Mudibu balongolole tshisumbu ne batshilombola

MU MUKANDA wa kumpala uvua mupostolo Paulo mutumine bena Kolinto, wakaleja bualu bua mushinga mukole budi butangila Nzambi wamba ne: “Nzambi ki nNzambi wa malu mabuelakane to, kadi udi Nzambi wa ditalala.” Pashishe wakamba kabidi bua bisangilu bia tshisumbu ne: “Malu onso enzeke bimpe ne mu bulongame.”​—1 Kol. 14:33, 40.

² Paulo wakafila mibelu ku ntuadijilu kua mukanda wende eu bua matapuluka avua mu tshisumbu tshia ku Kolinto. Wakabela bana betu abu bua ‘kuakula mu diumvuangana’ ne bua ‘kuikala tshintu tshimue menemene mu meji amue ne mu lungenyi lumue.’ (1 Kol. 1:10, 11) Pashishe wakabapesha mibelu bua bilumbu bia bungi bivua bipangisha bena mu tshisumbu bua kuikalabu mu buobumue. Wakafila tshilejilu tshia mubidi wa muntu bua kuleja bua tshinyi bidi bikengela kuikala mu buobumue ne kukuatshishangana. Ke bualu kayi, wakakankamija bena Kristo bonso ba mu tshisumbu atshi bua kutabalelangana ne dinanga nansha bobu ne mudimu kayi. (1 Kol. 12:12-26) Dikuatshishangana dia nunku munkatshi mua bena mu tshisumbu didi dilomba dilongolola malu mu bulongame.

³ Kadi mmunyi muvuabu ne bua kulongolola tshisumbu tshia bena Kristo? Nnganyi uvua ne bua kutshilongolola? Mmunyi muvuatshi ne bua kuikala? Mbanganyi bavua ne bua kuambula majitu? Netupete mandamuna majalame a nkonko eyi tuetu balekele Bible utulombola.​—1 Kol. 4:6.

TSHILONGOLOLA BILONDESHILE DISUA DIA NZAMBI

⁴ Tshisumbu tshia bena Kristo tshiakajadikibua mu Pentekoste wa 33 P.Y. Ntshinyi tshidi tshilejilu tshia tshisumbu tshia mu bidimu lukama bia kumpala tshitulongesha? Bavua batshilongolole ne batshilombola bilondeshile disua dia Nzambi, mmumue ne: ku bukokeshi (mu tshiena Greke, kratos) bua Nzambi (theos). Miaku ibidi eyi idi mu 1 Petelo 5:10, 11. Malu akenzeka dituku adi mu Yelushalema kukadi bidimu bitue ku 2 000 adi aleja patoke ne: Nzambi ke uvua mujadike tshisumbu tshia bena Kristo bela manyi atshi. (Bien. 2:1-47) Tshivua nzubu wende, bena mu nzubu muende. (1 Kol. 3:9; Ef. 2:19) Tshisumbu tshia bena Kristo tshia lelu tshidi tshilonda mushindu uvuabu balongolole tshisumbu atshi ne mushindu uvua midimu yenzekamu.

⁵ Tshisumbu tshia mu bidimu lukama bia kumpala tshiakabanga ne bayidi batue ku 120. Bakanji kuitshikijila bantu aba nyuma muimpe bua kukumbaja mulayi wa mu Yoele 2:28, 29. (Bien. 2:16-18) Kadi anu dituku adi, bantu bakuabu batue ku 3 000 bakabatijibua mu mâyi ne kubuelabu mu tshisumbu tshia bantu bavua baledibue ku diambuluisha dia nyuma. Bakitaba mukenji uvua utangila Kristo ne “bakatungunuka ne kudifila ku malongesha a bapostolo.” Pashishe, “Yehowa pende uvua utungunuka ne kubakumbajila bantu bavua basungidibua.”​—Bien. 2:41, 42, 47.

⁶ Pavua muakuidi munene wa bena Yuda mumone muvua tshisumbu tshia bela manyi tshia mu Yelushalema tshidiunde, wakadilakana wamba ne: bayidi ba Yezu bavua buwuje Yelushalema tente ne malongesha abu. Munkatshi mua bayidi bapiabapia bavua mu tshisumbu tshia mu Yelushalema muvua bakuidi bena Yuda ba bungi.​—Bien. 5:27, 28; 6:7.

⁷ Yezu wakamba ne: “Nenuikale bantemu banyi mu Yelushalema, mu Yudaya mujima ne mu Samalea, too ne ku miaba ya kule menemene ya pa buloba.” (Bien. 1:8) Tshivua Yezu muambe ke tshiakenzeka. Pakabangabu kukengesha bayidi bavua mu Yelushalema panyima pa lufu lua Stefano, bakatangalaka mu Yudaya ne mu Samalea mujima. Kadi miaba yonso ivuabu baya, bakatungunuka ne kuamba lumu luimpe ne kuvuija bantu bavule bayidi too ne bena mu Samalea. (Bien. 8:1-13) Pashishe, bakatuadija kuyisha bantu ba bisamba bikuabu bavua kabayi batengula lumu luimpe, malu kuendawu bimpe. (Bien. 10:1-48) Mudimu wa diyisha eu wakenza bua bavuije bantu ba bungi bayidi, kufikishawu ku diledibua dia bisumbu mu miaba mikuabu pambelu pa Yelushalema.​—Bien. 11:19-21; 14:21-23.

⁸ Ntshinyi tshiakenzabu bua tshisumbu tshipiatshipia tshionso tshikale tshilongolola ne tshilombola bilondeshile disua dia Nzambi? Nyuma wa Nzambi wakambuluisha bua kutekabu balami bavua ku bukokeshi bua Kristo bua kutabalelabu tshisumbu tshia mikoko. Tshilejilu, Paulo ne Bânaba bakateka bakulu mu bisumbu biakakumbulabu mu luendu luabu lua kumpala lua bumisionere. (Bien. 14:23) Luka umue wa ku bafundi ba Bible udi ulonda malu avua mupostolo Paulo muambile bakulu ba mu Efeso pavuaye mudisangishe nabu. Paulo wakabambila ne: “Nudilame nuenu bine ne tshisumbu tshionso tshia mikoko tshidi nyuma muimpe munuteke batangidi munda muatshi, bua kulama tshisumbu tshia Nzambi tshivuaye musumbe ku mashi a Muanende yeye.” (Bien. 20:17, 28) Bavua bakumbane bua kuikala bakulu bualu bavua bakumbaje malu malomba a mu Bible. (1 Tim. 3:1-7) Bakapesha Tito pende bukenji bua kuteka bakulu mu bisumbu bia mu Kulete. Yeye Tito eu uvua muenzejanganyi wa mudimu ne Paulo.​—Tito 1:5.

⁹ Bu muvua bisumbu bienda bivula, bapostolo ne bakulu ba mu Yelushalema bakatungunuka ne kuikala batangidi. Bobu ke bavua ku mutu kua bisumbu bia bena Kristo bionso, ne bobu kabidi ke bavua benza kasumbu kaludiki ka bisumbu bionso abi.

¹⁰ Mupostolo Paulo wakafundila bena mu tshisumbu tshia mu Efeso uleja ne: dienza mudimu mu diumvuangana ne nyuma wa Nzambi divua mua kuambuluisha tshisumbu bua kulama buobumue ne kutumikila bumfumu bua Yezu Kristo. Wakalomba bena Kristo abu bua kuikala ne budipuekeshi ne kulama “buobumue bua mu nyuma” mu didisangisha ne bantu bonso badi mu tshisumbu mu ditalala. (Ef. 4:1-6) Ke Paulo kutela mêyi adi mu Misambu 68:18 bua kuleja muvua Yehowa mulongolole bua bantu balume badi bashindame mu nyuma kukuatshilabu tshisumbu mudimu: bamue bu bapostolo, bakuabu bu bambi, banga bu balami ne balongeshi. Bantu ba nunku (badi bikale mapa a kudi Yehowa) bavua ne bua kukolesha bisumbu bionso bua kufikabi ku tshiuwidi tshia mu nyuma bua kusankisha Nzambi.​—Ef. 4:7-16.

BISUMBU BIA LELU BIDI BILONDA DIKASA DIA BAPOSTOLO

¹¹ Lelu bisumbu bionso bia Bantemu ba Yehowa bidi bilonda tshilejilu tshia tshisumbu tshia mu bidimu lukama bia kumpala mu dilongolola dia malu. Bisumbu ebi bionso bisangisha bidi bienza tshisumbu tshidi mu buobumue tshia pa buloba bujima tshikale ne bena Kristo bela manyi bu nshindamenu watshi. (Zek. 8:23) Buobumue ebu budiku bualu Yezu Kristo mmushale ne bayidi bende bela manyi “matuku onso too ne ku nshikidilu kua ndongoluelu wa malu eu,” anu muvuaye mulaye. Bantu ba bungi badi benda babuela mu tshisumbu lelu eu badi bitaba lumu luimpe lua Nzambi, badilambula ne muoyo wabu mujima kudi Yehowa, ne babatijibua bua kulua bayidi ba Yezu. (Mat. 28:19, 20; Mâko 1:14; Bien. 2:41) Badi bitaba ne: Yezu Kristo udi “mulami muimpe wa mikoko” ne yeye ke Mfumu wa bena Kristo bela manyi ne wa “mikoko mikuabu.” Bisumbu bionso bibidi ebi bidi bienza tshisumbu tshimue. (Yone 10:14, 16; Ef. 1:22, 23) “Tshisumbu tshimue” atshi tshidi tshishala mu buobumue paditshi tshitaba ne: Kristo udi mfumuatshi ne tshishala tshilamate bumfumu buende abu ne tshikokela “mupika wa lulamatu udi mudimuke” udi Kristo muteke. Bu mukadi Kristo muteke mupika wa lulamatu, tutungunukayi ne kumueyemena ne muoyo umue.​—Mat. 24:45.

DIENZA MUDIMU NE TUSUMBU TUDI TUMANYIKE KUA MBULAMATADI

¹² Bua kukumbaja mudimu wa kufila biakudia bia mu nyuma mu tshikondo tshiakanyine ne kuyisha lumu luimpe lua Bukalenge kumpala kua nshikidilu kuluaye, mbenze tumue tusumbu tudi tumanyike kua mbulamatadi. Mikenji ya mu matunga a bungi mmitabe tusumbu tudi tumanyike kudi mbulamatadi etu ne tudi tueleshangana diboko. Bidi biambuluisha bua kuyisha lumu luimpe pa buloba bujima.

MUSHINDU UDIBU BALONGOLOLE FILIALE

¹³ Patubu bateka biro bia filiale kampanda, batu bateka Komite wa filiale muenza ne bakulu basatu anyi ba bungi bua kutabalela mudimu mu ditunga dimue anyi mavule adi filiale au utangila. Umue wa ku bakulu aba utu mulombodi wa komite wa filiale eu.

¹⁴ Bisumbu bidi ku bulombodi bua filiale yonso mbitapulula mu bijengu. Bijengu bitu bishilangane ku bunene bilondeshile muaba anyi miakulu, peshi bilondeshile bungi bua bisumbu bidi filiale utangila. Mutangidi wa tshijengu udi utangila bisumbu bionso bidi mu tshijengu tshiende. Biro bia filiale bitu bileja mutangidi wa tshijengu tshia kuenza bua kukumbaja midimu yende bimpe.

¹⁵ Bisumbu bionso bidi bitaba mushindu udibu balongolola malu eu ne biwulonda bua diakalenga dia bonso badimu. Bantu bonso badi bitaba bakulu badibu bateka bua kutangila mudimu mu filiale, mu bijengu ne mu bisumbu. Badi bindila biakudia bia mu nyuma bidi mupika wa lulamatu udi mudimuke ufila mu tshikondo tshiabi. Mupika wa lulamatu udi pende ukokela bukokeshi bua Kristo ne muoyo umue, ulonda mêyi a mu Bible ne buludiki bua nyuma muimpe. Padi bantu bonso benza mudimu mu buobumue, batu bapeta masanka anu bu muvuabi bienzekele bena Kristo ba mu bidimu lukama bia kumpala. Bible udi wamba ne: “Bushuwa, bisumbu biakatungunuka ne kukoleshibua mu ditabuja ne kuvulangana ku dituku ne ku dituku.”​—Bien. 16:5.