9 Tshiudi menemene

TSHIDIBI BIUMVUIJA

Tshiudi menemene katshiena tshitangila anu dîna diebe ne tshimuenekelu tshiebe to. Tshidi tshikongoloja mikenji ya bikadilu iudi ulonda, malu autu witabuja, ne bikadilu biebe. Mu kuamba kuimpe, tshiudi ntshienza kudi tshintu tshionso tshidi tshienza bua wikale tshiudi atshi, munda ne pambelu.

BUA TSHINYI BIDI NE MUSHINGA

Wewe mulame tshiudi menemene ne manza abidi, newimanyine malu audi witabuja, ne kuakulekela bena mulongo nebe bakuambila tshia kuenza to.

Adrian udi wamba ne: “Bantu ba bungi batu anu bu bana ba bitetela. Bana ba bitetela kabatu badisunguila bilamba bitubu nabi pambidi to; bantu ke badi babasunguilabi.”

Courtney udi wamba ne: “Ndi mulonge mua kuimanyina tshidi tshimpe nansha biobi bikole. Ndi mmanyina balunda banyi balelela ku malu adibu benza ne ku andi meme ngenza patudi nabu.”

DÎYI DINENE DIA MU BIBLE: “Lekelayi kuikala nufumbibua kudi ndongoluelu wa malu eu, kadi nushintuluke pa kukudimuna meji enu.”​—Lomo 12:2.

TSHIUDI MUA KUENZA

Konkonona malu autu mukolele, butekete buutu nabu, ne malu autu witabuja bua kumanya tshiudi mpindieu ne tshiudi ujinga kulua. Mushindu muimpe wa kutuadija nkuandamuna nkonko idi ilonda eyi.

Malu antu mukolele: Mbipedi kayi bintu nabi? Mmamanya kayi andi mupete? Mmalu kayi antu ngenza bimpe? (Tshilejilu: Ntu nnemeka dîba anyi? Ntu ndikanda anyi? Ntu muenji wa mudimu anyi? Ntu ne tshianza tshilekelela anyi?) Mmalu mimpe kayi antu ngenza?

MUBELU: Bitu bikukolele bua kumanya malu mimpe autu wenza anyi? Ebeja muledi webe anyi mulunda webe wa kueyemena akuambile malu autu mukolele ne tshidiye wambidila nanku.

DÎYI DINENE DIA MU BIBLE: “Muntu yonso akonkonone bienzedi biende, dîba adi neapete tshidiye mua kusankila bua bualu buende nkayende, kayi udifuanyikija ne muntu mukuabu to.”​—Galatiya 6:4.

Butekete buebe: Mbibadi kayi bia bumuntu buanyi bindi ne bua kutamba kukolesha? Ndîba kayi dintu nangananga mua kutetshibua? Mmu malu kayi mundi ne bua kutamba kudikanda?

DÎYI DINENE DIA MU BIBLE: “Tuetu bambe ne: ‘Katuena ne mpekatu,’ tudi tudishima tuetu nkayetu.”​—1 Yone 1:8.

Malu autu witabuja: Mmikenji kayi ya bikadilu intu ndonda? Bua tshinyi? Ntu ngitabuja Nzambi anyi? Tshidi tshinjadikila ne: udiku ntshinyi? Mmalu kayi antu mmona ne: mmabi? Bua tshinyi? Mmalu kayi andi mutuishibue ne: neenzeke kumpala eku?

DÎYI DINENE DIA MU BIBLE: “Bukokeshi bua kunana lungenyi nebukulame, ne dijingulula dia malu nedikukube.”​—Nsumuinu 2:11.