Tshidi bamue bamba

Bena Hindu

batu bamona makenga bu tshipeta tshia malu adi muntu wenza lelu anyi avuaye muenze ku kale. Bena Hindu badi bitaba ne: makenga a muntu neajike padiye ufika ku Moksha, (anyi pikalaye katshiyi uledibua tshiakabidi,) padiye ukumbaja lungenyi kampanda ludi bantu badi kabayi batendelela bapangile.

Bamizilman

batu bamona makenga bu dinyoka didibu bapesha bantu badi benza mpekatu, ne bu diteta dia ditabuja. Sayyid Syeed mfumu wa bamizilman ba ku Amerike wa ku nord udi wamba ne: nsombelu mikole idi ikuata bantu idi ibavuluija “bua kuikala ne dianyisha kudi Nzambi bua mabenesha onso adiye ubapesha, ne kumanya ne: badi ne bua kuambuluisha aba badi dijinga ne dikuatshisha.”

Mu bilele bia bena Yuda

batu bamba ne: makenga adi afumina ku malu adi muntu nkayende wenza. Bena Yuda bakuabu batu bamba ne: nekuikale dibishibua dia bantu ku lufu, ne panyima pa dibishibua adi nebabingishe bantu bavua bakenge kabayi ne bualu. Mu bilele kampanda bia majimbu bia bena Yuda abi batu balongesha bantu bua diledibua tshiakabidi, didi dipetesha muntu mishindu ya bungi ya kunyingalala bua bilema bivuaye muenze.

Bena Buddha

batu bamba ne: muntu utu upetangana ne makenga mu bikondo bia bungi bituye ne muoyo, mmumue ne: misangu yonso ituye uledibua tshiakabidi idi itungunuka too ne padi meji ende mabi ne majinga ende mabi ne bienzedi biende bibi bionso bimana. Ku diambuluisha dia meji, midimu mimpe, ne didikanda dia mu lungenyi, muntu udi mua kufika ku nirvana, mmumue ne: nsombelu udi kayi makenga.

Bua balongi ba Confucius

nkonga miaku kampanda udi wamba ne: batu bamba mudi “dipangila kukokesha bimpe dia bantu ne bilema biabu” bitamba kukebesha makenga. (Dictionary of Comparative Religion) Batu balongesha ne: nansha mudi makenga mua kukepela mu nsombelu wa bantu, a bungi a kudiwu badi baakebesha “kudi bifukibua bia mu nyuma bidi ne bukole bua bungi bupite bua bantu. Mu nsombelu ya nunku, muntu mmuenzejibue bua kuitaba tshidi bifukibua abi bipangadija.”

Bimue bitendelelu bia bankambua

bidi biamba ne: bena buloji ke badi bakebesha makenga. Bilondeshile malu adibu bitaba aa, bena buloji badi mua kupetesha muntu diakalenga anyi lutatu lubi, ne makenga aa badi mua kuajikija ne mikiya mishilashilangane. Padi muntu ukenga ne disama, badi bela meji ne: mikiya ne luondopu lua banganga bidi mua kutekesha bukole bua disama dia kudi bena buloji.

Bena Kristo

batu bitaba ne: mpekatu wa bantu babidi ba kumpala udibu bakuile mu mukanda wa Genese ke udi mukebeshe makenga. Kadi bitendelelu bia bungi mbisakidile ngenyi yabi ku dilongesha adi. Tshilejilu, bamue bena Katolike batu bamba ne: ntatu itudi nayi tudi mua kuyileja Nzambi mu disambila bua abeneshe ekeleziya anyi bua avuije ntatu ayi lupandu kudi muntu mukuabu.