BUAKABULUIBUA BULEJA YONE

1 Buakabuluibua* bua Yezu Kristo, buvua Nzambi mumupeshe,+ bua kuleja bapika bende+ malu adi ne bua kuenzeka mu katupa kîpi emu. Wakatuma muanjelu wende ne wakabuleja ku butuangaji buende mu bimanyinu kudi mupika wende Yone+ 2 uvua mufile bujadiki bua dîyi divua Nzambi mufile ne bumanyishi buvua Yezu Kristo mufile, eyowa, malu onso avuaye mumone. 3 Muntu udi ubala ne dîyi dikole ne bantu badi bumvua mêyi a buprofete ebu ne badi batumikila malu adi mafundamu,+ mba diakalenga, bualu tshikondo tshisungula tshidi pabuipi.

4 Yone kudi bisumbu muanda mutekete+ bidi mu provense wa Asia:

Ngasa ne ditalala bikale nenu bia kudi “Eu udiku ne uvuaku ne udi ulua,”+ ne bia kudi nyuma muanda mutekete+ idi kumpala kua nkuasa wende wa bukalenge, 5 ne bia kudi Yezu Kristo, “Ntemu wa lulamatu,”+ “muanabute wa munkatshi mua bafue,”+ ne “Mukokeshi wa bakalenge ba pa buloba.”+

Kudi yeye udi mutunange,+ uvua mutusulule ku mpekatu yetu ku diambuluisha dia mashi ende,+ 6 (ne wakatuvuija bukalenge,+ bakuidi+ kudi Nzambi wende ne Tatu) eyowa, butumbi ne bukole bikale kudiye bua kashidi. Amen.

7 Tangilayi! Yeye udi ulua ne matutu,+ ne dîsu dionso nedimumone, ne aba bavua bamutue difuma; bisa bionso bia pa buloba nebidikume bua kanyinganyinga bua bualu buende.+ Eyowa, Amen.

8 “Meme ndi Alfa ne Omega,”*+ ke mudi Yehowa* Nzambi wamba, “Eu udiku ne uvuaku ne udi ulua, Wa Bukole Buonso.”+

9 Meme Yone, muanenu ne muabanyanganyi nenu wa dikenga+ ne bukalenge+ ne dinanukila+ mu buobumue ne Yezu,+ mvua mu tshidiila* tshidibu babikila ne: Patemo bua kuakula bua bualu bua Nzambi ne kufila bumanyishi bua bualu bua Yezu. 10 Ku bukole bua nyuma ngakadisangana mu dituku dia Mukalenge, meme kumvua dîyi dikole panyima panyi bu dia mpungi, 11 diamba ne: “Bualu buudi umona, ubufunde mu muvungu, uwutumine bisumbu muanda mutekete: ku Efeso,+ ku Semuna,+ ku Pêgamo,+ ku Tuatila,+ ku Sâdi,+ ku Filadelefia+ ne ku Laodikiya.”+

12 Ngakakudimuka bua kumona uvua wakula nanyi, pangakakudimuka, ngakamona bitekelu bia miendu muanda mutekete bia or,+ 13 ne munkatshi mua bitekelu bia miendu muntu mukuabu bu muana wa muntu,+ muvuale tshilamba tshitue too ne ku makasa ne muvuale mukaba wa or pa tshiadi tshiende. 14 Kabidi, mutu wende ne nsuki yende bivua bitoke bu miosa mitoke ya mikoko, bu neje, ne mêsu ende avua bu ludimi lua kapia,+ 15 ne makasa ende avua bu tshiamu tshia mitaku tshimpe menemene+ paditshi tshikenka mu tshikutu tshia kapia, ne dîyi diende divua bu mukungulu wa mâyi a bungi. 16 Uvua ne mitoto muanda mutekete mu tshianza tshiende tshia balume,+ ne muele wa mvita mutue, mule, musakisha nseke ibidi+ uvua upatuka mukana muende, ne mpala wende* uvua bu dîba padidi dikenka bikole menemene.+ 17 Pangakamumona, ngakakuluka bu mufue ku makasa ende.

Ne wakantenteka tshianza tshiende tshia balume, kuambaye ne: “Kutshinyi to. Meme ndi Wa Kumpala+ ne Wa Ndekelu,+ 18 eu udi ne muoyo,+ mvua mufue,+ kadi tangila! ndi ne muoyo bua kashidi ne tshiendelele,+ ne ndi ne nsapi ya lufu ne ya Lukita.*+ 19 Nunku, funda malu auvua mumone, ne malu adiku, ne malu enzeka panyima pa aa. 20 Bua bualu busokoka bua tshijila bua mitoto muanda mutekete iuvua mumone mu tshianza tshianyi tshia balume ne bua bitekelu bia miendu muanda mutekete bia or: Mitoto muanda mutekete idi ileja banjelu ba bisumbu muanda mutekete, ne bitekelu bia miendu muanda mutekete bidi bileja bisumbu muanda mutekete.+

2 “Fundila muanjelu+ wa tshisumbu tshia ku Efeso+ ne: Yeye udi mukuate mitoto muanda mutekete mu tshianza tshiende tshia balume, udi wenda munkatshi mua bitekelu bia miendu muanda mutekete bia or, udi wamba malu aa ne:+ 2 ‘Ndi mumanye bienzedi biebe, ne mudimu webe mukole, ne dinanukila diebe, ne ndi mumanye kabidi ne: kuena mua kuanyisha bantu babi, kabidi ne: udi mutete bantu badi bamba mudibu bapostolo,+ kadi kabayi bapostolo, ne udi mubasangane bena dishima. 3 Udi kabidi uleja dinanukila, ne udi mutantamene malu a bungi bua dîna dianyi+ ne kuena mupungile to.+ 4 Nansha nanku, ndi nebe tshilumbu etshi ne: udi mulekele dinanga diuvua nadi ku ntuadijilu.

5 “‘Nunku vuluka muaba uuvua mudishindile, nyingalala bua mpekatu yebe+ ne enza bienzedi biuvua muenze kumpala. Tshianana, nendue kuudi, ne nengumbushe tshitekelu tshiebe tshia miendu+ pa muaba watshi, wewe kuyi munyingalale bua mpekatu yebe.+ 6 Nansha nanku, udi ne bualu buimpe ebu: udi mukine bienzedi bia kasumbu ka Nikolao,+ kandi panyi mukine. 7 Muntu udi ne matshi umvue tshidi nyuma wambila bisumbu:+ Muntu udi utshimuna+ nemmuanyishile bua kudia bimuma bia ku mutshi wa muoyo,+ udi mu mparadizu wa Nzambi.’

8 “Fundila muanjelu wa tshisumbu tshia ku Semuna ne: ‘Wa Kumpala ne Wa Ndekelu,’+ uvua mufue ne mupetulule muoyo, udi wamba malu aa ne:+ 9 ‘Ndi mumanye dikenga diebe ne bupele buebe (kadi udi mubanji)+ ne bipendu bia kudi bantu badi badibikila bena Yuda, pabu kabayi bena Yuda menemene, kadi badi nsunagoga wa Satana.+ 10 Kutshinyi malu akadi pa kukukuata to.+ Tangila! Diabolo neatungunuke ne kuela bamue ba kunudi mu buloko bua nutetshibue mu malu onso, ne nenupete dikenga matuku dikumi. Uleje lulamatu too ne ku lufu, ne nenkupeshe tshifulu tshia butumbi tshia muoyo.+ 11 Muntu udi ne matshi umvue+ tshidi nyuma wambila bisumbu: Muntu udi utshimuna,+ lufu luibidi kaluakumuenzela bibi nansha kakese.’+

12 “Fundila muanjelu wa tshisumbu tshia ku Pêgamo ne: Yeye udi ne muele wa mvita mutue, mule, musakisha nseke ibidi, udi wamba malu aa ne:+ 13 ‘Ndi mumanye muaba uudi musombele, mmumue ne: muaba udi nkuasa wa bukalenge wa Satana; kadi udi utungunuka ne kukuata dîna dianyi bikole,+ ne kuvua muvile ditabuja diebe kundi+ nansha mu matuku a Antipa, ntemu wanyi wa lulamatu,+ uvuabu bashipe+ ku luseke luenu, muaba udi Satana musombele.

14 “‘Nansha nanku, ndi nebe ne malu makese aa: kuntu aku udi ne bantu badi balamate dilongesha dia Balama,+ uvua mulongeshe Balaka+ bua kuteka tshilenduishi kumpala kua bana ba Isalele, bua kudiabu bintu bilambula mpingu ne kuenda masandi.*+ 15 Mu mushindu wa muomumue, udi kabidi ne bantu badi balamate dilongesha dia kasumbu ka Nikolao.+ 16 Nunku, nyingalala bua mpekatu yebe. Tshianana, ndi ndua kuudi lukasa, ne nembaluishe ne muele wa mvita mule wa mukana muanyi.+

17 “‘Muntu udi ne matshi umvue tshidi nyuma wambila bisumbu:+ Muntu udi utshimuna+ nemmupeshe ndambu wa mana masokoka,+ ne nemmupeshe lusoka lutoke, ne mbafunde pa lusoka alu dîna dipiadipia didi muntu nansha umue kayi mumanye, anu eu udi udipeta.’

18 “Fundila muanjelu wa tshisumbu tshia ku Tuatila+ ne: Muana wa Nzambi, udi ne mêsu bu ludimi lua kapia,+ ne makasa bu tshiamu tshia mitaku tshimpe menemene,+ udi wamba malu aa ne: 19 ‘Ndi mumanye bienzedi biebe ne dinanga diebe ne ditabuja diebe ne mudimu webe ne dinanukila diebe, ndi mumanye kabidi ne: bienzedi biebe bia ku ndekelu eku mbipite biuvua muenze kumpala.

20 “‘Nansha nanku, ndi nebe tshilumbu etshi ne: udi witaba mukaji au Yezabele,+ udi udibikila muprofete mukaji, ne udi ulongesha bapika banyi, ubapambuisha bua kuendabu masandi*+ ne bua kudiabu bintu bilambula mpingu. 21 Mvua mumupeshe tshikondo tshia kunyingalalaye bua mpekatu yende, kadi ki mmusue kunyingalala bua masandi* ende to. 22 Tangila! Nkadi pa kumuela mu bulalu bua disama, ne kuela bantu badi benda nende masandi mu dikenga dinene, bobu kabayi banyingalale bua bienzedi biende. 23 Nenshipe bana bende ne tshipupu tshia lufu, nunku bisumbu bionso nebimanye ne: meme ndi eu udi ukonkonona meji a munda menemene* ne mioyo, ne nennufute muntu ne muntu bilondeshile bienzedi bienu.+

24 “‘Kadi ba kunudi badi bashale badi ku Tuatila, bonso badi kabayi balonda dilongesha edi, bavua kabayi bafike ku dimanya tshidibu babikila ne: “malu male a Satana”+ ndi mbambila ne: tshiena nnutentekela bujitu bukuabu to. 25 Nansha nanku, kuatayi tshinudi natshi bikole too ne pandi ndua.+ 26 Muntu udi utshimuna ne ulonda bienzedi bianyi too ne ku ndekelu, nemmupeshe bukokeshi ku mutu kua bisamba,+ 27 ne neakokeshe bantu ne dikombo dia tshiamu+ bua basunsudibue bu malongo a diima, anu bu mundi mupete bukokeshi kudi Tatu wanyi. 28 Ne nemmupeshe mutoto wa nkesha.+ 29 Muntu udi ne matshi umvue tshidi nyuma wambila bisumbu.’

3 “Fundila muanjelu wa tshisumbu tshia ku Sâdi ne: Yeye udi ne nyuma muanda mutekete ya Nzambi+ ne mitoto muanda mutekete+ udi wamba malu aa ne: ‘Ndi mumanye bienzedi biebe, ndi mumanye ne: udi ne dîna* ne: udi ne muoyo, kadi udi mufue.+ 2 Ikala mutabale,+ kolesha bintu bidi bishale bikavua pa kufua, bualu tshiena musangane midimu yebe mikumbaja* yonso kumpala kua Nzambi wanyi to. 3 Nunku, tungunuka ne kuvuluka* tshiudi mupete ne mumvue, ne tungunuka ne kutshilama, unyingalale bua mpekatu yebe.+ Bushuwa wewe kuyi mutabale, nendue bu muivi,+ kuakumanya dîba dingalua kuudi nansha kakese.+

4 “‘Nansha nanku, udi ne ndambu wa bantu* mu Sâdi bavua kabayi banyange bilamba biabu,+ ne nebende nanyi pamue mu bilamba bitoke,+ bualu mbakumbane kuenza nanku. 5 Nunku muntu udi utshimuna+ nebamuvuadike bilamba bitoke,+ ne tshiakukupula* dîna diende mu mukanda wa muoyo nansha kakese,+ kadi nenjadike mundi mumanye dîna diende kumpala kua Tatu wanyi ne kumpala kua banjelu bende.+ 6 Muntu udi ne matshi umvue tshidi nyuma wambila bisumbu.’

7 “Fundila muanjelu wa tshisumbu tshia ku Filadelefia ne: Yeye udi wa tshijila,+ udi mulelela,+ udi ne nsapi wa Davidi,+ udi ukangula bua muntu mukuabu kakangi, ne udi ukanga bua muntu mukuabu kakangudi, udi wamba malu aa ne: 8 ‘Ndi mumanye bienzedi biebe (tangila! ndi muteke kumpala kuebe tshiibi tshiunzulula+ tshidi muntu nansha umue kayi mua kukanga. Ndi mumanye ne: udi ne bukole bukese, uvua mulame dîyi dianyi ne kuvua muvile dîna dianyi to. 9 Tangila! nengenze bua bantu ba mu nsunagoga wa Satana badi bamba mudibu bena Yuda pabu kabayi bena Yuda,+ kadi bashima) tangila! nengenze bua balue, biname* kumpala kua makasa ebe ne nengenze bua bamanye ne: ndi mukunange. 10 Bu muuvua mulame dîyi bua kunanukila kuanyi,*+ meme panyi nenkulame dîba dia diteta,+ didi ne bua kulua pa buloba bujima budi bantu basombele, bua kuteta bantu badi basombele pa buloba. 11 Ndi ndua lukasa.+ Tungunuka ne kukuata tshiudi natshi bikole, bua muntu nansha umue kangatshi tshifulu tshiebe tshia butumbi.+

12 “‘Muntu udi utshimuna, nemmuvuije dikunji mu ntempelo wa Nzambi wanyi, ne kakupatukamu kabidi nansha kakese, nemfunde pambidi pende dîna dia Nzambi wanyi,+ ne dîna dia tshimenga tshia Nzambi wanyi, Yelushalema Mupiamupia+ udi upueka ufumina mu diulu kudi Nzambi wanyi, ne dîna dianyi meme dipiadipia.+ 13 Muntu udi ne matshi umvue tshidi nyuma wambila bisumbu.’

14 “Fundila muanjelu wa tshisumbu tshia ku Laodikiya+ ne: Amen,+ ntemu+ wa lulamatu ne mulelela,+ tshibangidilu tshia bufuki bua Nzambi, udi wamba malu aa ne:+ 15 ‘Ndi mumanye bienzedi biebe, ndi mumanye ne: kuena ni nku mashika ni nku luya. Mvua musue wikale ku mashika anyi ku luya. 16 Nunku, bu muudi tshiuyuya, kuyi ni nku luya+ ni nku mashika,+ nenkutuile mukana muanyi. 17 Bu muudi wamba ne: “Ndi mubanji,+ ndi mupete bubanji ne tshiena dijinga ne tshintu nansha tshimue,” kadi kuyi mumanye ne: udi muena dikenga, wenza luse, mupele, mpofu ne butaka, 18 ndi nkubela bua usumbe kundi or mulengeja mu kapia bua ulue mubanji, ne bilamba bitoke bua wikale muvuale bilamba, bua bundu bua butaka buebe kabumueneki patoke,+ ne buanga bua kulaba mu mêsu ebe+ bua umone.+

19 “‘Bantu bonso bandi munange bikole, ndi mbabela ne mbanyoka.+ Nunku, ikala ne tshisumi ne nyingalala bua mpekatu yebe.+ 20 Tangila! ndi muimane ku tshiibi, nkokola. Muntu yeye mumvue dîyi dianyi ne munzulule tshiibi, nembuele mu nzubu muende, nendie nende biakudia bia dilolo ne yeye neadie nanyi. 21 Muntu udi utshimuna+ nemmuanyishile bua kusomba nanyi mu nkuasa wanyi wa bukalenge,+ anu bu mumvua mutshimune ne musombe+ ne Tatu wanyi mu nkuasa wende wa bukalenge. 22 Muntu udi ne matshi umvue tshidi nyuma wambila bisumbu.’”

4 Panyima pa bualu ebu, ngakamona, ne tangilayi! tshiibi tshiunzulula mu diulu, ne dîyi dia kumpala dimvua mumvue diakula nanyi divua bu mpungi, diamba ne: “Banda kuneku, nenkuleje malu adi ne bua kuenzeka.” 2 Panyima pa bualu ebu, ngakadisangana diakamue mu bukole bua nyuma, tangilayi! nkuasa wa bukalenge uvua pa muaba wende mu diulu, ne muntu mukuabu uvua musombe mu nkuasa wa bukalenge eu.+ 3 Ne Yeye uvua musombamu uvua ne tshimuenekelu bu tshia dibue dia jaspe+ ne tshia dibue dia sarduane,* ne muanza nkongolo uvua munyunguluke nkuasa wa bukalenge muikale umueneka bu dibue dia emerode.+

4 Nkuasa ya bukalenge 24 ivua minyunguluke nkuasa wa bukalenge au, ne ngakamona bakulu 24+ basombe mu nkuasa ya bukalenge eyi bavuale bilamba bitoke, ne ku mitu yabu kuvua bifulu bia butumbi bia or. 5 Mipenyi+ ne mêyi ne makubakuba+ bivua bipatuka ku nkuasa wa bukalenge; ne kuvua miendu muanda mutekete itema kumpala kua nkuasa wa bukalenge, ne miendu eyi idi ileja nyuma muanda mutekete ya Nzambi.+ 6 Kumpala kua nkuasa wa bukalenge kuvua tshintu tshifuanangane ne mbuu wa lumuenu,+ bu dibue dia kristale.

Munkatshi mua nkuasa wa bukalenge,* ne ku nseke yonso ya nkuasa wa bukalenge eu kuvua bifukibua binayi bidi ne muoyo+ bivua biuwule tente ne mêsu kumpala ne panyima. 7 Tshifukibua tshia kumpala tshidi ne muoyo tshivua bu ntambue,+ ne tshifukibua tshibidi tshidi ne muoyo tshivua bu muana mulume wa ngombe,+ ne tshifukibua tshisatu tshidi ne muoyo+ tshivua ne mpala bu wa muntu, ne tshifukibua tshinayi tshidi ne muoyo+ tshivua bu nyunyi wa mukanku udi upapala.+ 8 Bua bifukibua binayi bidi ne muoyo, tshionso tshia kudibi tshivua ne mapuapua asambombo; bivua biuwule tente ne mêsu mubidi mujima ne muinshi.*+ Bidi bitungunuka ne kuamba munya ne butuku ne: “Wa tshijila, wa tshijila, wa tshijila udi Yehowa*+ Nzambi, Wa Bukole Buonso, uvuaku ne udiku ne udi ulua.”+

9 Dîba dionso didi bifukibua bidi ne muoyo bitumbisha Yeye udi musombe mu nkuasa wa bukalenge, Yeye udi ne muoyo kashidi ne tshiendelele,+ bimupesha bunême ne bimuela tuasakidila, 10 bakulu 24+ badi badiela panshi kumpala kua Yeye udi musombe mu nkuasa wa bukalenge ne batendelela Yeye udi ne muoyo kashidi ne tshiendelele, ne badi bela bifulu biabu bia butumbi kumpala kua nkuasa wa bukalenge, bamba ne: 11 “Wewe, Yehowa* Nzambi wetu, udi mukumbane bua kuangata butumbi+ ne bunême+ ne bukole,+ bualu wakafuka bintu bionso,+ ne bua disua diebe biakikalaku ne biakafukibua.”

5 Ngakamona mu tshianza tshia balume tshia Yeye uvua musombe mu nkuasa wa bukalenge+ muvungu mufunda nseke yonso ibidi,* mukanga bikole ne bitampi muanda mutekete. 2 Ngakamona muanjelu wa bukole wamba ne dîyi dikole ne: “Nnganyi udi mukumbane bua kukangula muvungu ne kulamuna bitampi biawu?” 3 Kadi muntu nansha umue mu diulu anyi pa buloba anyi muinshi mua buloba kavua mukumbane bua kukangula muvungu anyi kutangila munda muawu to. 4 Ngakadila bikole bualu kabavua bapete muntu nansha umue uvua mukumbane bua kukangula muvungu anyi kutangila munda muawu. 5 Kadi umue wa ku bakulu wakangambila ne: “Lekela kudila. Tangila! Ntambue wa mu tshisa tshia Yuda,+ muji+ wa Davidi,+ mmutshimune+ bua kukangula muvungu ne bitampi biawu muanda mutekete.”

6 Ngakamona muana wa mukoko+ uvua umueneka bu mushipibue+ muimane munkatshi* mua nkuasa wa bukalenge, ne mua bifukibua binayi bidi ne muoyo, ne munkatshi mua bakulu,+ muikale ne nsengu muanda mutekete ne mêsu muanda mutekete, mêsu au adi aleja nyuma muanda mutekete ya Nzambi+ idibu batume pa buloba bujima. 7 Diakamue wakalua kumpala, kuwangataye mu tshianza tshia balume tshia Yeye uvua musombe mu nkuasa wa bukalenge.+ 8 Pakangataye muvungu, bifukibua binayi bidi ne muoyo ne bakulu 24+ bakadiela panshi kumpala kua Muana wa mukoko, yonso wa kudibu uvua ne lunzenze ne tubakudi tua or tuvua tuwule tente ne musenga wa manananshi. (Musenga wa manananshi udi uleja masambila a bansantu.)+ 9 Badi bimba musambu mupiamupia,+ bamba ne: “Udi mukumbane bua kuangata muvungu ne kukangula bitampi biawu, bualu wakashipibua ne ku mashi ebe wakasumbila Nzambi+ bantu ba mu tshisa tshionso ne mu muakulu wonso ne mu tshisamba tshionso ne mu ditunga dionso,+ 10 ne wakabavuija bukalenge+ ne bakuidi bua Nzambi wetu,+ ne badi ne bua kukokesha bu bakalenge+ pa buloba.”

11 Ngakamona ne ngakumvua dîyi dia banjelu ba bungi banyunguluke nkuasa wa bukalenge ne bifukibua bidi ne muoyo ne bakulu, ne bungi buabu buvua mbombo ne mbombo,* ne binunu ne binunu,+ 12 ne bavua bamba ne dîyi dikole ne: “Muana wa mukoko uvua mushipibue+ mmukumbane bua kuangata bukole ne bubanji ne meji ne makanda ne bunême ne butumbi ne dibenesha.”+

13 Ngakumvua tshifukibua tshionso mu diulu ne pa buloba ne muinshi mua buloba+ ne mu mbuu, ne bintu bionso bidimu, biamba ne: “Dibenesha ne bunême+ ne butumbi ne bukole bikale kudi Yeye udi musombe mu nkuasa wa bukalenge+ ne kudi Muana wa mukoko+ kashidi ne tshiendelele.”+ 14 Bifukibua binayi bidi ne muoyo bivua biamba ne: “Amen!” ne bakulu bakadiela panshi, kutendelelabu.

6 Ngakamona pavua Muana wa mukoko+ mukangule tshimue tshia ku bitampi muanda mutekete,+ ne ngakumvua tshimue tshia ku bifukibua binayi bidi ne muoyo+ tshiamba ne dîyi bu dikubakuba ne: “Luaku!” 2 Ngakamona, ne tangilayi! kabalu katoke,+ ne eu uvua musombapu uvua ne buta bua mikete; ne bakamupesha tshifulu tshia butumbi,+ wakapatuka wenda utshimuna ne bua kumana ditshimuna diende.+

3 Pavuaye mukangule tshitampi tshibidi, ngakumvua tshifukibua tshibidi tshidi ne muoyo+ tshiamba ne: “Luaku!” 4 Kabalu kakuabu kakapatuka, ka dikala dikunze kunzuu, ne bakapesha eu uvua musombapu bukokeshi bua kumbusha ditalala pa buloba bua bantu bashipangane, ne bakamupesha muele wa mvita munene.+

5 Pavuaye mukangule tshitampi tshisatu,+ ngakumvua tshifukibua tshisatu tshidi ne muoyo+ tshiamba ne: “Luaku!” Ngakamona, ne tangilayi! kabalu kafiike, ne eu uvua musombapu uvua ne tshipiminu mu tshianza tshiende. 6 Ngakumvua tshintu bu dîyi munkatshi mua bifukibua binayi bidi ne muoyo tshiamba ne: “Tshipiminu tshia kuâta* tshia blé ku ndenaliyo*+ umue ne bipiminu bia kuâta bisatu bia orje ku ndenaliyo umue; kunyangi mafuta a olive ne mvinyo to.”+

7 Pavuaye mukangule tshitampi tshinayi, ngakumvua dîyi dia tshifukibua tshinayi tshidi ne muoyo+ diamba ne: “Luaku!” 8 Ngakamona, ne tangila! kabalu katokoloke, ne eu uvua musombapu uvua ne dîna ne: Lufu. Ne Lukita* luvua lumulonda pabuipi. Bakabapesha bukokeshi pa tshia binayi tshia buloba, bua kushipa ne muele wa mvita mule, ne tshiyole tshia nzala,+ ne tshipupu tshia lufu, ne ku nyama ya luonji ya pa buloba.+

9 Pavuaye mukangule tshitampi tshitanu, ngakamona muinshi mua tshioshelu+ anyima*+ ya bavuabu bashipe bua dîyi dia Nzambi ne bua bujadiki buvuabu bafile.+ 10 Bakela mbila ne dîyi dikole, bamba ne: “Mukalenge Mutambe Bunene, wa tshijila ne mulelela,+ udi udikanda too ne dîba kayi bua kulumbuluisha ne kusombuela mashi etu kudi badi basombele pa buloba?”+ 11 Bakapesha yonso wa kudibu muzabi mutoke,+ ne bakabambila bua kuikisha kabidi ndambu too ne pavua bungi bua bapika nabu ne bana babu bakavuabu pa kushipa anu muvuabu babashipe pabu bukumbana.+

12 Ngakamona pavuaye mukangule tshitampi tshisambombo, ne buloba buakakanka bikole; dîba diakalua difiike bu tshilamba tshikayabale tshia miosa,* ne ngondo mujima wakalua bu mashi,+ 13 ne mitoto ya mu diulu yakakuluka pa buloba anu bu patu lupepele lukole lunyukula mutshi wa mfigi umatshisha mfigi mibishi. 14 Diulu diakumbuka bu muvungu udibu benda bavunga,+ ne bakumbusha mukuna wonso ne tshidiila* tshionso pa miaba yabi.+ 15 Nunku bakalenge ba pa buloba ne bakokeshi banene ne bamfumu ba basalayi ne babanji ne bantu ba bukole ne mupika yonso ne muntu yonso udi ne budikadidi bakasokoma mu nyongolo ne mu mabue a ku mikuna.+ 16 Badi batungunuka ne kuambila mikuna ne mabue ne: “Tupukilayi,+ tusokokayi ku mpala wa Yeye udi musombe mu nkuasa wa bukalenge+ ne ku tshiji tshikole tshia Muana wa mukoko,+ 17 bualu dituku dinene dia tshiji tshiabu tshikole diafiki,+ nnganyi udi mua kuimana?”+

7 Panyima pa bualu ebu ngakamona banjelu banayi bimane ku matumba anayi a buloba, bakuate bikole mpepele inayi ya buloba, bua lupepele kalututshi pa buloba anyi pa mbuu anyi pa mutshi nansha umue. 2 Ngakamona muanjelu mukuabu ubanda ufuma kudi dîba dipatukila* muikale ne tshitampi tshia Nzambi wa muoyo; wakela dîyi dikole kudi banjelu bavuabu bapeshe bukokeshi bua kuenzela buloba ne mbuu bibi, 3 wamba ne: “Kanuenzedi buloba nansha mbuu nansha mitshi bibi to, too ne patuajikija kutua bapika ba Nzambi wetu tshitampi+ pa mpala.”+

4 Ngakumvua bungi bua bantu bavuabu batue tshitampi: binunu 144,+ bavuabu batue tshitampi ba mu tshisa tshionso tshia bana ba Isalele:+

9 Panyima pa bualu ebu ngakamona, ne tangilayi! musumba munene wa bantu, bavua muntu kayi mua kubala, ba mu bisamba bionso ne mu bisa bionso ne mu bukua bantu buonso ne mu miakulu yonso,+ bimane kumpala kua nkuasa wa bukalenge ne kumpala kua Muana wa mukoko, bavuale mizabi mitoke;+ ne bavua ne malala a mabue mu bianza biabu.+ 10 Badi batungunuka ne kuela lubila ne dîyi dikole, bamba ne: “Lupandu luetu ndua kudi Nzambi wetu udi musombe mu nkuasa wa bukalenge+ ne kudi Muana wa mukoko.”+

11 Banjelu bonso bavua bimane banyunguluke nkuasa wa bukalenge ne bakulu+ ne bifukibua binayi bidi ne muoyo, ne bakatua mpala panshi kumpala kua nkuasa wa bukalenge, kutendelelabu Nzambi, 12 bamba ne: “Amen! Disamuna ne butumbi ne meji ne disakidila ne bunême ne bukole ne makanda bikale kudi Nzambi wetu kashidi ne tshiendelele.+ Amen.”

13 Umue wa ku bakulu wakangambila ne: “Bantu badi bavuale mizabi mitoke+ aba mbanganyi ne mbafumine penyi?” 14 Nunku ngakamuambila diakamue ne: “Mukalenge wanyi, wewe ke udi mumanye.” Yeye kungambila ne: “Aba mbantu badi bafume mu dikenga dinene,+ ne mbasukule mizabi yabu, bayitokeshe mu mashi a Muana wa mukoko.+ 15 Ke bualu kayi badi kumpala kua nkuasa wa bukalenge wa Nzambi, ne badi bamuenzela mudimu wa tshijila munya ne butuku mu ntempelo wende; ne Yeye udi musombe mu nkuasa wa bukalenge+ neabalule ntenta wende pa mutu pabu.+ 16 Kabakumvua kabidi nzala, nansha nyota kabidi, nansha dîba kadiakubosha kabidi anyi luya lukole,+ 17 bualu Muana wa mukoko+ udi munkatshi* mua nkuasa wa bukalenge, neabalame,+ neabalombole ku mishimi* ya mâyi a muoyo.+ Ne Nzambi neakupule tshinsonji tshionso ku mêsu kuabu.”+

8 Pakakangulaye+ tshitampi tshia muanda mutekete,+ mu diulu muakashala talalaa mutantshi bu wa tshitupa tshia dîba. 2 Ngakamona banjelu muanda mutekete+ badi bimana kumpala kua Nzambi, ne bakabapesha mpungi muanda mutekete.

3 Muanjelu mukuabu, mukuate dilongo* dia or dia musenga wa manananshi, wakalua, kuimanaye ku tshioshelu,+ ne bakamupesha musenga wa manananshi wa bungi+ bua kuwulambulaye pamue ne masambila a bansantu bonso pa tshioshelu tshia or+ tshivua kumpala kua nkuasa wa bukalenge. 4 Muishi wa musenga wa manananshi uvua ufuma mu tshianza tshia muanjelu wakabanda ne masambila+ a bansantu kumpala kua Nzambi. 5 Kadi diakamue muanjelu au wakangata dilongo dia musenga wa manananshi, kudiuwujaye ne ndambu wa kapia ka pa tshioshelu ne kukakupaye pa buloba. Makubakuba ne mêyi ne mipenyi+ ne dikanka dia buloba biakenzeka. 6 Banjelu muanda mutekete bavua ne mpungi muanda mutekete+ bakadilongolola bua kuyela.

7 Wa kumpala wakela mpungi wende. Kuakenzeka mvula wa mabue ne kapia bisambakaja ne mashi, ne bakabikupa pa buloba;+ tshia bisatu tshia buloba tshiakoshika, tshia bisatu tshia mitshi tshiakoshika, ne bisonsa bibishi bionso biakoshika.+

8 Muanjelu muibidi wakela mpungi wende. Bakakupa tshintu tshienze bu mukuna munene utema kapia mu mbuu.+ Tshia bisatu tshia mbuu tshiakalua mashi;+ 9 tshia bisatu tshia bifukibua bidi ne muoyo* bia mu mbuu tshiakafua,+ ne tshia bisatu tshia mazuwa tshiakatshibuka.

10 Muanjelu muisatu wakela mpungi wende. Mutoto munene uvua utema bu muendu wakakuluka ufuma mu diulu, wakakulukila pa tshia bisatu tshia misulu ne pa mishimi* ya mâyi.+ 11 Dîna dia mutoto au didi ne: Mutshi wa bululu. Tshia bisatu tshia mâyi tshiakalua bululu, ne bantu ba bungi bakafua bua mâyi aa, bualu avua malue bululu.+

12 Muanjelu muinayi wakela mpungi wende. Bakatuta tshia bisatu tshia dîba+ ne tshia bisatu tshia ngondo ne tshia bisatu tshia mitoto, bua tshia bisatu tshiabi tshilue mîdima+ ne bua tshia bisatu tshia dituku katshikadi ne butoke, nansha tshia butuku kabidi.

13 Ngakamona, ne ngakumvua nyunyi wa mukanku uvua upapala munkatshi mua diulu, wamba ne dîyi dikole ne: “Diakabi, diakabi, diakabi+ kudi badi basombele pa buloba bua miadi ya mpungi idi mishale ya banjelu basatu badi bakeba kuela mpungi yabu!”+

9 Muanjelu muitanu wakela mpungi wende.+ Ngakamona mutoto uvua mukuluke pa buloba mufume mu diulu, ne bakawupesha lusapi lua ku disoso* dia ku dijimba dile menemene.+ 2 Wakakangula disoso* dia ku dijimba dile menemene adi, ne muishi wakapatuka mu disoso* adi bu muishi wa tshikutu tshinene tshia kapia, ne dîba, kabidi ne kapepe, biakafiikishibua+ kudi muishi wa mu disoso* adi. 3 Mpasu yakapatuka mu muishi amu, kuluayi pa buloba,+ ne bakayipesha bukokeshi, bukokeshi bua muomumue ne budi nabu tuminyiminyi tua pa buloba. 4 Bakayambila bua kayenzedi bikunyibua bia pa buloba anyi tshisonsa tshibishi nansha tshimue anyi mutshi nansha umue bibi, kadi anu bantu badi kabayi ne tshitampi tshia Nzambi pa mpala yabu.+

5 Ne kabavua banyishile mpasu bua kubashipa, kadi bua kubakengesha ngondo itanu, ne dikenga diabu divua bu dikenga dia kudi kaminyiminyi+ padiku kasuma muntu. 6 Mu matuku au bantu nebakebe lufu, kadi kabakulupeta nansha kakese, nebajinge bua kufua, kadi lufu nelubanyeme.

7 Tshimuenekelu tshia mpasu ayi tshivua bu tshia tubalu tulongolola bua mvita;+ pa mitu payi pavua bintu bivua bu bifulu bia butumbi bia or, ne mpala yayi ivua bu mpala ya bantu, 8 kadi ivua ne nsuki bu ya bantu bakaji. Mênu ayi avua bu mênu a ntambue,+ 9 ne ivua ne bibuikilu bia pa tshiadi bu bibuikilu bia tshiamu tshifiike. Mutoyi wa masala ayi uvua bu mutoyi wa matempu a mvita adi tubalu tukoka matangile ku mvita lubilu.+ 10 Idi kabidi ne mikila ne tulonda bu tuminyiminyi, ne mu mikila yayi mudi bukokeshi buayi bua kuenzela bantu bibi ngondo itanu.+ 11 Idi ne mukalenge ku mutu kuayi, muanjelu wa dijimba dile menemene.+ Dîna diende dia mu tshiena Ebelu didi ne: Abadona,* kadi mu tshiena Greke udi ne dîna ne: Apoluona.*

12 Diakabi dimue ndipite. Tangila! Kudi kulua makuabu abidi+ panyima pa malu aa.

13 Muanjelu muisambombo+ wakela mpungi wende.+ Ngakumvua dîyi difumina ku nsengu ya tshioshelu tshia or+ tshidi kumpala kua Nzambi 14 diambila muanjelu muisambombo uvua ne mpungi ne: “Sulula banjelu banayi badibu basuike ku musulu munene wa Pelata.”+ 15 Bakasulula banjelu banayi bavuabu balongolole bua dîba adi ne dituku adi ne ngondo au ne tshidimu atshi bua kushipa tshia bisatu tshia bantu.

16 Bungi bua biluilu bia babandi ba pa tubalu buvua mbombo ibidi misangu mbombo;* ngakumvua bungi buabi. 17 Eu ke mushindu umvua mumone tubalu mu tshikena kumona ne bavua basombapu: Bavua ne bibuikilu bia pa tshiadi bia dikala dikunze bu kapia ne dia ble bu yasente ne dia manyimanyi bu sufre, ne mitu ya tubalu ivua bu mitu ya ntambue,+ ne kapia ne muishi ne sufre bivua bipatuka mukana muatu. 18 Tshia bisatu tshia bantu tshiakashipibua ku bipupu bisatu ebi: ku kapia, ku muishi ne ku sufre bivua bipatuka mukana muatu. 19 Bualu bukokeshi bua tubalu budi mukana muatu ne mu mikila yatu, bualu mikila yatu idi bu nyoka ne idi ne mitu, ne tudi tuenzelangana nayi bibi.

20 Kadi bantu bavua bashale bavua kabayi bashipibue ku bipupu ebi, kabavua banyingalale bua midimu ya bianza biabu; kabavua balekele kutendelela bademon ne mpingu ya or ne ya tshiamu tshia arjan ne ya tshiamu tshia mitaku ne ya dibue ne ya mutshi, idi kayiyi mua kumona anyi kumvua anyi kuenda to.+ 21 Kabavua banyingalale bua dishipa diabu dia bantu anyi bua bienzedi biabu bia mîdima anyi bua masandi* abu anyi bua buivi buabu to.

10 Ngakamona muanjelu mukuabu wa bukole upueka ufuma mu diulu, muvuale* ditutu, ne muanza nkongolo uvua ku mutu kuende, ne mpala wende uvua bu dîba+ ne mikolo* yende ivua bu makunji a kapia, 2 ne uvua ne muvungu mukese mukangula mu tshianza tshiende. Wakateka dikasa diende dia balume pa mbuu, kadi dia bakaji pa buloba, 3 ne wakela lubila ne dîyi dikole anu bu padi ntambue ukungula.+ Pakelaye lubila, mêyi a makubakuba muanda mutekete+ akakula.

4 Kadi pavua makubakuba muanda mutekete makule, nkavua nkeba kufunda, kadi ngakumvua dîyi difuma mu diulu+ diamba ne: “Tuaku tshitampi ku malu adi makubakuba muanda mutekete makule, kuafundi to.” 5 Muanjelu umvua mumone muimane pa mbuu ne pa buloba wakela tshianza tshiende tshia balume muulu, 6 ne wakaditshipa mu dîna dia Yeye udi ne muoyo kashidi ne tshiendelele,+ uvua mufuke diulu ne bintu bidimu ne buloba ne bintu bidipu ne mbuu ne bintu bidimu ne:+ “Kakuakuikala kabidi dinengakana nansha. 7 Kadi mu matuku adi muanjelu wa muanda mutekete+ ukeba kuela mpungi wende,+ bualu busokoka bua tshijila+ buvua Nzambi mumanyishe bu lumu luimpe kudi bapika bende baprofete+ budi bukumbajibua bulelela.”

8 Ne ngakumvua dîyi difumina mu diulu+ diakula kabidi nanyi, diamba ne: “Ndaku, wangate muvungu mukangula udi mu tshianza tshia muanjelu udi muimane pa mbuu ne pa buloba.”+ 9 Ngakaya kudi muanjelu au, kumuambila bua ampeshe muvungu mukese au. Yeye wakangambila ne: “Wangata uwudie,+ ne newuvuije tshifu tshiebe bululu, kadi newikale mushême bu buitshi mukana muebe.” 10 Ngakangata muvungu mukese au mu tshianza tshia muanjelu, meme kuwudia,+ ne uvua mushême mukana muanyi bu buitshi,+ kadi pangakawudia, tshifu tshianyi tshiakalua bululu. 11 Bakangambila ne: “Udi ne bua kuamba kabidi mêyi a buprofete adi atangila bukua bantu ne bisamba ne miakulu ne bakalenge ba bungi.”

11 Nunku bakampesha dilenge dienze bu mulangala*+ pavuaye ungambila ne: “Juka, pima muaba munsantu wa ntempelo wa Nzambi ne tshioshelu ne badi batendelelamu. 2 Kadi bua lubanza ludi pambelu pa muaba munsantu wa ntempelo, ulushiye ne kulupimi to, bualu mbalupeshe bisamba, ne nebidiatakaje tshimenga tshia tshijila+ muinshi mua makasa ngondo 42.+ 3 Nengenze bua bantemu banyi babidi bambe mêyi a buprofete matuku 1 260 bavuale bilamba bikayabale.” 4 Bobu mbafuanyikija ne mitshi ibidi ya olive+ ne bitekelu bia miendu bibidi,+ ne mbimane kumpala kua Mukalenge wa buloba.+

5 Muntu yeye musue kubenzela bibi, kapia kadi kapatuka mukana muabu ne kabutula baluishi babu. Muntu yeye usua kubenzela bibi, eu ke mushindu udiye ne bua kushipibua. 6 Bobu badi ne bukokeshi bua kukanga diulu*+ bua mvula kaloki+ mu matuku adibu bamba mêyi abu a buprofete, ne badi ne bukokeshi pa mâyi bua kuakudimuna mashi,+ ne bua kukuma buloba ne bipupu bia mishindu yonso misangu yonso idibu basue.

7 Pikalabu bajikije bumanyishi buabu, nyama wa luonji udi upatuka mu dijimba dile menemene neabele mvita, neabatshimune ne neabashipe.+ 8 Bitalu biabu nebikale mu musesu munene wa tshimenga tshinene tshidibu babikila mu ngumvuilu wa mu nyuma ne: Sodoma ne Ejipitu, muaba uvuabu kabidi bashipele Mukalenge wabu ku mutshi. 9 Ne ba mu bukua bantu, mu bisa, mu miakulu ne mu bisamba nebatangile bitalu biabu matuku asatu ne tshitupa,+ ne kabena bitaba bua bateke bitalu biabu mu lukita to. 10 Bantu badi basombele pa buloba badi basanka bua bualu buabu ne batua tshianga, ne nebatuminangane mapa, bualu baprofete babidi aba bavua bakengeshe bantu badi basombele pa buloba.

11 Panyima pa matuku asatu ne tshitupa, nyuma wa muoyo wa kudi Nzambi wakabuela munda muabu,+ bakimana ne makasa abu, ne buôwa bukole buakakuata bantu bavua babamone. 12 Bakumvua dîyi dikole difumina mu diulu dibambila ne: “Bandayi kuneku.” Bakabanda mu diulu mu ditutu, ne baluishi babu bakabamona.* 13 Dîba adi buloba buakakanka bikole, ne tshia dikumi tshia tshimenga tshiakakuluka; bantu 7 000 bakafua ku dikanka dia buloba adi, ne bavua bashale bakatshina, kutumbishabu Nzambi wa mu diulu.

14 Diakabi dibidi+ ndipite. Tangila! Diakabi disatu didi dilua lukasa.

15 Muanjelu wa muanda mutekete wakela mpungi wende.+ Mêyi makole akumvuika mu diulu, amba ne: “Bukalenge bua ba pa buloba mbulue Bukalenge bua Mukalenge wetu+ ne bua Kristo wende,+ ne yeye neakokeshe bu mukalenge kashidi ne tshiendelele.”+

16 Bakulu 24+ bavua basombe kumpala kua Nzambi mu nkuasa yabu ya bukalenge bakatua mpala yabu panshi, kutendelelabu Nzambi, 17 bamba ne: “Tudi tukuela tuasakidila, Yehowa* Nzambi, Wa Bukole Buonso, udiku+ ne uvuaku, bualu udi muangate bukole buebe bunene ne mutuadije kukokesha bu mukalenge.+ 18 Kadi bisamba biakumvua tshiji tshikole, ne tshiji tshiebe tshikole tshiakalua, ne tshikondo tshisungula tshiakalua tshia bafue kulumbuluishibuabu ne tshia kufuta+ bapika bebe baprofete+ ne bansantu ne badi batshina dîna diebe, bakese ne banene, ne tshia kubutula badi babutula* buloba.”+

19 Bakunzulula muaba munsantu wa ntempelo wa Nzambi mu diulu, ne mushete wende wa tshipungidi wakamueneka muaba munsantu wa ntempelo.+ Kuvua mipenyi ne mêyi ne makubakuba ne dikanka dia buloba ne mvula wa mabue mukole.

12 Pashishe tshimanyinu tshinene tshiakamueneka mu diulu: Mukaji+ mukuabu uvua muvuale dîba, ne ngondo uvua muinshi mua makasa ende, ku mutu kuende kuvua tshifulu tshia butumbi tshia mitoto 12, 2 ne uvua ne difu. Uvua udila bua bivua bimusama ne bua dikengakana diende bua kulela.

3 Tshimanyinu tshikuabu tshiakamueneka mu diulu. Tangilayi! Dragon+ munene mukunze bu kapia, muikale ne mitu muanda mutekete ne nsengu dikumi ne bikata bia lumu* muanda mutekete ku mitu yende; 4 ne mukila wende udi ukoka tshia bisatu tshia mitoto+ ya mu diulu, ne wakayikupa panshi pa buloba.+ Dragon au wakashala muimane kumpala kua mukaji+ ukavua pa kulela, bua pavuaye ulela, adie muanende.

5 Wakalela muana, muana wa balume,+ udi ne bua kukokesha bisamba bionso ne dikombo dia tshiamu tshifiike.+ Bakadiapula* muanende, kuyabu nende kudi Nzambi ne ku nkuasa wende wa bukalenge. 6 Mukaji eu wakanyemena mu tshipela mudiye ne muaba mumulongoluela kudi Nzambi, ne mudibu ne bua kumudishila matuku 1 260.+

7 Mvita yakajuka mu diulu: Mikaele*+ ne banjelu bende bakaluangana ne dragon, ne dragon ne banjelu bende bakaluangana nabu 8 kadi kabakatshimuna to,* ne kakuvua kabidi muaba mu diulu buabu bobu nansha. 9 Nunku, dragon munene+ wakedibua panshi, nyoka wa ku tshibangidilu,+ udibu babikila ne: Diabolo+ ne Satana,+ udi upambuisha ba pa buloba bonso;+ wakedibua panshi pa buloba,+ ne banjelu bende bakedibua nende panshi. 10 Ngakumvua dîyi dikole mu diulu diamba ne:

“Mpindieu lupandu+ ne bukole ne Bukalenge bia Nzambi wetu+ ne bukokeshi bua Kristo wende biafiki, bualu mubandi wa bana betu, udi ubabanda munya ne butuku kumpala kua Nzambi wetu,+ mmuedibue panshi! 11 Bakamutshimuna+ bua mashi a Muana wa mukoko+ ne bua dîyi dia bumanyishi buabu,+ ne kabavua banange anyima* yabu+ too ne kumpala kua lufu. 12 Bua bualu ebu, sankayi nuenu diulu ne nuenu badi basombamu! Diakabi bua buloba ne bua mbuu,+ bualu Diabolo mmupueke kunudi, muikale ne tshiji tshikole, mumanye ne: udi ne tshikondo tshîpi.”+

13 Kadi pakamona dragon ne: uvua muedibue panshi pa buloba,+ wakakengesha mukaji+ uvua mulele muana wa balume. 14 Kadi bakapesha mukaji mapuapua abidi a nyunyi munene wa mukanku+ bua abuuke aye mu tshipela muaba wende udibu ne bua kumudishila bua tshikondo ne bikondo ne tshitupa tshia tshikondo,*+ kule ne mpala wa nyoka.+

15 Ne nyoka wakaluka mâyi bu musulu ufumina mukana muende mu nyima mua mukaji au, bua musulu umuine. 16 Kadi buloba buakalua kuambuluisha mukaji, ne buloba buakabulula mukana muabu, kuminabu musulu uvua dragon muluke mukana muende. 17 Nunku dragon wakakuatshila mukaji tshiji tshikole, kuyaye bua kuluisha bashadile ba ku muanende*+ badi batumikila mikenji ya Nzambi ne badi ne mudimu wa kufila bumanyishi bua Yezu.+

13 Ne wakimana* pa lusenga lua ku mbuu.

Ngakamona nyama wa luonji+ upatuka mu mbuu,+ muikale ne nsengu dikumi ne mitu muanda mutekete, ne bikata bia lumu* dikumi pa nsengu yende, kadi pa mitu yende mêna a kupenda nawu Nzambi. 2 Nunku nyama wa luonji umvua mumone uvua bu nkashama, kadi makama ende avua bu a nyama wa urse, ne mukana muende muvua bu mukana mua ntambue. Dragon+ wakapesha nyama au bukole buende ne nkuasa wende wa bukalenge ne bukokeshi bunene.+

3 Ngakamona ne: umue wa ku mitu yende uvua umueneka bu mutapa mputa wa lufu, kadi mputa wende wa lufu au wakuma,+ ne buloba bujima buakalonda nyama wa luonji buenda bukema. 4 Ne bakatendelela dragon bualu uvua mupeshe nyama wa luonji bukokeshi, ne bakatendelela nyama wa luonji ne mêyi aa: “Nnganyi udi bu nyama wa luonji eu, ne nnganyi udi mua kuluangana nende?” 5 Bakamupesha mukana mudi muamba malu manene ne mêyi a bipendu, ne bakamupesha bukokeshi bua kuenza malu munkatshi mua ngondo 42.+ 6 Wakabulula mukana muende bua kupenda+ Nzambi, bua kupenda dîna diende ne muaba wende wa kusombela, too ne badi basombe mu diulu.+ 7 Bakamuanyishila bua kuluangana ne bansantu ne kubatshimuna,+ ne bakamupesha bukokeshi pa tshisa tshionso ne bantu bonso ne muakulu wonso ne tshisamba tshionso. 8 Bantu bonso badi basombele pa buloba nebamutendelele. Katshia ku mbangilu wa ba pa buloba, ki mbafunde dîna diabu nansha dimue mu muvungu wa muoyo+ wa Muana wa mukoko uvuabu bashipe to.+

9 Muntu yeye ne matshi, umvue.+ 10 Bikala muntu mufundila dikuatshibua, neakuatshibue. Bikala muntu mua kushipangana ne muele wa mvita,* udi ne bua kufua ku muele wa mvita.+ Eu ke muaba udi ulomba bansantu+ dinanukila+ ne ditabuja.+

11 Pashishe ngakamona nyama wa luonji mukuabu upatuka mu buloba, uvua ne nsengu ibidi bu muana wa mukoko, kadi wakatuadija kuakula bu dragon.+ 12 Udi wenza malu ne bukokeshi buonso bua nyama wa luonji wa kumpala au+ ku mêsu kuende. Ne udi wenza bua buloba ne bantu badi basombelapu batendelele nyama wa luonji wa kumpala au uvua ne mputa wa lufu ukavua mume.+ 13 Udi wenza bimanyinu binene, upatula too ne kapia mu diulu kapueka pa buloba ku mêsu kua bantu.

14 Udi upambuisha bantu badi basombele pa buloba bua bimanyinu bivuabu bamuanyishile bua kuenza ku mêsu kua nyama wa luonji, eku wambila bantu badi basombele pa buloba bua kuenza tshimfuanyi+ tshia nyama wa luonji uvuabu batape muele wa mvita kadi mupetulule muoyo.+ 15 Bavua bamuanyishile bua kupesha tshimfuanyi tshia nyama wa luonji mueyelu,* bua tshimfuanyi tshia nyama wa luonji tshiakule ne tshishipeshe bantu bonso badi babenga kutendelela tshimfuanyi tshia nyama wa luonji.

16 Udi wenzeja bantu bonso, bakese ne banene, babanji ne bapele, badikadile ne bapika, bua bobu aba batuibue tshimanyinu pa tshianza tshiabu tshia balume anyi pa mpala yabu,+ 17 ne bua muntu nansha umue kasumbi anyi kasumbishi pa kumbusha anu muntu udi ne tshimanyinu atshi, dîna+ dia nyama wa luonji anyi nomba wa dîna diende.+ 18 Eu ke muaba udi ulomba meji: Muntu udi ne busunguluji enze makumi a nomba wa nyama wa luonji, bualu nnomba wa muntu,* ne nomba wende udi 666.+

14 Pashishe ngakamona, ne tangilayi! Muana wa mukoko+ muimane pa Mukuna wa Siona,+ muikale ne bantu binunu 144+ badi ne dîna diende ne dîna dia Tatu wende+ mafunda pa mpala yabu. 2 Ngakumvua mukungulu ufuma mu diulu bu mukungulu wa mâyi a bungi ne bu mukungulu wa dikubakuba dikole; mukungulu umvua mumvue uvua bu wa bimbi ba misambu bimba ne nzenze yabu. 3 Ne badi bimba musambu udi umvuika bu musambu mupiamupia+ kumpala kua nkuasa wa bukalenge ne kumpala kua bifukibua binayi bidi ne muoyo+ ne bakulu,+ muntu nansha umue kavua mua kumanya musambu au to, anu bantu binunu 144+ bavuabu basumbe pa buloba. 4 Bobu aba mbantu bavua kabayi badinyange ne bakaji; mu bulelela, badi tumama.+ Bobu aba mbantu badi batungunuka ne kulonda Muana wa mukoko kuonso kudiye uya.+ Bavua basumbibue+ munkatshi mua bukua bantu bu mamuma a kumpala+ bua Nzambi ne bua Muana wa mukoko, 5 kabavua basangane dishima mukana muabu; kabena ne kalema.+

6 Ngakamona muanjelu mukuabu upapala munkatshi mua diulu,* uvua ne lumu luimpe lua tshiendelele lua kumanyisha badi basombele pa buloba, kudi tshisamba tshionso, tshisa tshionso, muakulu wonso ne bantu bonso.+ 7 Uvua wamba ne dîyi dikole ne: “Tshinayi Nzambi, mutumbishayi, bualu dîba dia yeye kulumbuluisha diakumbanyi,+ nunku tendelelayi Yeye uvua muenze diulu ne buloba ne mbuu+ ne mishimi* ya mâyi.”

8 Muanjelu mukuabu, muibidi, wakalonda, wamba ne: “Wakuluki! Babilona Munene+ wakuluki,+ yeye uvua munuishe bisamba bionso mvinyo wa dijinga dikole* dia masandi ende!”*+

9 Muanjelu mukuabu, muisatu, wakabalonda, wamba ne dîyi dikole ne: “Muntu yeye mutendelele nyama wa luonji+ ne tshimfuanyi tshiende ne mupete tshimanyinu pa mpala pende anyi pa tshianza tshiende,+ 10 neanue pende mvinyo wa tshiji tshia Nzambi udibu bapongolola mu dikopo dia tshiji Tshiende tshikole+ kayi mutekesha, neakengeshibue ne kapia ne sufre+ ku mêsu kua banjelu ba tshijila ne ku mêsu kua Muana wa mukoko. 11 Muishi wa dikengeshibua diabu udi ubanda kashidi ne tshiendelele,+ kabena ne dikisha munya ne butuku, bobu badi batendelela nyama wa luonji ne tshimfuanyi tshiende, ne muntu yonso udi upeta tshimanyinu tshia dîna diende.+ 12 Muaba eu ke udi ulomba bansantu dinanukila,+ bobu badi batumikila mikenji ya Nzambi ne balamate bikole ku ditabuja+ dia Yezu.”

13 Ngakumvua dîyi difuma mu diulu diamba ne: “Funda ne: Bafue badi bafua mu buobumue ne Mukalenge+ kutuadijila ku mpindieu mba diakalenga. Eyowa, ke mudi nyuma wamba, bikishe ku midimu yabu mikole, bualu malu avuabu benze adi aya* nabu.”

14 Pashishe ngakamona, ne tangilayi! ditutu ditoke, ne muntu uvua musombe pa ditutu adi uvua bu muana wa muntu,+ muikale ne tshifulu tshia butumbi tshia or ku mutu ne muele mutue wa kunowa nawu mu tshianza.

15 Muanjelu mukuabu wakapatukila mu muaba munsantu wa ntempelo, wela uvua musombe pa ditutu lubila ne dîyi dikole ne: “Ela muele webe wa kunowa nawu, unowe, bualu dîba dia kunowa diakumbanyi, bualu bia kunowa bia pa buloba bikadi bipie bimpe menemene.”+ 16 Yeye uvua musombe pa ditutu wakela muele wende wa kunowa nawu pa buloba, ne bakanowa buloba.

17 Muanjelu mukuabu kabidi wakapatukila mu muaba munsantu wa ntempelo udi mu diulu, ne yeye pende uvua ne muele mutue wa kunowa nawu.

18 Muanjelu mukuabu kabidi wakapatukila ku tshioshelu, ne uvua ne bukokeshi pa kapia. Wakela uvua ne muele mutue wa kunowa nawu lubila ne dîyi dikole, wamba ne: “Ela muele webe mutue wa kunowa nawu, sangisha tusumbu tua tumuma tua ku muonji wa tumuma tua mvinyo wa pa buloba, bualu tumuma tuawu tukadi tupie.”+ 19 Muanjelu au wakela muele wende wa kunowa nawu pa buloba, kusangishaye muonji wa tumuma tua mvinyo wa pa buloba, kuwelaye mu tshikaminu tshinene tshia mvinyo tshia tshiji tshia Nzambi.+ 20 Bakadiata tshikaminu tshia mvinyo pambelu pa tshimenga, ne mashi akapatuka mu tshikaminu tshia mvinyo kufikawu too ne pa bule bua mionji ya ku mbanga ya tubalu, ntanta wa stade 1 600.*

15 Ngakamona tshimanyinu tshikuabu tshinene ne tshia dikema mu diulu: banjelu muanda mutekete+ bikale ne bipupu muanda mutekete. Ebi mbia ndekelu, bualu ku diambuluisha diabi, tshiji tshia Nzambi tshidi tshituishibua ku ndekelu.+

2 Ne ngakamona tshintu tshienze bu mbuu wa lumuenu+ musambakaja ne kapia, ne bantu badi batshimune+ nyama wa luonji ne tshimfuanyi tshiende+ ne nomba wa dîna diende+ bavua bimane pabuipi ne mbuu wa lumuenu eu, bikale ne nzenze ya Nzambi. 3 Bavua bimba musambu wa Mose+ mupika wa Nzambi ne musambu wa Muana wa mukoko,+ bamba ne:

“Midimu yebe mminene ne ya dikema,+ Yehowa* Nzambi, Wa Bukole Buonso.+ Njila yebe mmiakane ne milelela,+ Mukalenge wa tshiendelele.+ 4 Yehowa,* nnganyi wabenga kukutshina bulelela ne kutumbisha dîna diebe? Bualu wewe nkayebe udi muena lulamatu!+ Bualu bisamba bionso nebilue, nebitendelele kumpala kuebe,+ bualu mêyi ebe makane mmamueneshibue patoke.”

5 Panyima pa bualu ebu ngakamona, ne bakunzulula muaba munsantu wa ntenta wa bumanyishi+ mu diulu,+ 6 ne banjelu muanda mutekete bavua ne bipupu muanda mutekete+ bakapatukila muaba munsantu au, bavuale bilamba bia line bimpe bibalakana ne badijingile mikaba ya or pa biadi biabu. 7 Tshimue tshia ku bifukibua binayi bidi ne muoyo tshiakapesha banjelu muanda mutekete bibakudi muanda mutekete bia or bivua biuwule tente ne tshiji tshia Nzambi+ udi ne muoyo kashidi ne tshiendelele. 8 Muaba munsantu wakuwula ne muishi bua butumbi bua Nzambi+ ne bua bukole buende, kakuvua muntu uvua mua kubuela muaba munsantu too ne pavua bipupu muanda mutekete+ bia banjelu muanda mutekete bijike.

16 Ngakumvua dîyi dikole difuma muaba munsantu+ diambila banjelu muanda mutekete ne: “Ndayi, nupongolole bibakudi muanda mutekete bia tshiji tshia Nzambi pa buloba.”+

2 Wa kumpala wakaya, kupongololaye tshibakudi tshiende pa buloba.+ Mputa wa lubangu mubi menemene udi usama+ wakakengesha bantu bavua ne tshimanyinu tshia nyama wa luonji+ ne bavua batendelela tshimfuanyi tshiende.+

3 Muibidi wakapongolola tshibakudi tshiende mu mbuu.+ Mbuu wakalua mashi+ bu a muntu mufue, ne tshifukibua* tshionso tshivua ne muoyo tshiakafua, eyowa, bintu bivua mu mbuu.+

4 Muisatu wakapongolola tshibakudi tshiende mu misulu ne mu mishimi* ya mâyi.+ Ne yakalua mashi.+ 5 Ngakumvua muanjelu wa mâyi wamba ne: “Wewe, Eu udiku ne uvuaku,+ Muena lulamatu,+ udi muakane bualu udi mulumbuluishe mushindu eu,+ 6 bualu bavua bapongolole mashi a bansantu ne a baprofete,+ ne udi mubapeshe mashi bua kunuabu;+ bobu mbakumbanyine bualu ebu.”+ 7 Ngakumvua tshioshelu tshiamba ne: “Eyowa, Yehowa* Nzambi, Wa Bukole Buonso,+ malumbuluisha* ebe mmalelela ne mmakane.”+

8 Muinayi wakapongolola tshibakudi tshiende pa dîba,+ ne bakanyishila dîba bua kuosha bantu ne kapia. 9 Bantu bakoshika ne luya lukole, kadi bakapenda dîna dia Nzambi udi ne bukokeshi pa bipupu ebi, ne kabavua banyingalale bua mpekatu yabu ne bamutumbishe to.

10 Muitanu wakapongolola tshibakudi tshiende mu nkuasa wa bukalenge wa nyama wa luonji. Bukalenge buende buakalua mîdima,+ bakatuadija kudisuma mênu ku ndimi bua bivua bibasama, 11 kadi bakapenda Nzambi wa mu diulu bua bivua bibasama ne bua mputa yabu ya lubangu, ne kabakanyingalala bua bienzedi biabu to.

12 Muisambombo wakapongolola tshibakudi tshiende pa musulu munene wa Pelata,+ mâyi awu akuma,+ bua kulongoluela bakalenge+ badi bafumina kudi dîba dipatukila* njila.

13 Ne ngakamona mêyi a bukoya asatu mamba ku nyuma* avua bu ndimba apatuka mukana mua dragon+ ne mukana mua nyama wa luonji ne mukana mua muprofete wa dishima. 14 Mu bulelela, mmêyi mamba ku nyuma wa bademon ne adi enza bimanyinu,+ adi aya kudi bakalenge ba pa buloba bujima budi bantu basombele, bua kubasangisha pamue ku mvita+ ya dituku dinene dia Nzambi Wa Bukole Buonso.+

15 “Tangila! Ndi ndua bu muivi.+ Wa diakalenga mmuntu udi ushala mutabale+ ne ulama bilamba biende bia pa mutu, bua kendi butaka ne bantu kabamonyi bundu buende.”+

16 Akabasangisha pamue muaba udibu babikila mu tshiena Ebelu ne: Armagedone.*+

17 Wa muanda mutekete wakapongolola tshibakudi tshiende mu kapepe. Bua bualu ebu, dîyi dikole diakapatuka muaba munsantu+ difuma ku nkuasa wa bukalenge, diamba ne: “Kuajiki!” 18 Kuvua mipenyi ne mêyi ne makubakuba, ne kuvua kabidi dikanka dikole dia buloba ditu kadiyi dianji kuenzeka katshia bantu bikala pa buloba,+ dikanka dia buloba adi divua dinene menemene ne dikole menemene. 19 Tshimenga tshinene+ tshiakakosoloka mu bitupa bisatu, ne bimenga bia bisamba bikuabu biakakuluka; Babilona Munene+ wakavulukibua kumpala kua Nzambi bua kumupesha dikopo dia mvinyo wa luonji lua tshiji tshiende tshikole.+ 20 Kabidi, tshidiila* tshionso tshiakanyema, kabakasangana mikuna to.+ 21 Pashishe mabue manene a mvula, dibue dionso dikale ne bujitu bu bua ntalanta* umue, akafuma mu diulu kudituta pa bantu,+ ne bantu bakapenda Nzambi bua tshipupu tshia mabue a mvula,+ bualu tshipupu atshi tshivua tshinene tshia dikema.

17 Umue wa ku banjelu muanda mutekete bavua ne bibakudi muanda mutekete+ wakalua, kungambilaye ne: “Luaku, nenkuleje dilumbuluisha dia ndumba munene udi musombe pa mâyi a bungi,+ 2 uvua bakalenge ba pa buloba bende nende masandi,*+ ne bantu badi basombele pa buloba bakuatshike ne mvinyo wa masandi* ende.”+

3 Wakaya nanyi ku bukole bua nyuma mu tshipela. Ngakamona mukaji mukuabu musombe pa nyama wa luonji mukunze uvua muwule tente ne mêna a kupenda nawu Nzambi ne uvua ne mitu muanda mutekete ne nsengu dikumi. 4 Mukaji au uvua muvuale bilamba bikunzubile+ ne bikunze, uvua mudilengeje ne or ne mabue a mushinga mukole ne mabue a busanga,+ ne uvua ne dikopo dia or mu tshianza tshiende divua diuwule ne bintu bia muendi ne bintu bia bukoya bia masandi* ende. 5 Pa mpala pende pavua pafunda dîna, bualu busokoka: “Babilona Munene, mamuende wa bandumba+ ne wa bintu bia muendi bia pa buloba.”+ 6 Ngakamona ne: mukaji au uvua mukuatshike ne mashi a bansantu ne mashi a bantemu ba Yezu.+

Kadi, pangakamumona, ngakakema bikole. 7 Ke muanjelu au kungambila ne: “Bua tshinyi uvua mukeme? Nenkuambile bualu busokoka bua mukaji au+ ne bua nyama wa luonji udi mumuambule ne udi ne mitu muanda mutekete ne nsengu dikumi:+ 8 Nyama wa luonji uuvua mumone uvuaku, kadi kenaku, tshidibi ukadi pa kupatuka mu dijimba dile menemene,+ kadi mbua kuya too ne ku dibutuka. Ne bantu badi basombele pa buloba (badi mêna abu kaayi mafunda mu muvungu wa muoyo+ katshia ku mbangilu wa ba pa buloba) nebakeme padibu bamona muvua nyama wa luonji muikalaku, kadi kenaku, tshidibi neikalaku.

9 “Bualu ebu budi bulomba lungenyi* ludi ne meji: Mitu muanda mutekete+ idi ileja mikuna muanda mutekete, idi mukaji musombe pa nsongo payi. 10 Kudi bakalenge muanda mutekete: Batanu bakadi bakuluke, umue udiku, ne mukuabu ki mmuanji kufika to; kadi padiye ufika, udi ne bua kushala bua tshitupa tshîpi. 11 Nyama wa luonji uvuaku au, kadi kenaku,+ udi pende mukalenge wa muanda mukulu, kadi udi upatukila ku bakalenge muanda mutekete abu, ne udi uya too ne ku dibutuka.

12 “Nsengu dikumi iuvua mumone ayi idi ileja bakalenge dikumi badi kabayi banji kupeta bukalenge, kadi badi bapeta bukokeshi bu bakalenge bua dîba dimue pamue ne nyama wa luonji. 13 Bobu aba badi ne meji amue, nunku badi bapesha nyama wa luonji bukole ne bukokeshi buabu. 14 Bobu aba nebaluangane ne Muana wa mukoko,+ kadi bu mudiye Mukalenge wa bakalenge ne Mfumu wa bamfumu,+ Muana wa mukoko neabatshimune.+ Kabidi, bantu badi nende badi babikidibue ne basungula ne bena lulamatu, nebatshimune pabu.”+

15 Wakangambila ne: “Mâyi auvua mumone, avua ndumba musombapu, adi aleja bukua bantu ne misumba ya bantu ne bisamba ne miakulu.+ 16 Nsengu dikumi+ iuvua mumone ne nyama wa luonji,+ biobi nebikine ndumba eu,+ nebimupawule, nebimushiye butaka, nebidie mubidi wende ne nebimubutule butubutu ne kapia.+ 17 Bualu Nzambi wakateka bualu ebu mu mioyo yabu bua kukumbajabu lungenyi luende,+ eyowa, bua kukumbajabu lungenyi luabu lumue padibu bafila bukalenge buabu kudi nyama wa luonji,+ too ne padi mêyi a Nzambi akumbana. 18 Ne mukaji+ uuvua mumone udi uleja tshimenga tshinene tshidi ne bukalenge ku mutu kua bakalenge ba pa buloba.”

18 Panyima pa bualu ebu, ngakamona muanjelu mukuabu upueka ufuma mu diulu muikale ne bukokeshi bunene, ne butumbi buende buakakenkesha buloba. 2 Wakela lubila ne dîyi dikole, wamba ne: “Wakuluki! Babilona Munene wakuluki,+ ne mmulue muaba wa kusombela wa bademon ne muaba udi nyuma* yonso wa bukoya ne nyunyi yonso wa bukoya, udibu bakine usokomena!+ 3 Bua mvinyo wa dijinga dikole* dia masandi* ende, bisamba bionso mbikuluke,+ ne bakalenge ba pa buloba bavua bende nende masandi,+ ne bangenda mushinga* ba pa buloba bavua balue babanji ku bukole bua bintu biende bia mushinga mukole kabiyi bundu.”

4 Ngakumvua dîyi dikuabu difuma mu diulu diamba ne: “Bantu banyi, patukayi munkatshi muende+ binuikala kanuyi basue kubuelakana nende mu mpekatu yende, ne binuikala kanuyi basue kupeta tshitupa tshia bipupu biende.+ 5 Bualu mpekatu yende mmidiunguije mushiki too ne mu diulu,+ ne Nzambi mmuvuluke bienzedi biende bidi kabiyi biakane.*+ 6 Numuenzele anu muvuaye muenzele bakuabu,+ eyowa, numuenzele misangu ibidi bua malu adiye muenze;+ mu dikopo+ didiye musambakajile bintu, numusambakajile bintu misangu ibidi.+ 7 Mu mushindu uvuaye muditumbishe ne musombe munkatshi mua bintu bia mushinga mukole kabiyi bundu, mu mushindu au numupeshe dikengeshibua ne madilu. Bualu udi utungunuka ne kudiambila mu muoyo wende ne: ‘Ndi musombe bu mukalenge mukaji, tshiena mukaji mukamba to, tshiakumona madilu nansha kakese.’+ 8 Ke bualu kayi bipupu biende nebilue mu dituku dimue, lufu ne madilu ne tshiyole tshia nzala, ne nebamubutule butubutu ne kapia,+ bualu Yehowa* Nzambi, uvua mumulumbuluishe, udi ne bukole.+

9 “Bakalenge ba pa buloba bavua bende nende masandi* ne basombe nende mu bintu bia mushinga mukole kabiyi bundu nebadile ne nebaditute bua kanyinganyinga bua bualu buende padibu bamona muishi wa dioshika diende. 10 Nebimanyine pa bule bua ditshina dia dikengeshibua diende ne nebambe ne: ‘Bibi bitambe, bibi bitambe, wewe tshimenga tshinene,+ wewe Babilona tshimenga tshikole, bualu dilumbuluisha diebe ndifike mu dîba dimue!’

11 “Kabidi, bangenda mushinga ba pa buloba badi badila ne badi mu madilu bua bualu buende, bualu kakuena muntu udi usumba bintu biabu bionso bia kupana kabidi to, 12 bintu bionso bia kupana: or, tshiamu tshia arjan, mabue a mushinga mukole, mabue a busanga, bilamba bia line muimpe menemene, bilamba bikunzubile, bilamba bia swa, ne bilamba bikunze kunzuu; ne bintu bionso bienza ne mabaya a mupuya muimpe; bintu bia mishindu yonso bienza ne mibanga ne mabaya a mushinga mukole, ne tshiamu tshia mitaku, ne tshiamu tshifiike, ne mabue a marbre; 13 kabidi ne kinamona, bintu bia mupuya muimpe bia mu Inde, musenga wa manananshi, mafuta a mupuya muimpe, budimbu bua mupuya muimpe, mvinyo, mafuta a olive, bukula bunefuke, ntete ya blé, ngombe, mikoko, tubalu, matempu, bapika, ne mioyo* ya bantu. 14 Eyowa, tshimuma tshimpe menemene tshiuvua* ujinga ntshikushiye, ne biakudia bionso bishême ne bintu bionso bilengele mbikujimine, kabiakumueneka kabidi nansha.

15 “Bangenda mushinga bavua basumbishe bintu ebi, bavua balue babanji ku diambuluisha diende, nebimane pa bule bua ditshina diabu dia dikengeshibua diende ne nebadile, nebikale mu madilu, 16 bamba ne: ‘Bibi bitambe, bibi bitambe, tshimenga tshinene tshivua tshivuale bilamba bia line muimpe menemene ne bilamba bikunzubile ne bilamba bikunze kunzuu, ne tshivua tshidilengeje bikole ne bilengejilu bia or ne mabue a mushinga mukole ne mabue a busanga,+ 17 bualu mu dîba dimue bubanji bunene nunku mbubutudibue!’

“Kapitene konso ka mazuwa ne muntu yonso udi wenza ngendu pa mâyi ne bendeshi ba mazuwa ne bantu bonso badi bapetela tshiakudia ku mbuu bakimanyina pa bule, 18 badila pavuabu batangila muishi wa dioshika diende, bamba ne: ‘Ntshimenga kayi tshidi bu tshimenga tshinene etshi?’ 19 Bakadiela lupuishi mu mutu, kuelabu mbila, badila ne babuela mu madilu, bamba ne: ‘Bibi bitambe, bibi bitambe, tshimenga tshinene muvua bantu bonso bavua ne mazuwa pa mbuu balue babanji bua bubanji buende, bualu mu dîba dimue mmubutudibue!’+

20 “Wewe diulu, sanka bua bualu buende,+ kabidi ne nuenu bansantu+ ne bapostolo ne baprofete, bualu Nzambi mmumukosele tshibawu bua bualu buenu!”+

21 Muanjelu mukuabu wa bukole wakela dibue muulu dienze bu dibue dinene dia mpelu, kudikupaye mu mbuu, wamba ne: “Nebakupe Babilona tshimenga tshinene panshi musangu umue mushindu eu, kakuikalaku kabidi nansha.+ 22 Kabakumvua kabidi munda muebe tshiona tshia bimbi ba misambu badi bimba ne nzenze, tshia tungimba, tshia bedi ba nshiba, ne tshia bedi ba mpungi to. Kabakupeta kabidi munda muebe nsenda nansha umue udi wenza mudimu kayi wonso, ne kabakumvua kabidi mutoyi wa dibue dia mpelu munda muebe to. 23 Bukenke bua muendu kabuakukenkesha kabidi munda muebe, kabakumvua kabidi dîyi dia musedianganyi ne dia mukaji udibu basela munda muebe to; bualu bangenda mushinga bebe bavua bantu banene ba pa buloba, ne bisamba bionso bivua bipambushibue ku bienzedi biebe bia mîdima.+ 24 Eyowa, bakapeta munda muende mashi a baprofete ne a bansantu+ ne a bantu bonso bavuabu bashipe pa buloba.”+

19 Panyima pa bualu ebu, ngakumvua dîyi bu dîyi dikole dia musumba munene wa bantu mu diulu. Bavua bamba ne: “Tumbishayi Yah!*+ Lupandu ne butumbi ne bukole mbia Nzambi wetu, 2 bualu malumbuluisha ende mmalelela ne mmakane.+ Bualu mmulumbuluishe ndumba munene uvua munyange buloba ne masandi* ende, ne mmusombuele mashi a bapika bende adi ku bianza biende.”*+ 3 Bakamba diakamue bua musangu muibidi ne: “Tumbishayi Yah!*+ Muishi wende udi utungunuka ne kubanda kashidi ne tshiendelele.”+

4 Bakulu 24+ ne bifukibua binayi bidi ne muoyo+ bakadiela panshi, kutendelelabu Nzambi udi musombe mu nkuasa wa bukalenge bamba ne: “Amen! Tumbishayi Yah!”*+

5 Kabidi, dîyi diakafuma ku nkuasa wa bukalenge diamba ne: “Ikalayi nutumbisha Nzambi wetu, nuenu bapika bende bonso,+ badi bamutshina, bakese ne banene.”+

6 Ngakumvua dîyi bu dîyi dia musumba munene wa bantu ne bu mukungulu wa mâyi a bungi ne bu mukungulu wa makubakuba makole. Bakamba ne: “Tumbishayi Yah,*+ bualu Yehowa* Nzambi wetu, Wa Bukole Buonso,+ watuadiji kukokesha bu mukalenge.+ 7 Tusankayi ne tutuayi tshianga tshikole, tumupeshayi butumbi, bualu dibaka dia Muana wa mukoko diafiki ne mukajende ukadi mudilongolole. 8 Eyowa, mbamuanyishile bua kuvuala tshilamba tshidi tshibalakana ne tshikezuke tshia line muimpe menemene, bualu tshilamba tshia line muimpe menemene etshi tshidi tshileja bienzedi biakane bia bansantu.”+

9 Yeye udi ungambila ne: “Funda ne: Ba diakalenga mbantu badibu babikile ku didia dia dilolo dia dibaka dia Muana wa mukoko.”+ Yeye kungambila kabidi ne: “Aa mmêyi malelela a Nzambi.” 10 Bua bualu ebu ngakadiela ku makasa ende bua kumutendelela. Kadi yeye udi ungambila ne: “Wamanya! Kuenji nanku to!+ Ndi anu mupika nebe ne wa bana benu badi ne mudimu wa bumanyishi bua bualu bua Yezu.+ Tendelela Nzambi!+ Bualu bumanyishi bua bualu bua Yezu ke budi buenzeja dîyi dia buprofete.”+

11 Ngakamona diulu dibululuke, ne tangilayi! kabalu katoke.+ Ne badi babikila muntu uvua musombapu ne: Muena Lulamatu+ ne Mulelela,+ ne udi ulumbuluisha ne uluangana mvita mu buakane.+ 12 Mêsu ende adi ludimi lua kapia,+ ne ku mutu wende kudi bikata bia lumu* bia bungi. Udi ne dîna difunda didi muntu nansha umue kayi mumanye, anu yeye nkayende, 13 ne mmuvuale tshilamba tshia pa mutu tshikale ne makeji a* mashi, ne dîna didibu bamubikila didi ne: Dîyi+ dia Nzambi. 14 Bualu bukuabu, biluilu bia mu diulu bivua bimulonda pa tubalu tutoke, ne bivua bivuale bilamba bitoke, bikezuke bia line muimpe menemene. 15 Mukana muende mudi mupatuka muele wa mvita mule mutue,+ udiye ne bua kutapa nawu bisamba, ne neabilombole ne dikombo dia tshiamu tshifiike.+ Kabidi, udi udiata tshikaminu tshia mvinyo tshia luonji lua tshiji tshikole tshia Nzambi Wa Bukole Buonso.+ 16 Pa tshilamba tshiende tshia pa mutu, eyowa, pa tshibelu tshiende, udi ne dîna difundapu ne: Mfumu wa bamfumu ne Mukalenge wa bakalenge.+

17 Ngakamona kabidi muanjelu muimane mu dîba, wakela lubila ne dîyi dikole, kuambilaye nyunyi yonso idi ipapala munkatshi mua diulu* ne: “Luayi apa, disangishayi pamue bua didia dinene dia dilolo dia Nzambi,+ 18 bua nudie munyinyi wa bakalenge ne munyinyi wa bamfumu ba basalayi ne munyinyi wa bantu ba bukole+ ne munyinyi wa tubalu ne wa bantu badi basombapu,+ ne munyinyi wa bantu bonso, wa badikadile ne wa bapika ne wa bakese ne banene.”

19 Ngakamona nyama wa luonji ne bakalenge ba pa buloba ne biluilu biabu badisangishe pamue bua kuluisha yeye uvua musombe pa kabalu ne tshiluilu tshiende.+ 20 Bakakuata nyama wa luonji pamue ne muprofete wa dishima+ uvua muenze bimanyinu kumpala kuende bivuaye mupambuishe nabi bantu bavua bapete tshimanyinu tshia nyama wa luonji+ ne bavua batendelele tshimfuanyi tshiende.+ Bakabela bonso babidi ne muoyo mu dijiba dia kapia didi ditema ne sufre.+ 21 Kadi bavua bashale bakabashipa ne muele wa mvita mule uvua upatuka mukana mua yeye uvua musombe pa kabalu.+ Nyunyi yonso yakukuta ne munyinyi wabu.+

20 Pashishe ngakamona muanjelu upueka ufuma mu diulu muikale ne lusapi lua ku dijimba dile menemene+ ne shene munene mu tshianza tshiende. 2 Wakakuata dragon,+ nyoka wa ku tshibangidilu,+ udi Diabolo+ ne Satana,+ ne wakamusuika bua bidimu tshinunu. 3 Wakamuela mu dijimba dile menemene,+ wakadikanga ne wakatuapu tshitampi pa mutu pende, bua kapambuishi kabidi bisamba too ne pakajika bidimu tshinunu. Panyima pa bualu ebu, udi ne bua kulekeledibua bua tshitupa tshîpi.+

4 Ngakamona nkuasa ya bukalenge, ne bakapesha bavua basombamu bukokeshi bua kulumbuluisha. Eyowa, ngakamona anyima* ya bantu bavuabu bashipe* bua bumanyishi buvuabu bafile bua bualu bua Yezu ne bua diakula bua bualu bua Nzambi, ne bantu bavua kabayi batendelele nyama wa luonji anyi tshimfuanyi tshiende ne kabayi bapete tshimanyinu pa mpala yabu ne pa tshianza tshiabu.+ Bakapetulula muoyo ne kukokeshabu bu bakalenge ne Kristo+ bidimu tshinunu. 5 (Bafue bavua bashale+ kabavua bapetulule muoyo too ne pakajika bidimu tshinunu.) Edi ndibishibua dia ku lufu dia kumpala.+ 6 Wa diakalenga ne wa tshijila mmuntu yonso udi upeta dibishibua ku lufu dia kumpala edi;+ lufu luibidi+ kaluena ne bukokeshi ku mutu kuabu to,+ kadi nebikale bakuidi+ ba Nzambi ne ba Kristo, ne nebakokeshe nende bu bakalenge bidimu tshinunu.+

7 Kadi diakamue padi bidimu tshinunu bijika, nebapatule Satana mu buloko buende, 8 neapatuke bua kupambuisha bisamba ku matumba anayi a buloba, Goga ne Magoga, bua kubisangishaye pamue bua mvita. Bungi buabi budi bu nsenga ya ku mbuu. 9 Bakatangalaka pa buloba bujima, kunyungulukabu tshitudilu tshia bansantu ne tshimenga tshinangibue. Kadi kapia kakapueka kafuma mu diulu, kubabutulaku.+ 10 Diabolo uvua ubapambuisha wakedibua mu dijiba dia kapia ne sufre, mukavua nyama wa luonji+ ne muprofete wa dishima;+ ne nebakengeshibue* munya ne butuku kashidi ne tshiendelele.

11 Ngakamona nkuasa wa bukalenge munene mutoke ne Eu uvua musombamu.+ Diulu ne buloba biakanyema kumpala kuende,+ muaba kawuvuaku kabidi buabi biobi to. 12 Ngakamona bafue, banene ne bakese, bimane kumpala kua nkuasa wa bukalenge, ne bakabulula mivungu. Kadi bakabulula muvungu mukuabu; mmuvungu wa muoyo.+ Bafue bakalumbuluishibua bilondeshile malu avua mafunda mu mivungu eyi bilondeshile bienzedi biabu.+ 13 Mbuu wakapatula bafue bavua munda muende, ne lufu ne Lukita* biakapatula bafue bavua munda muabi, bakabalumbuluisha muntu ne muntu bilondeshile bienzedi biende.+ 14 Bakela lufu ne Lukita* mu dijiba dia kapia.+ Etshi tshidi tshiumvuija lufu luibidi:+ dijiba dia kapia.+ 15 Kabidi, muntu yonso uvuabu kabayi basangane mufunda mu mukanda wa muoyo+ wakedibua mu dijiba dia kapia.+

21 Ngakamona diulu dipiadipia ne buloba bupiabupia;+ bualu diulu dia kale ne buloba bua kale bivua bijimine,+ ne mbuu+ katshienaku kabidi to. 2 Ngakamona kabidi tshimenga tshia tshijila, Yelushalema Mupiamupia, tshipueka tshifuma mu diulu kudi Nzambi,+ tshilongolola bu mukaji udibu basela, mulengeja bua bayende.+ 3 Ke meme kumvua dîyi dikole difuma ku nkuasa wa bukalenge diamba ne: “Tangilayi! Ntenta wa Nzambi udi ne bantu, ne yeye neasombe nabu, ne bobu nebikale bantu bende. Nzambi muine neikale nabu.+ 4 Yeye neakupule tshinsonji tshionso ku mêsu kuabu,+ ne lufu kaluakuikalaku kabidi,+ nansha madilu, nansha mbila ya miadi, nansha bintu bidi bisama kabiakuikalaku kabidi.+ Malu a kale mmajimine.”

5 Yeye udi musombe mu nkuasa wa bukalenge+ wakamba ne: “Tangilayi! Ndi ngenda mvuija bintu bionso bipiabipia.”+ Udi wamba kabidi ne: “Funda, bualu mêyi aa nga lulamatu* ne mmalelela.” 6 Wakangambila ne: “Akumbanyi! Meme ndi Alfa ne Omega,* ntuadijilu ne ndekelu.+ Muntu yonso udi ne nyota nemmupeshe mâyi a ku mushimi* wa mâyi a muoyo tshianana.*+ 7 Muntu yonso udi utshimuna neapiane bintu ebi, ne nengikale Nzambi wende ne yeye neikale muananyi. 8 Kadi bua bena buôwa ne badi kabayi ne ditabuja+ ne badi benza muengu mu bukoya buabu ne bashipianganyi+ ne bena masandi*+ ne bantu badi benza malu a mîdima ne batendeledi ba mpingu ne bena mashimi bonso,+ tshiabu tshitupa netshikale mu dijiba didi ditema ne kapia ne sufre.+ Etshi tshidi tshiumvuija lufu luibidi.”+

9 Umue wa ku banjelu muanda mutekete bavua ne bibakudi muanda mutekete bivua biuwule tente ne bipupu muanda mutekete bia ndekelu+ wakalua, kungambilaye ne: “Luaku, nenkuleje mukaji udibu basela, mukaji wa Muana wa mukoko.”+ 10 Nunku wakaya nanyi ku bukole bua nyuma ku mukuna munene mule, kundejaye tshimenga tshia tshijila, Yelushalema, tshipueka tshifuma mu diulu kudi Nzambi,+ 11 tshikale ne butumbi bua Nzambi.+ Kubalakana kuatshi kuvua bu dibue dia mushinga mukole menemene, bu dibue dia jaspe didi dikenka bu dibue dia kristale ditoke zezeze.+ 12 Tshivua ne tshimanu tshinene tshile ne tshivua ne biibi 12 ne banjelu 12 ku biibi, ne ku biibi aku kuvua kufunda mêna a bisa 12 bia bana ba Isalele. 13 Ku est kuvua biibi bisatu, ne ku nord biibi bisatu, ne ku sud biibi bisatu ne ku ouest biibi bisatu.+ 14 Tshimanu tshia tshimenga tshivua kabidi ne mabue 12 a bishimikidi, ne pa mabue apu pavua mêna 12 a bapostolo 12+ ba Muana wa mukoko.

15 Kadi uvua wakula nanyi au uvua mukuate dilenge dia or bu tshia kupima natshi bua kupima tshimenga ne biibi biatshi ne tshimanu tshiatshi.+ 16 Tshimenga tshidi ne matumba anayi a bule bumue, bule buatshi budi muomumue ne butshiama buatshi. Wakapima tshimenga ne dilenge: stade binunu 12;* bule buatshi ne butshiama buatshi ne butumbuke buatshi bidi muomumue. 17 Wakapima kabidi tshimanu tshiatshi: nkubita 144,* bilondeshile tshipiminu tshia muntu, tshidi tshikale kabidi tshipiminu tshia muanjelu. 18 Kadi tshimanu tshivua tshibaka ne mabue a jaspe,+ ne tshimenga tshivua tshia or mukezuke bu lumuenu lutoke zezeze. 19 Bishimikidi bia tshimanu tshia tshimenga bivua bilengeja ne mabue a mushinga mukole a mishindu yonso: tshishimikidi tshia kumpala tshivua tshia jaspe, tshibidi tshia safire, tshisatu tshia kalasedone, tshinayi tshia emerode, 20 tshitanu tshia sardonikse, tshisambombo tshia sarduane, tshia muanda mutekete tshia krizolite, tshia muanda mukulu tshia berile, tshia tshitema tshia topaze, tshia dikumi tshia krizopraze, tshia 11 tshia yasente, tshia 12 tshia ametiste. 21 Kabidi, biibi 12 bivua mabue a busanga 12; tshiibi tshionso tshivua tshienza ne dibue dia busanga dimue. Ne musesu munene wa tshimenga uvua wa or mukezuke, bu lumuenu ludi lumuenesha dia muamua.

22 Tshivua mumone ntempelo munda muatshi to, bualu Yehowa* Nzambi Wa Bukole Buonso+ udi ntempelo watshi, ne Muana wa mukoko kabidi. 23 Tshimenga etshi katshiena dijinga ne dîba anyi ne ngondo bua kutshikenkesha to, bualu butumbi bua Nzambi buvua butshikenkesha,+ ne muendu watshi uvua Muana wa mukoko.+ 24 Bisamba nebiende ku diambuluisha dia butoke buatshi,+ ne bakalenge ba pa buloba nebalue ne butumbi buabu munda muatshi. 25 Kabakukanga biibi biatshi mu munya nansha kakese, bualu butuku kabuakuikalamu to.+ 26 Nebaluamu ne butumbi ne bunême bua bisamba.+ 27 Kadi tshintu tshionso tshidi tshinyanguke ne muntu yonso udi wenza malu a muendi ne a dishima kakubuelamu nansha kakese;+ anu bantu badibu bafunde mu muvungu wa muoyo wa Muana wa mukoko ke babuelamu.+

22 Ne wakandeja musulu wa mâyi a muoyo+ mutoke zezeze bu dibue dia kristale, upueka ufumina ku nkuasa wa bukalenge wa Nzambi ne wa Muana wa mukoko+ 2 too ne munkatshi mua musesu watshi munene. Ku mielelu yonso ibidi ya musulu kuvua mitshi ya muoyo ikuama bimuma misangu 12, ikuama bimuma biayi ku ngondo ne ku ngondo. Ne mabeji a mitshi ayi avua bua kuondopa nawu bisamba.+

3 Kakuakuikala kabidi mulawu nansha. Kadi nkuasa wa bukalenge wa Nzambi ne wa Muana wa mukoko+ neikale mu tshimenga atshi, ne bapika bende nebamuenzele mudimu wa tshijila; 4 nebamone mpala wende,+ ne dîna diende nedikale pa mpala yabu.+ 5 Butuku kabuakuikalaku kabidi,+ ne kabena dijinga ne dinkenke dia muendu anyi butoke bua dîba to, bualu Yehowa* Nzambi neabatokeshe,+ ne nebakokeshe bu bakalenge kashidi ne tshiendelele.+

6 Wakangambila ne: “Mêyi aa nga lulamatu* ne mmalelela;+ eyowa, Yehowa,* Nzambi uvua muenzeje baprofete ne nyuma wende,+ mmutume muanjelu wende bua kuleja bapika bende malu adi ne bua kuenzeka mu katupa kîpi emu. 7 Tangila! Ndi ndua lukasa.+ Muntu yonso udi utumikila mêyi a buprofete a mu muvungu eu ngua diakalenga.”+

8 Kadi meme, Yone, ke uvua mumvue ne mumone malu aa. Pamvua muumvue ne muamone, ngakadiela panshi bua kutendelela ku makasa a muanjelu uvua undeja malu aa. 9 Kadi yeye udi ungambila ne: “Wamanya! Kuenji nanku to! Ndi anu mupika nebe ne wa bana benu baprofete ne wa bantu badi batumikila mêyi a mu muvungu eu. Tendelela Nzambi.”+

10 Yeye udi ungambila kabidi ne: “Kutu tshitampi ku mêyi a buprofete a mu muvungu eu to, bualu tshikondo tshisungula tshikadi pabuipi. 11 Muntu udi kayi muakane atungunuke mu malu adi kaayi makane; muntu mukoya atungunuke mu bukoya buende; kadi muntu muakane atungunuke mu buakane, ne wa tshijila atungunuke ne kuikala wa tshijila.

12 “‘Tangila! Ndi ndua lukasa, ne difutu dindi mfila didi nanyi, bua kufuta muntu yonso bilondeshile mudimu wende.+ 13 Meme ndi Alfa ne Omega,*+ wa kumpala ne wa ndekelu, ntuadijilu ne ndekelu. 14 Ba diakalenga mbantu badi basukula mizabi yabu,+ bua bamone mua kupeta bukokeshi bua kuya ku mitshi ya muoyo+ ne bua bamone mua kubuela mu tshimenga ku biibi biatshi.+ 15 Pambelu padi mbua* ne bantu badi benza malu a mîdima ne bena masandi* ne bashipianganyi ne batendeledi ba mpingu ne muntu yonso udi munange mashimi ne mudifile ku mashimi.’+

16 “‘Meme, Yezu, mvua mutume muanjelu wanyi bua kunumanyisha malu aa bua bisumbu. Ndi muji ne muana wa Davidi,+ ne mutoto wa mu dinda udi ukenka.’”+

17 Nyuma ne mukaji udibu basela+ badi batungunuka ne kuamba ne: “Luaku!” ne muntu yonso udi umvua ambe ne: “Luaku!” ne muntu yonso udi ne nyota alue;+ muntu yonso udi musue angate mâyi a muoyo tshianana.+

18 “Ndi mmanyisha muntu yonso udi umvua mêyi a buprofete a mu muvungu eu ne: Muntu yeye musakidile tshintu ku malu aa,+ Nzambi neamusakidile bipupu bidi bifunda mu muvungu eu;+ 19 ne muntu yeye mumbushe tshintu mu mêyi a mu muvungu wa mêyi a buprofete aa, Nzambi neumbushe tshitupa tshiende ku mitshi ya muoyo+ mu tshimenga tshia tshijila,+ bintu bidibu bafunde bualu buabi mu muvungu eu.

20 “Eu udi umanyisha malu aa udi wamba ne: ‘Eyowa; ndi ndua lukasa.’”+

“Amen! Luaku, Mukalenge Yezu.”

21 Ngasa wa Mukalenge Yezu Kristo ikale ne bansantu.