Dilongolola Dia Nzambi dikadi pa kukumbana

Dilongolola dia Nzambi pakafukaye buloba divua dia se: bantu ba disanka bikalepu, ne basombe mu buakane. Bua kuikala ne muoyo tshiendelele, bantu bavua ne bua kutumikila mikenji ya Nzambi. Bu muvuabo batupe, mulume wa kumpala ne mukaji wa kumpala bakalua benji ba mpekato, bafundila tshibawu tshia lufu. Nunku, ke mpekato ne lufu kusambulukilabi ndelanganyi yabo.​—⁠Genese 1:​27, 28; 2:​16, 17; 3:​1-19; Lomo 5:12.

Nzambi, udi ne dîna dia Yehowa, wakapangadika bua kujimija bipeta bia dipanga butumike ne bia mpekato pa buloba. Ne dipita dia bidimu, wakatangija mesu pa buloba, e kumonaye Abrama, muntu wa lulamatu uvuaye mushintulule dîna bua kumubikilabo ne: Abrahama. Nzambi wakamulaya ne: ndelanganyi yende ivua ne bua kulua tshisamba tshinene, kabidi ne: ku diambuluisha dia tshisamba etshi ùvua ne bua kupatula kankanunuina uvuaye ne bua kuenza nende mudimu bua meku wonso a pa buloba kubeneshibuawo.​—⁠Genese 12:​1-3; 18:​18, 19; 22:18; Musambu wa 83:18; Ebelu 11:8-16.

Ku ndekelu kua siekele wa 16 kumpala kua bikondo bietu ebi, bana ba Yakoba anyi Izalele, kankanunuina wa Abrahama, bakalua bisa dikumi ne bibidi bivua bikuatshibue ku bupika mu Ejipitu. Yehowa wakapikula bena Izalele aba, e kubavuijaye tshisamba. Ku mukuna wa Sinai, ku butuangaji bua Mozese, wakabapesha Mikenji ivua ne bua kuikala bu mukanda wa mêyi ne mikandu ya ditunga diabo. Yehowa uvua Mukalenge wabo, Mulumbuluishi wabo ne Mubeledi wa mikenji. Tshisamba tshia Izalele tshiakalua tshisamba tshisungula tshia Nzambi tshienza ne bantemu bende balongolola bua kukumbaja dilongolola diende. Munkatshi muabo ke muvua ne bua kupatukila Masiya muimikila mudimu wa kujadika Bukalenge bua kashidi bua dibeneshibua dia bantu ba bisamba bionso.​—⁠Ekesode 19:​5, 6; 1 Kulondolola 7:​7-14; 1 Bakalenge 4:​20, 25; Yeshayi 33:22; 43:10-12; Lomo 9:4, 5.

Kukadi bidimu bu 2 000, peshi kunyima kua siekele mitue ku 15, Nzambi wakatuma Muanende umu’epele, mumbukile mu diulu, e kuluaye pa buloba pakaledibuaye kudi nsongakaji muena Yuda utshivua kamama uvua ne dîna dia Mariya. Kumuinyikabo dîna dia Yezu, kabidi uvua ne bua kupiana Bukalenge buvua Nzambi mulaye nkambua wende Davidi. Pavuaye ne bidimu 30, Yezu wakatambushibua kudi Yone Mubatiji, diakamue e kutuadijaye kumanyisha Bukalenge bua Nzambi. Ku bishima biende bia dijikija masama, wakaleja mushindu walua Bukalenge kubenesha bukua-bantu. Ku diambuluisha dia bimfuanyi, wakumvuija malu malomba kudi aba buonso badi bipatshila muoyo wa kashidi. Pashishe, Yezu wakashipibua ku mutshi, ke muoyo wende wa muntu mupuangane kuenzawo mudimu wa tshia-bupikudi bua bukua-bantu.​—⁠Matayi 1:​18-24; 3:​13-16; 4:​17-23; 6:​9, 10; nshapita wa 13; 20:28; Luka 1:​26-37; 2:14; 4:43, 44; 8:1; Yone 3:16; Bienzedi 10:37-39.

Yezu wakamba ne: Bukalenge bua Masiya buvua ne bua kujadikibua kunyima kua bikondo bivule, ku nshikidilu wa bulongolodi bua malu. Mu tshikondo atshi, uvua ne bua kuikala pa muanzu wende wa Mukalenge mukokeshi mu diulu, kayi umueneka ne mesu, kabidi uvua ne bua kumanyisha dikalaku diende pa kutangija ntema yende pa buloba. Mianda ya pa buloba bujima idi ileja ne: tudi mu tshikondo etshi biangatshile mu tshidimu tshia 1 914. Anu bu muvua Yezu mumanyishe mu mulayi, lumu luimpe lua Bukalenge ndumanyishibue pa buloba bujima bu tshimanyinu ku bisamba bionso. Nunku, pa buloba bujima, bantu badi benda basangishibua ku luseke lua Bukalenge bua Nzambi. Nebapanduke ku nshikidilu wa bulongolodi ebu bua malu bua kupeta muoyo wa kashidi pa buloba ku bukokeshi bua Bukalenge bua Masiya.​—⁠Matayi, nshapita wa 24 ne wa 25; Buakabuluibua 7:​9-17.

Lelu’eu, Ekleziya mivule idi idiamba mudiyo yenza disua dia Nzambi. Kadi mmunyi mudi muntu mua kumanya tshisumbu tshilelela tshia bena nkristo? Mpa kukonkonona Mifundu idi ileja mushindu uvua tshisumbu tshia bena nkristo ba mu bidimu lukama bia kumpala ne pa kumona aba badi balonda tshilejilu etshi lelu’eu.

• Abrahama ne Izalele bavua ne midimu kayi mu dikumbaja dia dilongolola dia Nzambi?

• Yezu wakakumbaja tshinyi ku mudimu wende ne ku lufu luende?

• Mmianda kayi ìvuà milayi mimanyishe ìvuà ne bua kuenzeka mu tshikondo tshietu etshi?