Bua tshinyi bidi ne mushinga bua kumanya ni kudi Mufuki?

Bua tshinyi bidi ne mushinga bua kumanya ni kudi Mufuki? Kuoku bualu budi bukujadikila ne: Nzambi wa bukole buonso udiku, nunku udi pamuapa mua kukonkonona bijadiki bidi bileja ne: Bible mmufundisha ku bukole bua nyuma wende. Wewe witaba tshidi Bible wamba, malu adi alonda aa adi mua kukuambuluisha.

Newikale ne nsombelu wa nsongo menemene

TSHIDI BIBLE WAMBA: “[Nzambi uvua] muenze malu mimpe, unulokeshila mvula ya mu diulu, unupesha mivu ya biakudia, unukutshisha ne biakudia ne uwuja mioyo yenu ne disanka.”—Bienzedi 14:17.

TSHIDIBI BIUMVUIJA: Bintu bionso bidi bikusankisha mu bufuki ndipa dia kudi Mufuki. Newanyishe bintu bionso ebi kabidi bikole menemene pawamanya ne: mupeshanganyi wa bintu ebi udi ukutabalela bikole.

Neupete mibelu mimpe idi mua kukuambuluisha mu malu ebe a ku dituku

TSHIDI BIBLE WAMBA: “Neujingulule tshidi tshiakane, tshimpe ne tshikumbane, njila mujima wa tshidi tshimpe.”—Nsumuinu 2:9.

TSHIDIBI BIUMVUIJA: Bu mudi Nzambi Mufuki webe, mmumanye biudi nabi dijinga bua kuikala ne disanka. Wewe ulonga Bible, udi mua kumanya malu adi mua kukuambuluisha ku mpindieu.

Neupete mandamuna a nkonko yebe

TSHIDI BIBLE WAMBA: “Neupete dimanya dia Nzambi.”—Nsumuinu 2:5.

TSHIDIBI BIUMVUIJA: Kumanya ne: Mufuki udiku, nekukuambuluishe bua kupeta mandamuna a nkonko ya mushinga bu mudi: Bua tshinyi tudi ne muoyo? Bua tshinyi kudi makenga bungi nunku? Ntshinyi tshitu tshienzekela muntu padiye ufua? Udi mua kupeta mandamuna mimpe mu Bible.

Neupete ditekemena bua matuku atshilualua

TSHIDI BIBLE WAMBA: “‘Ndi mumanye bimpe meji andi nnuelela,’ ke mudi Yehowa wamba, ‘meji a ditalala, ki nga dikenga to, bua kunupesha matuku atshilualua mimpe ne ditekemena.’”—Yelemiya 29:11.

TSHIDIBI BIUMVUIJA: Nzambi mmulaye ne: mu katupa kîpi emu neumbushe malu mabi, makenga, nansha lufu. Paudi witaba malu adi Nzambi mulaye aa, ditekemena diebe dia matuku atshilualua nedikuambuluishe bua kutantamena ntatu ya ku dituku ne ku dituku ne dikima.

Mudi kuitaba ne: Mufuki udiku kuambuluishe bamue bantu

“Bitu anu binkemesha pantu mmona mudi Nzambi utuambuluisha mu mishindu ya bungi. Udi utuambuluisha bua kumanya tshidi ne mushinga mu nsombelu wetu, kumanya mua kusomba ne bakuabu, ne mutudi mua kulua balunda bende.”—Cyndi, États-Unis.

“Kuitaba ne: Mufuki udiku nkumpeteshe nsombelu muimpe wa disanka. Kudi kungunzulula lungenyi, bualu kudi anu malu a bungi a meme kulonga pa bidi bimutangila yeye, bintu bidiye mufuke, ne Dîyi diende.”—Elise, France.

“Kutumikila malu adi Mufuki utulongesha mu Bible kudi kumpetesha disanka dia bungi. Kudi kungambuluisha bua kuepuka kuambangana, kuikala kuteleja bakuabu bikole, ne kuikala ne disanka dia bungi. Kudi kungambuluisha kabidi bua kuikala tatu muimpe.”—Peter, Pays-Bas.

“Kumpala kua meme kulonga malu a Nzambi, tshionso tshiumvua ngenza tshivua anu kudia, kulala, ne kudienzeja bua kuya ku mudimu kumpala kua dîba. Mvua ne kanyinganyinga ka bungi. Mpindieu nkadi mmona muoyo bu dipa ditambe buimpe, mmumue ne: ndi ne nsombelu wa disanka ne ndi ngangata muoyo ne mushinga.”—Liz, Estonie.

“Ntu anu ne kanyinganyinga. Kadi kumanya ne: malu mabi, kansungansunga, ne makenga nebijike, kudi kungambuluisha bua kupita ne kanyinganyinga.”—Adrien, France.