“Nuvuluke bantu badi balombola munkatshi muenu”

BADI mua kukudimuna kabidi mêyi a mupostolo Paulo adi mu Ebelu 13:7 ne: “Nuvuluke bantu badi banukokesha.” Kubangila anu mu Pentekoste wa mu tshidimu tshia 33 P.Y., bapostolo ba lulamatu ba Mukalenge Yezu Kristo ke bavua bakumbaja mudimu eu. Bobu ke bavua benza kasumbu kaludiki kavua kalombola tshisumbu tshia bena Kristo tshivuabu bafuma ku dienza. (Bien. 6:2-4) Bu mu tshidimu tshia 49 P.Y., kasumbu kaludiki aku kakadiunda ne kakatshivua anu ne bapostolo ba Yezu nkayabu to. Tshilejilu, dîba divua kasumbu kaludiki kangate dipangadika bua tshilumbu tshia ditengulangana, kakavua kenza ne “bapostolo ne bakulu ku Yelushalema.” (Bien. 15:1, 2) Bavua ne mudimu wa kukonkonona bilumbu bivua bitangila bena Kristo ba miaba yonso. Bakatuma mikanda ne mêyi avuabu basuike, kukoleshabi bisumbu ne kuenzabi bua bayidi bashale mu buobumue mu lungenyi ne mu bienzedi. Bisumbu bivua bitumikila malu avua kasumbu kaludiki kamba ne biakokela; ndekelu wa bionso Yehowa wakabibenesha biobi kuvulangana kabidi.​—Bien. 8:1, 14, 15; 15:22-31; 16:4, 5; Eb. 13:17.

² Panyima pa lufu lua bapostolo, butontolodi bukole buakatuadija. (2 Tes. 2:3-12) Anu muvua Yezu mulaye mu tshilejilu tshiende tshia blé ne lupela, bakamiamina ntete ya lupela (bena Kristo ba dishima) mu blé (bena Kristo bela manyi). Munkatshi mua bidimu nkama ne nkama, mfumu wakalekela bisumbu bibidi abi bikolela kaba kamue too ne ku dinowa, mmumue ne: tshikondo tshia ku “nshikidilu wa ndongoluelu wa malu.” (Mat. 13:24-30, 36-43) Tshikondo atshi bena Kristo bela manyi, muntu pa nkayende, bakatungunuka ne kuanyishibua kudi Yezu, kadi kakuvua kasumbu kaludiki to, kakuvua muntu uvua Yezu musungule bua kulombola bayidi bende pa buloba to. (Mat. 28:20) Nansha nanku, Yezu uvua mulaye ne: dishintuluka kampanda divua ne bua kuenzeka mu tshikondo tshia dinowa.

³ “Nnganyi menemene udi mupika wa lulamatu udi mudimuke?” Yezu Kristo wakela lukonko elu pakafilaye tshilejilu kampanda tshivua mu “tshimanyinu” tshivuaye mufile bua “nshikidilu wa ndongoluelu wa malu eu.” (Mat. 24:3, 42-47) Yezu wakaleja ne: mupika wa lulamatu eu uvua ne bua kuikala ne mudimu wa bungi wa kupesha bantu ba Nzambi biakudia bia mu nyuma “mu tshikondo tshiakanyine.” Anu bu muvua Yezu muenze mudimu ne kasumbu ka bantu balume bua kulombola mu bidimu lukama bia kumpala, pamutu pa muntu umue, bia muomumue mupika wa lulamatu udi Yezu muteke mu tshikondo tshia ku nshikidilu wa ndongoluelu wa malu eu ki mmuntu umue to.

“MUPIKA WA LULAMATU UDI MUDIMUKE” NNGANYI?

⁴ Nnganyi uvua Yezu muteke bua kudisha bayidi bende? Mbikumbane bua kuamba ne: uvua mua kuenza mudimu ne bena Kristo bela manyi badi pa buloba. Bible udi wamba mudibu “bakuidi bikale bakalenge” bavuabu bapeshe mudimu wa “‘kumanyisha miaba yonso bikadilu bitambe buimpe’ bia Yeye uvua [mubabikile] bua kupatuka mu mîdima kubuela mu butoke buende bua dikema.” (1 Pet. 2:9; Mal. 2:7; Buak. 12:17) Bela manyi bonso badi pa buloba badi benza mupika wa lulamatu anyi? Tòo. Pavua Yezu mudishe musumba wa bantu balume batue ku 5 000 mu tshishima, pa kumbusha bakaji ne bana, uvua mupeshe bayidi bende biakudia abi, bobu pabu kubipesha musumba wa bantu abu. (Mat. 14:19) Wakadisha bantu ba bungi ku diambuluisha dia bantu bakese. Lelu, udi ufila biakudia bia mu nyuma mu mushindu wa muomumue.

⁵ Nunku “mulami wa lulamatu udi mudimuke” mmuenza ne kasumbu kakese ka bena Kristo bela manyi. Anu bena Kristo aba nkayabu ke badi balongolola biakudia bia mu nyuma ne babifila mu tshikondo tshia dikalaku dia Kristo. (Luka 12:42) Mu matuku a ku nshikidilu aa, bena Kristo bela manyi badi benza “mupika wa lulamatu udi mudimuke” badi benza mudimu pamue ku biro bidi bilombola mudimu wetu pa buloba bujima. Lelu, bena Kristo bela manyi aba ke Kasumbu kaludiki ka Bantemu ba Yehowa.

⁶ Kristo udi ukuata mudimu ne kasumbu aka bua kuleja mudi milayi ya mu Bible ikumbana ne kutupesha mibelu ya mua kutumikila mêyi manene a mu Bible mu malu etu a buatshia buila. Tutu tupeta mibelu eyi pa dîba diayi. Badi bafila biakudia bia mu nyuma ebi ku diambuluisha dia bisumbu bia Bantemu ba Yehowa. (Yesh. 43:10; Gal. 6:16) Mu tshikondo tshivuabu bafunda Bible, mupika uvuabu beyemena anyi mulami wa bintu, uvua utangila bintu bia mu nzubu bionso. Bia muomumue, mbapeshe mupika wa lulamatu udi mudimuke mudimu wa kutangila bena mu nzubu wa ditabuja. Nunku mupika wa lulamatu udi utangila kabidi bintu bia mudimu, mudimu wa diyisha, dilongolola programe ya mpuilu ne mpungilu, diteka batangidi mu midimu mishilashilangane mu bulongolodi buetu, dipatula mikanda idi yumvuija Bible, bionso ebi bua kuambuluisha “bena mudimu.”​—Mat. 24:45.

⁷ Mpindieu “bena mudimu” mbanganyi? Mu tshikoso, mbantu badibu badisha. Kumpala, bela manyi bonso ke batuvua tuangata bu bena mudimu. Kadi pashishe tuetu kumona ne: bela manyi pamue ne musumba munene wa “mikoko mikuabu” bonso mbena mudimu. (Yone 10:16) Bisumbu bionso bibidi ebi bidi bipeta biakudia bia mu nyuma bidi mupika wa lulamatu ufila.

⁸ Mu dikenga dinene, palua Yezu bua kulumbuluisha ndongoluelu mubi eu ne kumubutula, neateke mupika wa lulamatu “ku mutu kua bintu biende bionso.” (Mat. 24:46, 47) Bantu badi benza mupika wa lulamatu nebapete difutu diabu dia mu diulu. Bobu pamue ne bashadile ba ku bela manyi 144 000 nebakokeshe ne Kristo mu diulu. Nansha muikalaku kakutshiyi mupika wa lulamatu udi mudimuke pa buloba, Yehowa ne Yezu nebenze mudimu ne bantu batekabu bu “bakokeshi” bua kulombola bantu bikala pa buloba bakokela Bukalenge bua Masiya.​—Mis. 45:16.

BUA TSHINYI ‘KUVULUKA BANTU BADI BALOMBOLA’?

⁹ Kudi malu a bungi adi atusaka bua ‘kuvuluka bantu badi balombola’ ne kubeyemena. Bua tshinyi kuenza nunku nkuimpe buetu tuetu? Mupostolo Paulo wakafunda ne: “Badi batungunuka ne kunulama bu bantu balua kufila luapolo lua mudimu wabu, bua bamone mua kuenza nunku ne disanka kabayi batua mikemu, tshianana bualu ebu budi mua kunukebela lutatu.” (Eb. 13:17) Mbia mushinga bua tuetu kutumikila bantu badi batulombola ne kubakokela bualu badi batungunuka ne kutulama bua tuikale bimpe mu nyuma.

¹⁰ Anu mudibi bileja mu 1 Kolinto 16:14, Paulo wakamba ne: “Malu onso anudi nuenza enzeke mu dinanga.” Mapangadika onso adibu bangata bua bantu ba Nzambi mmashindamene pa ngikadilu wa mushinga mukole wa dinanga. 1 Kolinto 13:4-8 udi wamba bua dinanga ne: “Dinanga didi ne lutulu ne bulenga. Dinanga kadiena ne mukawu. Kadiena ne diambu, kadiena didiuwuja, kadiena dienza malu a bundu, kadiena didikebela anu masanka adi, kadiena dikuata tshiji. Kadiena dibalulula malu mabi. Kadiena disanka bua malu adi kaayi makane, kadi didi disanka ne bulelela. Didi dikolesha muoyo mu malu onso, ditabuja malu onso, ditekemena malu onso, dinanukila mu malu onso. Dinanga kadiena dishikila nansha.” Bu mudi dinanga dilombola mapangadika onso adibu bangata bua disanka dia batendeledi ba Yehowa, katuena mua kutshina bulombodi ebu to. Bualu ebu budi buleja kabidi mudi Yehowa mutunange.

¹¹ Anu muvuabi mu bidimu lukama bia kumpala, bantu badi Yehowa muteke bua kulombola bantu bende mbapange bupuangane. Nansha nanku Yehowa wakasungula bantu bapange bupuangane bua kukumbaja disua diende ku kale. Tshilejilu, Noa wakenza buatu ne wakayisha bantu bua kabutu kavua ne bua kulua tshikondo tshiende. (Gen. 6:13, 14, 22; 2 Pet. 2:5) Nzambi wakasungula Mose bua kupatula bantu bende mu Ejipitu. (Ekes. 3:10) Wakapesha bantu bapange bupuangane nyuma muimpe bua kufundabu Bible. (2 Tim. 3:16; 2 Pet. 1:21) Bu mudi Yehowa muteke bantu bapange bupuangane lelu bua kulombola mudimu wa kuyisha ne kuvuija bantu bayidi, kabiena bitupangisha bua kushala beyemene bulongolodi buende nansha. Kadi bidi bitukolesha bualu tudi bamanye ne: bu Yehowa kayi utukuatshisha, bulongolodi buende kabuvua mua kukumbaja bionso bidibu buenza to. Mu ntatu ne mu malu makuabu a bungi, mupika wa lulamatu mmuleje ne: nyuma wa Nzambi ke udi ulombola malu. Tshitupa tshia bulongolodi bua Yehowa tshidi tshimueneka ntshipete masanka a bungi lelu. Nunku tudi tubukuatshisha ne tubueyemena ne muoyo mujima.

MUTUDI MUA KULEJA NE: TUDI BEYEMENE BULONGOLODI

¹² Bantu badibu bateke ku mutu kua tshisumbu badi baleja mudibu beyemene bulongolodi padibu bitaba midimu idibu babapesha ne bayenza ne disanka dionso anu mudibi bikengela. (Bien. 20:28) Tuetu bamanyishi ba Bukalenge, tudi tuyisha ku nzubu ne ku nzubu, tupinganyina bantu ne tulonga nabu Bible ne tshisumi. (Mat. 24:14; 28:19, 20) Bua tuetu kupeta masanka a bungi bua biakudia bia mu nyuma bidi mupika wa lulamatu utupesha, anu tuetu tulongolola bisangilu bionso ne tubuelamu, ne tubuela mu mpuilu ne mpungilu. Tudi tupeta kabidi masanka mavule patudi tudisangisha ne bena Kristo netu bua kukankamijangana.​—Eb. 10:24, 25.

¹³ Tudi tuleja mutudi beyemene bulongolodi buetu patudi tufila mapa. (Nsu. 3:9, 10) Patudi tumona bana betu mu dikenga, tudi tubambuluisha katuyi tujingakana to. (Gal. 6:10; 1 Tim. 6:18) Tudi tuenza nanku bualu tudi banange bana betu, tukeba mushindu wa kuleja Yehowa ne bulongolodi buende dianyisha misangu yonso bua malu mimpe onso atudi bapete.​—Yone 13:35.

¹⁴ Tudi tuleja kabidi ne: tudi tueyemena bulongolodi buetu patudi tutumikila mapangadika adibu buangata. Mmumue ne: padi bantu badibu bateke bua kutulombola bu mudi batangidi ba bijengu ne bakulu batupesha buludiki kampanda, tudi tudipuekesha tubulonda. Bana betu aba badi mu “bantu badi balombola,” batudi ne bua kutumikila ne kukokela. (Eb. 13:7, 17) Nansha tuetu katuyi bumvue bimpe menemene tshidibu bangatshile amue mapangadika, tudi bamanye ne: kuatumikila nekutuambuluishe bua kashidi. Yehowa udi utubenesha patudi tutumikila Dîyi diende ne tukokela bulongolodi buende. Nunku tudi tuleja mutudi tukokela Mfumu wetu Yezu Kristo.

¹⁵ Bushuwa, tudi ne malu a bungi adi atusaka bua kueyemena mupika wa lulamatu udi mudimuke. Satana nzambi wa ndongoluelu wa malu eu udi wenza muende muonso bua kupendesha dîna dia Yehowa ne bulongolodi buende. (2 Kol. 4:4) Katuponyi mu mateyi a Satana to. (2 Kol. 2:11) Mmumanye ne: nkumushadile anu “tshikondo tshîpi” bua kumuelabu mu dijimba, ke bualu kayi mmudisuike bua kupambuisha batendeledi ba Yehowa ba bungi. (Buak. 12:12) Kadi bu mudi Satana uvudija mateyi ende, tusemenayi pabuipi menemene ne Yehowa. Tueyemenayi Yehowa ne mupika wa lulamatu udiye muteke bua kulombola bantu bende lelu. Patudi tuenza nanku, tudi tushala mu buobumue bu bana ba muntu.