Bisumbu Bua Kukoleshangana mu dinanga ne mu buobumue

Imue misangu, ukadi mubuele mu bimue bia ku bisangilu bia Bantemu ba Yehowa pabuipi ne muaba wudi musombele. Uvua musanganemu bantu ba mishindu yonso, meku majima, bajike, bansongalume ne bansongakaji, bantu banunu. Bonso badi mu buobumue mu ditendelela diabo ne badi baditatshisha bua kuambuluisha bantu nabo.

Muaba wonso udi bantu bavule bajinga kuenza mudimu mu buobumue, kudi ne bua kuikala bulongolodi. Nzambi udi Nzambi wa bulongame; nunku, bulongame abu budi ne bua kumueneka mu tshisumbu tshia bantu bende. Anu muvuabi mu bidimu lukama bia kumpala, lelu’eu bena nkristo bapiluke, bakumbane ne bamonemone mianda mbatekibue bakulu anyi batangidi. Badi balombola tshisumbu ne batabalela ku biditshi tshikengela mu nyuma. Mbambuluishibue kudi bantu bakuabo ba lulamatu badibo babikila ne: basadidi ba midimu. Bantu aba kabena bapeta difutu anyi diambuluisha ne bintu bia ku mubidi; badi benza mudimu ku budisuile, mudimu wabo wa bianza udi ubambuluisha bua kupeta bintu bidibo bakengela.​—⁠1 Kolinto 14:33, 40; Filipoi 1:1; 1 Timote 3:8, 9.

Bantu aba mbasungudibue mushindu kayi? Mmunkatshi mua basadidi ba lulamatu ba Nzambi badi bakumbaja amue malu malomba mu Bible. Tshilejilu, badi ne bua kuikala ‘bena meji mapole, bena bulongame, bakididianganyi, bakumbane mua kulongesha, kabayi bena bilumbu, kabayi banangi ba mfranga; bidi bibakengela kulombola ba mu nzubu muabo mu mushindu mulenga; kabikadi bapiabapia mu ditabuja; bidi bibakengela kuikala ne lumu luimpe kudi bantu ba pambelu.’ Kabidi, bidi bibakengela ‘kulamata ku dîyi didi mua kueyemenyibua pa bidi bitangila ndongeshilu wabo mulenga.’​—⁠1 Timote 3:1-15; Tito 1:7-9, MN.

Balume aba ki mbasungudibue mu midimu yabo ku diela dia tukanda kudi bena tshisumbu nansha, bualu tshidi mua kuikala imue misangu ne bena nkristo bapiabapia mu ditabuja. Kadi, badi babalombela midimu yabo kudi balume bapiluke ne bamonemone mianda badi bakulu ne badi ne busunguluji budi bukengedibua bua kumona bu bikalabo bakumbaja malu malomba mu Mifundu Minsantu. Disungudibua dia bakulu ne dia basadidi ba midimu didi dienjibua ku bulombodi bua Kasumbu kaludiki ka Bantemu ba Yehowa, bilondeshile tshilejilu tshishiya kudi tshisumbu tshia bena nkristo tshia mu bidimu lukama bia kumpala.

Bakulu anyi batangidi aba ki mbamfumu ba tshisumbu nansha; kabena bakokesha bena mudimu nabo bu bamfumu to. Anu bu muvua Yezu muambe, muntu udi musue kulombola mikoko udi ne bua kuikala mupika wa buonso. Mu bisumbu bia Bantemu ba Yehowa, bakulu mbakuatshishanganyi ba mudimu ne bakuabo bena nkristo bua Bukalenge bua Nzambi.​—⁠Matayi 20:26, 27; 23:8-11; Lomo 12:8; 1 Kolinto 3:5; 4:1, 2; Kolosai 4:11; 1 Tesalonike 5:12-14.

Bu mudibo batangidi, badi balombola dilongesha didi difidibua mu bisangilu, kabidi badi bilejilu mu mudimu wa buambi. Tshipatshila tshia kumpala tshia tshisumbu, ntshia kumanyisha lumu luimpe lua Bukalenge mu tshijengu tshidibo batshipeshe. Batangidi badi benza mudimu kabidi bu balami; badi bakumbula bena mu tshisumbu bua kubakankamija bilondeshile bidibo bakengela.​—⁠Matayi 24:14; Bienzedi 1:8; 1 Tesalonike 2:11, 12; 5:14, 15; 2 Timote 2:24-26; Ebelu 13:17; Yakobo 5:13-16; 1 Petelo 5:1-4.

Bakulu badi kabidi ne mudimu wa kubela ne kunyoka muntu udi ulonda njila mubi, ujinga kutundubija bukezuke bua mu nyuma peshi ngikadilu mulenga ne buobumue bua tshisumbu.​—⁠1 Kolinto 5:4, 5, 7, 11-13; Tito 1:9; 2:15; 3:10, 11.

Biwikala ne tshibidilu tshia kutantshila tshisumbu, neupete mabenesha mavule a mu nyuma, kabidi neusanganemu bantu ba tshitembu ba kusombeshangana nabo.​—⁠Misambu 35:18; 84:10.

• Mbanganyi badi batabalela bua malu wonso kuendawo bimpe mu tshisumbu tshionso?

• Batangidi aba mbasungudibue bilondeshile malu kayi?

• Badi ne midimu kayi?

[Miaku miumvuiji ya tshimfuanyi pa dibeji 13]

Batangidi badi balongesha tshisumbu, bafila tshilejilu mu mudimu wa buambi ku nzubu ne ku nzubu, bakankamija bena nkristo bakuabo ku makumbula abo ku nzubu, bafila mibelu ne banyoka padibi bikengedibua