Bisangilu Bidi Bisaka ku dinanga ne ku bienzedi bilenga

Bena nkristo ba kumpala bavua badisangisha mu nzubu kampanda bua kulonga ne kukoleshangana. Lelu’eu, bisumbu bia Bantemu ba Yehowa bidi bidisangisha misangu isatu ku lumingu. Udi mubikidibue ne musangelu bua kubuela mu bisangilu ebi. Kamuena bilele bijadika; kadi bidi bikoka ntema ya bateleji ku malongesha a Nzambi. Bisangilu bia tshisumbu bidi bituadija ne bijika ne musambo ne disambila. Badi babuelamu patupu, kabidi kamuena dienzejibua bua kusangisha mfranga.​—⁠Bienzedi 4:23-31; 14:22; 15:32, 35; Lomo 16:5; Kolosai 4:15.

Imue misangu, tshisangilu tshia patoke ke tshiudi mua kubuela bua musangu wa kumpala. Badi benzamu diyuki dia minute 45 pa malongesha a mu Bible, milayi anyi mibelu idi itangila nsombelu wa buena-nkristo. Pashishe, badi badilonda kudi dilonga dia Bible dishindamene pa tshiena-bualu tshia La Tour de Garde tshienza nangananga bua tshisumbu kutshikonkonona. Tshidi tshituadija nunku: mulombodi udi ubadisha diambedi tshikoso mu La Tour de Garde, pashishe wela bateleji nkonko idi kunshi kuatshi; muntu udi musue kufila diumvuija udi wela tshianza kulu bua kulomba dîyi; pa tshibidilu mumvuija mavule adi afidibua mu tshikoso tshionso. Dilonga edi didi dienzeka munkatshi mua dîba dijima.

Kunyima kua matuku makese mu lumingu, kudi kuenzeka bisangilu bibidi bidi binenga munkatshi mua minute 45 ku tshisangilu tshionso. Tshia kumpala, nKalasa ka mudimu wa Bukalenge. Kadi katulongesha bua kusangisha mamanyisha mavule pa biena-bualu bia mu Bible ne kulongesha bua kupatula bipeta bilenga. Kunyima kua minute 21 idi itangila dilongesha dia pa buadi, kudi balongi badianjila kusungula kumpala bua kuenza miyuki mipi. Kunyima kua diyuki dionso, mulongeshi wa Kalasa udi upesha mulongi yonso mibelu bua kumuambuluisha bua kudiunda. Kudi mikanda mivule idi mienjibue bua kalasa aka. Aba badi ne tshibidilu tshia kubuela mu bisangilu bàdi mua kudifundisha dîna mu kalasa aka anu bikalabo ne nsombelu udi mumvuangane ne mêyi-maludiki a buena-nkristo.

Pashishe bakalonda kudi tshisangilu tshia mudimu. Tshidi ne bitupa bisatu anyi binayi bidi bitangila dimanyisha dia lumu luimpe ku nzubu ne ku nzubu anyi luseke lukuabo lua midimu ya Nzambi. Bidi mua kuikala diyuki, diyukilangana anyi manaya, imue misangu diela bateleji nkonko. Tshitupa tshinene tshia programme eu ntshishindamene pa Mudimu wetu wa Bukalenge, dibeji dia nseke inayi didi ne mibelu mipatula ku ngondo yonso kudi Société Watch Tower.

Tshisangilu tshisatu tshìdì tshienzeka mu lumingu ndilonga dia pa tshibidilu dìdì dienjibua mu tusumbu tukese mu nzubu kampanda ìdì mu tshijengu tshia tshisumbu. Dilonga edi ndishindamene pa Bible ne pa mukanda mupiamupia mupatula kudi Société. Bu mudi kasumbu kapite bukese, muntu yonso udi ne mushindu wa kubuela mu diyukidilangana, kabidi mbipepele bua bateleji kumanyanganabo bimpe bitambe.

Bisumbu bivule bidi bienzela bisangilu biabo mu Nzubu ya Bukalenge miibaka kudi Bantemu ba Yehowa bobo nkayabo. Makuta adi abambuluisha bua midimu eyi mmafume ku mapa a budisuile mafila kudi Bantemu, kabidi mu nsombelu mivule, midimu idi yenjibua patupu kudi bena mudimu badi kabayi bafutshibua. Mu bisangilu bionso, kudi tushete tuteka bua mapa bua muntu yonso udi musue kufila mapa.

Ku diambuluisha dia bisangilu bia tshisumbu, Bantemu ba Yehowa badi balonda mubelu eu mufila mu Ebelu 10:24, 25 (MN): “Tuenzayi madikolela bua kusakangana ku dinanga ne ku malu mempe, katuyi tulekela didisangisha dietu pamue, bu mudi tshilele tshia bakuabo, kadi tukoleshangane ku muoyo, tutamba kuenza nunku bu mutudi tumona dituku dienda disemena pabuipi.”

• Bisangilu bia bena nkristo ba kumpala bivua ne amue malu kayi adi asanganyibua lelu’eu mu bisangilu bia Bantemu ba Yehowa?

• Umvuija mushindu udi bisangilu bitanu bia pa tshibidilu bilongolola kudi Bantemu ba Yehowa bienzeka.

• Bantemu badi bafika ku dipeta nzubu yabo ya bisangilu mushindu kayi?

[Miaku miumvuiji ya tshimfuanyi pa dibeji 14]

Mukulu ulombola dilonga dia La Tour de Garde, mu Etats-Unis

Kalasa ka mudimu wa Bukalenge (ka bakulu), mu bidiila bia Féroé

Kasumbu kakese ka bantu balonga mu nzubu kampanda, ku Yap

Nzubu wa Bukalenge wa ku New Braunfels, mu Etats-Unis, muibaka munkatshi mua matuku abidi kudi Bantemu ba Yehowa

[Miaku miumvuiji ya tshimfuanyi pa dibeji 15]

Nzubu ya Bukalenge mu matunga mashilangane

Japon

Australie

Autriche

Espagne