Tshisumbu Tshia Bena Nkristo mu bidimu lukama bia kumpala
Dia Pentekoste wa tshidimu tshia 33 mu bikondo bietu ebi, nyuma muimpe wakamuangalajibua pa balongi ba Yezu 120, ke kutuadijabo kuakula pa malu malenga a dikema a Nzambi mu miakulu mivule. Ke muvua tshisumbu tshia bena nkristo tshituadije. Dituku adi, balongi bapiabapia batue ku 3 000 bakatambushibua.—Bienzedi, nshapita 2.
Bu muvua bapostolo ne balongi bakuabo batungunuke ne kuamba Diyi dia Nzambi ne dikima, bisumbu biakavula mu miaba mivule. Anu bu mudibi bifunda mu mukanda wa Bienzedi, mu mutantshi mukese, mudimu wa buambi wakamuangalaka mu matunga adi manyunguluke mbuu wa Méditerranée, kumukila ku Babilone ne ku nord wa Afrike too ne ku Roma, pamue apa too ne ku Espagne.—Lomo 15:18-29; Kolosai 1:23; 1 Petelo 5:13.
Muaba wonso uvua bantu balua balongi, bavua benza bisumbu. Bantu bapiluke ne bakulumpe mu nyuma bavua batekibua bu bakulu, anyi batangidi bua kulama ndongeshilu mujalame ne ngikadilu mulenga mu bisumbu. Kadi, kabavua bamfumu ba tshitendelelu nansha; bavua bena mudimu ne bakuatshishanganyi ba mudimu ne bakuabo bua Bukalenge bua Nzambi.—Bienzedi 14:23; 20:28; 1 Kolinto 3:5; 5:13; Kolosai 4:11; 1 Timote 3:1-15; Ebelu 13:17; 1 Petelo 5:1-4.
Bapostolo ne bakuabo bàvuà babambuluisha mu mudimu bàvua kasumbu kaludiki. Bobo ke bavua balombola mudimu wa buambi. Bakajikija ntatu mu tshisumbu tshia ku Yeruzaleme. Bakatuma bana betu bapiluke ku Samariya ne ku Antiokiya bua kukolesha bena kuitabuja bapiabapia. Bakajikija matandu avua mapatuke pa ditengudibua, kutumabo dipangadika diabo kudi bisumbu bionso bua kuditumikilabi. Nansha nanku, bantu aba kabavua bamfumu ba bakuabo to; kadi bavua bapika ne bambuluishanganyi ne bakuabo bena mu tshisumbu tshijima.—Bienzedi 4:33; 6:1-7; 8:14-25; 11:22-24; 15:1-32; 16:4, 5; 1 Kolinto 3:5-9; 4:1, 2; 2 Kolinto 1:24.
Balongi ba ku ntuadijilu bakamanyika bu bena nkristo e kuinyikibua dîna edi ku buenzeji bua Nzambi. Bavua ne malongesha avua abatapulula ne bakuabo; malongesha awo avua abikidibua se: dilongesha dia bapostolo, peshi tshidikijilu tshia mêyi a lupandu. Dilongesha edi dia mu Mifundu Minsantu divua kabidi dibikidibua ne: bulelela.—Yone 17:17; Bienzedi 2:42; 11:26; Lomo 6:17; 1 Timote 4:6; 6:1, 3; 2 Timote 1:13; 2 Petelo 2:2; 2 Yone 1, 4, 9.
Bena nkristo bavua mu tshisumbu tshia pa buloba bujima tshia bena muntu mu buobumue ne mu dinanga. Bakaleja dinanga kudi bena kuitabuja nabo ba mu matunga makuabo. Pavuabo baya ku ngendu, bena kuitabuja nabo bavua babakidila ku nzubu yabo. Bavua ne ngikadilu wa tshitembu, bu muvuabo tshisamba tshinsantu tshitapuluke ne ba pa buloba. Bavua balame mu lungenyi luabo tshikondo tshia dituku dia dikalaku dia Yehowa, kumanyishabo ditabuja diabo patoke ne disuminyina.—Yone 13:34, 35; 15:17-19; Bienzedi 5:42; 11:28, 29; Lomo 10:9, 10, 13-15; Tito 2:11-14; Ebelu 10:23; 13:15; 1 Petelo 1:14-16; 2:9-12; 5:9; 2 Petelo 3:11-14; 3 Yone 5-8.
Kadi, anu muvuabi bimanyisha mu mulayi, ditontolola dinene diakatuadija mu siekele muibidi ne muisatu. Kuakapatuka eklezia minene ìvuà kayiyi milame bukezuke bua mu tshisumbu tshia bena nkristo ba kumpala pa bidi bitangila malongesha, ngikadilu, bulongolodi ne diepuka kubuelakana mu malu a pa buloba.—Matayi 13:24-30, 37-43; 2 Tesalonike, nshapita 2.
Nansha nanku, Yezu wakamanyisha mu mulayi ne: kuvua ne bua kulua tshikondo tshia dipingajilula dia ntendelelu mulelela mu tshikondo tshia nshikidilu wa bulongolodi ebu bua malu. Bantemu ba Yehowa mbashindike se: dijadikibua edi didi mua kumueneka mu midimu idi yenzeka pa buloba bujima, kukadi bidimu 1 900 kunyima kua mulayi wa Yezu. Mabeji adi alonda neafile tshijadiki.
• Mmunyi muvua tshisumbu tshia bena nkristo ba kumpala tshituadije, ne mmushindu kayi uvuatshi tshidiunde?
• Mmunyi muvua tshisumbu atshi tshilombodibue?
• Mmalu kayi avua aleja patoke se: bena nkristo ba kumpala bavua batapuluke ne bantu bakuabo?
[Miaku miumvuiji ya tshimfuanyi pa dibeji 7]
(For fully formatted text, see publication)
Black Sea
Caspian Sea
Great Sea
Red Sea
Persian Gulf
Miaba ivua lumu luimpe lufike mu bidimu lukama bia kumpala
ITALY
Rome
GREECE
MALTA
CRETE
CYPRUS
BITHYNIA
GALATIA
ASIA
CAPPADOCIA
CILICIA
SYRIA
ISRAEL
Jerusalem
MESOPOTAMIA
Babylon
Bamue ba mu miaba eyi bakalua bena kuitabuja
ILLYRICUM
MEDIA
PARTHIA
ELAM
ARABIA
LIBYA
EGYPT
ETHIOPIA
[Miaku miumvuiji ya tshimfuanyi pa dibeji 7]
Bena nkristo ba kumpala bakalongesha Dîyi dia Nzambi ne dikima
Bavua bakidila bena nkristo pavuabo baya ku ngendu kudi bena kuitabuja nabo ku nzubu yabo