Tudi Basue kukuambuluisha

Broshire eu udi ne tshipatshila tshia kukumanyisha bimpe bitambe midimu ya Bantemu ba Yehowa ne malongolola adi majadikibue bua kukuambuluisha bua kuvudija dimanya diebe dia Bible. Imue misangu, ukadi mupete dikumbula dia Bantemu ba Yehowa, anyi ukadi muyukile nabo mu misesu, anyi miaba mikuabo. Misangu mikuabo, patudi tuakula apa, umue wa kudibo utu ulonga nebe Bible.

Utu mumanye se: batu bamanyisha mukenji wa Bukalenge bua Nzambi pa buloba bujima anyi? Mbua tshinyi? Bualu, Nzambi, Mufuki wetu mmusue bua bantu ba bisamba bionso badisangishe bua kumutendelela. Tangila tshidiye mumanyishe bua tshikondo tshietu etshi: “Bantu ba mu bisamba bivule nebayeku ne nebambe ne: ‘Luayi, tubande ku mukuna wa Yehowa, tubuele mu nzubu wa Nzambi wa Yakoba; bua yeye atulongeshe njila yende, bua tuetu tuende mu tujila tuende.’”​—⁠Yeshayi 2:2, 3, MN.

Mudimu udi Bantemu ba Yehowa benza bua kukumanyisha njila ya Nzambi udi ukumbaja mulayi eu. Mabeji adi alonda aa neakuleje bua tshinyi mudimu eu udi ne mushinga mutambe lelu’eu, ne mushindu udiwo mua kukuambuluisha.