Nshapita 3
Nzambi mulelela nnganyi?
PAUDI utangila mulu butuku padi kulu kutoke, kuena ukema bua kumona mitoto mitambe bungi nunku anyi? Mmunyi muudi umvuija dikalaku diayi? Ne netuambe tshinyi bua bintu bidi ne muoyo pa buloba—bilongo bia mekala, nyunyi idi yimba tusambu tudi tusankisha, mishipa ya balene ya bukole idi inyemakana mu mbuu? Bungi bua bintu kabuena kubala. Bionso ebi kabiena mua kuikala bilue ku mpukapuka nansha. Kabiena bikemesha padi bavule bitaba mêyi a ntuadijilu a mu Bible aa: “Kale ku tshibangidilu Nzambi wakafuka diulu ne buloba”!—Genese 1:1.
2 Bukua-bantu mbuabuluke bikole pa bualu bua Nzambi. Bamue badi bela meji se: Nzambi mbukole bua patupu. Miliyo ya bantu idi itendelela bankambua bafue, bela meji ne: Nzambi udi kule kutambe bua kusemena kudiye. Kadi Bible udi usokolola se: Nzambi mulelela mmuntu wa bushuwa udi utabalela yonso wa kutudi ne musangelu. Ke bua tshinyi Bible udi utukankamija bua ‘kukeba Nzambi,’ wamba ne: “Yeye kabidi kena kule ne yonso wa kutudi.”—Malu Menza 17:27, MMM.
3 Nzambi utu bishi? Bakese ba ku basadidi bende bakapeta bikena-kumona bia dikalaku diende dia butumbi. Mu bikena-kumona ebi uvua mudifuanyikije yeye nkayende bu musombe pa nkuasa wa bumfumu, dinkenke dikuate buôwa difumina kudiye. Nansha nanku, aba bavua bapete bikena-kumona bia mushindu’eu kabavua musangu nansha umue bumvuije mudi mpala wende. (Danyele 7:9, 10; Buakabuluibua 4:2, 3) Mbualu “Nzambi udi spiritu”; kêna ne mubidi wa musunyi. (Yone 4:24, NW) Bushuwa, kakuena mushindu wa kuenza tshimfuanyi tshijalame tshia Mufuki wetu, bualu “katshia muntu ki mmumone [Nzambi, NW].” (Yowanese 1:18, Mukenji Mulenga; Ekesode 33:20) Kadi, Bible udi utulongesha bivule pa bidi bitangila Nzambi.
NZAMBI MULELELA UDI NE DÎNA
4 Mu Bible, Nzambi mulelela udi ufunkunyibua ne biambilu bu mudi “Wa-Bukole-Buonso,” “Mutambe Kutumbuka,” “Mufuki Munene,” “Mushidimunyi Munene,” “Mfumu Mutambe bunene,” ne “Mukalenge wa tshiendelele.” (Genese 17:1; Musambu wa 50:14; Muambi 12:1; Yeshaya 30:20; Bienzedi 4:24; 1 Timote 1:17, NW) Dieleela meji pa mianzu ya mushindu’eu didi mua kutuambuluisha bua kudiundisha dimanya dia Nzambi.
5 Kadi, Nzambi udi ne dîna dimu’epele didi disanganyibua misangu mitue ku 7 000 mu Mifundu ya tshiena-Ebelu nkayamu—bungi bupite bua wonso wa ku mianzu yende. Kukadi bidimu bu 1 900, bena Yuda bakalekela kutela dîna dia Nzambi bua bitabataba. Tshiena-Ebelu tshia mu Bible katshivua tshifundibua ne maleta majikuke. Nenku, kakuena mushindu wa kujadika muvua Mozese, Davidi, anyi bakuabu bantu ba bikondo bia kale bashindumuna maleta matshintamane anayi aa (יהוה) adi enza dîna dia Nzambi. Bamue bashikuluji badi bamba ne: dîna dia Nzambi divua mua kuikala dishindumunyibua “Yahweh,” kadi kabena mua kujadika. Nshindumuinu wa mu Tshiluba “Yehowa” mmukuata nende mudimu kukadi bidimu bivule, ne nshindumuinu wa dîna edi mu miakulu mivule mmuanyishibue bikole lelu’eu.—Tangila Ekesode 6:3 ne Yeshaya 26:4 mu Mukanda wa Nzambi.
BUA TSHINYI UDI NE BUA KUTUMIKA NE DÎNA DIA NZAMBI
6 Dîna dia Nzambi dia pa buadi, Yehowa, didi diambuluisha bua kumutapulula ne nzambi mikuabu yonso. Ke bua tshinyi dîna edi didi disanganyibua misangu mivule menemene mu Bible, nangananga mu mifundu ya tshiena-Ebelu. Bakudimunyi bavule mbapange kutumika ne dîna dia Nzambi, kadi Musambu wa 83:18 (NW) udi wamba patoke ne: “Wewe, muena dîna dia Yehowa, wewe nkayebe udi Mutambe Kutumbuka pa buloba bujima.” Nunku mbiakane bua tuetu kutumika ne dîna dia Nzambi didi anu diende nkayende patudi tumutela.
7 Dîna dia Yehowa ndifume ku muaku wa pa muanda wa tshiena-Ebelu udi umvuija: “kuvua.” Nenku, dîna dia Nzambi didi diumvuija “Eu udi uvuija.” Yehowa Nzambi udi udifunkuna mu mushindu’eu bu Mudianjidi-kulongolola Munene. Udi misangu yonso wenza bua malongolola ende akumbajibue. Anu Nzambi mulelela ke udi mu bululame buonso mua kuangata dîna edi, bualu bantu kabena nansha musangu umue mua kuikala ne dishindika dia se: mapangadika abu adi mua kukumbana. (Yakobo 4:13, 14) Yehowa nkayende ke udi mua kuamba ne: “Ke muikala dîyi didi dipatuka mukana muanyi. . . . Bushuwa nedikumbaje muanda umvua muditumine.”—Yeshaya 55:11, NW.
8 Bankambua bena Ebelu Abrahama, Izaka, ne Yakobo yonso wa kudibo “wakabila dîna dia Yehowa,” kadi kabavua bamanye diumvuija dijima dia dîna dia Nzambi. (Genese 21:33; 26:25, NW; 32:9; Ekesode 6:3) Pakasokolola Yehowa kunyima dilongolola diende dia kupikula ndelanganyi yabu, bena Izalele, ku bupika mu Ejipitu ne kubapesha “buloba budi mabele ne buitshi bilengame,” bivua mua kumueneka bu bivua kabiyi mua kuenzeka. (Tshimuangi 3:17, MMM) Nansha nanku, Nzambi wakazangika diumvuija dia tshiendelele dia dîna diende pa kuambila muprofete wende Mozese ne: “Wewe newambile Bena Isalele ne, Yehowa, Nzambi wa bankambua benu, Nzambi wa Abalahama, Nzambi wa Isaka ne Nzambi wa Yakoba wakuntuma kunudi: edi ndina dianyi tshiendelele, etshi ntshivulukidi tshianyi kudi bantu bonso.”—Ekesode 3:15.
9 Mozese wakalomba Faraone, mukalenge wa Ejipitu, bua kulekela bena Izalele bua baye kutendelela Yehowa mu tshipela. Kadi Faraone, uvua yeye muine wangatshibua bu nzambi ne uvua utendelela nzambi mikuabu ya bena Ejipitu, wakandamuna ne: ‘Yehowa nnganyi? Tshiena ngitabuja dîyi diende bua kulekela Bena Izalele. Meme tshiena mumanye Yehowa ne tshiena ndekela Bena Izalele.’—Ekesode 5:1, 2.
10 Pa nanku Yehowa wakenza malu ku kakese ku kakese bua kukumbaja dilongolola diende, utumika mu diumvuangana ne diumvuija dia dîna diende. Wakatuma bipupu dikumi kudi bena Ejipitu ba kale. Tshipupu tshia ndekelu tshiakashipa ban’a bute buonso bena Ejipitu, kusangisha ne muana wa balume wa muditambishi Faraone. Kunyima, bena Ejipitu bakajinga bua Izalele aye. Kadi, bamue bena Ejipitu bakatamba kukemeshibua bua bukole bua Yehowa ne kufikabu ne ku didisanga ne bena Izalele bua kumbuka mu Ejipitu.—Ekesode 12:35-38.
11 Faraone muena mutu mukole ne biluilu biende, pamue ne nkama ya matempu abi a mvita, bakalonda lubilu bua kukuatulula bapika bende. Pakasemena bena Ejipitu, Nzambi wakabuluja mu tshishima Mbuu Mukunze bua bena Izalele bamone mua kusambuka pa buloba bûme. Pakabuela babalondi aba mu munkoloji wa mbuu, Yehowa “[wakatula, NW] nkata ya makalu, kabakamanya mua kuya bimpe.” Masalayi a bena Ejipitu akela mbila ne: “Tunyeme bietu ku mesu kua Bena Isalele, bualu bua Yehowa udi ubaluila nvita yabo, udi uluangana ne Bena Ejipitu.” Kadi dîba dikavua dipite. Bimanu bile bia mâyi biakadituta muinshi ne ‘akabanda pa makalu ne pa mutu pa masalayi akadi enda pa tubalu; pa mutu pa bisumbu bionso bia Faraone.’ (Ekesode 14:22-25, 28) Nunku Yehowa wakadipetesha dîna dinene yeye muine, ne bualu abu kabutu buvulamina too ne lelu’eu.—Yoshua 2:9-11.
12 Dîna divua Nzambi mudipetesha yeye muine didi ne diumvuija dinene buetu tuetu lelu’eu. Dîna diende, Yehowa, didi bu tshieya tshia se: bionso bidiye mulongolole neabivuije bilelela. Kusakidila dikumbaja dia dilongolola diende dia ku tshibangidilu dia se: buloba buetu ebu bulue mparadizu. (Genese 1:28; 2:8) Bua kukumbaja tshipatshila etshi Nzambi neabutule baluishi buonso ba bumfumu buende ku mutu kua bionso lelu’eu, bualu mmuambe ne: “Nebamanye ne, Meme ndi Yehowa.” (Yehezekele 38:23) Nunku Nzambi neakumbaje dilaya diende dia kupikula bamutendeledi bende bua kubabueja mu bulongolodi bupiabupia bua buakane.—2 Petelo 3:13.
13 Buonso badi basue dianyishibua kudi Nzambi badi ne bua kumanya mua kubila dîna diende ne ditabuja. Bible udi ulaya ne: “Yonso wabila dîna dia Yehowa neasungidibue.” (Lomo 10:13, NW) Eyowa, dîna dia Yehowa didi ne mushinga mukole. Kubila Yehowa bu Nzambi webe ne Mupikudi webe kudi mua kukufikisha ku diakalenga dikena ndekelu.
NGIKADILU MILENGA YA NZAMBI MULELELA
14 Dilonga dia dipikula dia bena Izalele mu Ejipitu didi dizangika ngikadilu milenga ya nshindamenu inayi ya Nzambi idiye nayi ne butshintshinkidi bupuangane. Bivuaye muenzele Faraone bidi bizangika bukole buende butshinyishi. (Ekesode 9:16) Mushindu wa mpatshi uvua Nzambi mutuishe nsombelu au mujingakane ku nkomenu udi uleja meji ende akena-kuelekeja. (Lomo 11:33) Uvua musokolole buakane buende pa kutuala dinyoka kudi baluishi bena mutu mukole ne bakengeshi ba tshisamba tshiende. (Dutelonome 32:4) Ngikadilu mutambe bunene wa Nzambi ndinanga. Yehowa wakaleja dinanga dia pa buadi pa kukumbaja dilaya diende divua ditangila ndelanganyi ya Abrahama. (Dutelonome 7:8) Wakaleja kabidi dinanga pa kuanyisha bua bamue bena Ejipitu kulekelabo nzambi ya dishima ne kupeta mabenesha manene pa kuditeka ku luseke lua Nzambi umu’epele mulelela.
15 Paudi ubala Bible, neumone se: dinanga nngikadilu wa kumpala wa Nzambi, ne utu udileja mu mishindu mivule. Tshilejilu, wakalua Mufuki ku dinanga ne kumpala wakabanyangana disanka dia kuikala ne muoyo ne bifukibua bia mu nyuma. Miliyo nkama ne nkama ya banjelu idi minange Nzambi ne imusamuna. (Yobo 38:4, 7; Danyele 7:10) Nzambi wakaleja kabidi dinanga pa kufuka buloba ne kubulongolola bua bantu bikale ne nsombelu wa disanka.—Genese 1:1, 26-28; Musambu wa 115:16.
16 Tudi tupetela bulenga ku dinanga dia Nzambi mu mishindu kayiyi kubala. Tshilejilu, Nzambi wakenza mibidi yetu ne dinanga mu mushindu wa mpatshi bua se: tumone mua kubabidila muoyo ne disanka. (Musambu wa 139:14) Dinanga diende ndimueneke pa kufila “mvula ya kulu, unutumina bikondo bia bufuke, unupetesha biakudia, uuja mioyo yenu ne disanka.” (Malu Menza 14:17, MMM) Nzambi mene “utu wabandishila bantu babi ne bantu bimpe diba, yeye kabidi utu watumina bantu bakane ne bantu babi nvula.” (Matayo 5:45) Kabidi dinanga didi disaka Mutufuki wetu ku dituambuluisha bua kupeta dimanya dia Nzambi ne kumusadila ne disanka bu bamutendeledi bende. Bushuwa, “Nzambi udi dinanga.” (1 Yone 4:8) Kadi bu-muntu buende budi ne ngikadilu mivule kupita apa.
“NZAMBI MULEKELEDI NE MUENA BULENGA”
17 Kunyima kua disambuka Mbuu Mukunze, bena Izalele batshivua bakengela kumanya Nzambi bimpe menemene. Mozese wakumvua dijinga edi ne wakasambila ne: “Pangikala mukutokele ku muoyo, anyisha undeje njila yebe bua nkumanye, nkutokele ku muoyo.” (Tshimuangi 33:13, MMM) Mozese wakafika ku dimanya Nzambi bimpe menemene pa kumvua miaku ya Nzambi nkayende eyi: “Yehowa, Yehowa, Nzambi mulekeledi [wa bilema] ne muena bulenga, ukena ukuata tshiji lubilu ne muule tente ne bulenga-bunangi ne bulelela, utu ulama bulenga-bunangi bua binunu bia bantu, ulekelela bilema ne dishipa dia mikenji ne mpekatu, kadi katu mua kupanga kunyoka nansha kakese.” (Ekesode 34:6, 7, NW) Nzambi udi utumika ne dinanga ne buakane mu mushindu mutshintshikila, kêna ukuba benji ba mpekatu ku budisuile ku bipeta bia bienzedi biabu bibi.
18 Bu muakabimanya Mozese, Yehowa utu uleja dilekelelangana bilema. Muntu mulekeledi udi umvuila badi bakenga luse ne ukeba mua kubatuadila disulakana. Nunku Nzambi wakaleja bukua-bantu luse pa kuenza ndongoluelu mufidi wa disulakana dia kashidi ku dikenga, masama, ne lufu. (Buakabuluibua 21:3-5) Batendeledi ba Nzambi badi mua kupetangana ne makenga anu bua nsombelu ya mu bulongolodi ebu bubi, anyi badi mua kupanga kuleja meji mu bienzedi biabu ne kututakena ne ntatu. Kadi biakebabu diambuluisha ne budipuekeshi kudi Yehowa, neabakankamije ne neabambuluishe. Bua tshinyi? Bualu, ne luse, utu uleja ditabalela diengeleki kudi bamutendeledi bende.—Musambu wa 86:15; 1 Petelo 5:6, 7.
19 Bantu bavule badi ne bukokeshi batu batatshisha bakuabu. Bishilangane, mmushindu kayipu udi Yehowa ne bulenga kudi basadidi bende badipuekeshi! Nansha mudiye mukokeshi mutambe kutumbuka mu bukua-bufuki, udi uleja bulenga bua pa buabu kudi bukua-bantu buonso mu ka-bujima. (Musambu wa 8:3, 4; Luka 6:35) Yehowa udi kabidi uleja bulenga kudi muntu pa nkayende, wandamuna ku mbila yabu misunguluke bua ditabaledibua. (Ekesode 22:26, 27; Luka 18:13, 14) Bushuwa, Nzambi ki mmuenzejibue bua kuleja ditabalela anyi dilekelela bilema kudi muntu yonso. (Ekesode 33:19) Ke bua tshinyi, tudi ne bua kuleja dianyisha dietu diondoke bua dilekelela ne bulenga bia Nzambi.—Musambu wa 145:1, 8.
KAYI UKUATA TSHIJI LUKASA, KAYI KANSUNGA, NE MUAKANE
20 Yehowa kêna ukuata tshiji lukasa. Kadi, ebi kabiena biumvuija ne: katu wenza bualu nansha bumue, bualu wakenza bualu kampanda pa kubutula Faraone muena mutu mukole ne biluilu biende mu Mbuu Mukunze. Yehowa kêna ne kansunga. Nansha tshisamba tshiende tshisungula tshine, bena Izalele, tshiakajimija dianyishibua diatshi kudiye kunyima bua ditungunuka diabu ne kuenza bibi. Nzambi udi witaba bantu ba mu matunga wonso bu bamutendeledi bende, kadi anu aba badi balonda njila yende miakane.— Bienzedi 10:34, 35.
21 Mukanda wa mu Bible wa Buakabuluibua udi uzangika mushinga wa kulonga “mapangadika makane” a Nzambi. Udi utuambila ne: bifukibua bia mu diulu bidi bimba ne: “Midimu yebe idi minene ne ya dikema, Yehowa Nzambi, Wa-Bukole-Buonso. Njila yebe idi miakane ne milelela, Mukalenge wa tshiendelele. Nenku, nnganyi wabenga kukutshina bushuwa, Yehowa, ne wapanga kutumbisha dîna diebe, bualu, wewe nkayebe udi mulamatshi wa mikenji? Bualu, matunga wonso nealue ne neatendelele kumpala kuebe, bualu mapangadika ebe makane akamueneshibua patoke.” (Buakabuluibua 15:2-4, NW) Tudi tuleja ditshina dimpe dia Yehowa, anyi dimunemekela, pa kutumikila tshidiye wamba ne: ntshiakane. Mbitekete bituikala tuetu bine tuvuluka meji ne dinanga bia Nzambi. Mêyi-matuma ende wonso adi bua diakalenga dietu.—Yeshaya 48:17, 18.
“YEHOWA NZAMBI WETU UDI UMUE”
22 Bena Ejipitu ba kale bavua batendelela nzambi mivule, kadi Yehowa udi “Nzambi udi ulomba lulamatu lukena luabanya.” (Ekesode 20:5, NW) Mozese wakavuluija bena Izalele ne: “Yehowa, Nzambi wetu, udi biende Yehowa umue.” (Dutelonome 6:4) Yezu Kristo wakambulula miaku eyi. (Mâko 12:28, 29) Ke bua tshinyi, aba badi bitaba Bible bu Dîyi dia Nzambi kabena batendelela Busatu Bunsantu budi buenza kudi bantu basatu anyi nzambi isatu mu umue. Bushuwa, muaku “Busatu Bunsantu” kawena nansha usanganyibua mu Bible. Nzambi mulelela udi Muntu umue, mushilangane ne Yezu Kristo. (Yone 14:28; 1 Kolinto 15:28) Spiritu munsantu wa Nzambi ki mmuntu to. Mbukole buenzeji bua Yehowa, budi Wa-Bukole-Buonso utumika nabu bua kukumbaja malongolola ende.—Genese 1:2; Bienzedi 2:1-4, 32, 33; 2 Petelo 1:20, 21.
23 Paudi wela meji mudi Yehowa mutambe bulenga, kuena witaba se: mmuakanyine dimutendelela dietu anyi? Bu muudi ulonga Dîyi diende, Bible, neufike ku dimumanya bimpe menemene ne neulonge tshidiye ukulomba bua diakalenga ne disanka biebe bia kashidi. (Matayo 5:3, 6) Kusakidila apu, dinanga diebe bua Nzambi nedidiunde. Mbiakanyine, bualu Yezu wamba ne: “Udi ne bua kunanga Yehowa Nzambi webe, ne mutshima webe wonso, ne anyima webe wonso, ne tshieledi tshiebe tshionso tshia lungenyi, ne bukole buebe buonso.” (Mâko 12:30, NW) Bushuwa, Yezu uvua ne dinanga dia mushindu’eu bua Nzambi. Kadi ntshinyi tshidi Bible utusokoluela pa bidi bitangila Yezu Kristo? Mmudimu kayi udiye nawu mu dilongolola dia Yehowa?
TETA DIMANYA DIEBE
Dîna dia Nzambi nnganyi, ne mmisangu bungi munyi ididi disanganyibua mu Mifundu ya tshiena-Ebelu?
Bua tshinyi udi ne bua kutumika ne Dîna dia Nzambi?
Nngikadilu milenga kayi ya Yehowa Nzambi idi ikulenga ku muoyo mu mushindu wa pa buawu?
[Nkonko ya dilonga]
1. Bua tshinyi bavule badi bitaba mêyi a ntuadijilu a mu Bible?
2. Ntshinyi tshidi Bible wamba pa bidi bitangila Nzambi, ne bidi bitukankamija bua kuenza tshinyi?
3. Bua tshinyi nansha bia munyi katuena mua kuenza tshimfuanyi tshia Nzambi?
4. Ng’imue mianzu kayi idi ne diumvuija idi mipesha Nzambi mu Bible?
5. Dîna dia Nzambi nnganyi, ne mmisangu bungi munyi ididi disanganyibua mu Mifundu ya tshiena-Ebelu?
6. Musambu wa 83:18 udi wamba tshinyi pa bidi bitangila Yehowa, ne bua tshinyi tudi ne bua kutumika ne dîna diende?
7. Ntshinyi tshidi diumvuija dia dîna dia Yehowa ditulongesha pa bidi bitangila Nzambi?
8. Ndilongolola kayi divua Yehowa mumanyishe ku butuangaji bua Mozese?
9. Mmunyi muvua Faraone wangata Yehowa?
10. Mu Ejipitu wa kale, Yehowa wakenza tshinyi bua kukumbaja dilongolola diende divua ditangila bena Izalele?
11. Ntshishima kayi tshiakenza Yehowa ku Mbuu Mukunze, ne ntshinyi tshivua baluishi bende benzejibue bua kuitaba?
12, 13. (a) Dîna dia Nzambi didi ne diumvuija kayi buetu tuetu lelu’eu? (b) Ntshinyi tshidi bantu ne bua kumanya ne lukasa luonso, ne mbua tshinyi?
14. Nngikadilu kayi milenga ya nshindamenu ya Nzambi idi Bible uzangika?
15, 16. Mmu mishindu kayi mudi Nzambi muleja dinanga?
17. Ntshinyi tshitudi tulonga pa bidi bitangila Nzambi mu Ekesode 34:6, 7?
18. Mmunyi mudi Yehowa mudileje mulekeledi?
19. Bua tshinyi tudi mua kuamba ne: Nzambi mmuena bulenga?
20. Ntshinyi tshidi tshileja ne: Yehowa kêna ukuata tshiji lubilu ne kêna ne kansunga?
21. (a) Ntshinyi tshidi Buakabuluibua 15:2-4 utulongesha pa bidi bitangila Nzambi? (b) Ntshinyi tshiatupepejila malu bua kuenza tshidi Nzambi wamba ne: ntshiakane?
22. Bua tshinyi aba badi bitaba Bible kabena batendelela Busatu Bunsantu?
23. (a) Mmunyi muadiunda dinanga diebe bua Nzambi? (b) Ntshinyi tshivua Yezu muambe pa bidi bitangila kunanga Nzambi, ne ntshinyi tshitudi ne bua kumanya pa bidi bitangila Kristo?
[Tshimfuanyi mu dibeji 29]
Udi mumanye Mufuki wa bintu bionso bimpe menemene anyi?