

5 Kristo wakatupikula bua budikadidi bua nunku. Ke bualu kayi shindamayi,+ ne kanuitabi bua banusuike kabidi ku mutshi wa tshikokedi wa bupika.+

2 Tangilayi! Meme Paulo ndi nnuambila ne: bobu banutengule, Kristo kakuikala ne dikuatshisha kunudi to.+ 3 Ndi njadikila kabidi muntu yonso udibu batengula ne: mmuenzejibue bua kutumikila Mikenji yonso.+ 4 Nudi batapuluke ne Kristo nuenu badi bakeba bua kubadibua bakane ku diambuluisha dia mikenji;+ nudi baye kule ne ngasa wende. 5 Buetu tuetu, ku butuangaji bua nyuma, tudi bindile ne muoyo mujima buakane butudi batekemene budi bufumina ku ditabuja. 6 Bualu mu buobumue ne Kristo Yezu, ditengudibua anyi dibenga kutengudibua kadiena ne mushinga to,+ kadi ditabuja didi dikuata mudimu ku diambuluisha dia dinanga ke didi ne mushinga.

7 Nuvua nunyema bimpe.+ Nnganyi uvua munupangishe bua kutungunuka ne kutumikila bulelela? 8 Ditabijijangana dia mushindu eu kadiena difumina kudi Yeye udi unubikila to. 9 Luevene lukese ludi lubandisha bukula buonso busopa.+ 10 Ndi mushindike ne: nuenu badi mu buobumue ne Mukalenge+ kanuakufika ku diela meji mushindu mukuabu to; kadi muntu udi unutatshisha,+ nansha yeye muikale nganyi, neapete dilumbuluisha didi dimukumbanyine. 11 Kadi buanyi meme bana betu, bingikala ntungunuka ne kuyisha bualu bua ditengudibua, bua tshinyi batshidi bankengesha? Biobi bikale nanku, bakadi bumbushe tshilenduishi tshia mutshi wa makenga.*+ 12 Ndi musue bua bantu badi bakeba kunutatshisha baditungule bobu nkayabu.*

13 Bana betu, nuvua babikidibue bua budikadidi; kadi kanuangatshi budikadidi ebu bu mpunga wa nuenu kubuelela bua kulonda majinga a mubidi to,+ kadi bua dinanga nukuatshilangane mudimu bu bapika.+ 14 Bualu Mikenji yonso mmikumbane* mu dîyi dimue edi ne: “Udi ne bua kunanga mukuebe bu muudi mudinange.”+ 15 Kadi nuenu nutungunuka ne kusumangana ne kudiangana,+ nudimuke bua kanulu kubutulangana.+

16 Kadi ndi ngamba ne: Tungunukayi ne kuenda mu diumvuangana ne nyuma,+ nunku kanuakukumbaja majinga a mubidi nansha.+ 17 Bualu mubidi, mu majinga awu, kawena upetangana ne nyuma to, ne nyuma kena upetangana ne mubidi to; bidi bibengangana, bua kanuenji malu mine anudi basue kuenza.+ 18 Bualu bukuabu, bikala nyuma unulombola, kanuena muinshi mua mikenji to.

19 Mpindieu malu a mubidi adi amueneka patoke; ngowu aa: masandi,*+ malu a bukoya, tshikadilu tshia dikamakama,*+ 20 ditendelela dia mpingu, malu a mîdima,*+ lukuna, matandu, mukawu, biji bikole bia lukasa, makokianganyi, matapuluka, tusumbusumbu, 21 dialakana, dikuatshika dia maluvu,+ bibilu bia bisankasanka* ne malu a buena aa.+ Ndi ndianjila kunudimuija bua malu aa anu munkavua munudimuije ne: bantu badi benza malu a nunku kabakupiana Bukalenge bua Nzambi to.+

22 Kadi dimuma dia nyuma didi: dinanga, disanka, ditalala, lutulu,* bulenga, buimpe,+ ditabuja, 23 bupole, didikanda.+ Kakuena mukenji udi ukandika malu a nunku to. 24 Bualu bukuabu, bantu ba Kristo Yezu mbapopele mubidi pamue ne nkuka yawu ne majinga awu ku mutshi.+

25 Bituikala ne muoyo bua nyuma, tutungunuke ne kuenda mu bulongame bilondeshile nyuma+ kabidi. 26 Katukebi bua kudileja bu ne: tudi bapite bakuabu,+ tukebesha ditembangana munkatshi muetu,+ tualakanangana.

6 Bana betu, nansha muntu yeye wenda usesuka mu njila, kumpala kua yeye kujingulula bualu ebu, nuenu badi bashindame mu nyuma nukebe bua kupingaja muntu wa nunku mu njila ne meji a bupole.+ Kadi udimuke wewe muine+ bua kulu pebe kutetshibua.+ 2 Nutungunuke ne kuambuishangana majitu,+ ne mu mushindu eu nenukumbaje mukenji wa Kristo.+ 3 Bualu bikala muntu wela meji ne: udi ne mushinga wa bungi pende kayi nawu,+ udi udidinga. 4 Kadi muntu yonso akonkonone bienzedi biende yeye,+ dîba adi neapete tshidiye mua kusankila bua bualu buende nkayende, kayi udifuanyikija ne muntu mukuabu to.+ 5 Bualu muntu yonso neadiambuile bujitu* buende.+

6 Bualu bukuabu, muntu yonso udibu balongesha* dîyi abanyangane bintu bimpe bionso ne muntu udi umulongesha nunku.*+

7 Kanudidingi: Nzambi kabena mua kumuseka to. Bualu tshionso tshidi muntu ukuna, ke tshiapuolaye kabidi;+ 8 bualu muntu udi ukunyina mubidi wende bintu neapuole dibola dia kudi mubidi wende, kadi muntu udi ukunyina nyuma bintu, neapuole muoyo wa tshiendelele kudi nyuma.+ 9 Nunku katulekedi kuenza malu mimpe nansha, bualu netupuole mu tshikondo tshiakane tuetu katuyi batshioke.*+ 10 Nunku mpindieu, patutshidi ne mushindu,* tuenzelayi bantu bonso malu mimpe, kadi tuenzele nangananga bana betu mu ditabuja.

11 Tangilayi mundi munufundile ne maleta manene ku tshianza tshianyi nkayanyi.

12 Bantu bonso badi basue bua babamone bimpe mu mubidi* ke badi basue kunuenzeja bua nutengudibue, benza nunku anu bua kuepuka dikengeshibua bua mutshi wa makenga* wa Kristo. 13 Bualu nansha bantu badi batengudibua kabena bobu bine batumikila Mikenji,+ kadi mbasue bua nuenu nutengudibue bua bamone mua kuditumbisha bua mubidi wenu. 14 Kadi meme tshiditumbishi nansha kakese, pa kumbusha anu kuditumbishila mu mutshi wa makenga* wa Mukalenge wetu Yezu Kristo;+ ku butuangaji buende mbashipe* bukua panu bua bualu buanyi ne meme bua bualu bua bukua panu. 15 Bualu ditengudibua kadiena ne mushinga, nansha dibenga kutengudibua,+ kadi tshifukibua tshipiatshipia ke tshidi ne mushinga.+ 16 Bua bantu bonso badi benda mu bulongame bilondeshile dîyi edi, ditalala ne luse bikale kudibu, eyowa, kudi Isalele wa Nzambi.+

17 Kutuadijila ku mpindieu, muntu nansha umue kantatshishi to, bualu ndi ne bimanyinu bia mupika wa Yezu pambidi panyi.+

18 Bana betu, ngasa wa Mukalenge wetu Yezu Kristo ikale ne lungenyi lunudi nuleja. Amen.