Tuitabayi mudimu udi Nzambi mupeshe Kristo

“KU TSHIBANGIDILU Nzambi wakafuka diulu ne buloba,” ne bintu bionso bivuaye muenze bivua “bimpe be!” (Gen. 1:1, 31) Yehowa uvua mufuke bantu bua bikale ne nsombelu mulenga. Kadi buntomboji bua mu Edene buakanji kunyanga nsombelu wa disanka ukavuaye mulongoluele bukua bantu. Nansha nanku, malu avua Yehowa mulongolole bua buloba ne bua bantu kaavua mashintuluke to. Nzambi wakaleja ne: bana ba Adama bikala mua kumutumikila bavua ne bua kupikudibua. Kulayaye ne: bavua ne bua kujadikulula ntendelelu mulelela ne kubutula mubi ne midimu yende yonso mibi. (Gen. 3:15) Nanku bintu bionso nebilue kabidi “bimpe be!” Yehowa neenze malu aa ku butuangaji bua Muanende Yezu Kristo. (1 Yone 3:8) Ke bualu kayi, tudi ne bua kuitaba mudimu udi Nzambi mupeshe Kristo.​—Bien. 4:12; Filip. 2:9, 11.

MUDIMU UDI NAWU KRISTO

² Patudi tutangila mudimu udi Nzambi mupeshe Kristo, tudi tumona ne: mudimu eu udi ne bitupa bia bungi. Yezu mMukuudi wa bantu, mMuakuidi Munene, mMfumu wa tshisumbu tshia bena Kristo, ne lelu eu mMukalenge wa Bukalenge bua Nzambi. Kuelangana meji a midimu eyi nekuvudije dianyisha dietu bua malu adi Nzambi mulongolole ne nekutusake kabidi bua kunanga Kristo Yezu bikole. Tumonayi mudi Bible umvuija midimu yende eyi.

³ Pavua Kristo uyisha pa buloba, biakamueneka patoke ne: ku butuangaji buende, bantu bavua batumikila Nzambi bavua mua kulengeja malanda abu ne Nzambi. (Yone 14:6) Bu mudiye Mukuudi wa bantu, wakadifila bu tshia kupikulangana natshi pa muaba wa bantu ba bungi. (Mat. 20:28) Nunku Yezu kena anu tshilejilu tshia muntu wa ngikadilu mimpe to. Yeye ke wenza bua malu adi Nzambi mulongoluele bantu akumbane. Yeye ke njila umuepele utudi mua kulonda bua Nzambi kutuanyisha tshiakabidi. (Bien. 5:31; 2 Kol. 5:18, 19) Lufu lua Yezu ne dibishibua diende ku lufu biakunzuluila bantu badi batumikila Nzambi njila wa kupeta masanka a kashidi pikala Bukalenge bua Nzambi bukokesha.

⁴ Bu mudi Yezu Muakuidi Munene, udi ‘utumvuila mu matekete etu’ ne ubuikila mpekatu ya bayidi bende badi pa buloba badi badilambule kudi Nzambi. Mupostolo Paulo wakumvuija ne: “Katuena ne muakuidi munene udi kayi mua kutumvuila mu matekete etu, kadi tudi ne muakuidi udi mutetshibue mu malu onso bu tuetu, kadi kayi ne mpekatu.” Pashishe wakakankamija bantu badi baleja ditabuja kudi Yezu Kristo bua kuenza muabu muonso bua bafike ku dilengejangana ne Nzambi, wamba ne: “Nunku tusemenayi ku nkuasa wa bukalenge wa ngasa ne dikima dia kuakula, bua tupete luse ne ngasa bua kutuambuluisha pa dîba dikumbane.”​—Eb. 4:14-16; 1 Yone 2:2.

⁵ Yezu udi kabidi Mfumu wa tshisumbu tshia bena Kristo. Anu bu bayidi bende ba mu bidimu lukama bia kumpala, lelu katuena petu dijinga ne muntu wa pa buloba bua kutulombola to. Yezu udi ulombola tshisumbu ku diambuluisha dia nyuma muimpe ne dia balami bakumbane badi ku bukokeshi buende. Balami aba nebamupeshe yeye ne Tatuende wa mu diulu luapolo lua mudimu wabu wa ditabalela tshisumbu tshia mikoko ya Nzambi. (Eb. 13:17; 1 Pet. 5:2, 3) Yehowa wakamba mêyi a buprofete adi atangila Yezu a ne: “Monayi! Mvua mumuvuije ntemu kudi bisamba, mulombodi ne mukokeshi kudi bisamba.” (Yesh. 55:4) Yezu wakajadika dikumbana dia mulayi eu pakambilaye bayidi bende ne: “Kabanubikidi ne: balombodi, bualu Mulombodi wenu udi anu umue, Kristo.”​—Mat. 23:10.

⁶ Yezu mmutuleje tshidi lungenyi luende ne mudiye mudilongolole bua kutuambuluisha padiye utubikila wamba ne: “Luayi kundi, nuenu bonso badi batata ne midimu mikole ne bambule majitu mabapite, nennupeshilule bukole. Ambulayi mutshi wanyi wa tshikokedi, nulonge malu kundi, bualu meme ndi mupole malu ne mupuekele mu muoyo, nunku nuenu nenupetulule bukole. Bualu mutshi wanyi wa tshikokedi mmuimpe ne bujitu buanyi mbupepele.” (Mat. 11:28-30) Padi Yezu Kristo ulombola tshisumbu tshia bena Kristo ne bupole mu mushindu wa kutupeshilula bukole, udi uleja mudiye “mulami muimpe wa mikoko” udi ulonda tshilejilu tshia Tatuende wa mu diulu Yehowa Nzambi.​—Yone 10:11; Yesh. 40:11.

⁷ Mu mukanda wa kumpala uvua Paulo mufundile bena Kolinto, wakumvuija mudimu mukuabu udi nawu Yezu Kristo wamba ne: “Udi ne bua kukokesha bu mukalenge too ne padi Nzambi uteka bena lukuna bonso muinshi mua makasa ende. Kadi patekibua bintu bionso ku bukokeshi buende, dîba adi Muana muine neaditeke pende ku bukokeshi bua Yeye uvua muteke bintu bionso ku bukokeshi buende, bua Nzambi ikale bintu bionso kudi muntu yonso.” (1 Kol. 15:25, 28) Yezu ke tshifukibua tshia kumpala tshia Nzambi. Kumpala kua kuluaye pa buloba uvua “muena mudimu mupiluke” wa Nzambi mu diulu. (Nsu. 8:22-31) Pavua Nzambi mutume Yezu pa buloba, uvua wenza disua dia Nzambi misangu yonso. Wakashala ne lulamatu kudi Tatuende too ne kumpala kua lufu luvua diteta dipite bukole. (Yone 4:34; 15:10) Bu muvua Muanende mushale ne lulamatu too ne ku lufu, Nzambi wakamubisha ku lufu kuyaye mu diulu ne kumupeshaye bukenji bua kuikala Mukalenge wa Bukalenge bua mu diulu. (Bien. 2:32-36) Bu mudi Kristo Yezu Mukalenge, Nzambi mmumupeshe mudimu munene wa kulombola binunu ne binunu bia bifukibua bia mu nyuma bua kumbusha bukokeshi bua bantu ne malu mabi onso pa buloba. (Nsu. 2:21, 22; 2 Tes. 1:6-9; Buak. 19:11-21; 20:1-3) Pashishe Bukalenge bua Nzambi bua mu diulu budi Kristo ulombola abu nebukokeshe buobu nkayabu buloba bujima.​—Buak. 11:15.

TSHIDI KUITABA MUDIMU UDI NAWU KRISTO KUMVUIJA

⁸ Yezu Kristo ntshilejilu tshietu ne mmupuangane. Mbamupeshe mudimu wa kututabalela. Bua yeye kutunanga ne kututabalela bimpe, tudi ne bua kushala ne lulamatu kudi Yehowa ne kuenda pamue ne bulongolodi buende budi buenda buya kumpala.

⁹ Bayidi ba Yezu ba mu bidimu lukama bia kumpala bavua bitaba mudimu udi Nzambi mupeshe Kristo bawitaba ne muoyo mujima. Bakaleja bualu ebu mu dienza mudimu mu buobumue ku bukokeshi bua Kristo, bakokela mushindu uvuaye ulombola malu ku diambuluisha dia nyuma muimpe. (Bien. 15:12-21) Mupostolo Paulo wakakula bua buobumue buvua mu tshisumbu tshia bena Kristo bela manyi pakafundaye ne: “Patudi eku tuamba bulelela, mu dinanga, tukolayi mu malu onso munda mua yeye udi ku mutu, Kristo. Kudiye, mbalamakaje mubidi wonso pamue bimpe ne mmuenza bua wikale ukuatshishangana ku diambuluisha dia dinungu dionso didi difila tshidi tshikengedibua. Padi tshitupa tshionso tshienza mudimu watshi bimpe, bidi biambuluisha mubidi bua kukolawu padiwu udibaka nkayawu mu dinanga.”​—Ef. 4:15, 16.

¹⁰ Padi bena mu tshisumbu beleshangana diboko ne bonso benza mudimu mu diumvuangana ku bulombodi bua Kristo, tshisumbu tshidi tshiya kumpala ne benamu badi banangangana bualu dinanga didi “tshisuikidi tshipuangane tshia buobumue.”​—Yone 10:16; Kolos. 3:14; 1 Kol. 12:14-26.

¹¹ Malu adi enzeka pa buloba adi akumbaja milayi ya mu Bible ne ajadika bimpe ne: bakadi bapeshe Yezu Kristo bukokeshi bua Bukalenge katshia ku 1914. Mpindieu udi ukokesha munkatshi mua bena lukuna bende. (Mis. 2:1-12; 110:1, 2) Malu aa adi umvuija tshinyi bua bantu badi pa buloba lelu? Mu katupa kîpi emu, Yezu nealeje mudiye Mukalenge wa bakalenge ne Mfumu wa bamfumu pabutulaye bena lukuna bende. (Buak. 11:15; 12:10; 19:16) Pashishe mulayi wa Yehowa wa kupikula bantu uvuaye muleje ku ntuadijilu kua buntomboji bua bantu newukumbanyine badi ku tshianza tshia balume tshia Kristo badiye wanyisha. (Mat. 25:34) Tudi ne disanka dia bungi bua mutudi bitabe mudimu udi Nzambi mupeshe Kristo. Tushalayiku mu buobumue mu dienza mudimu wa diyisha pa buloba bujima ku kulombodi bua Kristo mu matuku a ku nshikidilu aa.