BULOBA BUDI MU KAYUMBAYUMBA

2 | Kuba makuta ne bintu biebe

BUA TSHINYI BIDI NE MUSHINGA?

Bantu ba bungi batu baluangana dituku dionso edi anu bua kupeta bintu bidibu nabi dijinga menemene. Diakabi, padiku kayumbayumba, bidi mua kukolela kabidi bantu bikole bua kupeta bidibu nabi dijinga. Bua tshinyi?

Patu ntatu ibudika muaba kampanda, bintu bitu bibanda mushinga, bu mudi biakudia ne nzubu ya difutshila.
Patu bipupu bienzeka, bantu ba bungi batu bajimija midimu anyi babanga kuenza mudimu bua tumakuta tukese.
Bipupu bidi mua kunyanga midimu ya bantu, nzubu yabu, anyi bintu bikuabu bia mushinga, bifikisha ba bungi ku dishala bapele.

Tshiudi ne bua kumanya

Wewe ulama makuta ebe bimpe, tshipupu tshiotshi tshilue, neumanye mua kupita natshi bimpe.
Bukubi budi makuta atupetesha kabutu bushala kashidi to; difutu dietu, makuta atudi balame, ne bintu bietu bikuabu bidi mua kujika mushinga wabi.
Kudi bintu bidi makuta kaayi mua kusumba, bu mudi disanka ne buobumue bua bena mu dîku.

Tshiudi mua kuenza mpindieu

Bible udi wamba ne: “Bu mutudi ne biakudia ne bilamba, tusanke ne bintu ebi.”—1 Timote 6:8.

Kusanka eku kudi kumvuija kudielela mikalu bua bintu bitudi tujinga ne: tuikale nabi. Kudi kumvuija kabidi kusanka padi majinga etu a ku dituku makumbane. Bualu ebu budi ne mushinga nangananga tuetu bajimije makuta ne bintu bietu bikuabu.

Bua kusanka ne biudi nabi, pamuapa mbimpe ushintulule malu mu nsombelu webe. Wewe ukeba bua kuikala ne bintu biudi kuyi mua kupeta, neusune wewe kudiambika mu malu a makuta.

TSHIA KUENZA—Malu a mushinga

Padi bipupu bienzeka, tumikila mibelu mimpe eyi bua ukube makuta ne bintu biebe bikuabu

KEPESHA BUNGI BUA BINTU BIA KUSUMBA

Dikosela makuta a kuikala kutula

Kutudi makuta ku bintu biudi kuyi nabi dijinga menemene to. Diebeja ne: ‘Ndi dijinga ne kusumba mashinyi anyi? Ndimaku kabudimi ka biakudia bua tshitambi kubitudila makuta anyi?’
Kumpala kua kusumba tshintu, diebeja ne: ‘Ndi natshi dijinga menemene anyi? Ndi mua kutshisumba anyi?’
Kuoku mushindu, keba diambuluisha kudi mbulamatadi anyi kudi malongolodi kampanda.

“Tuakasomba pamue mu dîku, tuetu kukonkonona tshivua nsombelu wetu. Tuakashipa mishindu ya dijikija lutetuku ivua itutudisha makuta a bungi ne kukepesha mikuabu. Tuakatuadija kulamba biakudia bia makuta makese.”—Gift.

DIKOSELA MAKUTA A KUIKALA KUTULA

Kepesha bungi bua bintu bia kusumba

Bible udi wamba ne: “Malu adi bantu badi benza mudimu ne muoyo mujima balongolola adi bushuwa afika ku dikumbana.” (Nsumuinu 21:5) Kudikosela makuta a kutula kudi kukuambuluisha bua kubenga kutula makuta mapite audi upeta.

Tshia kumpala, funda bungi bua makuta awapeta ku ngondo.
Pashishe, funda bungi bua makuta anuikala mua kutula ku ngondo bua nzembu, biakudia, ne bua bintu bikuabu, budi mudi kufuta nzubu.
Utangile bungi bua makuta autu upeta ne bua bintu biutu usumba, biobi bikengela, umone biudi mua kukepesha anyi kulekela kusumba bua wikale utula makuta bilondeshile autu upeta.

“Ngondo yonso tutu tufunda bungi bua makuta atutu tupeta ne atutu tutula. Tutu tudienzeja bua kulama makuta a kutula dîba didi bualu bua tshimpitshimpi butukuata ne bua bintu bitudi bamanye ne: netusumbe matuku atshilualua. Bidi bituambuluisha bua kubenga kusamisha mutu bikole bualu tudi tudianjila kumanya mutuikala mua kutula makuta etu.”—Carlos.

EPUKA MABANZA / LAMA MAKUTA

Epuka mabanza / Lama makuta

Longolola malu bimpe bua kukepesha mabanza. Kuoku mushindu, epuka disombangana makuta. Kadi ikala ulama makuta bua kusumba biudi nabi dijinga.
Ikala uteka dikuta ku luseke ngondo yonso bua wikale ne makuta a kutula padi bualu bua tshimpitshimpe bukukuata anyi bua bintu bikuabu biwasumba matuku kumpala.

ENZA MUDIMU BIKOLE / LAMA MUDIMU

Bible udi wamba ne: “Mudimu mukole wonso udi ne difutu.”—Nsumuinu 14:23.

Enza mudimu bikole / Lama mudimu

Ikala ne meji mimpe bua mudimu. Nansha mudimu uudi nawu kawuyi mudimu uuvua ukeba, tshibi udi anu ukupetesha dikuta.
Dienzeja bua kuikala muenji wa mudimu udi kayi windila anu ne: bakuabu benze. Nebikuambuluishe bua kulama mudimu webe, anyi nebikuambuluishe bua kupeta mudimu mukuabu uudi nawu eu wowu mufue.

“Ntu ngitaba mudimu wonso udi umueneka, nansha meme tshiyi muwunange anyi kawuyi wa makuta a bungi bundi nkeba. Ntu anu ndifila ku mudimu, nguenza bimpe menemene, bienze anu bu ne: nguanyi meme ndienzela.”—Dmitriy.

Wewe ukeba mudimu . . .

Keba tshia kuenza. Ndaku miaba ya midimu bua ne: ni udi mua kupeta mudimu wa kuenza, nansha bobu kabayi bafile dimanyisha dia ne: badi bakeba bantu. Ambila balunda bebe ne bena mu dîku dienu ne: udi ukeba mudimu.
Ibidilangana ne mudimu. Udi mua kupeta mudimu udi ne bionso biudi ukeba.