Tshitupa 6
Bua Tshinyi Nzambi Mmulekele Makenga
1, 2. Mmunyi muakanyanga baledi betu ba kumpala ntuadijilu mulenga wakabapeshabu kudi Nzambi?
NTSHINYI tshiakanyanga malu? Ntshinyi tshiakenzeka tshivua tshinyangishe ntuadijilu mulenga uvua Nzambi mupeshe baledi betu ba kumpala mu Mparadizu wa mu Edene? Bua tshinyi, pamutu pa ditalala ne diumvuangana bia mu Mparadizu, bubi ne makenga mbitangalake munkatshi mua binunu bia bidimu?
2 Kabingila kadi ne: Adama ne Eva bakenza mudimu bibi ne budisunguidi buabu. Bakapua muoyo bualu bua se: kabavua babafuka bua kudilubulukila batapuluke kudi Nzambi ne ku mikenji yende. Bakapangadija bua kulua badilamune kudi Nzambi, bela meji ne: ebi bivua mua kuakaja nsombelu wabu. Nunku bakasambuka mikalu miteka kudi Nzambi ya budisunguidi.—Genese, nshapita 3.
Tshilumbu tshia bumfumu bukulu pa bintu bionso
3-5. Bua tshinyi Nzambi kakabutula diakamue Adama ne Eva ne kubangulula kabidi?
3 Bua tshinyi Nzambi kakashipa diakamue Adama ne Eva ne kuenzulula dîku dikuabu dia bantu? Bualu bumfumu buende bukulu pa bionso, mbuena kuamba ne: bukenji buende bua kukokesha budi kabuyi mua kupianyibua kudi munga muntu, buvua buedibue mpata.
4 Tshilumbu tshivua ne: Nnganyi udi ne bukenji bua kukokesha, ne mbukokeshi bua nganyi budi buakane? Bu mudiye Wa-Bukole-Buonso ne Mufuki wa bifukibua bionso, Nzambi udi ne bukenji bua kukokesha bifukibua ebi. Ne bu mudiye muena meji onso, bukokeshi buende mbutambe buimpe bua bifukibua bionso. Kadi bukokeshi bua Nzambi buvua buedibue mpindieu mpata. Kabidi, kuvuaku bubi kampanda kudi muntu—tshifukibua tshiende—anyi? Netukonkonone pashishe mudi tshilumbu tshia muoyo-mutoke wa bantu tshibuelakane mu bualu ebu.
5 Pakadilamuna muntu kudi Nzambi, tshilumbu tshikuabu tshiakajuka: Bantu bavua mua kuenza malu bimpe bikalabu kabayi balombola kudi Nzambi anyi? Bushuwa Mufuki uvua mumanye diandamuna, kadi mushindu mulelela wa bukua-bantu kudisokololabu uvua wa kubapesha budikadidi bua tshishiki buvuabu basue. Bakasungula njila au wa budisunguidi buabu nkayabu, nunku Nzambi wakitaba bua kuenzekabi.
6, 7. Bua tshinyi Nzambi mmushile bantu budikadidi buonso mutantshi bule nunku?
6 Pa kulekela bantu tshikondo tshile bua benza malu abu ne budikadidi buonso, Nzambi uvua mua kujadika bua kashidi bikala bantu mua kuikala ne nsombelu muimpe muinshi mua bulombodi Buende peshi muinshi mua bulombodi buabu nkayabu. Ne tshikondo tshibalekela tshivua ne bua kuikala tshile bua bantu kufikabu ku tshivuabu bamone se: ke pa ndekelu wa malu abu a tshididi, a biapu, sianse, ne luondapu.
7 Nunku, Nzambi mmulekele bantu badilombola ku lungenyi luabu too ne matuku etu aa bua kuleja mu mushindu udi kauyi diela mpata bikala bulombodi bua bukua-bantu mua kupatula bipeta bimpe padibu badilamune kudiye. Nunku muntu uvua ne bukokeshi bua kusungula pankatshi pa bulenga ne tshikisu, pankatshi pa dinanga ne lukuna, pankatshi pa buakane ne dipanga buakane. Kadi mmupetangane kabidi ne bipeta bia disungula diende: buimpe ne ditalala peshi bubi ne makenga.
Ditomboka dia bifukibua bia mu nyuma
8, 9. (a) Mmunyi muakatuadija buntomboji mu tshisombelu tshia mu nyuma? (b) Pa kumbusha Adama ne Eva, mbanganyi bavua Satana musake ku ditomboka?
8 Kudi bualu bukuabu bua kukonkonona. Kabavua anu baledi betu ba kumpala nkayabu bakatombokela bukokeshi bua Nzambi nansha. Kadi nnganyi mukuabu uvuaku dine dîba adi? Bifukibua bia mu nyuma. Bangabanga ne Nzambi kufukaye bantu, wakafuka bifukibua bia muoyo mubandile, banjelu ba bungi, bua kusombabu mu tshisombedi tshia mu diulu. Buobu pabu bavua bafukibue ne budisunguidi pamue ne dijinga dia kukokela bukokeshi bua Nzambi.—Yobo 38:7; Musambu 104:4; Buakabuluibua 5:11.
9 Bible udi uleja ne: buntomboji buakabangila diambedi mu tshisombedi tshia mu nyuma. Tshifukibua kampanda tshia mu nyuma tshiakajinga budikadidi bua tshishiki. Tshiakajinga mene bua bantu batshitendelele. (Matayo 4:8, 9) Tshifukibua etshi tshitomboke ke tshiakafikisha Adama ne Eva bua kutomboka, pa kuamba ne dishima dionso ne: Nzambi uvua ubasokoka tshintu kampanda tshimpe. (Genese 3:1-5) Nunku badi batshibikila ne: Diabolo (Mushiminyinyanganyi) ne Satana (Muluishi). Pashishe, tshiakasaka bifukibua bikuabu bia mu nyuma ku ditomboka. Biakalua kumanyika bu ba-demon.—Dutelonome 32:17; Buakabuluibua 12:9; 16:14.
10. Ntshipeta kayi tshiakafumina ku ditomboka dia bantu ne bifukibua bia mu nyuma?
10 Pakatombokelabu Nzambi, bantu bakadifila nkayabu ku buenzeji bua Satana ne ba-demon bende. Ke bua tshinyi Bible udi ubikila Satana ne: “nzambi wa ndongoluelu eu wa malu,” udi “mufofomije lungenyi lua badi kabayi bitabuja.” Nunku, Dîyi dia Nzambi didi diamba ne: “bena panu bonso badi mu bianza bia Muena bubi.” Yezu nkayende wakabikila Satana ne: “mukokeshi wa buloba ebu.”—2 Kolinto 4:4, NW; 1 Yowanese 5:19, MMM; Yone 12:31.
Bilumbu bibidi
11. Satana wakatontolola Nzambi bua tshilumbu kayi tshikuabu?
11 Satana wakajula tshilumbu tshikuabu tshiakatontolola Nzambi. Bushuwa, wakabanda Nzambi ne: uvua mutupakane mu mushindu Wakafukaye bantu ne se: muntu nansha umue kavua mua kujinga bua kuenza bualu buimpe bikalaye mu difinakaja. Bushuwa, wakamba ne: bantu badi mene mua kudiwula Nzambi padibu mu diteta. (Yobo 2:1-5) Mu mushindu eu ke muvua Satana muele muoyo-mutoke wa bukua-bantu mpata.
12-14. Mmunyi muikala tshikondo mua kusokolola bulelela pa bidi bitangila bilumbu bibidi biakajula Satana?
12 Kadi, Nzambi mmulekele tshikondo tshile bua bifukibua bionso bia lungenyi kumonabi muandamunabu ku lukonko elu pamue ne ku lua bumfumu bukulu bua Nzambi. (Fuanyikija ne Ekesode 9:16.) Malu mamonamona a mu miyuki ya bantu avua ne bua kusokolola bulelela pa bidi bitangila nkonko eyi ibidi.
13 Tshiakumpala, ntshinyi tshiasokolola tshikondo pa bidi bitangila lukonko lua bumfumu bukulu pa bionso, buakane bua bukokeshi bua Nzambi? Bantu badiku mua kudilombola nkayabu bimpe kupita mudi Nzambi mua kuenza anyi? Ndongoluelu kampanda wa bukokeshi bua bantu budilamune kudi Nzambi, udiku mua kufikisha ku bulongolodi bua disanka budi kabuyi mvita, dibunda bibawu, ne dipanga buakane anyi? Muntu kampanda udiku mua kujikija bupele ne kupetesha bantu bonso nsombelu mulenga anyi? Kudiku muntu kampanda udi mua kutshimuna masama, bukulakaje, ne lufu anyi? Bukokeshi bua Nzambi buvua bulongolola bua kuenza bionso ebi.—Genese 1:26-31.
14 Pa bidi bitangila tshilumbu tshibidi, ntshinyi tshialeja tshikondo bua mushinga udi nawu muntu? Tshivua tshilema bua mudi Nzambi mufuke bantu mu mushindu udiye muenze anyi? Umue wa kudibu udiku mua kuenza malu mimpe padiye mu diteta anyi? Bantu kampanda badiku mua kuleja ne: bavua basue bukokeshi bua Nzambi pamutu pa bukokeshi budikadile bua bantu anyi?
[Tshimfuanyi mu dibeji 13]
Nzambi mmushile bantu tshikondo bua kufikabu pa ndekelu mu dienza diabu dia bintu
[Mêyi a dianyisha]
Ndeke wa fize: Bilondeshile foto NASA